KO 1 SĀMIUELA 30
30
Ko e Tau‘i ‘o e kakai ‘Amalekí
1PEA ‘i he faifai pea a‘u ‘a Tēvita mo ‘ene kau tangata ki Sikilaki ‘i hono tolu ‘o e ‘aho, tā kuo ‘ohofia ‘e ha‘a ‘Amaleki ‘a e feitu‘u ko Tonga, mo Sikilaki, pea kuo nau taa‘i ‘a Sikilaki, mo tutu ia: 2pea kuo nau taki pōpula ‘a e kau fefine na‘e ‘i ai, ‘a e si‘i mo e lahi; na‘e ‘ikai te nau tāmate‘i ha taha, ka nau ‘ave pē, ‘o fai atu ‘enau fononga. 3Pea ‘i he a‘u ‘a Tēvita mo ‘ene kau tangata ki he kolo, tā kuo tutu ia; pea ko honau ngaahi uaifi mo ‘enau fānau tangata mo fānau fefine kuo ‘ave pōpula. 4Pea ofa‘aki ‘e Tēvita mo e kakai na‘e ‘iate ia ‘enau fu‘u fākafoa, kae‘oua ke ‘ikai ke ‘i ai hanau mālohi ke tangi. 5Pea kuo taki pōpula ‘a e ongo uaifi ‘o Tēvita, ‘a ‘Ahinoami ko e fefine Sisilili, mo ‘Apikale na‘a na nonofo mo e Kāmeli ko Nāpale.#1 Sām 25.42-43
6Pea na‘e faingata‘a‘ia lahi ‘a Tēvita, he na‘e lau ‘e he kakai ke tolomaka‘i ia; he na‘e kona honau loto takitaha koe‘uhi ko hono ngaahi foha, mo hono ngaahi ‘ōfefine: ka na‘e kumi ivi ‘e Tēvita meia Sihova ko hono ‘Otua. 7Pea pehē ‘e Tēvita ki he taula‘eiki ko ‘Āpaiata, ko e foha ‘o ‘Ahimeleki, ‘unuaki mai mu‘a ‘a e ‘ēfoti: pea ‘omi ‘e ‘Āpaiata ‘a e ‘ēfoti kia Tēvita.#1 Sām 22.20-23 8Pea huhū ‘e Tēvita kia Sihova, ‘o pehē, Ka u tuli koā ki he kongakau ni, te u ma‘u kinautolu? Pea ne tali, Tuli pē, he te ke ma‘u noa pē, ‘o hamusi kotoa.
9Ko ia na‘e ‘alu ‘a Tēvita, ‘a ia mo ‘ene toko onongeau, pea nau a‘u ki he vaitafe ko Pēsoa, pea tuku ai ‘a kinautolu na‘e nofo. 10Ka ka tuli atu pē ‘a Tēvita, ‘e ia mo e toko fāngeau: ka na‘e nofo ha toko uangeau ‘a ia na‘e vaivai, ‘o ‘ikai te nau lava ke a‘a atu ‘i he vaitafe ko Pēsoa. 11Pea nau ‘ilo ha tangata ‘Isipite ‘i he vao, pea nau ‘omi ia kia Tēvita, ‘o nau ‘ange ha‘ane me‘akai, ‘o ne tokoni; pea nau ‘ange hano vai inu. 12Na‘a nau ‘ange foki ha ‘io‘i takaonga fiki, mo e ongo takaonga kālepi tau‘aki; pea hili ‘ene tokoni, na‘e foki mai ‘ene mo‘ui, he kuo ‘ikai te ne kai me‘akai, pe inu ha vai, ‘o ‘aho tolu mālō mo pō tolu. 13Pea pehē ‘e Tēvita kiate ia, ‘Oku ‘o hai koe? Pea mei fē? Pea ne tali, Ko e tama ‘Isipite au, ko e tamaio‘eiki ki ha motu‘a ‘Amaleki; pea ko hono ‘aho tolu eni mo e li‘aki au ‘e hoku ‘eiki, koe‘uhi na‘a ku tō mahaki.
14Ko kimautolu na‘a mau fai tau ki he feitu‘u Tonga ‘o ha‘a Kēleti, mo ia ‘oku kau ki Siuta, mo e feitu‘u Tonga ‘o ha‘a Kēlepi; pea mau tutu ‘a Sikilaki.
15Pea lea ‘a Tēvita ki ai, Te ke ‘ohifo au ki he kongakau na? Pea tali ‘e ia, Fuakava mai ‘i he ‘Otua, ‘e ‘ikai te ke tāmate‘i au, pea ‘e ‘ikai te ke tukuange ki he nima ‘o hoku ‘eiki, pea te u toki ‘ohifo koe ki he kongakau na.
16Pea ne ‘ohifo ia, pea tā kuo mafola kinautolu ki he funga ‘o e fonua kotoa, ‘oku nau kai, mo inu mo fai kātoanga, koe‘uhi ko e fu‘u vete kuo nau ma‘u mei he fonua ‘o e kakai Filisitia, pea mei he fonua ‘o Siuta.
