2 Kal 25
25
Ko e Tu‘i Siuta ko ‘Amasaia
(2 Tu‘i 14.2-6)
1NA‘E tu‘i ‘a ‘Amasaia kuo ne uofulu mā nima ta‘u; pea na‘e uofulu mā hiva ta‘u ‘ene hau ‘i Selusalema: pea ko e hingoa ‘o ‘ene fa‘ē ko Sihoatani mei Selusalema. 2Pea na‘a ne fai ‘a e me‘a na‘e hā totonu ki he finangalo ‘o Sihova, kae ‘ikai ‘aki ha loto haohaoa. 3Pea ‘i he kaukaua leva hono hau, na‘a ne hanga ‘o taa‘i ‘ene kau tamaio‘eiki kuo nau te‘ia ‘a e tu‘i ko ‘ene tamai. 4Ka ko ‘enau fānau na‘e ‘ikai te ne tāmate‘i, hangē ko ia kuo tohi ‘i he Puka ‘a Mōsese, ‘a ia na‘e tu‘utu‘uni ‘e Sihova, ‘o pehē, ‘E ‘ikai mate ‘a e mātu‘a koe‘uhi ko e fānau, pea ‘e ‘ikai mate ‘a e fānau koe‘uhi ko e mātu‘a; ‘e mate takitaha koe‘uhi ko ‘ene angahala ‘a‘ana.#Teu 24.16
Ko e Tau‘i ‘o ‘Ītomi
(2 Tu‘i 14.7)
5Pea fakataha ‘e ‘Amasaia ‘a Siuta, ‘o ne fokotu‘u kinautolu ‘o fakatatau ki honau ngaahi ‘ulumotu‘a, ‘o pule‘i ‘e he ngaahi kapiteni-toko‘i-afe mo e ngaahi kapiteni toko‘i-teau, ‘io, ‘a Siuta kātoa mo Penisimani: ‘o ne lau kinautolu ‘o kamata mei he uofulu ta‘u ‘o fai hake: pea tā na‘e ai ha toko tolu kilu na‘e taau ke ‘alu ‘i he tau, ‘o ala to‘o ‘a e tao mo e pā. 6Pea ne nō mei ‘Isileli ha to‘a ‘e toko kilu ‘aki ‘a e taleniti siliva ‘e teau. 7Pea ha‘u kiate ia ha tangata ‘o ‘Elohimi, ‘o ne fakatau folofola ki ai, ‘o pehē, ‘Ēī, ke ‘oua ‘e ‘alu mo koe ‘a e tau ‘Isileli; he ‘oku ‘ikai ke kau ‘a Sihova mo ‘Isileli; ‘io, mo ha‘a ‘Ifalemi kātoa. 8Ka ‘oka kuo pau ho loto ke ‘alu mo kinautolu, fai; tānaki ho ivi ki he tau:#25.8 Ka ‘oka… tau; ‘Oku ‘ikai ke mahino ‘a hono faka-Hepeluú, ka ‘oku pehē ‘i he ngaahi hiki fuoloa ‘e ni‘ihi: ‘Oku mou fakakakau nai te mou mālohi ange koe‘uhi ko kinautolu [ka]. ‘e lī koe ki lalo ‘e ‘Elohimi ‘i he ‘ao ‘o e fili: he ‘oku mālohi ‘a e ‘Otua ke tokoni, pea ke sī ki lalo.
9Pea folofola ‘a ‘Amasaia ki he tangata ‘o ‘Elohimi, Ka ko e hā ‘e fai ki he teau‘i taleniti, ‘a ia kuo u ‘atu ki he kongakau ‘Isileli? Pea tali ‘a e tangata ‘o ‘Elohimi, ‘Oku mafai ‘e Sihova ke foaki kiate koe ‘o lahi hake ‘i hena.
10Ko ia na‘e vahe‘i kinautolu ‘e ‘Amasaia, ‘a e kongakau na‘e ha‘u kiate ia mei ‘Ifalemi, ke nau foki ki honau feitu‘u: ko ia na‘e tō ‘enau ‘ita ki Siuta ‘o lahi, ‘o nau foki ki ‘api kuo nau mamahi.
11Ka ka fakato‘oto‘a ‘a ‘Amasaia, ‘o ne taki atu hono kakai, ‘o nau ‘alu atu ki Tele‘a Māsima, ‘o ne taa‘i ha toko mano ‘o ha‘a Seia. 12Pea ko e toko mano ‘e taha na‘e ‘ave mo‘ui ‘e ha‘a Siuta, ‘o nau ‘omi ki he funga makatu‘u, ‘o lī hifo kinautolu mei he funga makatu‘u,#25.12 funga makatu‘u; ‘Oku hiki ‘e he ni‘ihi ko Sela; pe Pita. pea nau lailai kotoa.
13Ka ko e kau tangata ‘o e kongakau na‘e fakafoki ‘e ‘Amasaia ke ‘oua te nau ō mo ia ki he tau, na‘a nau hanga ‘o tau‘i ‘a e ngaahi kolo ‘o Siuta, mei Samēlia ‘o a‘u ki Pete-holoni, pea nau tāmate‘i honau toko tolu afe, ‘o ‘ave ha vete lahi.
