KO TĀNIELA 5
5
Ko e Fakaafe ‘a Pelisasa
1KO KINGI PELISASA na‘a ne fai ha kātoanga lahi ki ha toko afe ‘o hono hou‘eiki, pea na‘a ne inu kava ‘i he ‘ao ‘o e toko afe. 2Pea lolotonga ‘ene kamata ‘a e uaine, na‘e fekau ‘e Pelisasa ke ‘omai ‘a e ngaahi ipu koula mo siliva, ‘a ia ne fetuku mai ‘e he‘ene ‘eiki ko Nepukanesa#5.2; 5.11 Na‘e ‘i ai e ngaahi tu‘i ‘i he vaha‘a ‘o Nepukanesa mo Pelisasá. ‘Oku ‘uhinga nai ‘a e ‘eikí ko e tu‘i na‘e hoko ki ai a Nepukanesá, pe ko hono ngāue‘aki nai ‘o e hingoa Nepukanesá kia Pelisasa. mei he Temipale ‘i Selusalema; koe‘uhi ke inu kava ‘aki ‘e he tu‘i mo hono hou‘eiki, ‘a hono ngaahi uaifi mo ‘ene kau sinifu. 3Pea nau ‘omi ‘a e ngaahi ipu koula, ‘a ia na‘e fetuku mei he temipale ‘o e fale ‘o e ‘Otua ‘i Selusalema; pea na‘e inu kava ai ‘a e tu‘i mo hono hou‘eiki, ‘a hono ngaahi uaifi mo ‘ene kau sinifu. 4Na‘a nau inu kava, mo nau fakahīkihiki‘i ‘a e ngaahi ‘otua koula mo siliva, ‘a e palasa, ‘aione, ‘akau mo maka.
5‘I he houa ko ia na‘e nga‘unu mai ‘a e louhi‘i nima ‘o ha tangata, ‘o ne fai tohi ‘i he ‘aofi palasi fe‘unga mo e tu‘unga maama: pea na‘e mamata ‘e he tu‘i ki he konga ‘o e nima na‘e fai ‘a e tohi. 6Pea ko e tu‘i leva–na‘e liliu hono fofonga, pea fakailifia‘i ia ‘e he‘ene ngaahi filio‘i, pea na‘e hangē kuo homo hono tenga, pea fepaki hono ongo tui. 7Kalanga le‘o lahi ai ‘a e tu‘i ke fakahū mai ‘a e kau maki mo e kau Kalitia mo e kau ‘asitalōnome. Fokotu‘u ‘e he tu‘i ‘ene folofola ki he ha‘a poto ‘o Pāpilone, ‘o pehē, ‘Ilonga ha tangata te ne lau ‘a e tohi ko ē, pea fakahā mai hono ‘uhinga, ‘e ‘ai ki ai ha kofu kulokula, pea kahoa ‘aki ha seini koula, pea te ne hoko ko hono tolu ‘o e pule ‘i he pule‘anga. 8Toki hū mai ‘a e kau poto kotoa pē ‘a e tu‘i; ka na‘e ‘ikai te nau lava ke lau ‘a e tohinima, pe fakahā hono ‘uhinga. 9Pea hoha‘a ‘aupito ‘a Kingi Pelisasa, pea lolou hono fofonga, pea na‘e puputu‘u hono hou‘eiki.
