Hepelū 3
3
Ko e Lahi ‘a Sīsū ‘ia Mōsese
1KO IA, ‘e hoto ngaahi tokoua tapu, si‘i kau ‘i ha ui mei langi, mou tokanga‘i ‘a e ‘Aposetolo mo Taula‘eiki Lahi ‘o ‘etau lotu, ‘io, ‘a Sīsū; 2‘ene lototō kiate ia na‘a ne ngaohi ia, ‘o hangē foki na‘e lototō ‘a Mōsese ‘i he ‘api kotoa ‘o ‘Ene ‘Afio.#Nōm 12.7 3He kuo lau ‘a e toko taha ko eni ‘oku ne taau mo ha fakahīkihiki lahi ‘ia Mōsese, ke hoa mo e lahi hake ‘o e mahu‘inga ‘o‘ona na‘a ne langa ‘a e ‘api, ‘i he mahu‘inga ‘o e ‘api. 4Seuke, ‘ilonga ha ‘api, kuo pau na‘e langa ‘e ha taha; pea ko ia na‘a ne langa ‘a e me‘a kotoa pē ko e ‘Otua. 5Pea ko Mōsese foki na‘a ne lototō ‘i he ‘api kotoa ‘o ‘Ene ‘Afio, ko e matāpule pē, mo‘o fakamo‘oni ki he ngaahi me‘a ka folofola‘aki ‘amui. 6Ka ko e lototō ‘a Kalaisi, ko e fai ‘a ha ‘Alo ‘oku pule ki he ‘api ‘o ‘Ene ‘Afio; ‘a ia ko hono ‘api ‘a kitautolu, ‘o kapau te tau kuku ma‘u ‘o a‘u ki he ngata‘anga ‘a ‘etau lotolahi, mo ‘etau viki ‘i he‘etau fakatu‘amelie kuo ma‘u.
Ko e Fiemālie Ma‘á e Kakai ‘a e ‘Otuá
7Ko ia–hangē ko e folofola ‘a e Laumālie Mā‘oni‘oni,#Saame 95.7-11 (LXX)
Ko e ‘aho ni pē–kapau te mou fanongo ki hono le‘o.
8‘Oua na‘a fakafefeka homou loto;
‘O hangē ko ia ne fai ‘i Fakahouhau,
‘O tatau mo e ‘aho ‘o ‘Ahi‘ahi ‘i he Toafa:
9‘A ia na‘e ‘ahi‘ahi au ‘e ho‘omou ngaahi kui,
He‘enau ala‘aki mai;
‘O nau mamata ki he‘eku ngaahi ngāue
‘O fāngofulu ta‘u.
10Ko ia, na‘a ku ‘ita ki he to‘utangata ko eni, ‘o u pehē,
‘Oku nau hē ma‘u ai pē ‘i honau loto;
Pea na‘e ‘ikai te nau a‘usia ‘a e ‘ilo‘i ‘o hoku ngaahi ‘alunga.
11‘A ē ne u fuakava ai ‘i he‘eku ‘ita ko au ē, ha‘anau hū ki hoku Mālōlō‘anga!
12Ko ia, mou vakai, ‘e kāinga, na‘a ‘iloange ‘e ai ‘i hamou toko taha ha loto kovi he ta‘etui, ‘a ia ‘oku hiki mei he ‘Otua ‘oku mo‘ui. 13Ka mou feenginaki‘aki pē, ‘o hokohoko ‘aho pē, lolotonga ‘oku kei lau atu ko e ‘aho ni; na‘a fakafefeka hamou taha ‘i he kākā ‘a angahala. 14He kuo tau hoko ko e kau ‘inasi ‘ia Kalaisi, ‘o kapau ā ‘oku tau kuku ma‘u ‘o a‘u ki he ngata‘anga ‘a e lotopau na‘a tau kamata ‘aki.
15[‘A ia ‘oku hā] ‘i hono pehē mai,#Saame 95.7-8 (LXX) Ko e ‘aho ni, ‘o kapau te mou fanongo ki hono le‘o, ‘oua na‘a fakafefeka homou loto, ‘o hangē ko e fai ‘i Fakahouhau.
16He ko hai ‘a kinautolu na‘e fanongo kae fakatupu houhau? ‘Ā, ‘ikai ko kinautolu ia kotoa pē na‘e ‘alu atu mei ‘Isipite ‘ia Mōsese?#Nōm 14.1-35 17Pea ko hai na‘a ne ‘ita ki ai ‘o fāngofulu ta‘u? ‘ikai ko kinautolu ia na‘e angahala, ‘a ia na‘e mokulu honau ngaahi kupu ‘i he Toafa? 18Pea ko hai ‘a kinautolu na‘a ne fuakava ki ai, ‘e ‘ikai te nau hū ki hono mālōlō‘anga? ‘Ikai ko kinautolu na‘e talangata‘a? 19Pea ‘oku tau vakai, na‘e ‘ikai te nau lava ke hū, koe‘uhi ko ‘enau ta‘etui.
Currently Selected:
Hepelū 3: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
