KO 1 SĀMIUELA 6
6
Ko e Foki Ma i ‘a e ‘A‘ake ‘o e Fuakavá
1PEA na‘e fitu māhina ‘ene ‘i he tuku‘uta ‘o e kau Filisitia ‘a e ‘A‘ake ‘o Sihova. 2Pea ui ange ‘e he kau Filisitia ‘a e kau taula mo e kau tongafisi, ‘o nau pehē, Ko e hā ‘atautolu ‘e fai ki he ‘a‘ake ‘o Sihova? hīnoi‘i kimautolu pe ko e hā ha me‘a te tau tuku ‘aki atu ia ki hono feitu‘u.
3Pea pehē ‘e kinautolu, Kapau ‘oku pehē ke tuku atu ‘a e ‘a‘ake ‘o e ‘Otua ‘o ‘Isileli, ‘oua te mou tuku atu mola ia; ka kuo pau te mou fakafoki ‘aki ia he holo ki he‘ene ‘Afio: ka mou mo‘ui ai, pea ‘e mahino kiate kimoutolu pe ko e hā kuo ‘ikai hiki ai ‘ene tā meiate kimoutolu.
4Pea nau pehē, Ko e hā ‘a e holo te tau fakafoki ‘aki ki he‘ene ‘Afio? Pea nau tali, Ko e nima‘i ‘ulufī koula, mo e nima‘i kumā koula, ‘o fakatatau ki he tokolahi ‘o e kau ‘ulu ‘o ha‘a Filisitia: he na‘e taha ‘a e mala na‘e ‘iate kinautolu kātoa, pea ‘i homou kau ‘ulu.
5Ko ia, te mou ngaohi ‘a e fakatātā ‘o homou ngaahi ‘ulufī, mo e fakatātā ‘o ho‘omou fanga kumā ‘a ia ‘oku nau maumau‘i ‘a e fonua: pea te mou tuku kolōlia ki he ‘Otua ‘o ‘Isileli: hei‘ilo te ne fakama‘ama‘a ‘ene tā ‘e hiki meiate kimoutolu, pea mei homou ngaahi fa‘ahikehe. 6Pea mei homou fonua. Pea koe‘uma‘ā ke fakafefeka homou loto, ‘o hangē na‘e fakafefeka ‘e he kau ‘Isipite mo Felo? ‘Ikai na‘a nau tukuange kinautolu hili ‘ene taa‘i tūkuingata kiate kinautolu, pea nau ‘alu? 7Pea ko eni, mou hanga ‘o ngaohi ha sāliote fo‘ou, mo e ongo pulu toutama, ‘a ia kuo te‘eki ‘ai ‘ioke ki ai; pea no‘otaki ‘a e ongo pulu ki he sāliote, kae ta‘ofi mei ai hona ongo ‘uhiki, ‘o fakafoki ki ‘api: 8pea mou to‘o ‘a e ‘a‘ake ‘o Sihova, ‘o ‘ai ki he sāliote, pea tuku ‘a e nāunau koula ‘a ia ‘oku mou holo ‘aki ki he‘ene ‘Afio ki he puha ‘i hono tafa‘aki; pea tuku atu ia ke ‘alu. 9Pea mou vakai, kapau ‘e ‘alu hake ‘i he hala ‘o e feitu‘u ‘o‘ona ki Pete-semesi, pea tā ko ‘ene ‘Afio kuo fai ‘a e fu‘u kovi ni kiate kitautolu: pea ka ‘ikai, pea te tau ‘ilo na‘e ‘ikai ko hono nima ne taa‘i kitautolu; ko e me‘a hoko fāinoa.
10Pea na‘e fai pehē ‘a e kau tangata; pea nau to‘o ha ongo pulu toutama, ‘o no‘otaki ki he sāliote, ‘o nau tāpuni ‘a e ongo ‘uhiki ‘i ‘api: 11pea nau ‘ai ‘a e ‘A‘ake ‘o Sihova ki he sāliote, mo e puha mo e ngaahi kumā koula, mo e ngaahi fakatātā ‘o honau ngaahi hangatāmaki. 12Pea na‘e fakahangatonu atu ‘a e ongo pulu ‘i he hala ki Pete-semesi; na‘a na fou ai pē ‘i he hala tanu, ‘o tangi ‘i he‘ena ‘alu, pea na‘e ‘ikai te na afe ki to‘omata‘u pe to‘ohema; pea na‘e muimui kiate kinaua ‘a e kau ‘ulu ‘o ha‘a Filisitia, ‘o a‘u ki he tafafonua ‘o Pete-semesi.
