Yakubu 2

Inda uma derere

1Uma a̱ va̱, Vuzagbayin Yesu Kishi vuma vu gbayin ɗa. Ka̱ta̱ i cikpa vuza yoku u laꞋa vuza yoku ba, adama a na i neke ta̱ a̱ɗu a̱ ɗa̱ u Kishi. 2Agisana, vuza u ta̱wa̱ baci a̱ ubuta̱ u koɓolo u ɗa̱, nu ntogu n singai nu nkawani mi ikebe ma azanariya u uꞋuki. Ɗa vuma vi yoku vu unambi u uwai a̱ ubuta̱ u koɓolo, u ukai akashi nu ntogu n na mo oꞋoi ɗe. 3Ɗa i bonokoi a̱shi a̱ ɗa̱ a̱ ubuta̱ u vuza na u ukai a̱kumbula̱, ɗa i danai ni, “Ili yi ida̱shi i ɗa na.” Ɗa i danai vuza vu unambi, “Shamgba na ɗe,” ko “Da̱sa̱ngu a iɗika a uɓon wa̱ a̱civa̱ e ene a̱ va̱.” 4I yaꞋan baci nannai, yi ta̱ e kupece uma, yi ta̱ kpamu a kuyaꞋan uteku u na eyevafada a na i n kusheshe ku kavama a ci yaꞋan.

5Uma a̱ va̱, kasai atsuvu a̱ ɗa̱ mayin, Ka̱shile ka zagba ta̱ aza a unambi a aduniyan o okpo aza a̱ uciyi a̱ ubuta̱ u kuneke wa̱ a̱ɗu. A zagba le ta̱ adama a na o okpo aza a na a̱ kuciya̱ tsugono tsu na a yaꞋin uzuwakpani u kuneke aza a na a cigai ni. 6N nannai dem, ɗa yi a kushika aza a unambi. Amma aza a̱ uciyi ele ɗa aza a na a tsu takacika ɗa̱, ka̱ta̱ o rono ɗa̱ a kubana a̱ ubuta̱ wa afada ba? 7Ele ɗa kpamu a tsu dansa ili i kavama adama a kula ku singai ku Yesu, kula ku na i ci yongo n ku ɗa feu ba?

8Yi ta̱ a kuyaꞋan ili i na i gaꞋin, i tono baci wila̱ u na wu uta̱i o tsugono u na wi punu a Katagarda ka Ciɗa tsu na u danai, “Ciga vuza nu vu na vi ida̱shi ɗevu n avu uteku u na vi cigai ka̱ci ka̱ nu.” 9I ci yaꞋanka baci uma uteku u na i ce ene le pulai, i yaꞋan ta̱ unushi, adama a na wila̱ u dana a yaꞋan nannai ba. 10Vuza u tono baci Wila̱ u Ka̱shile dem, ɗa u nusai u te, u yaꞋan ta̱ unushi u na u koɗoi u ɗa ra̱ka̱. 11Ka̱shile ka na ka danai, “Ka̱ta̱ vi yaꞋan tsugbani ba.” A̱yi ɗa feu u danai, “Ka̱ta̱ vu una vuza ba.” Ko an vi yaꞋin tsugbani ba, amma vu una baci vuza, vo okpo ta̱ kokoɗi ka̱ Wila̱ ra̱ka̱.

12Adama a nannai, a̱ ka̱tsuma̱ ka kadanshi ka̱ nu n ili i na vi a kuyaꞋan, yaꞋan adanshi i ta̱ a kuyaꞋanka wu afada gogo va lo n wila̱ u na wi a kuzuwa wu vi yongo ba̱ri. 13Vu tsu pana baci asuvayali a uma o yoku ba, a kupana asuvayali a̱ nu ba. Amma vu tsu pana baci asuvayali, ayin a nan lo a ɗaɗa asuvayali a̱ Ka̱shile a kulyaꞋa utsura wa afada a na i ishi a kuyaꞋanka wu.

