KO 1 SĀMIUELA 3
3
1PEA ko e tamasi‘i ko Sāmiuela na‘a ne fai ‘a e tauhi ‘o Sihova ‘i he ‘ao ‘o ‘Īlai, pea ko e folofola ‘a Sihova na‘e ma‘ungata‘a ‘i he taimi ko ia: na‘e ‘ikai ha vīsone ‘e pā mai. 2Pea ko e ‘aho ‘e taha ‘i he taimi ko ia, kuo toka ‘a ‘Īlai ‘i hono potu mohe, (tokua kuo kamata nenefu hono mata, ‘o ‘ikai te ne lava ke sio), 3pea kuo te‘eki ke mate ‘a e maama ‘a e ‘Otua, pea na‘e tokoto ‘a Sāmiuela ke mohe ‘i he Temipale ‘o Sihova, ‘a ia na‘e ‘i ai ‘a e ‘A‘ake ‘o ‘Elohimi; 4mo e ui ange ‘e Sihova ‘a Sāmiuela: pea tali ‘e ia, Ko au. 5Pea ne lele kia ‘Īlai, ‘o ne pehē, Ko au eni: he na‘a ke ui au. Pea ne tali, Na‘e ‘ikai te u ui: toe tokoto pē. Ko ia na‘a ne ‘alu ‘o tokoto.
6Pea toe fai ‘e Sihova, ‘o ne toe ui, Sāmiuela ē. Pea tu‘u ‘a Sāmiuela ‘o ne ‘alu kia ‘Īlai, ‘o ne pehē, Ko au eni: he na‘a ke ui au. Ka ka tali ‘e ia. Na‘e ‘ikai te u ui, tama; toe tokoto. 7Ka ‘oku te‘eki ‘ilo ‘a e ‘Eiki ‘e Sāmiuela, pea kuo te‘eki fakahā kiate ia ‘a e folofola ‘a Sihova.
8Pea toe fai ‘e Sihova ‘a e ui, Sāmiuela! ko hono tu‘o tolu ia. Pea ne tu‘u ‘o ‘alu kia ‘Īlai, ‘o ne pehē, Ko au eni; he na‘a ke ui au. Pea e‘a kia ‘Īlai, tā ko Sihova kuo ne ui ‘a e tama.
9Ko ia na‘e pehē ‘e ‘Īlai kia Sāmiuela, ‘Alu, ‘o tokoto: pea ka faifai, ‘o ne ui koe, pea ke tali, Fai mai ha‘o folofola, ‘Eiki; he ‘oku fakaongo atu ‘e ho‘o tamaio‘eiki ko au. Ko ia na‘e ‘alu ‘a Sāmiuela, ‘o tokoto ‘i hono potu mohe.
10Pea hā‘ele mai ‘a e ‘Eiki, ‘o tu‘u ‘o ne ui mai ‘o hangē ko e taimi ko ē mo ē, Sāmiuela, Sāmiuela. Pea toki pehē ‘e Sāmiuela, Fai mai ha‘o folofola, he ‘oku fakaongo atu ‘e ho‘o tamaio‘eiki ko au.
11Pea folofola mai ‘a Sihova kia Sāmiuela; Vakai, ko au ‘oku ou teu fai ha me‘a ‘i ‘Isileli, ‘a ia ‘e vavana ‘a e ongo telinga ‘o ia te ne fanongo ki ai. 12‘I he taimi ko ia te u fakahoko kia ‘Īlai ‘a e me‘a kotoa kuo u lea ki ai, ‘o kau ki hono fale; te u kamata pea te u faka‘osi. 13He kuo u fakahā kiate ia#3.13 kuo u… ia: Ko hono faka-Hepeluú ia, ka ‘oku pehē he hiki fuoloa ‘e taha: te u fakahā kiate ia. te u fakamaau ‘e au hono fale ‘o ta‘engata, koe‘uhi ko e kovi na‘a ne ‘ilo ki ai, he fakatupu ‘e he‘ene fānau ha mala kiate kinautolu, kae ‘ikai te ne ta‘ofi kinaua. 14Pea ko ia kuo u fuakava ki he fale ‘o ‘Īlai, ko au ē ha lava hano fakamolemole ‘o e kovi ‘o e fale ‘o ‘Īlai ‘aki ha feilaulau, pe ha tuku me‘a‘ofa ‘o ta‘engata.
15Pea tokoto ‘a Sāmiuela ki he ‘apongipongi, pea ne toki fakaava ‘a e ngaahi matapā ‘o e fale ‘o Sihova. Pea na‘e manavahē ‘a Sāmiuela ke fakahā ‘a e vīsone kia ‘Īlai. 16Ka ka ui ‘e ‘Īlai ‘a Sāmiuela, ‘o ne pehē, Tama Sāmiuela. Pea tali ‘e ia, Ko au.
17Pea ne pehē, Ko e hā ‘a e me‘a na‘a ne folofola‘aki kiate koe? ‘Oua foki, ‘o ‘oua te ke fufū meiate au. ‘Ilo ‘e koe ‘o lahi hake kapau te ke fufū meiate au ha taha ‘o e ngaahi me‘a na‘a Ne folofola‘aki kiate koe. 18Ko ia, na‘e fakahā ‘e Sāmiuela kiate ia hono kotoa, ‘o ‘ikai te ne fufū meiate ia. Pea pehē ‘e ia, Ko e ‘Eiki pē: ke fai pē ‘e ia ‘a e me‘a ‘oku ne finangalo ki ai.
19Pea na‘e tupu ‘a Sāmiuela, pea na‘e ‘iate ia ‘a Sihova, ‘o ‘ikai te ne tuku ke tō kelekele ha‘ane lea ‘e taha. 20Pea na‘e ‘ilo ‘e ‘Isileli kātoa mei Tani ‘o a‘u ki Peasipa kuo fakapapau ‘a Sāmiuela ko e palōfita ‘a Sihova. 21Pea na‘e toe hā ‘a e ‘eiki ‘i Sailo: he na‘e fakahā ia ‘e he ‘Eiki kia Sāmiuela ‘i Sailo ‘i he‘ene folofola. Pea na‘e hoko ‘a e lea ‘a Sāmiuela ki ‘Isileli kātoa.
Currently Selected:
KO 1 SĀMIUELA 3: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