10Ha‘u ai ‘a e tu‘i fefine ki he fale kava, ko e me‘a ‘i he lea ‘a e tu‘i mo hono hou‘eiki; pea fakatau folofola ‘e he tu‘i fefine ‘o pehē, Ke lākoifie ma‘u ai pē ‘a e ‘afiona! ‘oua na‘a fakahoha‘a koe ‘e ho‘o ngaahi fifili, pea ‘oua ‘e lolou ho fofonga. 11‘Oku ai ha tangata ‘i ho pule‘anga ‘a ia ‘oku ‘iate ia ‘a e laumālie ‘o e ngaahi ‘otua toputapu;#5.11 ngaahi ‘otua toputapu; pe ‘Otua. pea ‘i he kuonga ‘o ho‘o ‘eiki na‘e hā ai ha maama mo ha ‘atamai mo ha poto, hangē ko e poto ‘o ha‘a ‘otua: pea ko ho‘o ‘eiki ko Kingi Nepukanesa, ‘io, ‘a e ‘afio ko ho‘o ‘eiki,#5.11; 5.2 Na‘e ‘i ai e ngaahi tu‘i ‘i he vaha‘a ‘o Nepukanesa mo Pelisasá. ‘Oku ‘uhinga nai ‘a e ‘eikí ko e tu‘i na‘e hoko ki ai a Nepukanesá, pe ko hono ngāue‘aki nai ‘o e hingoa Nepukanesá kia Pelisasa. na‘a ne ngaohi ia ko e pule ‘o e kau sikalaipe, maki, Kalitia, mo ‘asitalōnome; 12koe‘uhiā na‘e ‘ilo ‘iate ia ha laumālie fungani, mo e ‘ilo me‘a, mo e poto, mo e faka‘uhinga misi, mo e mate tupu‘a, mo e vete ‘o e ngaahi me‘a ‘oku fihi; ‘io, na‘e hā ia ‘i he toko taha ko ia, ‘a Tāniela, ‘a ia na‘e fakahingoa ‘e he tu‘i ko Pelitisasa. Ko ia ke ui mai ‘a Tāniela, pea te ne fakamatala ‘a e ‘uhinga.
Ko Hono Faka‘uhinga ‘e Tāniela ‘a e Mata‘itohí
13Toki fakahū mai ‘a Tāniela ki he ‘ao ‘o e tu‘i. Me‘a ‘a e tu‘i ‘o ne folofola kia Tāniela, ‘o pehē, Ko koe ‘a e Tāniela koā mei he kau pōpula Siuta, ‘a ia na‘e ‘omi mei Siuta ‘e he tu‘i ko ‘eku ‘eiki? 14Kuo u fanongo kiate koe, tokua ‘oku ‘iate koe ‘a e laumālie ‘o e ngaahi ‘otua,#5.14 ngaahi ‘otua toputapu; pe ‘Otua. pea kuo hā ‘iate koe ha maama, mo e ‘atamai, mo e poto ‘oku fungani. 15Pea ko eni kuo ‘omi ki hoku ‘ao ‘a e kau poto, ‘a e kau maki, ke lau ‘a e tohinima ko ē, mo fakahā hono ‘uhinga: ka kuo ‘ikai te nau lava ke faka‘uhinga ‘a e me‘a. 16Ka kuo u fanongo kiate koe ‘oku ke mafai ke faka‘uhinga me‘a, pea ke vete me‘a ‘oku fihi. Ko eni, kapau te ke lava ke lau ‘a e tohi, pea ke faka‘ilo mai hono ‘uhinga, te ke kofu kulokula, mo kahoa koula, pea te ke hoko ko hono tolu ‘o e pule ‘i he pule‘anga.
17Toki tali ‘a Tāniela, ‘o ne fakatau folofola ki he tu‘i, ‘o pehē, Ma‘u pē ho‘o ngaahi me‘a‘ofa, pea ‘atu ho‘o koloa ki ha taha kehe; ka te u lau pē ‘a e tohi ki he ‘afiona, pea te u faka‘ilo hono ‘uhinga.
