‘Apositoló 26

Ko e Tali ‘a Paula kia ‘Ākilipá

1PEA me‘a ‘a ‘Ākilipa kia Paula, ‘Oku ngofua ke ke lea ke taukapo‘i koe. Pea hanga leva ‘a Paula, ‘o mafao atu hono nima, ‘o kamata ‘ene fakamatala:

2‘E Kingi ‘Ākilipa, ‘oku ou lau ko hoku monū ‘ete tu‘u ‘i ho ‘ao he ‘aho ni ke fai ‘ete fakamatala ki he ngaahi me‘a kehekehe ‘oku fakahopo ai au ‘e he kakai Siu: 3koe‘uhi ko e pōtopoto‘i koe ‘i he ngaahi tō‘onga kotoa pē ‘a e kakai Siu, mo e ngaahi me‘a ‘oku ‘ū ki ai honau loto: ko ia ‘oku ou kole ke ke kātaki, ‘o me‘a lelei mai kiate au.

4Ko e anga ‘o ‘eku mo‘ui talu ‘eku talavou, ‘io, ‘a ‘eku anga mei he kamata‘anga ‘i he lotolotonga ‘o hoku kakai ‘o‘oku, pea ‘i Selusalema foki, ‘oku lāu‘ilo kī ai ‘a e kakai Siu kotoa pē. 5He kuo nau ‘ilo au mei mu‘a, pea ka ne nau loto ki ai ‘e faingofua ‘enau fakamo‘oni, na‘a ku kau ki he fa‘ahi ‘oku tu‘ukimu‘a ‘i he fakamamafa ki he ngaahi mingimingi‘i me‘a ‘o ‘etau lotu, ‘io, na‘a ku nofo ko e Fālesi.#Ngā 23.6; Filip 3.5 6Pea na‘a mo ‘eni, ko e me‘a kuo fakahopo ai au ko ‘eku ‘amanaki ki he tala‘ofa na‘e fai ‘e he ‘Otua ki he‘etau ngaahi kui: 7‘a e tala‘ofa ko ia ‘oku fakaukuloa ai ‘e hotau ‘ū matakali-hongofulu-mā-ua ‘a e fai ‘o ‘enau lotu ‘i he pō mo e ‘aho, ko ‘enau ‘amanaki hokosi: ‘e Tu‘i, ko e ‘amanaki ko ia kuo fakahopoa ai au ni ‘e ha kakai Siu foki. 8‘O fēfē nai ho‘omou lau ‘a e fokotu‘u ‘e he ‘Otua ‘a e pekia ko e me‘a ‘e ‘ikai ala tui ki ai?

9Ko ia na‘e hā kiate au, ‘oku totonu ke u ngāue lahi ke ta‘ofi ‘a e huafa ‘o Sīsū mei Nāsaleti.#Ngā 8.3; 22.4-5 10‘A ia na‘a ku fai foki ‘i Selusalema: pea ko e tokolahi ‘o e fa‘ahinga tapu na‘a ku ‘ai pilīsone ‘e au, he na‘e fakangofua mai ‘e he hou‘eiki taula‘eiki; pea ‘i he fai honau tāmate‘i, na‘a ku hikinima ki ai. 11Pea tu‘o lahi ‘eku tautea kinautolu ‘i he‘eku fakatotofu ‘a e ngaahi falelotu, ko ‘eku fakamamahi‘i kinautolu ke nau talakaa‘i ‘a e ‘Eiki; pea na‘e pehē fau ‘eku kālili kiate kinautolu, ko ia na‘a ku fakafe‘ātungia ‘o a‘u ki he ngaahi kolo muli foki.

12Pea lolotonga ‘eku fai ‘a e me‘a ko ia, ‘o u fononga ai ki Tāmasikusi, ‘o u ‘alu mo au ‘a e tu‘utu‘uni mo e fakangofua ‘e he hou‘eiki taula‘eiki– 13‘e Tu‘i, lolotonga ‘eku ‘alu, ho‘atā, na‘a ku sio ki ha maama na‘e ngingila ange ‘i he la‘ā, ‘oku malama mai mei he langi, ‘o ne hulu‘ia au mo kinautolu na‘a mau fononga. 14Pea ‘i he‘emau tō kotoa pē ki he kelekele, na‘a ku fanongo ki ha le‘o ‘oku pehē mai ‘i he lea faka-Hepelū, ‘E Saula, ‘e Saula, ko e hā ‘oku ke fakatanga‘i ai au? ‘Oku faingata‘a ho‘o ‘akahi ‘a e me‘a māsila. 15Pea u pehē ‘e au, ‘Ēī, ko hai koe?

