KO ‘ISIKELI 45
45
Ko e ‘Inasi ‘o Sihova ‘i he Fonuá
1PEA ka mou ka vahe talotalo ‘a e fonua ke tofi‘a, te mou hapai ha ‘inasi mo‘o Sihova, ko ha kelekele tapu: ‘i he fai fakalōloa ko e kaho ‘e ua mano mā nima afe; ko hono lōloa ia, pea ko hono māukupu ko e ua mano.#45.1 ua mano: ‘Oku tu‘u ‘i he tohi ‘e ni‘ihi: taha mano. 2Ko e potu ia ‘e tapu hono feitu‘u kotoa takatakai. ‘E lau mei ai ki he potu tapu ha kaho ‘e nimangeau; ko e nimangeau tapafā ia ‘i he potu kotoa pē; pea ai mo ha kiupite ‘e nimangofulu takatakai ki ai, ko e potu mavahe. 3Pea mei he potu ko ia na‘e fua, te ke vahe‘i ha me‘a, ko hono lōloa ko e kaho ‘e ua mano mā nima afe, pea ko hono māukupu ko e taha mano: pea ‘e tu‘u ‘i he potu ko ia ‘a e potu tapu: ko e me‘a toputapu ia. 4Ko e konga fonua ia ‘e tapu; ‘e ‘o e kau taula‘eiki ia, ‘a kinautolu ‘oku fai ‘a e ngāue ‘o e potu tapu, ‘a e fa‘ahinga ‘oku taka ofi kia Sihova ke tauhi ia; ‘io, te nau ma‘u ia ko e potu ke tu‘u ai honau ngaahi fale, pea ko e potu mavahe ke tu‘u ai ‘a e potu tapu. 5Pea ko hano potu, fe‘unga mo e kaho ‘e ua mano mā nima afe hono lōloa, mo e taha mano hono māukupu, ‘e ma‘u ‘e he kau Līvai, ko e kau tauhi ‘o e fale; ko honau ‘api tō mo‘o kolo nofo‘anga.#45.5: ‘api… nofo‘anga: Ko e hiki ‘eni he Sepituakiní. ‘Oku pehē ‘i he faka-Hepeluú: ngaahi loki ‘e uofulu.
6Pea te mou tuku ha potu, fe‘unga mo e kaho ‘e nima afe hono māukupu mo e ua mano mā nima afe hono lōloa, ko e kelekele ‘o e kolo; ‘e palāleli ia mo e me‘a na‘e hapai ke tapu: ‘e kau ia ki he fale kotoa ‘o ‘Isileli.
Ko e Kelekele Mo‘oe ‘Eiki ‘o e Kakaí
7Pea te mou ‘atu ki he ‘eiki ‘o e kakai, ‘i he potu ko ē mo ē ‘o e me‘a na‘e hapai ke tapu, pea mo e kelekele ‘o e kolo, ‘io, ‘e lave ki he potu na‘e hapai ke tapu, pea ‘e lave ki he kelekele ‘o e kolo, ‘o kamata mei he tafa‘aki ki lulunga ‘o fai ki lulunga, pea mei he tafa‘aki ki hahake ‘o fai ki hahake: pea ko hono tapa mei hihifo ki hahake ‘e hu‘ufataha mo ha taha ‘o e ngaahi vahefonua. 8‘E ‘atu ia ki he ‘eiki na mōno kelekele, ko hono ‘api tō ‘i ‘Isileli: koe‘uhi ke ‘oua na‘a toe fakaehaua hoku kakai ‘e hoku hou‘eiki; ka te nau tuku ‘a e kelekele ki he fale ‘o ‘Isileli ke ma‘u ‘e honau ngaahi matakali.
Ko e ngaahi Lao Mo‘oe ‘Eiki ‘o e Kakaí
9Ko e folofola ‘eni ‘a ‘Ātonai Sihova: ‘a e hou‘eiki ‘Isileli, ma‘u ā mu‘a, ‘o tuku ho‘omou fai fakamālohi, mo fakaehaua, pea mou fai ki he konisitūtone mo e totonu; faka‘atā hoku kakai mei ho‘omou fa‘a kapusi kinautolu mei honau tofi‘a–ko ‘Ātonai Sihova ia mei he Ta‘ehāmai.
10‘E totonu ho‘omou fuatautau, ‘e totonu ho‘omou ‘efa, pea totonu ho‘omou pate.#Lev 19.36
11Ko e ‘efa mo e pate ‘e ngaohi ke tatau, ‘e ngaohi ‘a e pate ke hao ai ‘a e vahehongofulu ‘o e homa, pea ko e ‘efa ko e vahehongofulu ‘o e homa:#45.11 homa; Ko e homá ko e fua me‘a mōmoa mo e me‘a huhu‘a, ‘oku fe‘unga mo e lita ‘e 175 nai; ‘a ia ko e ‘efá, pe ko e paté, ‘oku fe‘unga nai mo e lita ‘e 17.5. ko e fua ‘oku na tefito ki ai ko e homa.