17Pea taa‘i kinautolu ‘e Tēvita mei he ataata ‘o e ‘aho ko ia, ‘o a‘u ki he efiafi ‘o e ‘aho ‘e taha; pea na‘e ‘ikai hao ha taha, ngata pē ‘i ha toko fāngeau na‘e talavou, ‘a ia na‘a nau heka kāmeli ‘o hola. 18Pea hamusi ‘e Tēvita ‘a e me‘a kotoa na‘e ‘ave ‘e ‘Amaleki, ‘o ne ma‘u mai hono ongo uaifi. 19Pea kuo ‘ikai mole ha‘anau me‘a si‘i pe lahi, ha fānau tangata pe fānau fefine, pe ko e me‘a na‘e vete, pe ha me‘a kuo nau to‘o: 20ne foki mai mo Tēvita hono kotoa, pea ne to‘o foki hono kotoa ‘o e fanga sipi mo e fanga pulu, ‘a ia na‘a nau fakateka mu‘omu‘a ‘i he monumanu ko ē,#30.20 na‘a nau fakateka mu‘omu‘a ‘i he monumanu ko eé; ‘Oku ‘ikai ke mahino ‘a hono faka-Hepeluú, ka ‘oku ngali tonu hono hiki ‘o na‘a nau fakateka ‘a e monumanú ‘i mu‘a ‘iate kinautolu. ‘o nau pehē, Ko e vete koe ‘a Tēvita.
21Pea a‘u ‘a Tēvita ki he toko uangeau na‘e vaivai, ‘o ‘ikai lava ke ‘alu mo Tēvita, ‘o nau tuku ‘i he vaitafe ko Pēsoa: ‘o nau ‘alu atu ke fakafetaulaki kia Tēvita, pea ke fakafetaulaki ki he kakai na‘e ‘iate ia: pea ‘i he ofi ‘a Tēvita ki he kakai, na‘a ne Si‘oto‘ofa kiate kinautolu. 22Pea ko e kau tangata kovi mo fakaPileali ‘iate kinautolu na‘e ‘alu mo Tēvita na‘a nau kamata lau, ‘o pehē, Na‘e ‘ikai te nau ‘alu mo kitautolu; ko ia, ‘e ‘ikai te tau ‘ange kiate kinautolu ha me‘a mei he vete kuo tau ma‘u mai; ngata pē ‘i he uaifi mo e fānau ‘a e tangata takitaha, ke nau ‘ave kinautolu ‘o ‘alu.
23Kae pehē ‘e Tēvita, Kāinga, ‘e ‘ikai te mou fai pehē ki he me‘a kuo foaki ‘e he ‘Eiki kiate kitautolu; he ko ia ia kuo ne tauhi kitautolu, pea kuo ne tuku ki hotau nima ‘a e kongakau ne ha‘u ke tau‘i kitautolu. 24Pea ko hai ‘e fakaongo kiate kimoutolu ‘i he me‘a ni? he hangē ko e ‘inasi ‘o ia ‘oku ‘alu hifo ki he tau ‘e pehē ‘a e ‘inasi ‘o ia ‘oku nofo ‘i he nga‘oto‘ota: te nau ‘inasi tatau pē. 25Pea talu ai mo ‘ene pehē, he na‘a ne fokotu‘u ia ko e tu‘utu‘uni mo e kupu‘i konisitūtone ki ‘Isileli, pea ‘oku kei fai ni.
26Pea a‘u ‘a Tēvita ki Sikilaki, pea ne tuku atu ha me‘a mei he vete ki he mātu‘a Siuta, ‘a hono kau fe‘iloaki, he‘ene pehē, ‘Ē, ko e me‘a‘ofa eni ma‘amoutolu mei he vete ‘o e ngaahi fili ‘o Sihova: 27ki ha ni‘ihi ‘i Pēteli, mo ha ni‘ihi ‘i Lemoti ‘i he Tonga, pea ki ha ni‘ihi ‘i ‘Iatili, 28mo e ni‘ihi ‘i ‘Aloeli, mo e ni‘ihi ‘i Sifimoti, mo e ni‘ihi ‘i ‘Esitemoa, 29pea ki ha ni‘ihi ‘i Lākali, mo e ni‘ihi ‘i he ngaahi kolo ‘o e ‘Ilameeli, pea ki ha ni‘ihi ‘o e ngaahi kolo Keini; 30pea ki ha ni‘ihi ‘i Hoama, pea mo ha ni‘ihi ‘i Koa‘asani, pea ki ha ni‘ihi ‘i ‘Ātaki: 31pea ki ha ni‘ihi ‘i Hepeloni, mo e ngaahi potu na‘e fa‘a ‘alu holo ai ‘a Tēvita mo ‘ene kau tangata.
Currently Selected:
KO 1 SĀMIUELA 30: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