14Pea ‘i he faifai pea foki ‘a ‘Amasaia mei he taa‘i ‘o e kau ‘Ītomi, na‘a ne ha‘u mo ia ‘a e ngaahi ‘otua ‘o ha‘a Seia, ‘o ne fokotu‘u kinautolu ke ne ‘otua ‘aki, ‘o ne fai lotu ‘i honau ‘ao, mo tutu ‘inisēnisi ki ai. 15Ko ia na‘e tuputāmaki ‘a Sihova kia ‘Amasaia, ‘o ne fekau atu ki ai ha palōfita, ‘a ia na‘a ne fakatau folofola hake, ‘o pehē, Ko e hā kuo ke huhū ki he ngaahi ‘otua ‘o e kakai ni, ‘a ia na‘e ‘ikai te nau hamusi honau kakai mei ho nima?
16Pea ‘i he‘ena fefolofolai, ‘iloange na‘e folofola mai ia, He kuo fakanofo koe ke fale‘i ‘a e tu‘i? ta‘ofi koe; koe‘uma‘ā ho taa‘i?
Pea ta‘ofi ‘e he palōfita he‘ene pehē, ‘Oku ou ‘ilo kuo tu‘utu‘uni ‘a e ‘Otua ke faka‘auha koe, koe‘uhi ko ho‘o fai ‘a e me‘a ko eni, ‘o ‘ikai te ke tokanga ki he‘eku fale‘i koe.
Ko e Tau‘i ‘o ‘Isileli
(2 Tu‘i 14.8-20)
17Pea fai ‘e ‘Amasaia ko e Tu‘i Siuta ‘enau fakataha alea, pea ‘alu atu ‘ene fekau kia Soasi foha ‘o Sihoa‘asi foha ‘o Sehu ko e Tu‘i ‘Isileli ke fakahā, Ha‘u ā, ke ta tau‘aki sio.#25.17 tau‘aki sio; ‘a ia ko e alēlea, pe ko e tau. 18Pea ‘alu ‘a e fekau ‘a Soasi ko e Tu‘i ‘Isileli kia ‘Amasaia ko e Tu‘i Siuta ke fakahā, Tokua ko e Talatala ‘oku ‘i Lepanoni na‘e fekau atu ki he Sita ‘oku ‘i Lepanoni, ‘o pehē, Tuku mai ho ‘ōfefine ke nonofo mo hoku foha: pea na‘e laka ange ha manu fekai na‘e ‘i Lepanoni, ‘o ne malaki ‘a e Talatala. 19‘Oku ke taku kuo ke taa‘i ‘a ‘Ītomi; pea kuo hiki ai ho loto, ‘o ke fakausousa: pe‘i nofo ‘i ‘api; koe‘uma‘ā ho‘o o‘io‘i pea kovi, ka ke tō ai koe pea mo Siuta foki.
20Ka ka ‘ikai tokanga ‘a ‘Amasaia, he na‘e meia ‘Elohimi ia, koe‘uhi ke ne tukuange kinautolu ki he nima ‘o honau ngaahi fili, koe‘uhi ko ‘enau huhū ki he ngaahi ‘otua ‘Ītomi. 21Ko ia, na‘e ‘alu hake ‘a Soasi ko e Tu‘i ‘Isileli, ‘o na tau‘aki sio, ‘a ia mo ‘Amasaia ko e Tu‘i Siuta ‘i Pete-semesi, ‘a ia ‘oku kau ki Siuta. 22Pea vaivai ‘a Siuta ‘i he ‘ao ‘o ‘Isileli, ‘o nau hola takitaha ki hono tēniti. 23Pea ko e me‘a kia ‘Amasaia Tu‘i Siuta, ko e foha ‘o Soasi foha ‘o Sihoa‘asi, na‘e puke ia ‘e Soasi Tu‘i ‘Isileli ‘i Pete-semesi, ‘o ne ha‘u mo ia ki Selusalema, ‘o ne holoki ‘a e ‘ā ‘o Selusalema mei he matanikolo ko ‘Ifalemi ‘o a‘u ki he matanikolo ‘o e tuliki, ko e kiupite ‘e fāngeau. 24Pea ne to‘o ‘a e koula kotoa mo e siliva, mo e nāunau kehekehe na‘e ‘ilo ki ai ‘i he fale ‘o ‘Elohimi, ‘a ia na‘e tauhi ‘e ‘Ōpeti-‘Ītomi, mo e koloa ‘i he fale ‘o e tu‘i, pea mo e kau talifaki, ‘o ne foki ki Samēlia.
25Pea mo‘ui ‘atu ‘a ‘Amasaia foha ‘o Soasi ko e Tu‘i Siuta hili ‘a e pekia ‘a Soasi foha ‘o Sihoa‘asi ko e Tu‘i ‘Isileli, ‘o hongofulu mā nima ta‘u. 26Ko hono toe ‘o e ngāue ‘a ‘Amasaia mei he kamata‘anga ‘o a‘u ki mui, vakai, ‘ikai kuo tohi ‘i he Puka ‘o e Ngaahi Tu‘i Siuta mo ‘Isileli? 27Pea talu ‘a e afe ‘a ‘Amasaia mei he muimui kia Sihova, mo ‘enau puleaki‘i ia ‘i Selusalema; pea ne hola ki Lākisi: pea nau fekau atu ha ni‘ihi ke tulimui atu ki ai ki Lākisi, pea na‘a nau tāmate‘i ia ‘i ai. 28Pea na‘a nau fakaheka ia ki ha fanga hoosi, ‘o nau telio ia fakataha mo ‘ene ngaahi kui ‘i Kolo-‘o-Siuta.
Currently Selected:
2 Kal 25: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