13Pea ‘oku fai ‘e Pete-sēmesi ‘enau utu ‘a e ta‘u uite ‘i he lautoka: pea nau hanga hake ‘o nau mamata ki he ‘a‘ake, pea nau fiefia ke sio ki ai. 14Pea na‘e a‘u mai ‘a e sāliote ki he konga vao ‘o Siosiua ko e tangata Pete-semesi, pea ne tu‘u ai ‘i he potu na‘e ai ha fu‘u maka: pea nau fahi ‘a e sāliote ‘o fefie ‘aki, ‘o nau feia ‘aki ‘a e ongo pulu, ko e feilaulau-mōifua kia Sihova. 15Pea ko e kau Līvai na‘a nau ‘ohifo ‘a e ‘a‘ake ‘o Sihova, pea mo e puha na‘e tu‘u fakataha mo ia, ‘a ia na‘e ‘i ai ‘a e nāunau koula, pea nau tuku ‘i he fu‘u maka: pea na‘e feia ‘e he kau tangata Pete-sēmesi ‘i he ‘aho ko ia ha ngaahi feilaulau-mōifua, mo nau fai mo e ngaahi feilaulau kia Sihova. 16Pea ‘i he mamata ki ai ‘a e ‘ulu nima ‘o e kau Filisitia, na‘a nau foki ki ‘Ekiloni ‘i he ‘aho pē ko ia.
17Pea ko eni ‘a e ngaahi hangatāmaki koula na‘e foki ‘aki ‘e he kau Filisitia ko e holo kia Sihova; ko e taha ma‘a ‘Asitoti, ko e taha ma‘a Kesa, ko e taha ma‘a ‘Asikeloni, ko e taha ma‘a Kati, ko e taha ma‘a ‘Ekiloni. 18Pea ko e ngaahi kumā koula na‘e tatau mo e lau ‘o e ngaahi kolo Filisitia kātoa na‘e kau ki he ‘ulu nima, ‘o fai mei he kolo ‘aa‘i ‘o a‘u ki he vilisi tuku‘uta#6.18 ‘Oku ngali hala ‘a hono hiki ko iá. pea ko e fu‘u maka, ‘a ia na‘e fakamālōlō ki ai ‘a e ‘A‘ake ‘o Sihova, ‘oku kei tu‘u ‘o a‘u ki he ‘aho ni ‘i he konga vao ‘o Siosiua ko e tangata Pete-semesi.
19Pea ne taa‘i ha ni‘ihi ‘o e kau tangata Pete-semesi, koe‘uhi na‘a nau fakasio ki he ‘A‘ake ‘o Sihova, ‘io, na‘a ne taa‘i ‘i he kakai ha toko fitungofulu (ko e toko nimangofulu afe): pea na‘e ‘oiauē ‘a e kakai koe‘uhi kuo taa‘i ‘a e kakai ‘e Sihova ‘aki ha tā lahi.
Ko e ‘A‘ake ‘o e Fuakavá ‘i Kiliati-sialimi
20Pea pehē ‘a e kau tangata Pete-semesi, Ko hai ‘e lava ke tu‘u ‘i he ‘ao ‘o Sihova, ‘a e ‘Otua Mā‘oni‘oni ni? Pea te ne hā‘ele kia hai meiate kitautolu? 21Pea nau tuku atu ha kau talafekau ki he kakai ‘o Kiliati-sialimi, ke tala, Kuo fakafoki ‘e he kau Filisitia ‘a e ‘A‘ake ‘o Sihova; mou ō hifo, ‘o ‘ohake kiate kimoutolu. 22Pea omi ha kau tangata Kiliati-sialimi, ‘o nau ‘ohake ‘a e ‘A‘ake ‘o Sihova, ‘o ‘ave ki he fale ‘o ‘Apinatape ‘i he mo‘unga, pea nau fakatāpui hono foha ko ‘Eliesa ke tauhi ‘a e ‘A‘ake ‘o Sihova.#2 Sām; 1 Kal 13.5-7
Currently Selected:
KO 1 SĀMIUELA 6: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
