KO HOSEA 8
8
Ko Hano Fakahalaia‘i ‘o ‘Isileli ‘e Sihova ko ‘enau Lotu ‘Aitolí
1KO E talupite ki ho ngutu! Ko e lofa ē hangē ha ‘īkale ki he fale ‘o Sihova; koe‘uhiā na‘a nau laka kehe mo ‘eku kovinānite, pea nau maumau‘i ‘eku lao. 2Te nau tautapa kiate au, ‘E hoku ‘Otua, ‘oku mau ‘ilo koe, ‘e kimautolu ‘Isileli. 3‘Oku keu‘i ‘e ‘Isileli ‘a e lelei! tuku ke tuli ia ‘e he fili.
4Ko e fa‘ahinga na kuo nau fokotu‘u tu‘i, ka na‘e ‘ikai ko e me‘a meiate au: kuo nau fakanofo pilinisi, ka tala‘ehai na‘a ku ‘ilo ki ai: kuo nau ngāue‘aki ‘enau siliva mo e koula ke ngaohi ‘aki ‘enau ‘aitoli; ko hono ‘ātunga ē ‘e tu‘usi kinautolu. 5‘E Samēlia, ‘oku ne keu‘i ho kafi; kuo tafunaki ‘eku ‘ita kiate kinautolu: ko fotu ā mo e ‘ikai te nau lava ‘a e ta‘ehalaia? 6He ‘oku meia ‘Isileli mo ia foki: na‘e ngaohi ia ‘e ha tufunga, pea ‘oku ‘ikai ko e ‘Otua ‘a e me‘a na; tala atu ‘e hoko ‘a e kafi ‘o Samēlia ko e ‘ū matekitaki. 7He ‘oku nau tō matangi, pea te nau utu ‘a e afā.–‘Oku ‘ikai hano ta‘u ‘e motu‘u; ko ‘ene muka ‘oku ‘ikai iku fua; ka ne ai, ‘e folofua ‘e ha kau muli. 8–Kuo folofua ‘a ‘Isileli: na‘a mo e taimi ni kuo nau hoko ki he ngaahi pule‘anga ko e ipu ‘oku ‘ikai fai ki ai ha manako. 9–Seuke, kuo ‘alu hake ‘a e fa‘ahinga ko ia ki ‘Āsilia: ko e ‘asi kaivao ‘oku fakaeia pē.–Ko ‘Ifalemi kuo nō ‘ofa‘anga. 10Ka neongo ‘enau fai nō ‘i he ngaahi pule‘anga, ka te u tānaki mai leva kinautolu; pea te nau kamata ke mingi, koe‘uhi ko e fatongia ‘o e tu‘i ‘o e hou‘eiki.#8.10 ‘Oku fihi. ‘Oku tu‘u ‘i he tohi ni‘ihi: tu‘i mo e hou‘eiki.
11He kuo fakalahi ‘ōlita ‘e ‘Ifalemi ke fai angahala ai: kuo hoko ‘a e ngaahi ‘ōlita ko hono hia‘anga. 12–Kuo u tohi ma‘ana ‘a e mano‘i me‘a ‘o ‘eku lao: ‘oku ongo kiate kinautolu ‘o hangē ko e me‘a ‘a ha fonua kehe. 13–‘I he fai ‘o ‘eku ngaahi feilaulau tutu#8.13 ‘I he… tutu: ‘Oku ‘ikai ke mahino ‘a hono faka-Hepeluú. ‘oku nau tāmate‘i kakano pē ke kai: ‘oku ‘ikai ke hōhō‘ia ai ‘a Sihova: te ne manatua leva ‘enau kovi, mo ‘eke ‘enau hia; ‘e foki ki ‘Isipite ‘a e fa‘ahinga ko ena.
14He kuo ngalo ‘ia ‘Isileli ‘a e ‘Afio na‘a ne ngaohi ia, ‘o ne langa palasi,#8.14 pe temipale. pea ko Siuta kuo ne fakalahi kolo ai: ka te u tuku atu ha afi ki he‘ene ngaahi kolo, pea te ne keina hono ngaahi taua.
Currently Selected:
KO HOSEA 8: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
