Yakubu 4

Cija̱Ꞌa̱ n aduniyan

1Yi ɗa̱i i zuwai ɗa yi o kuyongo a̱ vishili n kanananai uteku u ɗa̱ a̱ ubuta̱ wi ida̱shi i ɗa̱? Ili i na i tsu zuwa ɗa̱ nannai i ɗaɗa kusheshe ku kavama ku na ki o kuvon punu a̱ a̱ɗu a̱ ɗa̱. 2I ci ciga ta̱ ili, i ciya̱ i ɗa ba, ka̱ta̱ i gita̱ kusheshi ku na i ku unanai. Yi ta̱ a maꞋiwanai adama a na aza o yoku i ta̱ n ili i na i kpa̱ɗa̱i kuciya̱, ya̱ kuciya̱ka̱ ka̱ci ka̱ ɗa̱ ili ya ba, ka̱ta̱ i ka̱na̱ vishili n kukpa̱ɗa̱ mapanakpanai adama a na yi isa ili ye ekiye ya aza a na i n i ɗa. Amma ili i na i zuwai ɗa i kpa̱ɗa̱i kuciya̱ ili i na i cigai va i ɗaɗa adama a na i folono Ka̱shile ili ya ba. 3Ko feu i folono i ci ciya̱ ba, adama a na a̱ɗu a̱ ɗa̱ a gaꞋan ba, i ci ciga ta̱ ili i na i kuneke ɗa̱ uyoꞋo koci.

4A̱ɗa̱ uma a na i kpa̱ɗa̱i kutono Ka̱shile, i yeve a na i ciga baci ukuna u kawasasa u nam pa, an yi o kokpo irala i Ka̱shile ba? 5I neke a̱ɗu a̱ ɗa̱ a̱ ubuta̱ wa akaka a Katagarda ka Ciɗa ba, ana u danai Ayinviki a̱ ni i ta̱ asuvu a̱ ɗa̱, a ɗa kpamu i ta̱ a kuꞋiwan ili i nan lo n utsura ka̱u. 6U yotsongu tsu ta̱ ugaꞋin u ni ka̱u. Indana ili i na Katagarda ka Ciɗa ka danai,

“Ka̱shile ki ta̱ a kuꞋiwan aza a ugbawansuvu,

amma u tsu yotsongu ta̱ ugaꞋin u ni wa aza a na o goyoi ka̱ci ke le.”

7Adama a nannai, ka̱sa̱kpa̱i Ka̱shile ko tono n a̱ɗa̱, lokoi Kalijani, wi ta̱ a kusuma u ka̱sa̱kpa̱ ɗa̱. 8Yawai ɗevu n Ka̱shile ayin tutu, wi ta̱ a kuyawa ɗevu n a̱ɗa̱. SaꞋi ekiye a̱ ɗa̱ adama a na a̱ɗa̱ aza a̱ unushi a ɗa, za̱Ꞌi kpamu a̱ɗu a̱ ɗa̱ adama a na a̱ɗa̱ aza a kapalaka̱shi a ɗa. 9Shika̱i n kujilya adama a̱ unushi u na i yaꞋin, na̱mgba̱i a̱tsuma̱ fon i ka̱sa̱kpa̱ izoshi yaꞋan una̱mgbuka̱tsuma̱ u loko ma̱za̱nga̱ ma̱ ɗa̱. 10Goyoi ka̱ci ka̱ ɗa̱ a̱ ubuta̱ u Ka̱shile, wi ta̱ a̱ kuɗengusa̱ ɗa̱.

11Uma a̱ va̱, ka̱ta̱ i dansakpanai n kagbani-gbani ba. I dansakpanai baci uteku u na toku vu ɗa̱ vi yaꞋin kagbani-gbani, ɗa kpamu yi a kuyaꞋankpanai afada, yi ta̱ a kushika Wila̱ u Ka̱shile. Amma eyevafada a ɗa yi ba, vuza na u kusheshe Wila̱ u Ka̱shile u na wi derere ko u na wi u gbani-gbani, ulinga u ɗa̱ u ɗaɗa i tono u ɗa. 12Ka̱shile kaꞋa ka yaꞋin Wila̱ wa, a̱yi ɗa endeꞋen kpamu vuza na u kuyaꞋanka tsu afada derere. A̱yi ɗa kpamu wi n utsura u na u kisa uma ko wu una. Yayi u nekei ɗa̱ utsura u na i yaꞋanka vuza ɗa̱ afada?

Ka̱ta̱ vi yaꞋan kadanshi ka mkpaꞋa ba

13Panai ili na! I tsu dana ta̱, “Anana ko mkpaꞋa, ci ta̱ a kubana a̱ likuci i yoku ka̱ta̱ tsu da̱sa̱ngu ɗe ali ka̱ya̱ ke te ka̱ta̱ ci yaꞋan tsulaga ka̱ta̱ ci ciya̱ ikebe.” 14I tsu dana ta̱ nahannai, amma i yeve ili i na i kuciya̱ ɗa̱ mkpaꞋa ba, adama a na wuma u ɗa̱ wi ta̱ an egele a usana. A̱ tsu ta̱wa̱ ta̱ n usana ka̱ta̱ a laza kanna ka yaꞋan baci. 15Ana ya dana nannai va, kucikpa i dana, “Ka̱shile ku ushuku baci ci n wuma, tsa kuyaꞋan ta̱ ili i nam pa ya n i nan ɗe.” 16I ci yaꞋan ta̱ a̱ra̱ɗi adama a ukuna u ka̱ci ka̱ ɗa̱, a̱ra̱ɗi ta na ili i kavama i ɗa. 17Ciɓa a na vuma u yeve baci ili i singai i na i gaꞋin u yaꞋan, ɗa u kpa̱ɗa̱i kuyaꞋan i ɗa, unushi u ɗa.

Currently Selected:

Yakubu 4: asgNT

Highlight

Copy

Compare