Afisu 6

Muku nu mmaci n le

1A̱ɗa̱ muku, panakai mmaci n ɗa̱, adama a na a̱ɗa̱ uma a Vuzagbayin ɗa, adama a na ili i singai i ɗa i na i gaꞋin i yaꞋan. 2Punu a̱ Wila̱ Kupa, ili i iyain i na i koɓolo n uzuwakpani i ɗa na: “Cikpa eshevu n a̱na̱vu.” 3Na va ɗaɗa uzuwakpani wa: “Vi cikpa baci eshevu n a̱na̱vu, ili dem yi ta̱ a kuwala wu mayin, vi ta̱ kpamu o kuyongo m megeshe a aduniyan a nam pa.”

4Mmaci, ka̱ta̱ i zuwa muku n ɗa̱ n yaꞋan wupa ba. I kucikpa i la̱na̱ le mayin, yaꞋankai le odoki ka̱ta̱ i yotsongu le a uye u na Vuzagbayin u cigai.

Agbashi n azagbagbaꞋin

5A̱ɗa̱ vu na yi agbashi, panakai azagbagbaꞋin a̱ ɗa̱ na a aduniyan. Panai wovon u le, i cikpa le ka̱ta̱ i yaꞋanka le tsugbashi tsu mayun uteku u na i kuyaꞋanka Kishi. 6YaꞋin ulinga ka̱u a ayin dem, amma adama a na i cigai azagbagbaꞋin a̱ ɗa̱ a pana uyoꞋo u ɗa̱ koci i baci a kinda ɗa̱ ba. Amma ili i na i laꞋi n kugaꞋan i ɗaɗa i yaꞋan ulinga u ɗa̱ n a̱ɗu a̱ ɗa̱ ra̱ka̱, uteku u na Ka̱shile ka ci ciga, adama a na a̱ɗa̱ agbashi a̱ Ka̱shile a ɗa. 7YaꞋin ulinga u ɗa̱ m ma̱za̱nga̱, adanshi Vuzagbayin ɗa yi a kuyaꞋanka u ɗa, amma adama a uma koci ba. 8Ciɓai Ka̱shile ki ta̱ a kutsupa ulinga u singai u na vuza dem u yaꞋin, ko wi kagbashi ko wi kagbashi ba.

9A̱ɗa̱ vu na yi kpamu azagbagbaꞋin, yaꞋankai agbashi a̱ ɗa̱ mayin feu. Ka̱ta̱ i dana sai i takacika le ba. Ciɓai, azagbagbaꞋin n agbashi ra̱ka̱ vu ɗa̱ yi ta̱ n Vuzagbayin vi te na ɗe gaɗi. U ci yaꞋanka ta̱ uma dem derere.

Ili i kuvon i Ka̱shile

10Kadanshi ku ukocishi ka̱ va̱ a kubana wa̱ ɗa̱ ka ɗaɗa na: Tsurakpai n utsura u Vuzagbayin u na wi gba̱ra̱ ayin tutu, adama a na yi ta̱ uɓolongi n a̱yi. 11Kosoji ko tsu foɓuso ta̱ ili i kuvon adama a na u yaꞋan vishili. N nannai kpamu, mayun ɗa i foɓuso ili ra̱ka̱ i na Ka̱shile ke nekei ɗa̱, adama a na ayin a na baci Kalijani† ki a kuciga kuya̱nsa̱ ɗa̱, i fuɗa i shamkpa vishili ka̱ta̱ i kpa̱ɗa̱ kuyikpa̱. 12Ci a̱ vishili n uma tsu tsu ba, amma ci ta̱ a̱ vishili n wunla̱i u gbani-gbani n utsura kakau u na wi o tsugono punu a aduniyan a̱ tsu a na i n ka̱yimbi, ci ta̱ kpamu a̱ vishili n utsura u kavama u na wi ɗe gaɗi.

