KO SĒNESI 23
23
Ko e Mate ‘a Sela mo e Fakatau ‘e ‘Epalahame ‘a e Fa‘itoka
1Pea ko e fuoloa ‘o Sela ko e ta‘u ‘e teau mo e ta‘u ‘e uofulu mā fitu: ko e ngaahi ta‘u ia ‘o e mo‘ui ‘a Sela. 2Pea pekia ‘a Sela ‘i Kiliati-‘A‘apa, ‘a ia ko Hepeloni ‘i he fonua ko Kēnani: pea na‘e ha‘u ‘a ‘Epalahame ke fetuki koe‘uhi ko Sela, pea ke tēngihia ia.
3Pea tu‘u hake ‘a ‘Epalahame mei he‘ene fekita ki hono pekia, ‘o ne fakalea ange ki ha‘a Heti, ‘o pehē, 4Ko si‘i muli mo ‘āunofo au ‘iate kimoutolu, tuku mai haku tofi‘a mōku fa‘itoka ‘iate kimoutolu kau tanu ai hoku pekia ke puli meiate au.#Hep 11.9,13; Ngā 7.16
5Pea tali kia ‘Epalahame ‘e ha‘a Heti, ‘o nau pehē ki ai, 6‘Ēī, ka ke me‘a mai; ‘oku ke nofo mai ka ko e ‘eiki lahi: ko homau ngaahi fa‘itoka ‘eiki ē, fai ai ho pekia: ‘oku ‘ikai hamau toko taha te ne tapui hono fai ho pekia ‘i hono fa‘itoka.
7Pea tu‘u ‘a ‘Epalahame ‘o fai ‘ene faka‘apa‘apa ki he kakai ‘o ‘e fonua, ‘a e ha‘a Heti. 8Pea ne fakalea ange ‘o pehē, Ka ‘oku pehē leva homou loto ke u tanu hoku pekia ke puli meiate au; pea mou ‘ofa ‘o fai ‘eku kole kia ‘Efiloni ko e foha ‘o Soha‘a, 9koe‘uhi ke ne tuku mai ‘a e ‘ana ko Makipila ‘a ia ‘oku ‘o‘ona, ‘a ia ‘oku ‘i he ngata‘anga ‘o hono ‘api; ka u ‘atu ha pa‘anga ko hono fe‘unga, ka ne tuku mai ia kiate au ‘i homou lotolotonga ko hoku tofi‘a mōku fa‘itoka.
10Ka ‘oku ta‘utu ‘a ‘Efiloni ‘i he ha‘oha‘onga ‘o ha‘a Heti: pea tali kia ‘Epalahame ‘a ‘Efiloni ko e matāpule Heti ‘i he ‘ao ‘o ha‘a Heti mo kinautolu na‘e fe‘alu‘aki ‘i he matapā ‘o hono kolo, ‘o pehē, 11‘Ēī, ‘oua ‘e pehē; me‘a mai kiate au: ko e me‘a ki he ‘api kuo u ‘atu ni ia, pea ko e ‘ana ‘oku ‘i ai ‘oku ou ‘atu mo ia; ‘i he ‘ao ‘o e hako ‘o hoku tupu‘anga kuo u ‘atu ni mo‘ou: fai ai ho pekia.
12Pea fai ‘e ‘Epalahame ‘ene faka‘apa‘apa ‘i he ‘ao ‘o e kakai ‘o e fonua. 13Pea ne lea kia ‘Efiloni ‘i he ‘ao ‘o e kakai ‘o e fonua, ‘o pehē, Ka ko eni, kapau ko ho loto ia, me‘a mai, te u ‘atu ha pa‘anga ki he ‘api; ke ke tali ia meiate au, ka u tanu hoku pekia ‘i he potu ko ia.
14Pea tali ‘e ‘Efiloni kia ‘Epalahame, ‘o ne pehē kiate ia. 15‘Ēī, me‘a mai: ko ha konga kelekele ‘oku fāngeau sikeli pē hono pa‘anga, ko e hā ia ‘iate kitaua? kehe pē ke ke fai ho pekia. 16Pea fai ‘a ‘Epalahame ki he me‘a ‘a ‘Efiloni, ‘o ne fua tautau kia ‘Efiloni ‘a e pa‘anga kuo ne tala ‘i he ha‘oha‘onga ‘o ha‘a Heti, ko e sikeli siliva ‘e fāngeau, ko e pa‘anga hū ‘i he kau fakatau.
17Pea ko e ‘api ‘o ‘Efiloni, ‘a ia ‘oku ‘i Makipila, ‘a ia ‘oku tu‘u ki he hahake ‘o Mamilī, ‘io, ‘a e ‘api mo e ‘ana ‘oku ‘i ai, mo e ngaahi ‘akau kotoa pē ‘oku ‘i he ‘api, ‘io, mo e ngaahi ‘akau ‘o e kau‘ā takatakai, 18na‘e fakapapau ia mo‘o ‘Epalahame ko ‘ene me‘a ‘i he ‘ao ‘o ha‘a Heti, mo kinautolu na‘e fe‘alu‘aki ‘i he matapā ‘o hono kolo.
19Pea hili ia na‘e tanu ‘e ‘Epalahame ‘a hono uaifi ko Sela ‘i he ‘ana ‘i he ‘api ko Makipila, ki he hahake ‘o Mamilī (‘a ia ko Hepeloni) ‘i he fonua ko Kēnani. 20Pea ko e ‘api mo e ‘ana ‘oku ‘i ai na‘e fakapapau mo‘o ‘Epalahame meia ha‘a Heti, ko e tofi‘a mōno fa‘itoka.
Currently Selected:
KO SĒNESI 23: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.