Tesalonaiká 1 1
1
1TŪ ko kimautolu, ‘a Paula mo Silivenusi mo Tīmote,#Ngā 17.1 ko ‘emau tohi ki he siasi ko ia ‘o e kakai Tesalonaika, ‘a ia ‘oku ‘i he ‘Otua ko e Tamai, pea mo e ‘Eiki ko Sīsū Kalaisi. ‘Ofa ke mou ma‘u kelesi mo e fiemālie.
Ko e Mo‘ui mo e Tui ‘a e Siasi ‘o Tesalonaiká
2‘Oku mau fakafeta‘i ma‘u ai pē ki he ‘Otua koe‘uhi ko kimoutolu kotoa pē, ‘o mau takua kimoutolu ‘i he‘emau ngaahi lotu; 3ko e ‘ikai motu ‘emau manatu ‘i he ‘ao ‘o e ‘Otua ko ‘etau Tamai ki he ngaue ‘o ho‘omou tui, mo e fakafitefita‘a ‘o ho‘omou ‘ofa, mo e kīkītaki ‘o ho‘omou ‘amanaki, ‘a e ‘amanaki ki hotau ‘Eiki ko Sīsū Kalaisi: 4kae‘uma‘ā ko ‘emau ‘ilo, si‘i kāinga ‘ofeina ‘e he ‘Otua, ko e kakai kimoutolu kuo fili mo‘oni. 5He tala‘ehai na‘e hoko atu ‘emau Kōsipeli ko e nge‘esi lea pē, ka na‘e ō mo e mālohi, pea ō mo e Laumālie Mā‘oni‘oni pea mo e loto ta‘etāla‘a. Seuke, ‘oku mou ‘ilo ‘a e anga na‘a mau anga‘aki ‘i homou lotolotonga, koe‘uhi ā ko kimoutolu. 6Kae‘uma‘ā foki, na‘a mou hoko ko e kau fa‘ifa‘itaki kiate kimautolu pea mo e ‘Eiki; he neongo na‘e hoko ‘a e folofola mo e fu‘u mamahi, ka mou tali fiefia pē, ko e fiefia tupu ‘i he Laumālie Mā‘oni‘oni.#Ngā 17.5-9 7Ko ia, kuo mou hoko ai ko e fa‘ifa‘itaki‘anga kiate kinautolu kotoa pē ‘i Masitōnia mo ‘Akeia kuo lotu. 8‘Io, ko kimoutolu kuo ongo mei ai ‘a e folofola ‘a e ‘Eiki ki Masitōnia mo ‘Akeia, ‘o ‘ikai ngata ai, ka kuo pavake ‘a ho‘omou lotu ki he potu kotoa pē, ‘o pehē ‘oku fai ki he ‘Otua. Ko ia ‘oku ‘ikai te mau kei tala ha me‘a, he koe‘uma‘ā; 9he ‘oku fai ‘e he kakai homau ongoongoa–‘a e anga ‘o ‘emau hoko atu kiate kimoutolu; mo ho‘omou tafoki ki he ‘Otua; ‘o fulitu‘a ki he ngaahi tamapua, ke hoko ko e kau tamaio‘eiki ‘a e ‘Otua ‘oku mo‘ui mo mo‘oni; 10pea ke nofo‘aki tali ‘a e ha‘u mei langi ‘a hono ‘Alo ne ne fokotu‘u mei he kau pekia, ‘io, ‘a Sīsū ‘a ia ‘oku ne fakahaofi kitautolu mei he houhau ‘oku tu‘unuku mai.
Currently Selected:
Tesalonaiká 1 1: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
