KO SĒNESI 4
4
Ko Keini mo ‘Ēpeli
1PEA fe‘iloaki ‘a ‘Ātama mo hono uaifi ko ‘Ivi pea ne feitama, ‘o ne fā‘ele‘i ‘a Keini [ko Ma‘u],#4.1 Keini; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e ma‘u maí. pea pehē ‘e he fefine, Kuo u ma‘u ha tangata ‘ia Sihova. 2Pea ne toe fā‘ele, ‘o ne ma‘u hono tehina ko ‘Ēpeli. Pea na‘e hoko ‘a ‘Ēpeli ko e tauhi sipi, ka ko Keini ko e tama ngoue. 3Pea ‘i he hili ha ngaahi ‘aho, pea ‘omi ‘e Keini ha fua ‘o ‘ene ngoue ko e feilaulau kia Sihova. 4Pea ko ‘Ēpeli foki na‘e ‘omi ‘e ia ‘a e veloaki ‘o ‘ene fanga sipi, ‘io, ‘a ia pē na‘e ngako. Pea na‘e hāngaifofonga ‘a Sihova kia ‘Ēpeli mo ‘ene feilaulau:#Hep 11.4 5ka ko Keini mo e feilaulau ‘a‘ana na‘e ‘ikai te ne fofonga ki ai. Pea ‘ita ‘aupito ‘a Keini, pea mapelu hono mata. 6Pea folofola ‘a Sihova kia Keini, Ko e hā ‘oku ke ‘ita ai? Pea ko e hā ‘oku mapelu ai ho mata? 7‘Ikai ‘e ai ha hanga hake,#4.7 ‘e ai… hake; pe ‘Ikai kuó ke malimali? pe na‘á ku mei tali ho‘o tukumo‘uí. ‘o kapau ‘oku ke feinga ke lelei? Pea ka ‘oku ‘ikai te ke feinga ke lelei ‘oku ‘i he matapā ‘a angahala, ‘o tokotoaki mai: pea ‘oku toka ‘ene holi kiate koe, ka ‘oku ‘a‘au ke pule ki ai.
8Pea lea ai ‘a Keini kia ‘Ēpeli ko hono tehina:#4.8 ‘Oku pehē he ngaahi hiki fuoloa ‘e ni‘ihi: Ta ō ki ‘uta; ‘Oku ‘ikai ke tu‘u ‘a e kupu‘i leá ni he faka-Hepeluú. pea lolotonga ‘ena ‘i ‘uta na‘e tu‘u ‘a Keini kia ‘Ēpeli ko hono tehina, ‘o ne tāmate‘i ia.#Māt 23.35; Luk 11.51; 1 Sione 3.12
9Pea folofola ‘a Sihova kia Keini, Kofa‘ā ‘a ‘Ēpeli ko ho tehina? Pea ne pehē, ‘Oku ‘ikai te te ‘ilo: he ko e tauhi kita ‘o hoto tokoua?
10Pea ne folofola mai, Ko e hā eni kuo ke fai? Sī, ko e le‘o ena! Ko e ngaahi tulutā toto ‘o ho tehina ‘oku tangi mai kiate au mei he kelekele.#Hep 12.24 11Pea ko eni ko e mala‘ia koe mei he kelekele na na‘e tangaki hono ngutu ‘o fakatali ‘a e toto ‘o ho tehina mei ho nima; 12he ‘oka ke ka ngoue‘i ‘a e kelekele, ‘e ‘ikai te ne toe ‘atu kiate koe ‘ene koloa; te ke nofo fakahee‘i mo fehiki‘aki ‘i māmani.
13Pea pehē ‘e Keini kia Sihova, ‘Oku mamafa fau hoku tautea, ‘o ‘ikai te u fa‘ahi. 14He vakai, kuo ke kapusi au he ‘aho ni ke ‘oua na‘a ku nofo ‘i he kelekele ni, pea te u puli mei ho fofonga; pea te u nofo fakahee‘i mo fehiki‘aki ‘i māmani; pea ‘e faifai pea ‘ilonga ha taha te ne ‘ilo au te ne tāmate‘i au.
