Sioné 2 1
1
KO E FAKAFE‘ILOAKI MO E LOTU
1TŪ ko au ko e Faifekau, ko ‘eku tohi ki si‘i fefine fili ko Kulia, pea mo ‘ene fānau,#1.1 fefine… fānaú; ‘Oku ‘uhinga nai eni ki ha siasi mo hono kāinga lotú (vakai ai pē ki he veesi 4-5). ‘a ia ‘oku ou ‘ofa ki ai, he‘ete tu‘u ‘i he mo‘oni; pea ‘oku ‘ikai ko au pē, ka ko kinautolu kotoa pē kuo ‘ilo‘i ‘a e mo‘oni, 2koe‘uhiā ko e mo‘oni ‘oku nofo ma‘u ‘iate kitautolu, ‘a ia foki ‘e kau mo kitautolu ‘o ta‘engata.
3‘E nofo mo kitautolu ‘a e kelesi mo e meesi mo e melino, mei he ‘Otua ko e Tamai, pea meia Sīsū Kalaisi ko e ‘Alo ‘o e Tamai, ‘o taka he mo‘oni mo e ‘ofa.
4Ne u fiefia ‘aupito ‘i he‘eku ‘ilo ha ni‘ihi ‘i ho‘o fānau ‘oku nau laka ‘i he mo‘oni, hangē ko e tu‘utu‘uni na‘a tau ma‘u mei he Tamai. 5Pea ko eni ‘oku ou kole atu, ‘e Kulia, ‘o ‘ikai hangē ko ha‘aku tohi atu ha fekau fo‘ou, ka ko ia pe kuo tau ma‘u mei he kamata‘anga, ‘ē, ke tau fe‘ofa‘aki.#Sioné 13.34; 15.12,17 6Pea ko eni ia ‘a e ‘ofa, ‘a ‘etau laka ‘o fakatatau ki he ngaahi tu‘utu‘uni ‘a ‘Ene ‘Afio. Ko eni ia ‘a e tu‘utu‘uni, ‘a ē ā ne mou fanongo ki ai mei he kamata‘anga, ‘o pehē, Ke mou laka ‘i he me‘a ko ia.
7Koe‘uhi kuo ‘i ai ‘a e tokolahi fakahē na‘e ‘alu atu ki māmani, ko e fa‘ahinga ‘oku ‘ikai te nau fakamo‘oni ki he ha‘u ‘a Sīsū Kalaisi ‘i he kakano. Ko eni ia ‘a Fakahē mo Fiekalaisi. 8Mou tokanga kiate kimoutolu koe‘uhi ke ‘oua na‘a mole ho‘omou ngaahi me‘a na‘e tupu ‘i he‘emau#1.8 he‘emau; ‘Oku pehē ‘i he ngaahi hiki fuoloa ‘e ni‘ihi: ho‘omou. ngāue, kaekehe ke mou ma‘u kotoa ‘a e totongi.
9Ko ia kotoa pē ‘oku mu‘omu‘a, ‘o ‘ikai te ne nofo ma‘u ‘i he tokāteline ‘a Kalaisi, ‘oku ‘ikai te ne ma‘u ‘a e ‘Otua. Ko ia ‘oku ne nofo ma‘u ‘i he tokāteline ko ia, ‘oku ma‘u ‘e he toko taha ko ia ‘a e Tamai mo e ‘Alo fakatou‘osi. 10Kapau ā kuo ha‘u kiate kimoutolu ha toko taha, ‘o ‘ikai ha‘u mo ia ‘a e tokāteline ko ia, ‘oua te mou tali ia ki homou fale, pea ‘oua te mou pehē kiate ia, Si‘oto‘ofa: 11he ko ia ‘oku ne pehē kiate ia Si‘oto‘ofa ‘oku ne kau ‘i he‘ene ngaahi ngāue kovi.
Ko e Lea Fakamāvae
12‘Oku lahi ‘ete me‘a ke tohi atu, ka ‘oku ‘ikai te te fie fai‘aki ‘a e pepa mo e vaitohi: ka ‘oku te ‘amanaki ke ‘alu atu ‘o talanoa ngutu pē, koe‘uhi ke kakato ho‘omou fiefia.
13‘Oku ‘ofa atu ‘a e fānau ‘a si‘i fefine fili ko ho tokoua.#1.13 ‘a e fānau ‘a si‘i fefine fili ko ho tokoua; ‘Oku ‘uhinga nai eni ki he kāinga lotu ‘o e siasi na‘e fai ki ai ‘a e tohí ni.
Currently Selected:
Sioné 2 1: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