18‘Ēī, na‘e foaki ‘e he ‘Otua Taupotu ki ho‘o ‘eiki ko Nepukanesa ha pule‘anga, mo ha aoniu, mo ha lāngilangi, mo ha ‘a‘apa‘ia; 19pea ko e me‘a ‘i he mā‘olunga kuo foaki kiate ia na‘e manavahē mo tetetete ‘i hono ‘ao ‘a e ngaahi kakai, matakali, mo fa‘ahinga lea: ‘ilonga ha taha na‘a ne finangalo ki ai na‘a ne tāmate‘i, pea ‘ilonga ha taha na‘a ne finangalo ki ai na‘a ne tuku ke mo‘ui; pea ‘ilonga ha taha na‘a ne finangalo ki ai na‘a ne fokotu‘u, pea ‘ilonga ha taha na‘a ne finangalo ki ai, na‘a ne hifo. 20Ka ‘i he hīkisia hono loto, mo fefeka hono laumālie, ‘o ne fai fielahi, na‘e hifo ia mei he taloni ‘o e pule‘anga, pea na‘e ‘ave meiate ia hono lāngilangi: 21pea na‘e kapusi ia mei he kakai, pea na‘e ngaohi hono loto ke hangē ko e fanga manu, pea na‘a ne nofo‘anga fakataha mo e fanga ‘asi kaivao; na‘e fafanga ia ‘aki ‘a e mohuku, hangē ko e pulu, pea na‘e viku hono sino ‘i he hahau mei langi: kae‘oua ke ne mea‘i ‘oku hau ‘a e ‘Otua Taupotu ‘i he pule‘anga ‘o e tangata, pea ‘oku ne fakanofo ‘a ia ‘oku ne finangalo ki ai.
22Pea ko koe, Pelisasa, ko hono ‘alo, kuo ‘ikai te ke fakavaivai‘i ho loto, neongo na‘a ke mea‘i ‘a e ngaahi me‘a ko ia kotoa; 23ka kuo ke fakafuofuolahi koe ki he ‘Eiki ‘o Langi; pea ko e ngaahi ipu ‘o hono fale kuo nau ‘omi ki ho ‘ao, pea ko koe mo ho hou‘eiki, ho ngaahi uaifi mo ho‘o kau sinifu, kuo nau inu kava ai; pea kuo ke fakahīkihiki‘i ‘a e ngaahi ‘otua siliva mo koula, ‘a e palasa, ‘aione, ‘akau mo maka, ‘a ia ‘oku ‘ikai te nau sio, pe fanongo, pe ‘ilo ha me‘a: ka ko e ‘Otua ‘oku ‘i hono nima ho‘o mānava, pea ‘a‘ana ho ngaahi ‘alunga kotoa, kuo ‘ikai te ke fakalāngilangi‘i. 24(Na‘e toki tuku atu mei hono ‘ao ‘a e potu nima, pea ko eni ‘a e tohinima kuo tohi.)
25Pea ko eni ‘a e me‘a kuo tohi,
MINE MINE TIKELI U-PASINI.#5.25 Ko hono faka-Tongá: LAU, LAU, FUA, MO-VAHEVAHE, pea ‘oku ofi ‘a e lea vahevahé ki he lea Pēsiá. Ko e pēsí ko e motu‘a anga ia ‘o e lea Pāsiní.
26Ko eni ‘a e ‘uhinga ‘o e me‘a: MINE; kuo ‘osi lau ‘e he ‘Otua ho‘o pule, pea kuo ne fakalato ia. TIKELI; 27kuo fua koe ‘i he me‘afua, pea ‘oku ke ma‘ama‘a. 28PESI; kuo vahe ho pule‘anga, ‘o foaki ki ha‘a Mītia mo Pēsia.#5.28 Pēsia; ‘Oku vāofi ‘a hono pu‘aki ‘o e Faka-‘Alamea ‘o e Pēsiá mo e faka-‘Ālamea ‘o e vahe.
29Toki fekau ‘e Pelisasa, pea na‘a nau fakakofu ‘a Tāniela ‘aki ‘a e kulokula, ‘o nau kahoa ‘aki ha seini koula, pea nau fanongonongo ke ne nofo ko hono toko tolu ‘i he kau pule ‘i he pule‘anga.#Sēn 41.42 30‘I he pō ko ia na‘e tāmate‘i ‘a Pelisasa ko e tu‘i ‘o e kau Kalitia. 31Pea na‘e ma‘u ‘a e pule ‘e he Mītia ko Talaiasi, kuo ne fe‘unga nai mo e onongofulu mā ua ta‘u.
Currently Selected:
KO TĀNIELA 5: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
