KO SĒNESI 46
46
Ko e Fononga ‘a Sēkope mo hono Fāmilí ki ‘Isipite
1PEA hiki ‘a ‘Isileli mo ia kotoa pē na‘a ne ma‘u, ‘o ne a‘u ki Peasipa: pea ne fai feilaulau ki he ‘Otua ‘o ‘ene tamai ko ‘Aisake. 2Pea folofola ‘a e ‘Otua kia ‘Isileli ‘i ha vīsone, po‘uli, ‘o pehē, ‘E Sēkope, ‘e Sēkope, pea tali ‘e ia, Ko au eni.
3Pea ne folofola mai, Ko ‘ELA au, ko e ‘Otua ‘o ho‘o tamai: ‘oua te ke manavahē ke ‘alu hifo ki ‘Isipite, he te u ngaohi koe ‘i ai ko e kakai lahi: 4te u ‘alu hifo mo koe ‘e au ki ‘Isipite, pea te u mātu‘aki ‘ohake koe: pea ko Siosifa te ne pooki ho mata.
5Pea tu‘u ‘a Sēkope ke ‘alu mei Peasipa: pea ko ha‘a ‘Isileli na‘a nau ‘ave ‘enau tamai ko Sēkope, mo ‘enau tamaiki, mo honau ngaahi uaifi, ‘i he ngaahi sāliote ne ‘omi ‘e Felo ke ‘ave ia. 6Pea nau ‘ave ‘enau fanga manu, mo e koloa kuo nau ma‘u ‘i he fonua ko Kēnani, pea nau a‘u ki ‘Isipite, ‘a Sēkope mo hono hako kotoa:#Ngā 7.15 7ko hono ngaahi foha mo e ngaahi foha ‘o hono ngaahi foha na‘e ha‘u mo ia, ko hono ngaahi ‘ōfefine mo e ngaahi ‘ōfefine ‘o hono ngaahi foha; ‘io, ko hono hako kotoa na‘a ne ha‘u mo ia ki ‘Isipite.
8Ko eni ‘a e ngaahi hingoa ‘o ha‘a ‘Isileli na‘e ha‘u ki ‘Isipite, ko Sēkope mo hono ngaahi foha: ko e ‘uluaki foha ‘o Sēkope ko Lūpeni. 9Pea ko e ngaahi foha ‘o Lūpeni: ko ‘Īnoke, mo Falu, mo Heseloni, mo Kālimi. 10Pea ko e ngaahi foha ‘o Simione; ko ‘Iemueli, mo Siamini, mo ‘Ōhati, mo Siakini, mo Soha‘a, pea mo Saula ‘a ia ko e tama ‘a ha fefine Kēnani. 11Pea ko e ngaahi foha ‘o Līvai; ko Kēsoni, Kōhati, mo Mēlali. 12Pea ko e ngaahi foha ‘o Siuta; ko ‘Ea, mo ‘Ōnani, mo Sela, mo Felesi mo Sala: ka na‘e pekia ‘a ‘Ea mo ‘Ōnani ‘i he fonua ko Kēnani, ka na‘e ai ha fānau ‘a Felesi, ko Heseloni mo Hāmuli. 13Pea ko e ngaahi foha ‘o ‘Īsaka; ko Tola, mo Puva, mo Siope, mo Similoni. 14Pea ko e ngaahi foha ‘o Sepulone; ko Sēleti, mo ‘Ēlone, mo ‘Iakaleli. 15Ko e hako ia ‘o Lia, ‘a ia na‘a ne fā‘ele‘i kia Sēkope ‘i Mesopotēmia, pea mo Taina ko hono ‘ōfefine; lau fakataha ‘ene fānau tangata mo fānau fefine ko e toko tolungofulu mā toko tolu.
16Pea ko e ngaahi foha ‘o Kata; ko Sifioni mo Haki, ko Suni mo ‘Esiponi, ko ‘Eli mo ‘Āloti pea mo ‘Āleli. 17Pea ko e ngaahi foha ‘o ‘Āseli; ko Sīmina, mo Sisua, mo Sisui, mo Pēli‘a, pea mo Sela ko honau tuofefine: pea ko e ongo foha ‘o Pēli‘a; ko Hepa mo Malakieli. 18Ko e hako eni ‘o Sīlipa, ‘a ia na‘e foaki ‘e Lēpani ki hono ‘ōfefine ko Lia, pea na‘a ne fā‘ele‘i ‘a kinautolu ni kia Sēkope, ko e toko hongofulu mā toko ono.
