2 Korintiya 12

Vuzagbayin u ta̱wa̱i u Bulusu tsalatani

1U gaꞋan ta̱ n yaꞋan a̱ra̱ɗi. Babu ili i na vuza u kuciya̱ n a ɗa, amma yaꞋan n yaꞋan a̱ra̱ɗi adama a tsalatani n kene kakau ku na Vuzagbayin u yotsongi mu. 2A̱ya̱ kupa n a̱ na̱shi a na a lazai, Ka̱shile ka ɗikai vuma vi yoku vuza na wi o kutono Kishi u bankai ni gaɗi dunduꞋun a̱ Ka̱shile. N yeve ba, ko ikyamba i ni i ɗa i yaꞋin nwalu ma, ko ayinviki a̱ ni a ɗa koci, amma Ka̱shile ke yeve ta̱. 3-4N doku ta̱ kpamu n dansa, n yeve ta̱ a ɗika ta̱ vuma vu nam pa a kubana a̱ ubuta̱ u kuvuka† a̱ Ka̱shile. N yeve ba, ko mayun ɗa ikyamba i ni i banai gaɗi ko ayinviki a̱ ni a ɗa koci a banai, amma Ka̱shile ke yeve ta̱. U panai ili u fuɗa ta na u dansa ukuna u le e keteshe ba, koɓolo n ili i na Ka̱shile ka̱ kpa̱ɗa̱i kuka̱sa̱kpa̱ vuza u dansa.

5Mi ta̱ a kuyaꞋan a̱ra̱ɗi adama a vuma vu nan lo, amma mi a kuyaꞋan a̱ra̱ɗi adama a̱ ka̱ci ka̱ va̱ ba, sai ili i na i yotsongi tsu na ikyamba i va̱ i kuwa̱i. 6Amma mi ishi baci n ciga n yaꞋan a̱ra̱ɗi adama a̱ ka̱ci ka̱ va̱, mi a kuyaꞋan tsulau ba, adama a na mi ta̱ a kudansa ili i na yi i mayun. Amma ma kuyaꞋan a̱ra̱ɗi adama a̱ ka̱ci ka̱ va̱ ba. N ciga uma e neke mu tsugbayin ali tsu laꞋa ili i na a̱ kpa̱ɗa̱i kene mu a kuyaꞋan ɗa kpamu n dansai ba.

7Amma u gaꞋan n yaꞋan a̱ra̱ɗi ka̱u adama a ili i mereve i na Ka̱shile ko yotsongi mu ba. I ɗaɗa i zuwai ɗa u nekei mu mɓa̱la̱ n yoku n na n soꞋo atakaci, tsu na kawana ka tsu sapa vuza a ikyamba. Wi ta̱ adanshi kalingata ka MalyaꞋi ka ciga mu ta̱ n soꞋo atakaci, ka̱ta̱ kpamu u sa̱nka̱ mu kuyaꞋan a̱ra̱ɗi. 8N folonoi Vuzagbayin ali kutatsu u takpaka mu atakaci a. 9Amma ɗa u danai mu, “Kasingai ka̱ va̱ ka yawa wu ta̱. Ayin a na baci ikyamba i nu i kpa̱ɗa̱i kutsurakpa, utsura u va̱ wi ta̱ a kokpo utsura u nu ka̱u.” Gogo na mi ta̱ a̱ ma̱za̱nga̱ adama a na n yaꞋan a̱ra̱ɗi n ukpa̱ɗi u kutsurakpa u va̱, adama a na utsura u Kirisiti Kishi u yaꞋan ulinga wa̱ va̱. 10Adama a ugaꞋin u Kishi u ɗa baci, m pana ta̱ uyoꞋo a ayin a na n nambai utsura. Mi ta̱ a kupana uyoꞋo uma a shika mu baci. Mi ta̱ a kupana ma̱za̱nga̱ n namba baci ili. N kupana ta̱ kpamu uyoꞋo uma a takacika mu baci, ko ayin a na n soꞋi atakaci. Ayin a na baci dem m panai atakaci a yoku ra̱ka̱, mi ta̱ a kupana ma̱za̱nga̱ koɓolo n ugaꞋin u Kishi. Ta nannai adama a na a ayin a na ikyamba i va̱ i kuwa̱i ɗaɗa ayin a na mi n utsura.

