KO 2 SĀMIUELA 12
12
Ko e Lea ‘a Nētane mo e Fakatomala ‘a Tēvita
1PEA fekau ange ‘a Nētane kia Tēvita ‘e Sihova. Pea ne a‘u kiate ia, ‘o ne fakatau folofola ange, Na‘e ai ha ongo tangata ‘i ha kolo pē taha; ko e taha na‘e koloa‘ia, kae masiva ‘a e taha.#Saame 51 (‘Ulu‘i Sāmé) 2Ko e koloa‘ia na‘e lahi ‘aupito ‘ene fanga sipi mo e pulu; 3ka ko si‘i masiva na‘e ‘ikai ha‘ane me‘a, ngata pē ‘i ha kihi‘i sipi fefine ‘e taha tofu pē, ‘a ia kuo ne fakatau, ‘o pusiaki: pea kuo ne tupu fakataha mo ia mo ‘ene fānau; pea na vaeua mo ia ‘ene ma‘anga, pea ne inu mei he‘ene ipu, pea ne tokoto ‘i hono fatafata, pea na‘e tatau mo hono ‘ōfefine. 4Pea na‘e ha‘u ha fononga ki he tangata koloa‘ia, pea ne mamae ke to‘o ha me‘a mei he‘ene fanga sipi pe pulu ‘a‘ana, ke ngaohi ma‘a e fononga kuo ha‘u kiate ia; ka ne to‘o ‘a e lami ‘a si‘i masiva, ‘o ne ngaohi ma‘a e tangata kuo ‘a‘ahi mai.
5Pea na‘e langa ai ‘a e houhau ‘o Tēvita ki he tangata ko ia, ‘o lahi ‘aupito; pea ne pehē kia Nētane, Tangi ‘a e mo‘ui ‘a e ‘Eiki, ‘e mate ‘a e tangata ko ia kuo fai pehē: 6pea te ne totongi ‘a e lami ‘o tu‘o fā, koe‘uhi ko ‘ene fai ‘a e me‘a ko ia, mo ‘ikai ha‘ane faka‘atu‘i.
7Pea fakatau folofola ‘a Nētane kia Tēvita, Ko koe ‘a e tangata ko ia. Ko eni ‘a e folofola ‘a Sihova ko e ‘Otua ‘o ‘Isileli, Na‘a ku fakanofo koe ke Tu‘i ‘Isileli, pea u fakahaofi koe mei he nima ‘o Saula: 8pea na‘a ku ‘atu kiate koe ‘a e fale ‘o ho ‘eiki, pea ko e ngaahi uaifi ‘o ho ‘eiki na‘a ku tuku ki ho fatafata, pea na‘a ku foaki kiate koe ‘a e fale ‘o ‘Isileli mo Siuta: pea ka ne kuo si‘i ia, pehē kuo u kanoni ‘aki ha me‘a mo ha me‘a. 9Ko e hā ai kuo ke ta‘etoka‘i ‘a e folofola ‘a Sihova, ke fai ‘a e me‘a ‘oku kovi ‘i hono ‘ao? Ko ‘Ūlaia Heti kuo ke taa‘i ‘aki ‘a e heletā, pea ko hono uaifi kuo ke to‘o mo‘ao ‘unoho, ka ko e tangata kuo ke fakapoongi ‘aki ‘a e heletā ‘a ha‘a ‘Āmoni. 10Pea ko eni, ‘e ‘ikai mahu‘i ‘a e heletā mei ho fale, ‘o ta‘engata; koe‘uhi kuo ke ta‘etoka‘i au, pea kuo ke to‘o ‘a e uaifi ‘o ‘Ūlaia Heti ke hoko ko ho uaifi ‘o‘ou. 11Ko eni ‘a e folofola ‘a Sihova: Vakai, te u fakatupu ha mala kiate koe mei ho fale ‘o‘ou, pea te u to‘o ho ngaahi uaifi mei ho funga, ‘o tuku ki ho kaungā‘api, pea te ne mohe mo ho ngaahi ‘unoho ‘i he mata ‘o e la‘ā ni.#2 Sām 16.22 12He na‘a ke fai fūfūnaki ‘e koe ‘a e me‘a ni, ka ko au te u fai ‘i he ‘ao ‘o ‘Isileli kātoa, pea ‘i he mata ‘o e la‘ā.
13Pea pehē ‘e Tēvita kia Nētane, Kuo u hia kia Sihova. Pea fakatau folofola ‘a Nētane kia Tēvita, Ko e ‘Eiki foki kuo ne ‘ave ho‘o hia; 14‘e ‘ikai te ke mate. Ka neongo ia, ka ko eni, kuo ke tuku ‘i he ngāue na ha tu‘unga ke lau‘ikovi‘i ai ‘a Sihova ‘e hono ngaahi fili; ko ia foki ko e tamasi‘i kuo fanau‘i kiate koe ‘e mate ia. 15Pea ‘alu ‘a Nētane ki hono ‘api. Pea taa‘i ‘e Sihova ‘a e tamasi‘i ne fanau‘i ‘e he uaifi ‘o ‘Ūlaia kia Tēvita.
