1 Korintiya 8

Inyama i na a alyukai a̱ a̱ma̱li

1Gogo na n ciga ta̱ kuyaꞋan kadanshi ki inyama i na a kiɗai ɗa a alyukai a̱ma̱li. Ra̱ka̱ vu tsu ci yeve ta̱ ukuna wi ili i nam pa. Kuyeve ku tsu ku tsu zuwa tsu ta̱ tsu ka̱ga̱ n avangatsu a kuyaꞋan a̱ra̱ɗi, amma ucigi u tsu zuwa tsu ta̱ tsu ɓa̱nka̱na̱i. 2Vuza u sheshe baci u ciya̱ ta̱ ɗe kuyeve, ka̱ta̱ u ciya̱ kuyeve ku mayun ka ba. 3Amma vuza na baci u cigai Ka̱shile a̱yi ɗa feu Ka̱shile ka ci ciga ka̱ta̱ u la̱na̱.

4Na ɗaɗa ili i na n dansai adama a ukuna u kutakuma ki inyama i na a alyukai a̱ma̱li: Ci yeve ta̱ ka̱ma̱li ili i makara i ɗa punu aduniyan ba, ci yeve ta̱ feu Ka̱shile ka ɗaɗa ke te koci. 5E ci ɗeke ta̱ ili n a̱bunda̱i i na yi gaɗi n iɗika dem “a̱ma̱li” n “azagbagbaꞋin.” Amma “a̱ma̱li” n “azagbagbaꞋin” ele ɗa mayun ba. 6Amma ci yeve ta̱ ci ta̱ n Ka̱shile ke te, a̱yi ɗa Dada, vuza na u yaꞋin ili dem, ɗa u yaꞋin tsu kpamu adama a na ci yaꞋanka yi tsugbashi. Yesu Kishi ɗa Vuzagbayin vu tsu endeꞋen. Babu ili i na u kpa̱ɗa̱i kuyaꞋan, adama a̱ ni a ɗa ci n wuma na.

7Amma uma ra̱ka̱ ɗa e yevei an ili i nam pa mayun ɗa i ɗa yi ba. Uma o yoku a̱ ka̱na̱ ta̱ ukuna wa̱ a̱ma̱li a̱ a̱ɗu e le, ali n gogo na a takuma baci inyama nannai, ka̱ta̱ a̱ ka̱na̱ kuciɓasa adanshi i na a yaꞋankai alyuka a̱ ubuta̱ wa̱ a̱ma̱li i ɗaɗa feu. E ci sheshe ta̱ i ɗa yi ta̱ a kuzuwa le o okpo ili yu unata a lyaꞋa baci ilikulyaꞋa nannai. E ci sheshe ta̱ nannai adama a na a kufuɗa kuntsukpa i singai n i gbani-gbani ba. 8Mayun inyama i ɗa i kuzuwa tsu kuyawa ɗevu n Ka̱shile ba. Tsu takuma baci i ɗa, yo kudoku tsu ili ba. Tsu takuma baci i ɗa ba, i kujebe tsu ili ba.

9Amma i zuka. Ka̱ta̱ i ka̱sa̱kpa̱ utsura u kulyaꞋa ki ilikulyaꞋa i yoku nannai i bonoko aza a na i n utsura wa̱ a̱ɗu ba, kuta̱ɗa̱tsa̱. 10I yeve ta̱ a̱ma̱li ili i makara i ɗa ba, nannai u kusa̱nka̱ ɗa̱ kubana a̱ a̱Ꞌisa̱ a̱ a̱ma̱li kutakuma ɗe ba. Amma vuza na ka̱ɗu ka̱ ni ka̱ kpa̱ɗa̱i kukutsa n Kutoni, we ene wu baci, wi ta̱ a kuciga feu wa takuma. 11Ili i na vi yevei va i la̱nga̱sa̱ ta̱ vuma vu na Kishi u kuwa̱i adama a̱ ni. 12Ayin a na baci vi yaꞋankai aza a̱ nu unushi, vu zuwai le a yaꞋan ili i na e enei i gbani-gbani i ɗa, avu feu vi ta̱ kuyaꞋan unushi u Kishi. 13Ili i na n kutakuma yi baci a kuzuwa vuza va̱ u yaꞋan unushi, mi o kudoku ma takuma inyama kpamu aduniyan a nam pa ba, adama a na n ciga yi u ta̱ɗa̱tsa̱ ba.

Currently Selected:

1 Korintiya 8: asgNT

Highlight

Copy