KO 2 SĀMIUELA 4
4
Ko Hono Fakapoongi ‘o ‘Isiposeti
1PEA ‘i he fanongo ‘e he foha ‘o Saula kuo pekia ‘a ‘Āpina ‘i Hepeloni, na‘e vaivai hono nima, pea mo‘utāfu‘ua ‘a ‘Isileli kātoa. 2Pea na‘e ai ha ongo tangata ‘ōfisa tau na‘e kau ki he foha ‘o Saula: ko e hingoa ‘o e taha ko Pā‘ana, pea ko e hingoa ‘o hono ua ko Lēkapi, ko e hako kinaua ‘o Līmoni ko e tangata Piheloti, na‘e kau ki ha‘a Penisimani– (he ‘oku lau foki ‘a Piheloti ki Penisimani; 3pea na‘e hola ‘a e kau Piheloti ki Kitaimi, pea kuo nau ‘āunofo ai ‘o a‘u ki he taimi ni.
4Pea ko Sionatane foha ‘o Saula ne ai hono foha na‘e heke. Kuo ne nima ta‘u ‘i he ‘omi ‘o e ongoongo ‘o Saula mo Sionatane mei Sisilili, pea hiki ia ‘e hono fefine tauhi ke holataki: pea ‘iloange, ‘i he‘ene fakavave ke hola, na‘e tō ‘a e tamasi‘i, pea talu ai mo ‘ene heke. Pea ko hono hingoa ko Mefiposeti).#2 Sām 9.3
5Pea ‘alu ‘a e ongo foha ‘o e Piheloti ko Līmoni, ‘a Lēkapi mo Pā‘ana, pea na hū ho‘atā ki he fale ‘o ‘Isiposeti, ‘oku fai ‘ene mohe ho‘atā. 6Pea na hū ki loto fale, ko ‘ena ‘omi uite tokua: pea na hoka‘i ia ‘i hono kete: pea toki hola ‘a Lēkapi mo hono tokoua ko Pā‘ana.#4.6 peá na hū… Pā‘ana; Ko hono faka-Hepeluú ia, ka ‘oku ngali tonu ange hono fakalea he hiki fuoloa e taha ‘o pehē: Kuo tulemohe ‘a e fefine na‘e fai ‘ene sivi uite he ve‘e matapaá ‘o ne mohe, pea moulu atu ki loto fale ‘a Lēkapi mo Pā‘ana. 7He ‘i he‘ena hū ki fale, tā ‘oku ne mohe ‘i hono mohenga ‘i he falemohe, pea na taa‘i ia ke mate, pea na tu‘usi hono ‘ulu, pea na to‘o hono ‘ulu, ‘o na hala ‘i ‘Alapā, ‘o na fononga ‘i he pō ko ia kotoa. 8Pea na ‘omi ‘a e ‘ulu ‘o ‘Isiposeti kia Tēvita ki Hepeloni, pea na fakatau folofola ki he tu‘i, Ko eni ‘a e ‘ulu ‘o ‘Isiposeti ko e foha ‘o Saula ko ho fili, ‘a ia na‘a ne tuli ki ho‘o mo‘ui: pea kuo sauni he ‘aho ni ‘e he ‘Eiki ‘a e ‘afio ko e tu‘i kia Saula mo hono hako.
9Pea tali ‘a Tēvita kia Lēkapi mo hono tokoua ko Pā‘ana, ko e hako ‘o e Piheloti ko Līmoni, ‘o ne pehē kiate kinaua, Tangi mo‘oni ‘a e ‘Eiki, ‘a ia kuo ne huhu‘i ‘eku mo‘ui mei he faingata‘a kotoa, ‘i he ongoongo mai ha taha, 10‘o pehē, Tokua kuo pekia ‘a Saula, ko ‘ene lau ko e ongoongo lelei kuo ne ‘omi kiate au, ka na‘a ku puke ia, ‘o tāmate‘i, ‘i Sikilaki: ko e totongi ia na‘a ku ‘atu ki ai koe‘uhi ko ‘ene ongoongo.#2 Sām 1.1-16 11Huanoa eni, ‘i he tāmate‘i ‘e ha ongo tangata kovi ha tangata ta‘ehalaia ‘i hono fale mo hono mohenga–huanoa ha‘aku ‘eke hono toto ki hona nima, ‘o ‘ave kinaua mei māmani? 12Pea fekau ‘e Tēvita ‘ene kau tama, pea nau tāmate‘i kinaua, pea nau tu‘usi hona nima mo hona va‘e, ‘o nau tautau kinaua ‘i he ve‘e vai ‘i Hepeloni. Pea nau to‘o ‘a e ‘ulu ‘o ‘Isi-poseti, ‘o nau tanu ‘i he fa‘itoka ‘o ‘Āpina ‘i Hepeloni.
Currently Selected:
KO 2 SĀMIUELA 4: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
