KO 2 SĀMIUELA 10
10
Ko Hono Ikuna‘i ‘e Tēvita ‘a e Kakai ‘Āmoní mo e Kakai Sīliá
(1 Kal 19.1-19)
1PEA hili ia tokua, na‘e pekia ‘a e Tu‘i Ha‘a ‘Āmoni, pea fetongi ia ‘e hono foha ko Hānuni. 2Pea pehē ‘e Tēvita, Te u fai ‘ofa kia Hānuni foha ‘o Nā‘asi, ‘o hangē ko e fai ‘ofa ‘a ‘ene tamai kiate au. Ko ia na‘e fekau atu ‘e Tēvita ha ni‘ihi ‘i he‘ene kau nofo‘anga, ke fakafai ‘iate kinautolu ha fakalelulelu kiate ia, koe‘uhi ko ‘ene tamai. Pea na‘e a‘u ‘a e kau tamaio‘eiki ‘a Tēvita ki he fonua ‘o ha‘a ‘Āmoni.
3Pea lea ‘a e hou‘eiki ‘o ha‘a ‘Āmoni ki honau ‘eiki ko Hānuni, ‘o pehē, ‘Oku ke mahalo ko e fakahīkihiki‘i ‘e Tēvita ho‘o tamai ‘ene fekau mai ha kau fakalelulelu? ‘Ikai kuo ne fekau mai ‘ene kau tamaio‘eiki ke hakule ‘a e kolo, pea ke mataki‘i, ka ne hamu ia?
4Ko ia, na‘e puke ‘e Hānuni ‘a e kau tamaio‘eiki ‘a Tēvita, ‘o ne tele vaeua honau kava, mo ne tu‘usi honau kofu fe‘unga mo e kongaloto kae hā honau tu‘ungaiku, ‘o ne fekau ke nau ‘alu. 5Pea na‘e fakahā kia Tēvita, ‘o ne tuku ha talafekau ke fakafetaulaki kiate kinautolu; he na‘e mā ‘aupito ‘a e tu‘unga me‘a. Pea folofola ‘a e tu‘i, Tatali pē ‘i Sielikō kae‘oua ke tupu homou kava, pea mou toki foki mai.
6Pea ‘i he vakai ‘e ha‘a ‘Āmoni kuo nau namukū ‘i he ‘ao ‘o Tēvita, na‘a nau fekau atu, ‘o nō ‘a Sīlia Pete-Lēhopi, mo Sīlia Sopa, ko e tau hā‘ele ‘e toko ua mano; ko e tu‘i Mā‘aka foki mo ‘ene toko afe, mo e kau Topi ko e toko taha mano mā toko ua afe. 7Pea ‘i he fanongo ki ai ‘a Tēvita, na‘a ne fekau atu ‘a Sioape mo e hōsitē kātoa ‘a e kau to‘a. 8Pea hū kitu‘a ‘a ha‘a ‘Āmoni, ‘o nau fakatē tau ‘i he matanikolo; ka ko Sīlia Sopa mo Lēhopi mo e kau Topi mo Maaka, na‘a nau ‘i ha potu kehe mei ‘uta.
9Pea ‘i he vakai ‘e Sioape ‘oku tu‘u mai ‘a e matatau mei ‘ao mo tu‘a, na‘a ne fili ‘a e lelei ‘o ‘Isileli, ‘o ne fakatē ke tali ‘a Sīlia: 10ka ko hono toe ‘o e kakai na‘a ne tuku ki he nima ‘o hono tokoua ko ‘Apisai, ‘o ne fakatē ke tali ‘a ha‘a ‘Āmoni. 11Pea ne pehē, Kapau ‘e mālohi fau ‘a Sīlia kiate au, pea te ke tokoni mai: pea kapau ‘e mālohi fau ‘a ha‘a ‘Āmoni kiate koe, pea te u ‘alu atu ke tokoni koe. 12Tu‘u hifo ke tau fai ngali tangata; telia hotau kakai, pea telia ‘a e ngaahi kolo ‘a hotau ‘Otua: pea ke fai ā, ‘e Sihova ‘a e me‘a ‘oku hā lelei kiate ia!
13Pea ‘unu‘unu atu ‘a Sioape mo e kakai na‘e ‘iate ia, ke fakahoko tau mo Sīlia: pea nau hola mei hono ‘ao. 14Pea vakai ‘e ha‘a ‘Āmoni ‘oku hola ‘a Sīlia, pea nau hola kinautolu mei he ‘ao ‘o ‘Apisai, ‘o nau hū ki kolo. Pea foki ‘a Sioape mei he fai mo ha‘a ‘Āmoni, ‘o ne a‘u ki Selusalema.
15Pea ‘i he vakai ‘e Sīlia kuo nau vaivai ‘i he ‘ao ‘o ‘Isileli, na‘a nau fakatefua mai. 16Pea fekau ‘e Hetatesa, ‘o ne fakahū kitu‘a ‘a e Sīlia na‘e nofo ‘i he tu‘a Vaitafe: pea nau omi ki Hēlame, pea taki ‘e Sōpaki ko e ‘eikitau ‘a Hetatesa. 17Pea na‘e fakahā kia Tēvita; pea ne tānaki ‘a ‘Isileli kātoa, ‘o ne a‘a ‘i Soatani, ‘o ne a‘u ki Hēlame. Pea fakatē tau ‘e Sīlia ke tali ‘a Tēvita, ‘o nau tau mo ia. 18Pea na‘e hola ‘a Sīlia mei he ‘ao ‘o ‘Isileli; pea na‘e tāmate‘i ‘e Tēvita ‘i Sīlia ‘a e sāliote ‘e fitungeau, pea mo e tau heka hoosi ‘e toko fā mano; ko Sōpaki foki ko honau ‘eikitau na‘a ne te‘ia, ‘o ne pekia ai. 19Pea ‘i he vakai ‘e he ngaahi tu‘i na‘e nofo kia Hetatesa kuo nau vaivai ‘i he ‘ao ‘o ‘Isileli, na‘a nau fakalelei mo ‘Isileli, ‘o fakaongo ki ai. Ko ia na‘e manavahē ‘a Sīlia ke toe tokoni ki ha‘a ‘Āmoni.
Currently Selected:
KO 2 SĀMIUELA 10: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
