Roma 10
10
1Uma a̱ va̱, ili i na n laꞋi n kuciga i ɗaɗa Ayahuda ra̱ka̱ a̱ ciya̱ wishi. Na lo ɗa avasa a̱ va̱ u Ka̱shile. 2N yeve ta̱ a ciga ta̱ kuyaꞋanka Ka̱shile tsugbashi, amma e yeve 3ili i na i tsu zuwa Ka̱shile kushuku n uma ba. A kucikpa ɗa i a kugbagbala o bonoko ka̱ci ke le aza a̱ usuɓi n uye u le. Ɗa a iwain kutono uye u Ka̱shile u na u tsu bonoko uma aza a̱ ma̱riki. 4Kirisiti Kishi u zuwa ta̱ Wila̱ wa wo okpo babu utsura. Ka̱shile ko tsu bonoko ta̱ aza a na e nekei ka̱ɗu n a̱yi o okpo aza a̱ usuɓi.
Uma ra̱ka̱ i ta̱ a kufuɗa kuciya̱ wishi
5Musa u ɗana ta̱ uteku u na Ka̱shile ko tsu bonoko uma aza a̱ usuɓi adama o kutono Wila̱. U danai, “Vuza na de dem u tonoi ili i na Wila̱ u danai u yaꞋan, wi ta̱ a̱ kuciya̱ wuma.”#A.Gan. 18:5. 6Amma ili i na Katagarda ka Ciɗa ko yotsongushi adama o kokpo aza a̱ usuɓi a̱ ubuta̱ wu uneki u ka̱ɗu i ɗa na: “Ka̱ta̱ vu danaka ka̱ci ka̱ nu ba, ‘Yayi u kubana gaɗi?’ ” (Na va wi ta̱ a kudana, “Yayi u kubana gaɗi ka̱ta̱ u cipa̱ n Kirisiti Kishi a aduniyan?”) 7“Ka̱ta̱ kpamu vu dana ba, ‘Yayi u kubana ɗaka a̱ ubuta̱ wa̱ a̱kpisa̱?’ ” (Na va wi ta̱ a kudana, “Yayi u kubana a̱ ubuta̱ wa̱ a̱kpisa̱ ka̱ta̱ u ɗengusa̱ Kishi.”) 8Ili i na Katagarda ka Ciɗa ka danai i ɗa na: “Akaka a i ta̱ ɗevu n avu; i ta̱ a̱ una̱ u nu n ka̱ɗu ka̱ nu kpamu.” Ɗaɗa kuyotsongusu ku uneki u ka̱ɗu ku na ci a kudansa.
9Vu dansa baci sakaɗi, “Yesu ɗa Vuzagbayin,” ɗa baci kpamu vu ushuki a̱ ka̱ɗu ka̱ nu a na Ka̱shile ka̱ ɗengusa̱i Yesu a̱ ubuta̱ wu ukpa̱, Ka̱shile ki ta̱ a kisa wu. 10Vuza na baci wu ushuki n ka̱ɗu ka̱ ni, ka̱ta̱ adama a nannai ta na Ka̱shile ko bonoko yi vuza vu usuɓi. Vu dana ta̱ kpamu sakaɗi a na vi nekei ka̱ɗu, ka̱ta̱ adama a nannai vi ciya̱ ta na wishi. 11Uteku u na Ka̱shile ka danai a Katagarda ka Ciɗa, “Amma vuza na de dem wu ushuki n a̱yi wi a kuyaꞋan wono ba.”#Ish. 8:14; 28:16. 12Na va wi ta̱ a kadanshi ka yaba dem, adama a na vuza wi lo kau ba, a̱ ka̱tsuma̱ ka Ayahuda n Aza̱ka̱yimbi. Ka̱shile kaꞋa Vuzavaguɗu vi te ɗa wi a kulyaꞋa tsugono ra̱ka̱. U ci neke ta̱ kpamu uma mayin ra̱ka̱ o folono baci wa̱ ni. 13Tsu na Katagarda ka Ciɗa ka danai, “Vuza na baci dem u ɗekei kula ku Vuzagbayin, Vuzavaguɗu wi ta̱ a kisa yi.”#Juw. 2:32.
14Nini ɗai uma e kuneke a̱ɗu n Vuzagbayin ka̱ta̱ o folono yi wi isa le, ka̱ta̱ baci a saꞋwa kupana ukuna u ni ba? Nini ɗai kpamu a kupana?, sai vuza yoku u dana le. 15Nini ɗai kpamu aza o yoku a kubana a dana le?, sai Vuzagbayin u suku le. Katagarda ka Ciɗa ka danai, “Ili i ma̱za̱nga̱ i ɗa n a̱bunda̱i adama a na uma a na a̱ tsu tuka̱ n Arabali a Singai i lo a̱ kuta̱wa̱.”#Ish. 52:7.
16Amma Ayahuda ra̱ka̱ ɗa a̱ ushuki n Arabali a Singai a ba. Agisana, keneki Ishaya ke ecei, “Vuzavaguɗu, vuza yoku wu ushuku ta̱ n ili i na tsu danai?” 17Vuza yoku u dana le baci ukuna u Kirisiti Kishi, uma kpamu a tsu pana ta̱ Arabali a Singai a, ka̱ta̱ e yeve a̱ ushuku a ɗa. 18Amma Ayahuda tamkpamu? A pana ta̱ ɗe akaka a? E, a pana ta̱ ɗe! Katagarda ka Ciɗa ka danai:
“A danai yaba dem akaka a.
A salai a ɗa a̱ ubuta̱ u dadaꞋin wa aduniyan.”#Ishp. 19:4.
19Amma uma a Israila e yeve ta̱ mayun? E, e yeve ta̱, adama a na ko a ayin a Musa, Ka̱shile ka dana ta̱ ɗe,
“N zuwaka ta̱ iɗika kakau i na i goyoi una̱singai, nannai u zuwa ɗa̱ ta̱ i yaꞋan cisheꞋe.
N zuwaka ta̱ Aza̱ka̱yimbi a na a̱ kpa̱ɗa̱i kuyeve ili una̱singai, nannai u zuwa ɗa̱ ta̱ i yaꞋan wupa.”#K.Wil. 32:21.
20A ayin o yoku kelime ɗa Ishaya u danai sakaɗi i na Vuzavaguɗu u danai,
“Aza a na i a̱ kula̱nsa̱ mu ba, ele ɗa aza a na a̱ ciya̱i mu.
N yotsongi ka̱ci ka̱ va̱ wa aza a na a̱ kpa̱ɗa̱i kufolono e ene mu.”#Ish. 65:1.
21Ɗa Ka̱shile ka danai kpamu adama a uma a Israila,
“Kanna ka̱ɓula̱ dem n tsu petikpe ta̱ ekiye a̱ va̱ n ciya̱ mi isa uma a na i n ugbamukaci ɗa a iwain kupana.”#Ish. 65:2.
Currently Selected:
Roma 10: asgNT
Highlight
Share
Copy
Want to have your highlights saved across all your devices? Sign up or sign in
© 2012 Wycliffe Bible Translators, Inc. All rights reserved
