KO 2 SĀMIUELA 7
7
Ko e Lea ‘a Nētane kia Tēvita
(1 Kal 17.1-15)
1PEA faifai pea kuo nofo ‘a e tu‘i ki hono fale, pea kuo fakanonga ia ‘e Sihova mei hono ngaahi fili takatakai; 2pea folofola ‘a e tu‘i kia Nētane ko e palōfita, ‘o pehē, Vakai ange, ko au ‘oku ou nofo ‘i ha fale sita, ka ko e ‘A‘ake ‘o ‘Elohimi ‘oku nofo ‘i ha fale tupenu.
3Pea tali ‘e Nētane ki he tu‘i, ‘Ilonga ha me‘a ‘oku ‘i ho loto, ‘alu ‘o fai; he ‘oku ‘iate koe ‘a e ‘eiki. 4Pea ‘iloange ‘i he pō ko ia, na‘e hoko ‘a e folofola ‘a Sihova kia Nētane, ‘o pehē, 5‘Alu ‘o tala ki he‘eku sevāniti ko Tēvita, ko eni ‘a e folofola ‘a Sihova, te ke langa koā ‘e koe ha fale mo‘oku ke u nofo ai? 6he kuo te‘eki ke u nofo fale talu e ‘aho na‘a ku ‘omi ai ‘a ha‘a ‘Isileli mei ‘Isipite, ‘o a‘u mai ki he ‘aho ni; ka kuo u taka tēniti mo ha tāpanekale. 7‘I he ngaahi potu kehekehe na‘a ku taka ai ‘i he lotolotonga ‘o ha‘a ‘Isileli, he na‘a ku momo‘i lea ki ha matakali ‘Isileli ‘e taha#7.7 matakali ‘Isileli ‘e taha; Ko hono faka-Hepeluú ia, ka ‘oku ngali tonu hono hiki ‘o kau taki ‘o ‘Isileli (vakai ki he 1 Kal 17.6). ‘a ia na‘a ku tu‘utu‘uni ke tauhi hoku kakai ‘Isileli, ‘o pehē, Ko e hā kuo ‘ikai te mou langa ai mo‘oku ha fale sita.
8Pea ko eni te ke lea ki he‘eku tamaio‘eiki ko Tēvita, ‘o pehē, Ko e folofola eni ‘a Sihova Sāpaoti, Na‘a ku to‘o koe ‘e au mei he loto‘ā sipi, mei he muimui ki he fanga sipi, ke ke hoko ko e ‘eiki ki hoku kakai, ki ‘Isileli: 9pea kuo u ‘iate koe ‘i ho ngaahi fononga kotoa, pea kuo u tu‘usi ho ngaahi fili kotoa mei ho ‘ao; pea te u ‘ai ke lahi ho hingoa, ‘o hangē ko e hingoa ‘o e kakai ongoongo, ‘oku ‘i māmani. 10Pea te u tu‘utu‘uni ha potu ki hoku kakai, ki ‘Isileli; pea te u fakalanga ‘o tō, pea te nau nofo‘i honau feitu‘u ‘onautolu, ‘o ‘oua ‘e toe hiki; pea ‘oua ‘e toe fakamamahi‘i kinautolu ‘e ha fa‘ahinga pau‘u, ‘o hangē ko ia ‘i he kamata‘anga, 11pea mei he taimi na‘a ku tu‘utu‘uni ai ha kau fakamaau ki hoku kakai ‘Isileli, pea te u fakanonga koe mei ho ngaahi fili fua pē. Pea ‘oku fakahā atu foki ‘e he ‘Eiki te ne fakaai ho fale. 12Ka kakato ho ngaahi ‘aho, pea ke toka mo ho‘o ngaahi kui, pea te u fokotu‘u ke hoko mo koe ‘a ho hako, ‘a ia ‘e ‘alu atu mei he manava, pea te u fakapapau hono pule‘anga.#Saame 89.3-4; 132.11; Sioné 7.42; Ngā 2.30 13Ko ia ia te ne langa ha fale ‘i hoku hingoa, pea te u fakapapau ‘a e taloni ‘o hono pule‘anga ‘o ta‘engata. 14Te u nofo au ko ‘ene tamai, pea ‘e nofo ia ko hoku foha: kapau te ne afe, te u tautea ia ‘aki ‘a e me‘a kinisi ‘a e kakai, pea ‘aki ‘a e fa‘ahinga tā ‘o e hako‘i tangata;#Saame 89.26-27; 2 Kol 6.18; Hep 1.5 15kae ‘ikai mahu‘i ‘eku ‘ofa meiate ia, ‘o hangē ko ‘eku hiki meia Saula, ‘a ia na‘a ku hiki mei ho ‘ao. 16Pea ‘e fakapapau ho fale mo ho pule‘anga kiate koe ‘o ta‘engata: ‘e fokotu‘u ho taloni ‘o ta‘engata.#Saame 89.36-37
17Hangē tofu pē ko e ngaahi lea ko ia, pea hangē ko e vīsone ko ia, na‘e pehē ‘a e fakamatala ‘a Nētane kia Tēvita.
