Salmos 66
66
Mash nungkanmaya ainautiram warasrum Yus pachisrum kanta kantamruataram
1Mash nungkanmaya ainautiram warasrum Yus pachisrum kanta kantamruataram.
2Yuse naari timiá pengker aa nu pachisrum kanta kantamruataram.
Tura Yus pachisrum:
Ameketme pengkeram tusaram kanta kantamruataram.
3Tura Yus chicharkuram:
“Aminu najanamuram ainauka nekasar shiiram ainawai.
Ame timiá kakaram asakmin,
ami nemasem ainau shamraminak amin eemkiar ayaarartin ainawai.
4Tura asaramtai mash nungkanmaya ainau amincha:
Ameketme juuntam turamiartin ainawai.
Nunia amin naarmin pachisar kantan kantamawartin ainawai” Yus titaram.
5Mash nungkanmaya ainautiram,
Yuse turamuri ainau wainkatasrum winitaram.
Turasha aints ainautin yainmaktas wainchatin shiirman najanamia nu wainkatasrum winitaram.
6Ningki juun entsa mujukash ati tusa najanamiayi.
Yus turamtai ii juuntri ainau yaanchuik nu juun entsanka kukarak katingkiarmiayi.
Tura asamtai ii Yusringkia warartusmi.
7Yus ni kakarmarijai tuke aints ainautin inatmartinuitji.
Tura niin umirtan nakitin ainauka umirtutsuk pujusarai tusa mash nungkanmaya ainaun jiij pujurtinuitai.
8-9Yus iinka iwiaaku pujustaram tusa tura ayaarairap tusa waitkartukmiayi.
Tura asamtai mash nungkanmaya ainautiram,
ii Yusri pengker awajsataram.
Turasha Yus pachisrum kanta kantamkuram antumtikiataram.
10Ii Yusriya ameka tuke iinka nekapkartinuyame.
Aints ainau jiru kuik pakuichau at tusar,
jiinam jiyaar shiiram najaninawa nunismek iincha pengker awajkartustasam nekapkartinuyame.#1 Pe 1.7
11Aints ainau kuntinun kutrinawa nunismek iincha chikich ainau achikiarti tusam tuke tsangkamkartin ayame.
Tura asam aints ainau merman entsamtikina nunismek ameka iinka tuke nekapkartinuyame.
12Tura aints ainau pachitsuk najararti tusam tsangkamkartinuyame.
Ame turau asakmin,
iisha entsanam jakerua nunisrik tura jiinmasha epeamua nunisrik nekapmamnuyaji.
Turarin wainiatum ukunam nungka pengkernum pujusarti tusam pujkartusmiame.
13-14Tura asakmin ami jeemin wayaan,
amin naarmin pachisan tangkurun maan epeatatjai.
Nuna turakun yaanchuik shamrumtinnum pujakun:
Wikia junia iwiaaku jiinkinka tangkurun maan susatatjame timiaja nunaka umiktatjai.
15Tangku epetinam ami jeem aa nuni tangkurun epeatatjai.
Waaka aishmangkri ainaun tura chipu ainauncha tura uwija aishmangkri kungkuram ainia nuna aminka susatatjame.
16Yus timiatrusrumek umirkau ainautiram mash winitaram.
Tura Yus wina pengker awajtusmaurun pachisan etsermatai nu antuitaram.
17Wina jangkerjai Yusrun seamiajai tura wararsamiajai.
18Wikia tunau nintimsan pujawaitmataikia,
wina Apurka winaka anturtukchamin ayayi.
19Turayat wi seamurnaka anturtinuyayi.
20Tura wi seamurnaka anturtuk ni anengkratairin suritrukchau asamtai,
Yusrunka ameketme pengkeram tajai.
Currently Selected:
Salmos 66: acu
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
