2 Biturusu 3

Yesu wi ta̱ o kubono kpamu

1Uma a ucigi a̱ va̱, n ɗanaka ɗa̱ ta̱ atagarda a akaka e re. Punu a atagarda a m gbagbala ta̱ adama a na n zuwa ɗa̱ i sheshe mayin ka̱ta̱ i ciɓa mayin kpamu. 2N ciga ta̱ i ciɓa ka̱ta̱ i yeve akaka e eneki a ciɗa† a ayin a cau. N ciga ta̱ kpamu i ciɓa ka̱ta̱ i yeve ili i na Vuzagbayin vu tsu n Kishi u zuwai azusuki a̱ ɗa̱ a dana ɗa̱ i yaꞋan.

3U gaꞋan ta̱ ka̱u i yeve a na a ukocishi u ayin i ta̱ a̱ kuciya̱ aza a ulami, aza a na o kuzoꞋoso ili i mayun ka̱ta̱ a yaꞋan ili i kavama dem i na a cikalai kuyaꞋan. 4Ka̱ta̱ a dana, “Te ɗai kuta̱wa̱ ku na u yaꞋin uzuwakpani wa ki? Aza e kelime a̱ tsu a̱ kuwa̱ ta̱ ɗe ra̱ka̱, ɗa ta na ili dem yo okpoi uteku u na i ɗa yi a ugiti wa aduniyan.”

5Amma uma a nam pa a kucikpa ta̱ a cinukpa a na m mani-mani va ɗe kadanshi ka̱ Ka̱shile ka ɗa ka yaꞋin gaɗi, ɗa ku uta̱ka̱i n iɗika punu a asuvu a̱ mini, ɗa ka zuwai mini uka̱ra̱Ꞌi wi iɗika. 6Ana ayin a yaꞋin kenu, ɗa Ka̱shile ka zuwai mini ma mu unai uma a aduniyan. 7Amma Ka̱shile ka zuwa ta̱ gaɗi n iɗika i gogo na i yongo ali sai a kanna ka afada. Ka̱ta̱ akina a̱ ta̱wa̱ we le, ka̱ta̱ aza a na e yevei Ka̱shile ba a̱ kuwa̱.

8Uma a ucigi a̱ va̱, ka̱ta̱ i cinukpa ba, a na Vuzavaguɗu wi e kene kanna ke te derere n a̱ya̱ ka̱kpa̱n ke te (1,000), wi ta̱ kpamu e kene a̱ya̱ ka̱kpa̱n ke te derere n kanna ke te. 9Uma o yoku i ta̱ e kusheshe Vuzagbayin wi ta̱ a kushamgba ali ayin ka̱u sapu u shatangu uzuwakpani u ni, amma Vuzagbayin u kushamgba ka̱u uteku u na uma a nan lo a zuwai ba. U reme ta̱ ka̱ɗu n a̱ɗa̱. U ciga ko vuza te u kuwa̱ ba, amma u laꞋa ta̱ n kuciga yaba dem u shika̱ unushi† u ni. 10Kanna ka Vuzagbayin ki ta̱ a kuyawa babu uzuki, uteku u na koboki ka ci yawa. Gaɗi wi ta̱ o kukotso n kacaꞋa ku utsura, ka̱ta̱ akina a̱ la̱nga̱sa̱ ili dem. Wi ta̱ o kuyotsongu e keteshe uteku u na aduniyan i, n ili i na yi punu dem.#3:10 Epepa a cacau a katagarda ka nam pa o kotsoso ta̱ kabaꞋin ka nam pa n udani tsu nam pa, “Ili ya aduniyan yi ta̱ e kuderekpe adama a̱ usuɗukpi wa̱ a̱bunda̱i”.

11Adama a na ili dem yi a̱ kuna̱mgba̱, icuꞋu i uma ye ne i ɗa̱i i gaꞋin yo okpo? Adama a nannai yaꞋankai Ka̱shile tsugbashi a̱ ubuta̱ wu uye u na yi o kuyongo. 12Zuwai a̱shi a̱ ɗa̱ a kanna ka nan lo ka̱ta̱ i ɓa̱nka̱ kaꞋa adama a na ka̱ ta̱wa̱ babu megeshe. A ayin a nan lo i ta̱ a̱ kula̱nga̱sa̱ gaɗi n akina, ka̱ta̱ ili dem i derekpe punu a̱ ubuta̱ wu usuɗukpi. 13Amma ci ta̱ a kinda kelime an ce kene gaɗi vu savu n iɗika i savu i na Ka̱shile ka yaꞋin uzuwakpani u kuyaꞋan, ubuta̱ u na yaba dem u kuyaꞋan ili i na Ka̱shile ka danai i ɗa yi derere.

Ikya̱shi yu ukocishi

14Uma a ucigi a̱ va̱, adama a nannai i yongo m ma̱ta̱na̱ n Ka̱shile ka̱ta̱ i dakaka kpamu i yongo ciɗa babu unushi a ayin a na yi a kuvana ili i nam pa ya i yaꞋan.

15Ciɓai, Vuzagbayin wi ta̱ a kuvana adama a na uma a̱ ciya̱ ayin a na a̱ ciya̱ wishi. Na va ɗaɗa uteku u na vuza vu ucigi vu tsu Bulusu u ɗanakai ɗa̱ n kuyeve ku na Ka̱shile ke nekei ni. 16Bulusu u yaꞋan ta̱ kadanshi ki ili i nam pa ya a atagarda akaka a̱ ni ra̱ka̱, amma ili i yoku i na u danai, yi ta̱ n atakaci e kuyeve. Uma o yoku a na i babu kuyeve n aza a na a̱ kpa̱ɗa̱i kushamgba mayin a sabaꞋa ta̱ kadanshi ka̱ ni adama a na ko okpo ili i yoku kau n i na u sheshei. A yaꞋan ta̱ nannai feu n ubuta̱ u na u buwai a Katagarda ka Ciɗa. Nannai ɗa i a̱ kutuka̱ n ukpa̱ u le.

17A̱ja̱Ꞌa̱ a̱ va̱ a ucigi, a ɓarangu ɗa̱ ta̱ ɗe n ayin a ɗe! YaꞋin kindi mayin ka̱ta̱ a̱ ripula̱ ɗa̱ n aꞋuwa a uma a kavama a nam pa ba. Ka̱ta̱ i ka̱sa̱kpa̱ uneki u ka̱ɗu wu utsura u ɗa̱ ba. 18I lyaꞋa kelime n kudoku kasingai n kuyeve ku Vuzagbayin Yesu Kirisiti Kishi.

Tsugbayin n tsugono ci ni tsu ɗa, gogo na n ayin tutu. Ta nannai.

Currently Selected:

2 Biturusu 3: asgNT

Highlight

Copy

Compare