KO 1 SĀMIUELA 27
27
Ko e Toi ‘a Tēvita he Lotolotonga ‘o e Kakai Filisitiá
1PEA pehē ‘e Tēvita ‘i hono loto, Tokaange ha ‘aho te u mole ‘i he fai ‘a Saula: ko e me‘a pē taha ‘oku toe kiate au ke u mātu‘aki hola ki he fonua ‘o e kau Filisitia; pea ‘e tuku ‘e Saula ‘ene kei kumi au ‘i he ngaahi feitu‘u ‘o ‘Isileli: ko ia te u hao mei hono nima. 2Pea tu‘u ‘a Tēvita, ‘o laka ange, ‘e ia mo e toko onongeau na‘e ‘iate ia kia ‘Ākisi foha ‘o Maoki, ko e Tu‘i Kati. 3Pea nofo ‘a Tēvita kia ‘Ākisi ‘i Kati, ‘e ia mo ‘ene kau tangata, takitaha mo hono fale, pea ‘ia Tēvita hono ongo ‘unoho ko ‘Ahinoami ko e fefine Sisilili, mo ‘Apikale ko e fefine Kāmeli, ‘a ia na‘e nonofo mo Nāpale. 4Pea na‘e fakahā kia Saula, Tokua kuo hola ‘a Tēvita ki Kati, pea na‘e ‘ikai te ne toe kumi ki ai.
5Pea lea ‘a Tēvita kia ‘Ākisi, Ka kuo u ta‘imālie ho‘o ‘ofa, pea ke nau tuku mai ha potu, ha taha pē ‘i he ngaahi kolo ‘i tuku‘uta, ka u nofo ai: he koe‘uma‘ā ke nofo ki he ‘afio na‘a ho‘o tamaio‘eiki ko au ‘i he kolo hau? 6Pea ‘ange ki ai ‘e ‘Ākisi ‘i he ‘aho ko ia ‘a Sikilaki: ‘a ē ā ‘oku kau ai ‘a Sikilaki ki he ngaahi Tu‘i Siuta, ‘o a‘u ki he ‘aho ni. 7Pea ko e fuoloa ‘o e nofo ‘a Tēvita ‘i he tuku‘uta ‘o e kau Filisitia ko e ta‘u kātoa mo e māhina ‘e fā.
8Pea ‘alu hake ‘a Tēvita mo ‘ene kau tangata, ‘o nau tau‘i ‘a ha‘a Kēsuli, mo ha‘a Kīsili, mo ha‘a ‘Amaleki: ko kinautolu na‘e nofo ‘i he fonua talu mu‘a ‘i ho‘o ‘alu ki Sua, ‘o fai ki ‘Isipite. 9Pea taa‘i ‘e Tēvita ‘a e fonua, ‘o ‘ikai te ne tuku ke mo‘ui ha tangata pe fefine, ‘o ne ‘ave ‘a e fanga sipi, mo e pulu, mo e ‘asi, mo e kāmeli, mo e kofu; pea ne foki, ‘o a‘u kia ‘Ākisi. 10Pea me‘a ‘a ‘Ākisi, Tā kuo mou toki fai tau ki ha potu ‘inē? Pea tali ‘e Tēvita, Ki he potu tonga ‘o Siuta, pea ki he potu tonga ‘o ha‘a ‘Ilameeli, pea ki he potu tonga ‘o ha‘a Keini. 11Pea kuo ‘ikai tuku ‘e Tēvita ke mo‘ui ha tangata pe fefine ke ha‘u mo kinautolu ki Kati, he‘ene pehē, Na‘a nau tala ‘etau me‘a, Tokua na‘e pehē ‘a e fai ‘a Tēvita, pea ‘e pehē ‘ene anga lolotonga ‘ene nofo ‘i he tuku‘uta ‘o Filisitia. 12Pea tui ‘e ‘Ākisi kia Tēvita, ‘o ne pehē, Kuo mātu‘aki fakanamukuu‘i ia ‘e ia ki hono kakai ‘Isileli, ko ia te ne nofo ko ‘eku tamaio‘eiki ‘o ta‘engata.
Currently Selected:
KO 1 SĀMIUELA 27: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
