Taitu 3
3
YaꞋan ili i na i gaꞋin
1Dana uma a̱ nu kpamu a panaka ngono n aza a̱ gba̱ra̱-gba̱ra̱ o tsugono. Uma a̱ nu a pana kadanshi ka̱ta̱ o yongo ufoɓushi ayin tutu adama a na a yaꞋan ili i na i gaꞋin. 2Ka̱ta̱ a ula vuza n kawuya ba, ka̱ta̱ kpamu a iwan kanananai. O okpo aza a̱ a̱ɗu a̱ yuwu ka̱ta̱ a yaꞋan aza a babu a̱ra̱ɗi u yaba dem.
3A ayin a mani-mani a ɗe, a̱tsu feu ci yongo ta̱ n tsulau n ukpa̱ɗi u kupana kadama tsu nan lo. Uma o yoku a̱ ya̱nsa̱i tsu, ɗa tso okpoi agbashi a̱ ubuta̱ u kuciga ili i kavama n a̱bunda̱i, ɗa tso okpoi agbashi a kupana uyoꞋo wi ili i gbani-gbani. Wuma u tsu wi ta̱ tukpa n kavama n tsurala. Ci iwan ta̱ uma o yoku, ɗa ele feu a iwain tsu.
4Amma Ka̱shile, a̱yi na wi Kishi ka̱ tsu, u yotsongi tsu ma̱riki ma̱ ni n ucigi u ni. 5Wi isa tsu ta̱ adama a asuvayali a̱ ni. Adama a̱ usuɓi a̱ tsu a ɗa ba. U za̱Ꞌa̱ ta̱ unushi u tsu, ɗa u nekei tsu wuma u savu a̱ ubuta̱ wa Ayinviki a̱ Ka̱shile. 6Ka̱shile ka̱ tsuwa̱nka̱i tsu Ayinviki a̱ ni gbani adama a ili i na Yesu Kishi ka̱ tsu u yaꞋin. 7Ka̱shile ka zuwa ta̱ tso okpo babu unushi adama a̱ kasingai ka̱ a̱bunda̱i ka̱ ni. Gogo na ci yeve ta̱ ci ta̱ a̱ kuciya̱ wuma u babu uteku. 8Ili i nam pa ra̱ka̱ i na n danai ɗa̱ mayun ɗa. N ciga ta̱ vu gbagbala uma a yaꞋan i ɗa, adama a na yaba dem vu na wu ushuki n Ka̱shile u zuka n kuyaꞋan ulinga u ma̱riki ayin dem. Ili i nam pa ya i gaꞋan ta̱, i ɗa yi ta̱ kpamu a̱ kutuka̱ n katsupu ka singai u yaba dem.
9Ka̱ta̱ a cina wu a kadanshi ka tsulau a ukuna wi ili ya aza a cau a̱ tsu ba. Ka̱ta̱ a cina wu feu a kanananai n vishili a̱ ubuta̱ u kutono Wila̱ wa Ayahuda ba. IcuꞋu yi ili i kavama i nam pa i ɗa i tsu la̱nga̱sa̱ ayin wasasa. 10Vuza wi baci a̱ kutuka̱ n kadanshi ka mawansa a̱ ka̱tsuma̱ ka̱ ɗa̱ adama a na u pece ɗa̱, ka̱ta̱ vu ɓarangu yi kute ka̱ta̱ kpamu vu ɓarangu yi ire. U pana baci ba, ka̱ta̱ i doku i yongo n a̱yi ba. 11Adama a na icuꞋu i uma i nan lo i iwan ta̱ kadanshi ka mayun. Uma a nan lo i ta̱ a kuyaꞋan unushi, ta kpamu i a̱ kula̱nga̱sa̱ ka̱ci ke le nannai.
Ikya̱shi yu ukocishi i Bulusu
12N sheshe ta̱ kusuku Atima ko Tikiku wa̱ nu. Vuza te vi le u yawa baci, ka̱ta̱ vu dakaka vu cina mu a Nikofoli gogoꞋo. Ili i na i zuwai i ɗaɗa ta ɗe n sheshei kushamgba ali ayin a̱ uta̱ni gbende. 13Dakaka adama a na vi ciya̱ vu ɓa̱nka̱ Zina keyevika̱wila̱ n Apolosu a̱ ubuta̱ wu nwalu n le. Ɓa̱nka̱ le a̱ ciya̱ ili ra̱ka̱ i na a cigai. 14Aza o Kutoni a piꞋisa kuyaꞋan ili i singai ka̱ta̱ feu a̱ ɓa̱nka̱ aza a na i a kuciga uɓa̱nki. Ili i na i zuwai i ɗaɗa u yotso ta̱ uma a̱ tsu a yaꞋan ulinga u ma̱riki n wuma u le.
15Yaba dem wi ta̱ a̱ kukya̱sa̱ wu. N folono wu ta̱ vi kya̱sa̱ka̱ mu aza o Kutoni ra̱ka̱ a na i a kuciga tsu.
Ka̱sa̱kpa̱ kasingai ka̱ Ka̱shile ko yongo n a̱ɗa̱ ra̱ka̱.
Currently Selected:
Taitu 3: asgNT
Highlight
Copy
Compare
Share
Want to have your highlights saved across all your devices? Sign up or sign in
© 2012 Wycliffe Bible Translators, Inc. All rights reserved