19Ko e hako ‘o Lesieli ko e uaifi ‘o Sēkope; ko Siosifa mo Penisimani. 20Pea na‘e fā‘ele‘i kia Siosifa ‘i ‘Isipite ‘a Manase mo ‘Ifalemi, ‘a ia na‘e fā‘ele‘i kiate ia ‘e ‘Asinate ko e ‘ōfefine ‘o Potifela ko e taula‘eiki ‘o ‘Oni.#Sēn 41.50-52 21Pea ko e ngaahi foha ‘o Penisimani; ko Pela mo Pēkeli mo ‘Asipeli, ko Kela mo Neamani, ko ‘Ehi mo Losi, ko Mūpimi mo Hūpimi mo ‘Āliti. 22Ko e hako eni ‘o Lesieli, ‘a ia na‘e fanau‘i kia Sēkope: lau fakataha ko e toko hongofulu mā toko fā.
23Pea ko e hako ‘o Tani; ko Hūsimi. 24Pea ko e hako ‘o Nafitalai ko ‘Iakasili, mo Kuni, mo ‘Ieseli, mo Sīlemi. 25Ko e hako eni ‘o Pila ‘a ia na‘e foaki ‘e Lēpani ki hono ‘ōfefine ko Lesieli, pea na‘a ne fā‘ele‘i ‘a kinautolu ni kia Sēkope: lau fakataha ko e toko fitu.
26Ko e lau fakataha ‘o e kakai na‘e ha‘u mo Sēkope ki ‘Isipite, ko e kakano ‘o hono manava, ko honau lau ko e toko onongofulu ma toko ono, ‘o ta‘ekau ai ‘a e ngaahi uaifi ‘o ‘ene fānau. 27Pea ko e hako ‘o Siosifa ‘a ia na‘e fanau‘i kiate ia ‘i ‘Isipite, ko e ongo me‘a ‘e toko ua: ko e lau fakataha ‘o e fāmili ‘o Sēkope na‘e ha‘u ki ‘Isipite ko e toko fitungofulu.#Ngā 7.14
Ko e Hiki ‘a Sēkope mo Hono Fāmilí ki ‘Isipite
28Pea na‘a ne fekau atu ‘a Siuta ke fakamelomelo kiate ia kia Siosifa, ke fakahinohino hono hala ki Kōseni; pea na‘a nau a‘u ki he fonua ko Kōseni. 29Pea na‘e teuteu ‘e Siosifa ‘ene sāliote, ‘o ne ‘alu ke fakafetaulaki ki he‘ene tamai ko ‘Isileli ki Kōseni, ‘o ne hā kiate ia, ‘o ne tāupe ‘i hono kia, mo tangi fuoloa. 30Pea lea ‘a ‘Isileli kia Siosifa, Ka u mate ‘eni, he kuo u sio ki ho mata, pea ‘oku ke kei mo‘ui.
31Pea lea ‘e Siosifa ki hono ngaahi tokoua, pea ki he fale ‘o ‘ene ‘eiki, Te u ‘alu hake ‘o fakapā kia Felo, pea te u tala kiate ia, Kuo ha‘u kiate au hoku ngaahi tokoua, pea mo e fale ‘o ‘eku ‘eiki, ‘a ia na‘a nau nofo ‘i Kēnani; 32pea ko e kau tauhi sipi ‘a e tu‘unga me‘a, he ko honau faiva ‘a e fanga manu; pea kuo nau ha‘u mo kinautolu ‘enau fanga manu iiki mo ‘enau fanga manu lalahi, mo ‘enau me‘a kotoa. 33Pea ko eni, ka ui kimoutolu ‘e Felo, ‘o ne pehē, Ko e hā ho‘omou ngāue? 34Pea te mou tali, ko e faiva ‘o ho‘o kau tamaio‘eiki, ‘a kimautolu mo ‘emau mātu‘a foki, ko e fanga manu, talu ‘emau tamaiki ‘o a‘u mai; koe‘uhi ā ke mou nofo ‘i he fonua ko Kōseni; he ko e fakalili‘a‘anga ‘o e kau ‘Isipite ‘a e tauhi sipi kotoa pē.
Currently Selected:
KO SĒNESI 46: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.