Proverbios 21
21
1Apu Yus entsa tu weti tusa inawa nunisang aintsu apuri
ni wakeramurin timiatrusang umirtukti tusa nintimtikui.
2Aints ningki nintimias: Wi turaja nuka mash pengkeraitai tayat,
Apu Yus: Waruka tu nintimua tusa nekawai.
3Aints ainau tangkun Yusen susartas maina nuna nangkamasarang pengker nintimsar
ni wakeramurin umirkarti tusa, Apu Yus timiá wakerawai.
4Ni jiijai suwirpiaku jiimsatin, tura wikia miajuitjai tumamtin,
tura aintsu pase nintimtairisha mash tunau ainawai. #1 Juan 2.15-17
5Aints nunaa eemak pengker nintimiar: Tu takakmastajai tusa, takatan nangkamawa nuka nukap eemtikiatnuitai.
Antsu chikich aints waurak: Wári takatan umistajai tusa, takatrin tu nangkamawa nuka nukap nuwaktinuitai.
6Anangkartin ainau warinchurin nukap kiaungkarmia nuka yurangkim tsaa sukuamunam
mengkawa nunisketai. Aints wári kuikiartin wajastasar wakerinauka wári jakatasar wakerinawai.
7Pase aints ainau pengkeran turatniun nakitinawai.
Antsu tuke maanitan wakerinau asar mengkakartin ainawai.
8Aints wait chichaman etsera nuka mengkakatnuitai.
Antsu anangmichu aina nuna turutiringkia jinta tupnik jeatnua nunisarang ainawai.
9Juun jea shiiram iwiaramunam katsekmin nuwajai pujustinka mianchawaitai.
Antsu jea tiupchinam ningki pujustinka timiá pengkeraitai.
10Aints paseka tuke pase turatniunka nintimias pujawai.
Tura asa ni irutkamuri ainaunka mash wait anentsuk pujawai.
11Wishiikiartinun awatraramtai, nintinchau ainau nuna jiisar: Turunawai tusar
nuimiarartinuitai. Tura paan nintimniunka aya chicharinam, wári nuimiartinuitai. #Prov 19.25
12Yus nekas tunaarinchawa nuka pase aintsu pujutrin jii pujurui.
Tura asa pase aints ainau itiurkachminnum wearti tusa akupkatnuitai.
13Yuuminak pujuinauka yainkata tinamaitiat, chikich aints ainau antutsuk pujuinauka
ukunam yuuminak yainkata tinamtaikia, chikich ainauka pengké pachischartin ainawai.
14Kajeu aintsun chikich aints warinchun nangkami suamtai, warinchun shishkamsang
susamun jukitata nuka timiá kajeu pujayat, kajekmaurin wári inaisatnuitai.
15Chichaman nekamtikin pase turinaun pachis: Achikrum karsernum akupkataram tamatai,
tunau turichu ainau warainawai. Antsu pase turin ainauka shaminak kurainawai.
16Aints paan nintimratniun jintanmaya jiinki weakka, wári jakau iwiartainium ayamsatnuitai.
17Aints nampetan wakerak, nangkami pujus, perfumen akikian sumaktas wakerakka, kuikiartichu atinuitai.
18Anangkartin tura pase aints ainauka wait wajakartin ainawai.
Antsu anangmichu tura pengkeran turin ainauka uwemrartin ainawai.
19Nuwa kajeu tura katsekminjai pujustinka mianchawaitai. Tura asamtai
aints atsamunam ningki pujustinka timiá pengkeraitai. #Prov 21.9
20Paan nintimniu jeenka kuik tura yutaisha nukap irunui.
Antsu aints nintinchauka ni takaka nuna mash nangkami ajapui.
21Aints tupin nintimias tura wait anenkartin pujakka, chikich ainauka: Nuka
pengker aintsuitai tiartinuitai. Tura jakayat tuke Yusnum iwiaaku pujustinuitai.
22Aints timiá paan nintimniuka ni nekamurijai chikich ainaun nepetkatnuitai.
Tura nekasan kakarmaitjai taunka ni pase nintimaurincha ni nekamurijai nepetkatnuitai.
23Aints nangkamikia chichatsuk tuke yaitas chichawa nuka itiurkachminumka jeashtinuitai.
24Aints miajuitjai tumamin meemas tura katsekmak pujau asamtai, ni naaringkia wishikiartin naartinuitai.
25-26Aints nakikia aya tuke wakerinuitai. Tura takakmastinasha nintimchau asa,
waring achat mash wakerinuitai. Turayat jukichu asa kintajai metek jakamin nekapeawai.
Antsu asumkia takatan shamtsuk pujus, surimtsuk tuke chikich aints ainaun yayaawai.
27Pase aints ainau pase nintimsar tangkun maawar Yusen susartas epeena nunaka Apu Yus tsuutawai.
28Aints wait chichaman etsera nuka jakatnuitai. Antsu aints antuj puja nuna inininamtaikia,
antujamniaun chichastinuitai.
29Pase aints ainauka: Wikia nekau aintsuitjai tusar chikich aints ainaun anangkawartinuitai.
Antsu aints anangmichuka: ¿Itiur pujaja? tusa paan nintimias pujuwitai.
30Aintstikia nekau akurkia, tura nintip akurkia, turasha paan nintimsar pujakrikia,
Apu Yuse pengké anangkashtinuitji.
31Suntar ainau mesetnum weartas ni kawairin tenapkesar iwiarinawai.
Antsu ni nemase ainaun nepetkatniun Yusek ningki tsangkatkatnuitai.
Currently Selected:
Proverbios 21: acu
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