Bulusu wi ta̱ a kuciga aza o Korintiya

11N yongo ta̱ a kuyaꞋan kadanshi an kalau, amma a̱ɗa̱ ɗa i zuwai mu kokpo nannai. A̱ɗa̱ ɗa i gaꞋin i dansa ukuna u singai adama a̱ va̱. Ko mpa mi baci ili ba, aza a na a danai ele ɗa “azusuki a gbagbaꞋin” a laꞋa mu biꞋi ba. 12Ayin a na mi ishi koɓolo n a̱ɗa̱, n ka̱na̱ ta̱ ka̱ɗu ɗa n yaꞋin ulinga wu utsura n urotu n ili i na i tsu zuwa uma a̱ ka̱na̱ mereve, tsu na vuzavusuki vu mayun u ci yaꞋan. 13Ta i ciya̱i ili dem uteku u na a̱Ꞌisa̱ a aza o Kutoni kakau a̱ ciya̱i. Ili i te i ɗa koci yi kau: M bonoko ka̱ci ka̱ va̱ a̱miki a kubana wa̱ ɗa̱ ba. Adama a nam pa, cinukpakai mu!

14N foɓuso ta̱ adama a na n ta̱wa̱ me ene ɗa̱ tatsu. Amma ali n gogo na n ciga n zuwaka ka̱ci ka̱ va̱ a̱miki a kubana wa̱ ɗa̱ ba. A̱ɗa̱ ɗa n cigai, ikebe i ɗa̱ i ɗa n cigai ba. U gaꞋan muku n zuwasa ikebe a̱ ma̱diki mu ulyopi adama a na a̱ ciya̱ ili i na a̱ kuɓa̱nka̱ isheku i le ba. Ta nannai ba! Isheku i ɗaɗa i tsu la̱na̱ muku n le. 15Mi ta̱ m ma̱za̱nga̱ adama a na n neke ɗa̱ ili dem i na mi n i ɗa ra̱ka̱, ali n ka̱ci ka̱ va̱ dem. I kujebe ta̱ ucigi u na yi a kuyaꞋanka mu adama a na ucigi u na mpa n yaꞋankai ɗa̱ u laꞋi n a̱bunda̱i?

16A̱ɗa̱ vi yoku yu ushuku ta̱ a na m kpa̱ɗa̱i kuneke ɗa̱ a̱miki. Amma e sheshe ta̱ ugboji u ɗa n yaꞋankai le, n dansai aꞋuwa adama a na ma aza ɗa̱. 17A̱ ka̱tsuma̱ ka uma a na n suki wa̱ ɗa̱, vuza te vi le u saꞋwa ta̱ kudoro ɗa̱? 18N folono ta̱ Taitu u bana wa̱ ɗa̱, ɗa kpamu n suki vuza vu Kutoni vi yoku koɓolo n a̱yi. Amma a̱yi u doro ɗa̱ ba. I yeve ta̱ a na Taitu nu mpa ci ta̱ a kuyaꞋan ili i te, ka̱ɗu kpamu ke te kaꞋa tsu.

19U gaꞋan ba i sheshe ta̱ ci ta̱ a kudansa ili i nam pa ya adama a na ci yotsongu a na ci yaꞋin derere. Ta nannai ba. Tsu dansa ta̱ uteku u na Kirisiti Kishi u kuciga tsu dansa e kelime ka̱ Ka̱shile. A̱ɗa̱ a̱ja̱Ꞌa̱ a̱ tsu a ɗa yi, ili i na baci ci yaꞋin dem ci yaꞋan ta̱ i ɗa adama a na i gbama ka̱u. 20Mi ta̱ a kupana wovon a ayin a na baci n ta̱wa̱i kene ɗa̱, ka̱ta̱ ida̱shi i ɗa̱ i kpa̱ɗa̱ kuyokpo mu. Adama a nannai yi a kupana uyoꞋo nu mpa ba. M pana ta̱ wovon u na n kucina ɗa̱ a kanananai, ko e cisheꞋe adama a ili i na uma i n i ɗa. Ɗa kpamu mi a kupana wovon yi a kushita adama a wupa, ko yi a kuciga ili dem i yaꞋan i ɗa̱. M pana ta̱ wovon a na yi kpamu a kudansa ili i gbani-gbani adama a uma, ali ɗa yi kpamu a kuyaꞋan kuyun. M pana ta̱ wovon a na yi a kuyaꞋan a̱ra̱ɗi, ɗa kpamu yi o kuyongo n wuma u kavama babu kutono uye u te. 21E, wovon u ka̱na̱ mu ta̱ adama a ayin a na baci n ta̱wa̱i, Ka̱shile ki ta̱ o kudoku ko bonoko mu kenu kpamu adama a̱ ɗa̱. Ka̱ta̱ n shika̱ adama a uma a na a yaꞋin ɗe unushi ɗa a̱ kpa̱ɗa̱i kuka̱sa̱kpa̱ kuyaꞋan ku kavama, n tsugbani, koɓolo n ili i wono.

Currently Selected:

2 Korintiya 12: asgNT

Highlight

Copy

Compare