2 Korintiya 7

1A̱ja̱Ꞌa̱ a̱ va̱, Ka̱shile ka yaꞋanka tsu ta̱ uzuwakpani n a̱bunda̱i u nam pa. Adama a nannai ci yaꞋin daꞋin n ili ra̱ka̱ i na i kuzuwa ikyamba i tsu n a̱ɗu a̱ tsu a natukpa. U gaꞋan ta̱ ci neke Ka̱shile tsugbayin ka̱ta̱ tsu dakaka adama a na tsu okpo ci ni gbende.

Ma̱za̱nga̱ ma̱ Bulusu

2Ɓa̱yuwa̱ka̱i tsu ubuta̱ punu a̱ a̱ɗu a̱ ɗa̱. Ci yaꞋanka vuza kagbani-gbani ba. Tsu la̱nga̱sa̱ uneki u ka̱ɗu u vuza ba. Tsu doro kpamu vuza ba. 3N dansa ili i nam pa adama a na n ciga mi ilukpa̱ ɗa̱ ba. N dana ɗa̱ ta̱ ɗe ayin tutu ci yongo ta̱ a kuciɓasa ko yi ɗa̱i i kuta̱wa̱. 4N soɗongu ta̱ ma̱tsa̱n n a̱ɗa̱ mayin. N ci yongo ta̱ a̱ ma̱za̱nga̱ ayin tutu adama a̱ ɗa̱. I yaꞋanka mu ta̱ kadanshi ku utsura u ka̱ɗu ka̱u. Ko a na mi n atakaci ka̱u, i zuwa mu ta̱ mo okpoi m ma̱za̱nga̱ ka̱u.

5Ana ci yawai a iɗika i Makidoniya, ci ciya̱ kuvuka ba. Ci cinai kadama a̱ ubuta̱ dem a kuvana tsu. Ci yaꞋan ta̱ kanananai n irala i tsu, ɗa ci yongoi a kupana wovon punu a̱ a̱ɗu a̱ tsu. 6Amma Ka̱shile, a̱yi na u tsu neke uma kadanshi ka kuvaꞋanka a̱ɗu, ayin a na baci a̱ɗu e le a̱ na̱mgba̱i, u yaꞋankai tsu kadanshi ka kuvaꞋanka ka̱ɗu a ayin a na Taitu u yawai. 7Mayun, ci ta̱ m ma̱za̱nga̱ ma na ce ene yi. Amma ili i na i nekei tsu ma̱za̱nga̱ mayun i ɗaɗa tsu na i nekei ni kadanshi ka utsura u ka̱ɗu. U dana tsu ta̱ uteku u na yi a kuciga ye ene mu, ɗa u danai tsu i shika̱ ta̱ unushi kpamu adama a ili i na i yaꞋin. U doku u danai mu tsu na i cigai kuɓa̱nka̱ mu ka̱u. Ana m panai ili i nam pa, ɗa m panai ma̱za̱nga̱ ka̱u.

8Ko akaka a̱ va̱ a̱ la̱nga̱sa̱ ɗa̱ baci a̱ɗu, na lo u ɓa̱la̱ mu ba. N ugiti u ɓa̱la̱ mu ta̱ kenu, adama a na a̱ɗu a̱ ɗa̱ a̱ na̱mgba̱i, amma una̱mgbuka̱tsuma̱ u ɗa̱ u yaꞋan makyan ba. 9Amma gogo na mi ta̱ m ma̱za̱nga̱. N yaꞋan ma̱za̱nga̱ adama a na n neke ɗa̱ ta̱ una̱mgbuka̱tsuma̱ ba, amma adama a na una̱mgbuka̱tsuma̱ u ɗa̱ u zuwa ɗa̱ ta̱ i sabaꞋi ma̱riki ma̱ ɗa̱. Ci yaꞋanka ɗa̱ iforotoi ba, ko kenu. 10Ka̱shile ka ci yaꞋan ta̱ ulinga n una̱mgbuka̱tsuma̱ a wuma u tsu adama a na u ɓa̱nka̱ tsu tsu ka̱sa̱kpa̱ unushi u tsu ka̱ta̱ ci ciya̱ wishi. Na lo u ɓa̱la̱ tsu adama a icuꞋu yi una̱mgbuka̱tsuma̱ u nan lo ba. Amma vuza wi baci n una̱mgbuka̱tsuma̱, ɗa u bonoi u Ka̱shile ba, wi ta̱ a̱ kukuwa̱, wi a̱ kuciya̱ wishi ba.

11Zukai n ili na una̱mgbuka̱tsuma̱ u na Ka̱shile ka cigai i pana u tuka̱i ɗa̱. U zuwa ɗa̱ ta̱ i ka̱na̱i kaci. U zuwa ɗa̱ ta̱ i yotsongu a na i yaꞋin unushi ba. U zuwa ɗa̱ ta̱ i yaꞋin wupa ɗa i panai wovon. U zuwa ɗa̱ ta̱ i cigai kene mu. U zuwa ɗa̱ ta̱ i ɓa̱nka̱i uma. U zuwa ɗa̱ ta̱ i ciya̱ mali ma na a takacika vuma vu na u nusai. U zuwa ɗa̱ ta̱ i yotsongi a na a̱ɗa̱ i yaꞋin ili i na yi derere. 12N ɗana ta̱ akaka a nan lo a adama a na ye ene, e kelime ka̱ Ka̱shile, tsu na i la̱na̱i tsu mayin. N ɗana a ɗa adama a vuza na u nusai, ko vuza na a nusakai ba. 13I ɗaɗa i zuwai ɗa ci ciya̱i utsura u ka̱ɗu.

Ko a na ci ciya̱i utsura u ka̱ɗu, tsu laꞋa ta̱ n kuyaꞋan ma̱za̱nga̱ adama a na ce ene Taitu wi ta̱ a̱ ma̱za̱nga̱, adama a na i zuwa ta̱ ka̱ɗu ka̱ ni ida̱shi. 14Tsu dana yi ta̱ tsu na ci m ma̱za̱nga̱ ka̱u adama a̱ ɗa̱, ɗa ta na i yotsongi a na mayun ɗa mu. Ili ra̱ka̱ i na tsu danai ɗa̱ mayun ɗa, a̱ɗa̱ kpamu i yotsongu ta̱ a na ili i na tsu danai Taitu adama a̱ ɗa̱ mayun ɗa. 15Adama a nannai ucigi u ni a kubana wa̱ ɗa̱ u tsurakpa, ayin a na baci u ciɓai tsu na ra̱ka̱ vu ɗa̱ yi ufoɓushi adama a na i pana kadanshi ka̱ ni, koɓolo kpamu n tsu na i ka̱na̱i ni n wovon n kujeꞋeke ki ikamba. 16Mi ta̱ m ma̱za̱nga̱ ka̱u uteku u na mi a kufuɗa kusoɗongu ma̱tsa̱n n a̱ɗa̱ mayin.

Currently Selected:

2 Korintiya 7: asgNT

Highlight

Copy

Compare