KO ‘ĒSETA 5
5
Ko Hono Fakaafe‘i ‘e ‘Ēseta ‘a e Tu‘í mo Hāmani ki He‘ene Fakaafe
1PEA ‘i hono ‘aho tolu na‘e ‘ai ‘e ‘Ēseta hono kofu fakatu‘i, ‘o ne tu‘u ‘i he loto‘ā loto ‘o e fale ‘o e tu‘i, ‘o fehangahangai mo e loki ‘o e tu‘i: pea ko e tu‘i ē ‘oku ‘afio ‘i hono taloni fakapule‘anga, ‘i he fale fakapule‘anga, ‘o hanga mai ki he hū‘anga. 2Pea ‘i he ‘iloange na‘e ‘afio‘i ‘e he tu‘i ‘a ‘Ēseta ko e kuini ‘oku ne tu‘u mai ‘i he loto‘ā, na‘a ne hōifua‘ia ai; pea mafao atu ‘e he tu‘i kia ‘Ēseta ‘a e sēpita koula na‘a ne to‘o. Pea ‘unu‘unu atu ‘a ‘Ēseta ‘o ala ki he ‘ulu‘i sēpita.
3Pea folofola ‘a e tu‘i ki ai, Ko e hā ‘au Kuini ‘Ēseta? Pea ko e hā ‘oku ke fiema‘u? ‘e ‘atu pē neongo ko e vaeua ‘o e pule‘anga.
4Pea tali ‘e ‘Ēseta, Ka lelei ki he ‘afiona, pea mo me‘a mai mo Hāmani ‘anai ki he kātoanga ‘oku ou teu ma‘a e ‘afiona.
5Pea folofola ‘a e tu‘i, Fakavave mai ‘a Hāmani, kae fai ki he me‘a ‘a ‘Ēseta. Ko ia na‘e omi, ‘a e tu‘i mo Hāmani ki he kātoanga kuo teu ‘e ‘Ēseta. 6Pea folofola ‘a e tu‘i kia ‘Ēseta ‘i he‘enau inu uaine, Ko e hā ho‘o kole? Pea ‘e ‘atu; ‘io, ko e hā ‘a e me‘a ‘oku ke fiema‘u? He fai, neongo ‘e a‘u ki he vaeua ‘o e pule‘anga.
7Pea tali ‘e ‘Ēseta, ‘o ne fakatau folofola ange, Ko ‘eku kole eni, mo e me‘a ‘oku ou fiema‘u– 8Ka kuo u ta‘imālie ‘ofa ‘i he ‘afiona, pea ka ‘oku lelei ki he ‘afiona ke tuku mai ‘a e me‘a ‘oku ou kole ki ai, pea ke fai ‘a e me‘a ‘oku ou fiema‘u–Pea ke me‘a mai ‘a e ‘afiona mo Hāmani ki he kātoanga te u teuteu ma‘amoua; pea te u fai ‘apongipongi hangē ko e me‘a ‘a e tu‘i.
9Pea hū ki tu‘a ‘a Hāmani ‘i he ‘aho ko ia ‘oku ne fu‘u fiefia, pea māfana hono loto: ka ‘i he‘ene sio kia Motekiai ‘i he hū‘anga ‘i he loto‘ā, ‘oku ‘ikai te ne tu‘u ki ‘olunga, pea ‘oku ‘ikai te ne teki kiate ia, na‘a ne fonu ‘i he ‘ita kia Motekiai. 10Ka ka fakama‘uma‘u pē ‘e Hāmani, ‘o ne a‘u ki hono fale, ‘o ne fekau ke omi hono kāinga, mo Sēlesi ko hono uaifi. 11Pea ‘a‘au ‘e Hāmani kiate kinautolu ‘a e lahi ‘o ‘ene koloa, mo e tokolahi ‘o ‘ene fānau, mo e me‘a kehekehe kuo hākeaki‘i ai ia ‘e he tu‘i, mo ‘ene hiki ia ki mu‘a ‘i he hou‘eiki mo e kau tamaio‘eiki ‘a e ‘afio. 12Pea fai atu ‘e Hāmani, Kae‘uma‘ā foki, ko ‘Ēseta ko e kuini na‘e ‘ikai te ne tuku ke hū mai ha taha mo e tu‘i ki he kātoanga kuo ne fai, ka ko au pē; pea ko e ‘apongipongi foki kuo tala kiate au ke ‘alu mo e tu‘i ki ai. 13Ka neongo ia kotoa, ka ‘oku ‘ikai te u siva‘u‘ia ai, lolotonga ‘eku sio kia Motekiai Siu ‘oku nofo ‘i he hū‘anga ki Loto‘ā.
14Pea lea ange ki ai hono uaifi ko Sēlesi, mo hono kāinga kotoa, Tuku ke nau fokotu‘u ha ‘akau ‘e nimangofulu‘i kiupite hono mā‘olunga; pea pongipongi hake ke ke lea ki he tu‘i ke nau fakatūfana‘i ai ‘a Motekiai; pea ke toki hū fiefia mo e tu‘i ki he kātoanga. Pea na‘e lelei‘ia ‘a Hāmani ‘i he me‘a, ‘o ne fekau ke nau ngaohi ‘a e ‘akau.
Currently Selected:
KO ‘ĒSETA 5: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