12Pea ko e sikeli ‘e fe‘unga mo e kela ‘e uofulu: ko e uofulu‘i sikeli,#45.12 sikeli: I he kuonga ‘o ‘Isikelí na‘e fe‘unga ‘a e fua mamafa ko ení mo e kalamu ‘e 11.4. ko e uofulu mā nima‘i sikeli, ko e hongofulu mā nima‘i sikeli, ko ho‘omou mina ia.
13Ko eni ‘a e feilaulau hapai te mou hapai; ko ha‘amou homa uite te mou vahe‘i mei ai ‘a e vahe ono ‘o e ‘efa, pea ko ha‘amou homa pa‘ale te mou vahe‘i mei ai ‘a e vahe ono ‘o e ‘efa. 14Pea ko e tu‘utu‘uni ki he lolo, ko ha‘amou pate lolo ‘e vahe mei ai fe‘unga mo e vahehongofulu ‘o e pate mei he koa (ko e pate ‘e hongofulu ia, tatau mo e homa; he ko e pate ‘e hongofulu ko e homa ia). 15Pea ko e manu ‘e taha mei he tākanga sipi pe kosi ‘oku toko uangeau, ha ni‘ihi kuo kakai ‘i ha potu ‘o ‘Isileli ‘oku mohu vai; ‘e ‘omi ia ki he feilaulau-me‘akai, mo e feilaulau-mōifua, mo e feilaulau-‘ofa, ke fai‘aki ha fakahōifua ma‘anautolu–ko ‘Ātonai Sihova ia mei he Ta‘ehāmai.
16Ko e ngāue ‘a e kakai kotoa ‘o e fonua ‘a e feilaulau hapai ni, ke ‘omi#45.16 ke ‘omi: ‘Oku ‘ikai ke mahino ‘a hono faka-Hepeluú, ka ‘oku ngali tonu pē ‘a hono hiki ko iá. ki he ‘eiki ‘o e kakai ‘Isileli. 17Pea ko e me‘a ‘a e ‘eiki ko ia ke ‘atu ‘a e ngaahi feilaulau-mōifua, mo e ngaahi feilaulau-me‘akai, mo e ngaahi feilaulau-kava, ‘i he ngaahi kātoanga, mo e ngaahi fakamāhina fo‘ou, mo e ngaahi Sāpate; ‘io, ‘i he ngaahi ‘aho tu‘utu‘uni kotoa ‘o e fale ‘o ‘Isileli; ko ia ia te ne teu ‘a e feilaulau-angahala, mo e feilaulau-me‘akai, mo e feilaulau-mōifua, mo e feilaulau-‘ofa, ke fai ha fakahōifua ma‘a e fale ‘o ‘Isileli.
Ko e ngaahi Kātoanga
(‘Eki 12.1-20; Lev 23.33-43)
18Ko e folofola ‘eni ‘a ‘Ātonai Sihova: ‘I he ‘uluaki ‘aho ‘o e ‘uluaki māhina te ke to‘o ha pulu mui ta‘ehano mele, ‘o fai ‘a e tatafi hia ‘o e potu tapu. 19Pea ‘e to‘o ‘e he taula‘eiki ha me‘a mei he toto ‘o e feilaulau-angahala, pea te ne ‘ai ki he ngaahi pou matapā ‘o e fale, pea ki he faa‘i tuliki ‘o e puha ‘o e ‘ōlita, pea ki he ngaahi pou ‘o e matanikolo ‘o e Loto‘ā Loto. 20Pea te ke fai pehē foki ‘i hono ‘aho fitu ‘o e māhina, telia ha ni‘ihi kuo afe, mo e hehemangofua: pea ke fai ai ha fakahōifua ma‘a e fale.
21‘I he ‘uluaki māhina, ‘i hono ‘aho hongofulu mā fā, ‘e hoko ‘a e Pāsova ma‘amoutolu, ko e kātoanga ‘oku ‘aho fitu; ko e mā ta‘elēvani ‘e kai.#‘Eki 12.1-20; Nōm 28.16-25 22Pea ‘e teu ‘i he ‘aho ko ia ‘e he ‘eiki pule, ma‘ana mo e kakai kotoa ‘o e fonua, ha pulu mo‘o feilaulau-angahala. 23Pea ‘i he fitu‘i ‘aho ‘o e kātoanga te ne teu feilaulau-mōifua kia Sihova, ko e pulu ‘e fitu mo e sipi tangata ‘e fitu, ko e manu ta‘emele kotoa pē, ki he fitu‘i ‘aho takitaha; pea mo ha kosi tangata ‘i he ‘aho kotoa pē mo‘o feilaulau-angahala. 24‘Ai mo e feilaulau-me‘akai, te ne teu ha ‘efa ‘e taha ki ha pulu, mo e efa ‘e taha ki ha sipi tangata, mo e hini lolo ki he efa.
25Pea ‘i hono māhina fitu, ‘i hono hongofulu mā nima ‘o e ‘aho, ‘i he fai ‘o e kātoanga te ne fai pehē pē ‘o ‘aho fitu; tatau ‘a e feilaulau-angahala, tatau ‘a e feilaulau-mōifua, pea tatau ‘a e feilaulau-me‘akai, pea tatau ‘a e lolo.#Lev 23.33-36; Nōm 29.12-38
Currently Selected:
KO ‘ISIKELI 45: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
