Sioné 3 1
1
Ko e Fakafe‘iloaki kia Keio
1TŪ ko au ko e Faifekau,#Ngā 19.29; Lom 16.23; 1 Kol 1.14 ko ‘eku tohi kia Keio ko e ‘ofeina, ‘a ia ‘oku ou ‘ofa ki ai, he‘ete tu‘u ‘i he mo‘oni.
2Si‘i ‘ofa‘anga, ‘oku ou hūfia koe ke ke tu‘umālie ‘i he me‘a kotoa pē, kae‘uma‘ā ke ke mo‘ui lelei, ‘o hangē ko e tu‘umālie ‘a ho laumālie. 3He na‘a ku fiefia ‘aupito ‘i he omi ‘a e kāinga, ‘o nau fakahā ho‘o ma‘u ‘a e mo‘oni, ‘a ia ‘oku hoa mo e fai he mo‘oni ho‘o laka. 4‘Oku ‘ikai ha‘aku toe fiefia ‘oku lahi ‘i he me‘a ni, ‘a ‘eku fanongo ki he‘eku fānau, ‘oku nau laka ‘i he mo‘oni.
5Si‘i ‘ofa‘anga, ko e ngāue ngali lotu ia ‘oku ke fai, ‘i ho‘o fakafitefita‘a ma‘a e kāinga lotu, kae‘uma‘ā ‘a kinautolu ‘oku ‘āunofo; 6‘a ia na‘a nau fakamo‘oni ki ho‘o ‘ofa ‘i he ‘ao ‘o e siasi: pea ‘e mālō ho‘o ngāue ‘o kapau te ke moimoi‘i kinautolu ‘i ha anga ‘oku ngali mo e ‘Otua. 7He na‘a nau ‘alu atu koe‘uhi pē ko e Huafa, ‘o ‘ikai te nau to‘o ha me‘a mei he hīteni. 8Ko ia ‘oku totonu ke tau tauhi ‘e kitautolu ‘a e fa‘ahinga pehē, koe‘uhi ke tau hoko ko e kaungā ngāue mo kinautolu ki he mo‘oni.
Ko Taiotifi mo Temetelio
9Na‘e ‘i ai ha me‘a na‘a ku tohi atu ki he Siasi na: ka ko ia ‘oku ne fie tāfataha ‘iate kinautolu, ‘a Taiotifi, ‘oku ‘ikai te ne tali kimautolu. 10Ko ia kapau te u ‘alu atu te u fakamanatu hake ‘ene ngaahi ngāue, ‘a e koto laukovi ‘oku ne fai kiate kimautolu, mo e ‘ikai te ne topono ai ka ne fakafisi ‘e ia ‘a e kāinga ni, mo ne ta‘ofi foki ‘a kinautolu na‘e loto ke tali, mo ne kapusi mei he siasi.
11Si‘i ‘ofa‘anga, ‘oua te ke fa‘ifa‘itaki ki he kovi, ka ki he lelei. Ko ia ‘oku fai lelei ko e tupu mei he ‘Otua ia: ko ia ‘oku fai kovi kuo te‘eki ke ne mamata ki he ‘Otua.
12Ko e me‘a kia Temetelio, kuo fakamo‘oni ki he‘ene lelei ‘e he kakai kotoa pē, ‘io, pea ‘e he mo‘oni ‘e ia: kae‘uma‘ā ‘oku mau fakamo‘oni ‘e kimautolu foki, pea ‘oku ke ‘ilo ‘oku mo‘oni ‘a e fakamo‘oni ‘amautolu.
Ko e Fakamāvae
13Na‘e lahi ‘eku me‘a ke tohi atu ki ai, ka ‘oku ‘ikai te u fie tohi kiate koe ‘aki ‘a e vaitohi mo e peni: 14ka ‘oku ou ‘amanaki ‘e vave ‘eta fe‘iloaki, pea ta toki talanoa ngutu pē. 15Si‘oto‘ofa atu. ‘Oku ‘ofa atu ho ngaahi kaume‘a. Tala hoku ‘ofa ki hoku ngaahi kaume‘a tāutaha.
Currently Selected:
Sioné 3 1: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.