16Pea na‘e puke lahi, pea hufekina ‘e Tēvita ‘a e tamasi‘i ki he ‘Otua, pea ne ‘aukai; pea ‘i he‘ene hū ki fale, na‘a ne tokoto ‘i he kelekele ‘i he pō kotoa ‘o ‘aho. 17Pea tutu‘u mai kiate ia ‘a e mātu‘a ‘o hono fale, ke fokotu‘u hake mei he kelekele: kae ‘ikai te ne tali: pea ‘i he fai ‘enau kai na‘e ‘ikai te ne mama ha me‘a. 18Pea ‘i he hoko hono ‘aho fitu na‘e pekia ‘a e tamasi‘i. Pea na‘e manavahē ‘a e kau tamaio‘eiki ‘a Tēvita ke fakahā kiate ia kuo pekia ‘a e tama: he na‘a nau pehē; Vakai, lolotonga ‘ene mo‘ui na‘a tau lea kiate ia ka na‘e ‘ikai te ne tokanga kiate kitautolu; kae huanoa ha kovi te ne fai, ka tau ka tala kiate ia kuo pekia ‘a e tamasi‘i.
19Pea ‘i he vakai ‘e Tēvita ‘oku fefanafanahi ‘ene kau tamaio‘eiki, na‘e mahino kiate ia kuo pekia ‘a e tamasi‘i: pea ne pehē ki he‘ene kau tamaio‘eiki, Kuo pekia ‘a e tama?
20Pea nau tali, Kuo pekia. Pea tu‘u hake ‘a Tēvita mei he kelekele, ‘o ne kaukau, mo pani, mo fetongi hono kofu; pea ne hū ki he fale ‘o Sihova ke fai ‘ene lotu, pea ne toki ha‘u ki hono fale: pea ‘i he‘ene huhu, na‘a nau fokotu‘u ha‘ane me‘a taumafa, ‘o ne tokoni. 21Pea fakatau folofola ange ‘e he‘ene kau tamaio‘eiki, Ko e hā eni kuo ke fai? ‘I he kei mo‘ui ‘a e tamasi‘i, na‘a ke ‘aukai ai mo tangi; ka ‘i he‘ene pekia leva, kuo ke me‘a hake, ‘o fai ho‘o taumafa.
22Pea ne tali, Lolotonga na‘e kei mo‘ui ‘a e tamasi‘i na‘a ku ‘aukai mo tangi; he na‘a ku pehē, Hei‘ilo ‘e ‘ofa ‘a e ‘Eiki kiate au, kae mo‘ui ‘a e tama. 23Ka ko eni kuo ne pekia, pea koe‘uma‘ā ‘eku toe ‘aukai? he te u lava ke fakafoki mai? Ko au te u ‘alu kiate ia, kae ‘ikai te ne foki mai ia kiate au.
Ko Hono ‘Alo‘i ‘o Solomoné
24Pea fai ‘e Tēvita ‘a e fakalelulelu ‘o Pātisepa ko hono uaifi, ‘o ne ‘alu ki ai ‘o na mohe: pea ne fā‘ele‘i ha tama, pea ne fakahingoa ia ko Solomone. 25Pea ‘ofa ki ai ‘a Sihova; pea ‘alu ki ai ‘ene fekau ‘i he palōfita ko Nētane, pea ne fakahingoa ia ko Setitaia (ko Pele-‘a-Iaa), koe‘uhi ko Sihova.
Ko Hono Puke ‘e Tēvita ‘a Lapa
(1 Kal 20.1-3)
26Pea fai tau ‘a Sioape mo Lapa ‘o ha‘a ‘Āmoni, pea ne hamu ‘a e kolohau. 27Pea ‘alu ‘a e fekau ‘a Sioape kia Tēvita ke fakahā, Kuo u tau‘i ‘a Lapa, pea kuo u hamu ‘a e kolo vai. 28Pea ko eni ke ke fakataha hono toe ‘o e kakai, ‘o nofo‘i ‘a e kolo hono hamu: na‘a ‘iloange te u hamu ‘e au ‘a e kolo, ‘o u ma‘u hingoa ai. 29Pea fakatefua mai ‘e Tēvita ‘a e kakai kotoa, ‘o ne ‘alu ki Lapa, ‘o tau‘i, ia, ‘o ne hamu. 30Pea ne to‘o ‘a e kalauni ‘o Moloke#12.30 Moloke: Ko e ‘aitoli ‘o e ‘otua ‘Āmoni ko Moloke; pe ‘o honau tu‘í. mei hono ‘ulu; pea ko hono mamafa ko e taleniti koula, pea ai moni makakoloa; pea ne ‘ai ki he ‘ulu ‘o Tēvitá.#12.30 makakoloa… peá ne ‘ai [‘a e kalauní ]… Tēvitá; pe pea to‘o ‘e Tēvita ‘a e makakoloá ‘o ‘ai ki hono kalauni ‘o‘oná. Pea ne ‘omi kitu‘a ‘a e vete ‘o e kolo, ko e me‘a lahi ‘aupito. 31Pea ne ‘omi kitu‘a ‘a e kakai na‘e ‘i ai, ‘o ‘ai ki he kili, pea ki he ngaahi sāliote ‘aione na‘e ‘au‘au koane ‘aki, pea ki he ngaahi toki ‘aione, ‘o ne fakalaka kinautolu ‘ia Moloke;#12.31 ‘o ne… ‘ia Moloke; Ko hono faka-Hepeluú ia; pe ko e ‘o ne… ‘i he fōnise ta‘o maka ‘umea 9; ka ‘oku ngali tonu hono hiki ‘o ‘o ne fakamālohi‘i kinautolu ke nau ngāue he ta‘o maka ‘umea (vakai kia 1 Kal 20.3). pea na‘e pehē ‘ene fai ki he kolo kotoa pē ‘o ha‘a ‘Āmoni. Pea foki ‘a Tēvita mo e kakai kotoa ki Selusalema.
Currently Selected:
KO 2 SĀMIUELA 12: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