Kuneke ku ka̱ɗu babu ulinga gbani ɗa

14Uma a̱ va̱, te ɗai ariba i dana baci yi ta̱ n uneki u ka̱ɗu, amma yi n ulinga u na i yaꞋin ka̱ta̱ i yotsongu a̱ ubuta̱ wi ili i na i yaꞋin ba? Uneki u ka̱ɗu wi baci nannai wa kisa vuza ba. 15Ve ene baci vuza na wi a kuciga motogu ko ilikulyaꞋa, 16ɗa vu danai, “Kya̱sa̱ wu,” ɗa kpamu vu danai, “Ka̱shile ka zuwaka wu una̱singai, vu da̱sa̱ngu m ma̱ta̱na̱ ka̱ta̱ vi lyaꞋa mayin,” amma vi neke vuza nan lo ilikulyaꞋa ba, ko motogu ba. Te ɗai ugaꞋin u kadanshi u nan lo wi? 17Ta baci vi nannai, vi nekei ka̱ɗu koci, amma vi yaꞋan ulinga ba, uneki u ka̱ɗu u nan lo wi ta̱ ukpa̱.

18Vuza yoku we ece mu baci, “Vi ta̱ n uneki u ka̱ɗu?” Mi ta̱ a̱ kushuku yi, “Mpa mi ta̱ n ulinga u na n yaꞋin.” Ka̱ta̱ n dana yi feu, “Nini ɗai vo kuyotsongu mu uneki u ka̱ɗu u nu, amma vi yaꞋan ili i singai ba? N kuyotsongu wu ta̱ uneki u ka̱ɗu u va̱ n ili i singai i na n yaꞋin.”

19Vu ushuku ta̱ an Ka̱shile ke te kaꞋa. U gaꞋan ta̱. Wunla̱i u gbani-gbani feu wu ushuku ta̱ nannai. U tsu zuwa le ta̱ kpamu kujeꞋeke ikyamba n wovon.

20Avu kalau ka vuma, vi ciga ta̱ vuza yoku u yotsongu wu uneki u ka̱ɗu babu ulinga u singai, vi yeve a na nannai ili i gbani i ɗa ba? 21Panai ili i nam pa, akaya a̱ tsu Ibrahim u saꞋa ta̱ Ka̱shile ka̱ɗu ana u zuwai maku mo kolobo ma̱ ni Ishaku a katalikalyuka adama a na u yaꞋan alyuka n a̱yi. 22Gogo na ye ene ta̱ uteku u na uneki u ka̱ɗu wi Ibrahim wi koɓolo n ili i na u yaꞋin. U yotsongu ta̱ uneki u ka̱ɗu u ni mayun ɗa, a̱ ubuta̱ wi ili i na u yaꞋin. 23Ili i na Katagarda ka Ciɗa ka̱ ciya̱i i ɗa na, ana ka danai, “Ibrahim wi ta̱ n uneki u ka̱ɗu n Ka̱shile, ɗa wo okpoi vuza vu usuɓi a̱ ubuta̱ u Ka̱shile.” Ta Ibrahim wo okpoi ka̱ja̱Ꞌa̱ ka̱ Ka̱shile nannai. 24Gogo na ye ene ta̱ tso okpo ta̱ uma a ciɗa a̱ ubuta̱ u Ka̱shile n ubuta̱ wi ili i na ci a kuyaꞋan, amma uneki u ka̱ɗu u ɗa koci ba.

25Agisana, Rahapu† kashakanlai kaꞋa. Amma u saꞋa ta̱ Ka̱shile ka̱ɗu ana u foɓoi aza a kasaka ki iɗika, ana wu uta̱ka̱i le ɗa o tonoi a uye u yoku o kubono a kpaꞋa. 26Ikyamba yi baci babu ayinviki, ikyamba i nan lo yi ta̱ ukpa̱, ta kpamu nannai uneki u ka̱ɗu u na wi babu ulinga wi ta̱ ukpa̱.

Currently Selected:

Yakubu 2: asgNT

Highlight

Copy

Compare