KO SĒNESI 16
16
Ko Heka‘ā mo ‘Isime‘eli
1PEA ko Sēlai ko e uaifi ‘o ‘Epalame na‘e ‘ikai ha‘ane tama kiate ia: ka na‘e ai ‘ene kaunanga ko e fefine ‘Isipite, pea ko hono hingoa ko Heka‘ā. 2Pea lea ‘a Sēlai kia ‘Epalame, ‘Eni, vakai kuo ta‘ofi au ‘e Sihova mei he fanau; ke ke ‘alu ki he‘eku kaunanga, hei‘ilo te u fanau ‘iate ia. Pea tuitala ‘a ‘Epalame ki he lea ‘a Sēlai. 3Pea ‘ave ‘e Sēlai, ko e uaifi ‘o ‘Epalame, ‘a Heka‘ā ko e fefine ‘Isipite ko ‘ene kaunanga, ‘o ne tuku ia kia ‘Epalame ko hono husepāniti ko ‘ene fokonofo: ko hono ‘osi ia ‘o e hongofulu ta‘u ‘o e nofo ‘a ‘Epalame ‘i he fonua ko Kēnani. 4Pea ne ‘alu kia Heka‘ā, pea feitama ia: pea ‘i he vakai ‘a e fefine kuo ne feitama, na‘a ne ta‘etoka‘i ‘ene fine‘eiki.
5Pea lea ‘a Sēlai kia ‘Epalame, Ke ‘eke mai kiate koe hoku tautekovia,#16.5 Ke ‘eke… tautekoviá; pe Ko e fehi‘a ‘a Heka‘ā ‘iate aú ko ho‘o ngāue. Na‘a ku ‘atu ‘iate au ‘eku kaunanga ki ho fatafata, pea ‘i he‘ene vakai kuo ne feitama, pea ne ta‘etoka‘i au: ‘e fakamaau ‘e Sihova ‘eta me‘a.
6Pea pehē ‘e ‘Epalame kia Sēlai, Ko ena ho‘o kaunanga ke ke fa‘iteliha ki ai: fai pē ho loto kiate ia. Pea ‘i he hanga ‘e Sēlai ‘o fai hono fakavaivai‘i, na‘a ne hola meiate ia.
7Pea ‘ilo ‘a e fefine ‘e he ‘Āngelo ‘a Sihova ‘i ha matavai ‘i he toafa, ‘a e vai ko ia ‘oku ‘i he hala ki Sua. 8Pea ne me‘a mai ki ai, ‘E Heka‘ā, ko e kaunanga ‘a Sēlai, ko ho‘o ha‘u mei fē? pea ko ho‘o faka‘a‘au ki fē? Pea ne pehē, Ko ‘eku hola meia Sēlai, ko ‘eku fine‘eiki.
9Pea me‘a kiate ia ‘e he ‘Āngelo ‘a Sihova, Foki pē ki ho‘o fine‘eiki, pea fakavaivai‘i koe kiate ia. 10Pea toe me‘a kiate ia ‘e he ‘Āngelo ‘a Sihova, Te u mātu‘aki fakatokolahi ho hako; ‘io, ‘e ‘ikai malau ko ‘ene tokolahi. 11Pea me‘a ange foki ‘e he ‘Āngelo ‘a Sihova kiate ia, Ko eni kuo ke feitama, pea te ke fanau‘i ha tama tangata; pea te ke fakahingoa ia ko ‘Isime‘eli [ko Ongo‘i-‘e-he-‘Otua], koe‘uhi ne ongo‘i ‘e Sihova ‘a ho‘o mamahi. 12Pea ‘e hoko ia ko e tangata faka-e-‘asi-kaivao; ‘e ala hono nima ki he kakai kotoa pē, pea ala ‘a e nima ‘o e kakai kotoa pē kiate ia; pea te ne ma‘u hono nofo‘anga ‘i he potu hahake ‘o hono kāinga kotoa pē.#16.12 ‘i he potu… kotoa pē; pe ‘i he ‘ao ‘o hono kāingá.
13Pea ‘ai ‘e he fefine ha huafa ‘o Sihova ‘a ia kuo ne folofola kiate ia, ‘o pehē, KO ‘ELA-LO‘I koe [ko e ‘Otua Hā Mai], he‘ene pehē, He ‘oku ou kei ‘i heni ‘o sio hili ‘eku sio!#16.13 He ‘oku ou… ‘eku sio! ‘Oku ngali tonu hono hiki ko ení, ka ‘oku ‘ikai ke mahino ‘a hono faka-Hepeluú. 14Ko hono ‘uhinga ia na‘e hingoa ai ‘a e vaikeli ko Pea-lehai-Lo‘ai [ko Vai-sio-kae-mo‘ui-pē]. Ko ena ia ‘i he vaha‘a ‘o Kētesi mo Pēleti.
15Pea na‘e fanau‘i ‘e Heka‘ā kia ‘Epalame ha tama tangata; pea fakahingoa ‘e ‘Epalame ‘a hono foha ne fā‘ele‘i ‘e Heka‘ā ko ‘Isime‘eli. 16Pea na‘e fe‘unga ‘a ‘Epalame mo hono valungofulu mā ono ta‘u ‘i he fanau‘i ‘o ‘Isime‘eli ‘e Heka‘ā kiate ia.
Currently Selected:
KO SĒNESI 16: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.