Proverbios 24
24
- 19 -
1Pase aints ainauka pengker pujuinawai, tuuka nintimraip. Tura niijai iruntratasan wakerajai
tuusha nintimraip. 2Kame, pase aints ainauka tuke maaniatnun nintimsar pujuinawai. Tura asar
pase turatniun pachisar tuke chichainawai.
- 20 -
3Jea jeamin ainau nekau asar jean jeaminawai. Tura paan nintimsar painin jintatin ainawai.
4Tura ni nekamurijai jea tesakmauri mash pengker arti tusar tesawar, warinchu shiiram iruna
nuna piirkanam kentsartin ainawai.
- 21 -
5Aints paan nintimniuka aints kakarman nepetkatnuitai. Turasha aints nekamtikiartinka aints kakarmanka nangkamaktinuitai. 6Tura asamtai mesetan najanawartas: Itiurkamnawaita tusar nintip ainaun yuuminawai. Tura ni nemase ainaun nepetkartas chichaman najanin ainaun untsuri wakerinawai.
- 22 -
7Aints nintinchauka nekau ataj tayat jeachminuitai. Tura asa juun ainau iruntramunam chichaktatkama tujintawai.
- 23 -
8Aints chikich ainaun tuke pase awajsatas wakerina nuna pachisar: Nuka pase nintintinuitai tinawai.
9Aints netsea nuka aya tunaanak nintimratnuitai. Tura asamtai aints ainau katsekmin ainaun arantak nakitinawai.
- 24 -
10Itiurkachminnum atsantrachmin nekapeakmeka, kakarmarka jumchikita tusam paan nekaatnuitme.
- 25 -
11Nangkamiar maawartinnum jukimu ainauka angkanmamtikiata. Tura nangkamiar:
Nu aints maataram tinu ainaunmaya nu aintska uwemtikrata. 12Wikia nekaachmajai takumningkia,
aintsu nintin mash nekawa nuka: ¿Ameka nekaachmashum tusa, nekas a nuka nekarmashtatuak?
¿Tura amin jakai tusa wainu weawa nuka nekaashtatuak? Yus aintsti ainauti turamurinka mash jiirmastinuitji. Tura asa pengker aa nuna turinauka pengker aa nuna jukiartin ainawai. Antsu pase aa nuna turinauka pase aa nuna jukiartin ainawai. #2 Cor 5.10
- 26 -
13Uchiru, wapasa yumiri mukunata. Wapasa jee jukimka, nuka nekas yuminuitai tusam nekapsatnuitme.
14Paan nintimratniuka tura nukap nekaatniuka wapasa yumiria tumawaitai. Nu wainkamka ukunam pengker pujustinuitme. Tura: Nuna turatasan wakerajai takumka, nukap arusam nusha turatnuitme.
- 27 -
15Aints anangmichu pachisam: Pase awajsatatjai tu nintimraip. Tura ni pujutirin mesraip.
16Kame, pengker turin aina nuka sieten iyainayat, ataksha nantakiartin ainawai.
Antsu pase aints ainauka wait wajaktinnum iyarartinuitai.
- 28 -
17Ami nemasem itiurkachminnum pujamtai warasaip. Tura tukumak iyaramtaikia pengkeraitai tiip.
18Apu Yus nunaka jiitnaka nakitawai. Antsu wait anentak ami nemasem tsangkuratnuitai.
- 29 -
19Pase aints ainau jiisam kajerkaip. Tura ni pachisam: Maj, wisha nijai metek yuumatsuk pujustasan wakerajai tiip. 20Pase aints ainau tuke pengkerka pujuschartin ainawai, antsu ni iwiaakmari namparing kajinua nunisang amuktinuitai.
- 30 -
21Uchiru, Apu Yus tura aintsu apurisha umirkata. Tura ni chichamen umirtan nakitin ainaujai pachinkaip. 22Pase aints ainau aneachmau itiurchatniunam waitnasar pujusartin ainawai. Turasha Apu Yus aintsu apurijai ¿warí wait wajaktinnasha akupkartinuita tusar yáki nekaat?
Chikich Nekau Ainau Nuikiartamuri
23-24Jusha nukap nekau aina nuna chichamentai:
Aintsu apuri ainau tunau turamun nekaawartas eketinauka tunaun turaun chicharinak:
Ame pengke aints asam jiinkita tinamtaikia, nuka paseetai. Chikich aints ainau nuna antukar
nu apun pachisar pase chichasartin ainawai. Tura chikich nungkanmaya ainausha niin nakitrartinuitai.
25Antsu apu ainau tunau ainaun ni wait wajaktintrin suina nuka nekasar pengker pujusartin ainawai.
Tura asaramtai aints ainau mash niin: Yus yainmakti tiartinuitai.
26Aints chikich aintsun pengker aimu wea nuna chichamenka
chikich aints ainau pengker nintimsar anturin ainawai.
27Numi ajaktin umisam, tura árak tenapkesam araam, nuniangka jeemin jeamkata.
28Ami irutkamuram pachisam nangkami wait chichaman chichaakum wiasmakaip.
Tura wait chichamjai chikich aints tsanuraip.
29Chikich aints amin pase awajtamak pujumia nu pachisam: Maj, wikia yapaijkiatjai tiip. #Rom 12.19
30Nuik aints nakia nuna ajarin tura nintinchawa nuna saakarincha nangkamakmajai.
31Tura ajarin jangkik nupak, tura wenukrisha yumpungkaun wainkamjai. Tura nuna wainkan
nukap nintimramjai. 32Tura nuna wainkau asan wi nuimiarja nuka nuwaitai: 33Ame tamrukam
kánakum, karamin asam, pengker kanurtasam minakmamsam tepamin, 34ami yuumaktintrum yaitas
kasa aintsua nunisang amin kuikiartichun awajtamsatas aneachmau winitramtinuitai.
Currently Selected:
Proverbios 24: acu
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
