2 Kal 27
27
Ko e Tu‘i Siuta ko Siotame
(2 Tu‘i 15.32-38)
1NA‘E uofulu mā nima ta‘u ‘a Siotame ‘i he‘ene kamata pule, pea na‘e hongofulu mā ono ta‘u ‘ene hau ‘i Selusalema: pea ko e hingoa ‘o ‘ene fa‘ē ko Sīlusa ko e ‘ōfefine ‘o Sātoki. 2Pea fai ‘e ia ‘a e me‘a na‘e hoa mo e finangalo ‘o Sihova, ‘o tatau tofu pē mo e fai ‘a ‘ene tamai ko ‘Ūsaia: kae ngata pē na‘e ‘ikai te ne hū ki he temipale ‘o Sihova.#27.2 na‘e ‘ikai te ne hū ki he temipale ‘o Sihova; pe na‘e ‘ikai te ne fai angahala ‘aki ha‘ane tutu ‘inisēnisi. Pea na‘e kei fai ‘e he kakai ‘a e ngaahi me‘a te nau maumau ai.
3Na‘e ngaohi ‘e ia ‘a e matanikolo ‘olunga ‘i he fale ‘o Sihova, pea lahi ‘a e me‘a na‘a ne langa ‘i he ‘ā ‘o ‘Ōfeli. 4Na‘a ne langa kolo foki ‘i he fonua mo‘unga ‘o Siuta, pea ne langa ‘ani taua moni fale le‘o ‘i he ngaahi vao tātā. 5Pea ne fai tau foki mo Tu‘i Ha‘a ‘Āmoni, ‘o ne lava‘i kinautolu. Pea ko e ta‘u ko ia na‘e tukuhau kiate ia ‘e ha‘a ‘Āmoni, ko e teau‘i taleniti siliva, mo e kilu‘i efa uite, mo e kilu‘i efa pa‘ale. Na‘e pehē mo e tukuhau ‘a ha‘a ‘Āmoni ‘i hono ua ta‘u foki, mo hono tolu. 6Ko ia na‘e kaukaua ‘a Siotame, koe‘uhi na‘a ne teu hono ngaahi ‘alunga ke ‘ao mo Sihova ko hono ‘Otua. 7Pea ko hono toe ‘o e ngāue ‘a Siotame, mo ‘ene ngaahi tau, mo hono ngaahi founga, vakai kuo tohi ia ‘i he Puka ‘o e Ngaahi Tu‘i ‘Isileli mo Siuta. 8Na‘a ne uofulu mā nima ta‘u ‘i he‘ene kamata pule, pea na‘e hongofulu mā ono ta‘u ‘ene hau ‘i Selusalema. 9Pea toka ‘a Siotame mo ‘ene ngaahi kui, pea na‘a nau telio ia ‘i Kolo-‘o-Tēvita; pea na‘e fetongi ia ‘i he pule ‘e hono foha ko ‘Āhasi.
Currently Selected:
2 Kal 27: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