13Adama a ili i nam pa, ukai ili ra̱ka̱ i vishili i na Ka̱shile ke nekei ɗa̱. Ka̱ta̱ a ayin a gbani-gbani i kpa̱ɗa̱ kusuma. Yi ta̱ a kufuɗa ya̱ shilika̱ ali uteku, a̱ɗa̱ ta na ushamgbi kashani n utsura. 14Nannai feu foɓusoi ka̱ci ka̱ ɗa̱! Dansai ili i mayun ayin tutu. Ukuna u mayun wi ta̱ tsu kaɗambura ka na vuza u ci shiya a̱ kukyuꞋun ku ni adama a na u foɓuso ka̱ci ka̱ ni kuyaꞋan ulinga. YaꞋan i na yi derere, adama a na usuɓi wi ta̱ an motogu ma̱ viyum ma na ma̱ tsu sa̱nka̱ ili kuciya̱ wu. 15LyaꞋi kelime n kuneke a̱ɗu n Arabali a Singai a na e ci neke ma̱ta̱na̱. Wi ta̱ ta na o kokpo adanshi yi ta̱ n ataka e ene a̱ ɗa̱, ka̱ta̱ i foɓuso mayin. 16Ili i yoku i ɗaɗa na: lyaꞋi kelime n kushuku n Yesu Kishi. Uneki u ka̱ɗu u ɗa̱ wi ta̱ o kokpo an ma̱ra̱ga̱ ma na ma kukpada ayaꞋa a akina a na MalyaꞋi ma tsu tawaka ɗa̱. 17Ana i yevei Ka̱shile ki isa ɗa̱ ta̱ babu munla̱i, wi ta̱ tsu ma̱kuꞋun mo kuvon ma̱ ɗa̱ ma na ma̱ tsu sa̱nka̱ ili kuciya̱ aci a̱ ɗa̱. Ka̱ta̱ i yongo ufoɓushi adama a na i yaꞋan ulinga n Kadanshi ka̱ Ka̱shile. Wi ta̱ tsu kotokobi ka na Ayinviki a̱ Ka̱shile e ci neke ɗa̱.

18I yaꞋan baci ili i nam pa, yaꞋin kavasa ka̱ta̱ i folono Ka̱shile ka̱ ɓa̱nka̱ ɗa̱ a̱ ubuta̱ wi ili ra̱ka̱ a ayin dem uteku u na Ayinviki a̱ Ka̱shile o tonoi n a̱ɗa̱. Yi baci kpamu a kuyaꞋan kavasa yongoi utaɗukpi. LyaꞋi kelime n kuyaꞋan kavasa ayin tutu adama a uma a̱ Ka̱shile ra̱ka̱.

19YaꞋankai mu feu kavasa, adama a na Ka̱shile ke neꞋe mu ili i na yi derere i na n kudansa n gita̱ baci kadanshi, adama a na n yaꞋan kadanshi babu wovon ka̱ta̱ n dana uma akaka a na u yotsongi tsu gogo na a̱ ubuta̱ wa Arabali a Singai. 20Yesu Kishi u zagba mu ta̱ mo okpo kalingata ka̱ ni, n dana Arabali a Singai a nam pa, i ɗaɗa i zuwai ɗa a shiyai mu n ikani a ugbashi gogo na. YaꞋankai mu kavasa adama a na ɗa baci n danai Arabali a Singai n yaꞋan kadanshi babu wovon, uteku u na u yotsoi n yaꞋan.

Ikya̱shi yu ukocishi

21-22N ciga ta̱ i yeve uteku u na mi n i na mi kpamu a kuyaꞋan. I ɗa i zuwai ɗa mi a̱ kusuku Tikiku wa̱ ɗa̱, vuza tsu ɗa vu na ci cigai, ɗa wi feu a kuyaꞋanka Vuzagbayin tsugbashi mayin. Wi ta̱ a kudana ɗa̱ ili i na i ciya̱i tsu, ka̱ta̱ kpamu u doku ɗa̱ utsura u ka̱ɗu.

23N yaꞋan ta̱ kavasa Ka̱shile Dada n Vuzagbayin Yesu Kishi, e neke ma̱ta̱na̱, n ucigi, n uneki u ka̱ɗu wa aza o Kutoni dem! 24Ka̱sa̱kpa̱ Ka̱shile ko yotsongu kasingai ka̱ ni wa aza a na a cigai Vuzagbayin vu tsu Yesu Kirisiti Kishi ra̱ka̱ n ucigi u na u tsu kpa̱ɗa̱ kukotso.

Currently Selected:

Afisu 6: asgNT

Highlight

Copy

Compare