Pea me‘a mai ‘a e ‘Eiki, Ko au Sīsū, ‘a ia ‘oku ke fakatanga‘i. 16Ka ke tu‘u, tu‘u ki ‘olunga: he ko eni ‘a e me‘a kuo u hā ai kiate koe, ke fakanofo koe ko e faifekau mo e fakamo‘oni ‘o e ngaahi me‘a kuo ke mamata ki ai,#26.16 ki ai: ‘Oku pehē ‘i hono ngaahi hiki fuoloa ‘e ni‘ihi: ki ai ‘iate aú. pea mo e ngaahi me‘a te u hā ai kiate koe ‘amui; 17pea u fakahaofi koe mei he kakai ‘Isileli, pea mo e Senitaile, ‘a ia ‘oku ou fekau atu koe ki ai, 18ke faka‘ā honau mata, ke nau tafoki mei he po‘uli ki he maama, pea mei he pule‘ia ‘e Sētane ki he ‘Otua, ke nau ma‘u ‘a e fakamolemole angahala, pea mo ha tofi‘a ‘i he lotolotonga ‘o e kakai kuo fakahaohaoa ‘i he‘enau tui pīkitai kiate au.

19Ko ia, ‘e Kingi ‘Ākilipa, na‘e ‘ikai te u talangata‘a ki he me‘a na‘e hā mai mei he langi. 20Ka na‘a ku kamata tala ke nau fakatomala pea tafoki ki he ‘Otua, he‘enau fai ‘a e ngaahi ngāue ‘oku hoa mo e fakatomala; pea u fua fai ‘i Tāmasikusi, pea hili ia ‘i Selusalema, mo e fonua kotoa ‘o Siutea, pea ki he Senitaile.#Ngā 9.20,28-29 21Ko hono ‘uhinga ia na‘e puke ai au ‘e he kakai Siu ‘i he temipale, ‘o nau ‘ahi‘ahi ke tāmate‘i. 22Ko ia, ko e me‘a ‘i he‘eku ta‘imālie tokoni mei he ‘Otua, kuo u kei tu‘u ai ‘o a‘u ki he ‘aho ni, ‘o u fai ‘eku fakamo‘oni ki he iiki mo e lalahi: ka tala‘ehai ‘oku ou fakahā ha me‘a kehe, ka ko ia pē na‘e lau ‘e he kau Palōfita mo Mōsese fakatou‘osi, ‘e faifai pea hoko: 23‘o pehē, ‘E ala feia ‘a e Mīsaia, pea ko e ‘uluaki ia ‘i he toetu‘u ‘o e pekia, pea te ne ongoongoa ‘a e maama ki he Siu mo e Senitaile fakatou‘osi.#‘Ais 42.6; 49.6; 1 Kol 15.20

24Pea ‘i he‘ene fakamatala pehē, na‘e ‘ioho ‘a Fesitō, ‘E Paula, kuo ke faha: ko e ‘ātunga ē ‘o ho‘o fa‘a lau tohi ‘oku ke faka‘a‘au ke faha.

25Ka ka pehē ‘e Paula, ‘E Fesitō, tapu mo e feitu‘u na, ‘oku ‘ikai te u faha; ka ko e ngaahi me‘a ‘oku ou pu‘aki ko e ngaahi tala ‘a e mo ‘oni mo e fakapotopoto. 26He ‘oku mea‘i ‘e he Tu‘i ‘a e ngaahi me‘a ni: pea ‘oku ou ‘āsili faingofua‘ia ke lea kiate ia, koe‘uhi ‘oku ou pehē, ‘oku ‘ikai hano momo‘i me‘a ‘e taha ‘e ‘ufikaua kiate ia; he tala‘ehai ko ha me‘a ia na‘e fai ‘i ha tuliki. 27‘E Kingi ‘Ākilipa, ‘oku ke tui ki he kau Palōfita? ‘oku ou ‘ilo ‘oku ke tui ki ai.

28Pea me‘a ‘a ‘Ākilipa kia Paula, Tā ‘oku ke lau ‘apē ‘e faingofua ho‘o liliu au ke Kalisitiane.

29Ka ka tali ‘e Paula, pe faingofua pe faingata‘a, tauange mo e ‘Otua ke ke hoko–‘o ‘ikai ko koe pē, ka ko kinautolu kotoa pē kuo fanongo kiate au he ‘aho ni–ke mou hoko ke tatau mo au–tuku kehe pē ‘a e ongo seini ni!

30Pea tu‘u ‘a e Tu‘i mo e Kōvana, ‘a Pelenaise foki mo e ha‘oha‘onga. 31Pea kuo nau tutuku, na‘a nau fealēlea‘aki ‘o pehē, Kuo ‘ikai fai ‘e he siana ni ha me‘a ‘oku hoa mo e mate pe ko e nofo pōpula. 32Pea me‘a ‘Ākilipa kia Fesitō, Ne mei tukuange ‘a e siana ni, ‘o ka ne ta‘e‘oua ‘ene unga kia Sisa.

Currently Selected:

‘Apositoló 26: TMB

Highlight

Copy