Ko e Lotu mo e Fakafeta‘i ‘a Tēvita
(1 Kal 17.16-27)
18Pea hū ‘a Kingi Tēvita, ‘o nofo ‘i he ‘ao ‘o Sihova, ‘o ne pehē, ‘Eiki Sihova, Ko hai au, pea ko hai hoku fale, kuo ke ‘omi ai au ki he me‘a kuo u ‘i ai? 19Pea tā ‘oku ke lau ko e me‘a si‘i ia koā, ‘Eiki Sihova; pea ‘oku kau foki ho‘o folofola ki he tu‘u ‘a e fale ‘o ho‘o tamaio‘eiki ‘o mama‘o atu ‘aupito: pea ko e lao eni koā ‘o ha tangata,#7.19 ko e lao… tangata; Ko hono faka-Hepeluú ia, ka ‘oku ngali tonu hono hiki ‘o kuó ke tuku ke ‘ilo ‘eni ‘e ha tangata. ‘Eiki Sihova! 20Pea ko e hā ha toe lea ‘a Tēvita ‘e fai atu ki he ‘Afiona? he ‘oku ke ‘afio‘i ho‘o tamaio‘eiki ko au, ‘Eiki Sihova. 21Telia pē ho‘o folofola, pea koe‘uhi pē ko ho tau ia, kuo ke fai ai ‘a e fu‘u me‘a ni, ke faka‘ilo pehē ki ho‘o tamaio‘eiki. 22Ko ia, ko e lahi koe, ‘e Sihova ‘Elohimi: he ‘oku ‘ikai hao tatau, ‘io, ‘oku ‘ikai ha ‘Otua ngata ‘i he ‘afiona; ‘oku hā ia mei he me‘a kotoa kuo ongo mai ki homau telinga. 23Pea ko e fe‘ia ha fo‘i kakai ‘i māmani hangē ko ho kakai, hangē ko ‘Isileli, ‘a ia na‘e hā‘ele atu ‘a e ‘Otua ke huhu‘i mōno kakai, pea ke ne fakaai hano huafa, pea ke fai me‘a lalahi ma‘amoutolu,#7.23 ma‘amoutolu; Ko hono faka-Hepeluú ia, ka ‘oku ngali tonu hono hiki ‘o ma‘anautolu. mo e ngaahi me‘a fakailifia ma‘a ho fonua,#7.23 ma‘a ho fonua; Ko hono faka-Hepeluú ia, ka ‘oku pehē he hiki fuoloa ‘e taha Na‘á ke teke‘i [‘a e ngaahi pule‘angá mo honau ngaahi ‘otuá]. ‘i he ‘ao ‘o ho kakai, ‘a ia na‘a ke huhu‘i ma‘au mei ‘Isipite, ‘a e ngaahi pule‘anga mo honau ngaahi ‘otua?#Teu 4.34 24Pea kuo ke fokotu‘u ma‘au ho kakai ‘Isileli ma‘ao kakai ‘o ta‘engata; pea ko koe, ‘Eiki, na‘a ke hoko ko honau ‘Otua.
25Pea ko eni, ‘e Sihova ‘Elohimi, ko e lea kuo ke folofola‘aki, ‘a ia ‘oku kau ki ho‘o tamaio‘eiki ko au, mo hoku fale, ke ke fokotu‘u ia ‘o ta‘engata, pea ke fai ‘o hangē ko ho‘o folofola. 26Pea ke fakahīkihiki‘i ho huafa ‘o ta‘engata, ‘o pehē, Ko Sihova Sāpaoti ko e ‘Otua ia ki ‘Isileli: pea ko e fale ‘o ho‘o tamaio‘eiki ko Tēvita ‘e fokotu‘u ma‘u ‘i ho ‘ao. 27He ko e ‘Afiona ko Sihova Sāpaoti, ko e ‘Otua ‘o ‘Isileli, kuo ke fanafana ki ho‘o sevāniti, ‘o pehē, Te u langa ha fale mo‘ou: ko hono ō ia kuo loto lahi ai ho‘o tamaio‘eiki ke feia ‘a e lotu ni ki he ‘Afiona.
28Pea ko eni, ‘Ātonai Sihova, ko koe ‘a e ‘Otua, pea ko ho‘o folofola ko e mo‘oni, pea kuo ke tala‘ofa ‘a e lelei ni ki ho‘o tamaio‘eiki ko au: 29pea ko ia ke lelei ki he ‘Afiona ke tāpuaki‘i ‘a e fale ‘o ho‘o tamaio‘eiki, ke tu‘u ia ‘i ho ‘ao ‘o ta‘engata; he ko koe, ‘Ātonai Sihova, kuo ke tala ia: pea ‘ofa ke tāpuaki‘i ‘a e fale ‘o ho‘o tamaio‘eiki ‘aki ho‘o tāpuaki ‘o ta‘engata.
Currently Selected:
KO 2 SĀMIUELA 7: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
