KO ‘ISIKELI 5
5
Ko e Kosi ‘e ‘Isikeli ‘a Hono ‘Ulú
1SĪNI foki, Hako‘i-tangata, to‘o ha‘o heletā māsila, te ke to‘o ia ma‘ao tele, pea te ke ‘ai ki ho ‘ulu mo ho kava: pea te ke toki to‘o ha‘o fuatautau, ‘o ke fua vahevahe ‘a e fulufulu‘i ‘ulu. 2Ko hono vahetolu te ke tutu ‘aki ‘a e afi ‘i he loto kolo, ‘oka kakato ‘a e taimi ‘o e ‘ākolo‘i; pea ko e vahetolu te ke to‘o, ‘o tā ‘aki ‘a e heletā ‘o takatakai ki he kolo; pea ko e vahetolu te ke veteki ki he matangi, pea te u tafi ki tu‘a niu kinautolu ‘aki ‘a e heletā. 3Ka te ke lau mei ai ha me‘a si‘i, pea te ke fakapona kinautolu ‘i ho tapa‘i kofu. 4Pea te ke toe to‘o ha me‘a meiate kinautolu, pea te ke lī ia ki he loto afi, ‘o tutu ‘aki ‘a e afi; ‘e ‘alu atu mei ai ‘a e afi ki he fale ‘o ‘Isileli kātoa.
5Ko e folofola ‘eni ‘a ‘Ātonai Sihova, Ko e Selusalema ko eni kuo u ‘ai ‘i he lotolotonga ‘o e ngaahi pule‘anga, pea ko e ngaahi fonua ‘oku takatakai kiate ia. 6Pea ‘i he‘ene faikovi kuo ne angatu‘u ki he‘eku ngaahi lao, ‘o hulu ‘i he ngaahi pule‘anga, pea ki he‘eku ngaahi tu‘utu‘uni ‘o hulu ‘i he ngaahi fonua ‘oku takatakai kiate ia: seuke, na‘a nau fakatale‘i ‘eku ngaahi lao, pea ko ‘eku ngaahi tu‘utu‘uni na‘e ‘ikai te nau fou ai. 7Ko ia ko e folofola ‘eni ‘a ‘Ātonai Sihova: Ko e me‘a ‘i ho‘omou futefute, ‘o hulu ‘i he ngaahi pule‘anga ‘oku takatakai kiate kimoutolu, ‘o ‘ikai te mou fou ‘i he‘eku ngaahi tu‘utu‘uni, ‘o ‘ikai te mou fai ki he‘eku ngaahi lao, pea na‘a mo e ngaahi lao ‘o e ngaahi pule‘anga ‘oku takatakai kiate kimoutolu, kuo ‘ikai te mou fai; 8ko ia ko e folofola eni ‘a ‘Ātonai Sihova: Vakai, ko au te u hoko ko ho fili; ‘io, ‘a au foki: pea te u fai ‘i ho lotolotonga ‘a e ngaahi tautea ke e‘a ki he ngaahi pule‘anga. 9Pea te u fai kiate koe koe‘uhi ko ho‘o ngaahi fakalielia ha me‘a kuo te‘eki te u fai, ‘io, ko e me‘a ‘e ‘ikai te u toe fai hono tatau. 10Ko ia, ‘e maumau‘i ‘e he ngaahi tamai ‘enau fānau ‘i ho lotolotonga, pea ‘e maumau‘i ‘e he fānau ‘enau ngaahi tamai; pea te u fai kiate koe ha ngaahi tautea, pea te u veteki ho kakai kotoa ‘oku toe ki he matangi fuli pē.#Tangi 4.10
11‘Āua! tangi ‘eku mo‘ui–ko ‘Ātonai Sihova ia mei he Ta‘ehāmai–ko e me‘a ‘i ho‘o ‘uli‘i hoku potu tapu ‘aki ho‘o ngaahi fu‘u fakalielia, pea ‘aki ho‘o ngaahi me‘a mousa‘a, tala atu, na‘a mo au te u ta‘ofi hoku mata ke ‘oua na‘a na faka‘atu‘i, na‘a mo au ‘e ‘ikai te u mamae‘i. 12Ko ho vahetolu ‘e mate ‘i he mahaki faka‘auha, pe faka‘osi ‘aki ‘a e honge ‘i loto kolo; pea ko e vahetolu ‘e tō ‘i he heletā ‘i he ngaahi feitu‘u takatakai ko ē; pea ko e vahetolu te u veteki ki he matangi fua pē, pea te u tafi ki tu‘a niu ‘aki ‘a e heletā.
13Ko ia, ‘e ‘osiki ‘eku houhau, pea te u fakamatematē ‘a e kakaha ‘o ‘eku ‘ita kiate kinautolu, ka u hōhō‘ia ai: pea te nau ‘ilo ko au Sihova na‘a ku lea ‘i he‘eku fua‘a, ‘oka u ka faka‘osi ‘eku kakaha kiate kinautolu. 14Pea te u ngaohi koe ko e lala mo e manukia‘anga ‘i he ngaahi pule‘anga ‘oku takatakai koe; ‘e hā pehē ki he kakai kotoa ‘oku laka ofi.
15‘Io, ‘e hoko ia ko e me‘a ke fai ai ha manuki, mo ha talakaa‘i; ko e me‘a ke tu‘u ai ha valoki mo ha ofo ‘i he ngaahi pule‘anga ‘oku takatakai koe, ‘oka u ka fai kiate koe ha ngaahi tautea ‘oku ō mo e ‘ita mo e kakaha mo e fu‘ufu‘unga tā: ko au Sihova kuo u lea: 16‘oka u ka tuku atu kiate kinautolu#5.16 kinautolu; Ko hono faka-Hepeluú ia, ka ‘oku ngali tonu hono hiki ‘o: kimoutolu. ‘a e ngaahi ngahau kovi ‘o e honge, ‘a ia ‘oku fai ke faka‘auha, ‘a ia te u tuku atu ke faka‘auha kimoutolu; pea te u ‘ai ke mamafa ‘a e honge kiate kimoutolu pea te u maumau‘i homou falala‘anga me‘akai; 17‘io, te u fekau kiate kimoutolu ‘a e honge mo e manu kovi, pea te nau ngaohi koe ke ta‘eha fānau; ‘io, ‘e laka atu ‘iate koe ‘a e mahaki faka‘auha, mo e tāmate, pea te u ‘omi kiate koe ‘a e heletā. Ko au Sihova kuo u lea.#Fkhā 6.8
Currently Selected:
KO ‘ISIKELI 5: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