15Pea folofola ‘a Sihova kiate ia, pea telia ‘a e me‘a ko ia, ‘ilonga ‘a ia te ne tāmate‘i ‘a Keini ‘e liunga fitu hono sauni. Pea na‘e tu‘utu‘uni ‘e Sihova ha faka‘ilonga mo‘o Keini ke ‘oua ‘e tāmate‘i ia ‘e he kakai te nau ma‘u ia. 16Pea na‘e ‘alu atu ‘a Keini mei he‘ene taka ofi kia Sihova, ‘o ne nofo ‘i he fonua ko Noti, ‘i he potu hahake ‘o ‘Īteni.
Ko e Hako ‘o Keiní
17Pea fe‘iloaki ‘a Keini mo hono uaifi; pea ne feitama ‘o ne fā‘ele‘i ‘a ‘Īnoke: pea ne kamata langa ha kolo, pea na‘a ne fakahingoa ‘a e kolo ki hono foha ko ‘Īnoke. 18Pea na‘e fanau‘i kia ‘Īnoke ‘a ‘Īlati: pea ma‘u foha ‘e ‘Īlati, ko Mehuiaeli: pea ma‘u ‘e Mehuiaeli ‘a Metuisaeli; pea ma‘u ‘e Metuisaeli ‘a Lēmeki. 19Pea mali ‘a Lēmeki mo ha ongo fafine ‘e toko ua; ko e hingoa ‘o e ‘uluaki ko ‘Ata, pea ko e hingoa ‘o hono ua ko Sila. 20Pea na‘e fā‘ele‘i ‘e ‘Ata ‘a Siapale: ko e tupu‘anga ia ‘o e ha‘a nofo tēniti, mo fanga manu. 21Pea ko e hingoa ‘o hono tehina ko Siupale: ko e tupu‘anga ia ‘o e fa‘ahinga ‘oku faiva ‘aki ‘a e ha‘ape mo e mimiha. 22Pea ko Sila foki na‘a ne fā‘ele‘i ‘a Tūpale-keini, ko e tama na‘a ne tuki ‘a e fa‘ahinga me‘a māsila kehekehe mei he kapa mo e ‘aione:#4.22 ko e tama na‘á ne tuki ‘a e fa‘ahinga me‘a māsila kehekehe mei he kapa mo e ‘aione: ‘Oku pehē he hiki fuoloa ‘e taha: ko e tupu‘anga ‘o e kau tuki ukamea kotoa pē. pea ko e tuofefine ‘o Tūpale-keini ko Nā‘ama.
23Pea pehē ‘e Lēmeki ki hono ongo uaifi,
Fanongo mai, ‘Ata mo Sila;
Ongo uaifi ‘o Lēmeki,
Tokanga ka u lea:
He‘eku tāmate‘i ‘a e tangata ne taa‘i au,
‘Io, ‘a e talavou ne fai hoku pohu.
24He liunga fitu ‘a e sauni ‘o Keini,#Māt 18.22
Kae liunga fitungofulu mā fitu ‘a Lēmeki.
Ko Seti mo ‘Īnosi
25Pea toe fe‘iloaki ‘a ‘Ātama mo hono uaifi; pea ne fā‘ele‘i ha tama, ‘o ne fakahingoa ia ko Seti [ko Tu‘utu‘uni];#4.25 Seti; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e kuo foaki mai. he‘ene pehē, Kuo tu‘utu‘uni ma‘aku ‘e he ‘Otua ha hako ‘e taha ke fetongi ‘a ‘Ēpeli, ‘a ia ne tāmate‘i ‘e Keini. 26Pea ko Seti foki na‘e fanau‘i kiate ia ha foha; ‘o ne fakahingoa ko ‘Īnosi. Ko e taimi ko ia na‘e kamata fai ai ‘a e lotu ki he huafa ‘o Sihova.
Currently Selected:
KO SĒNESI 4: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.