1 Korintiya 7

Kuyotsongusu ku yolo

1Gogo na n kudana ɗa̱ ta̱ ili i na n sheshei n ukuna u na i ɗanakai mu a katagarda ka akaka ka̱ ɗa̱. I danai, “Vuma u ciga baci Ka̱shile ka pana uyoꞋo u ni, u kulaꞋa ta̱ n kugaꞋan u kpa̱ɗa̱ kuyaꞋan yolo.” 2Wushuki u va̱ u ɗaɗa: uma n a̱bunda̱i a tsu fuɗa a̱ ka̱na̱ ka̱ci ke le ba, i ɗa i tsu zuwa ɗa a ci yaꞋan tsugbani. I ɗaɗa i zuwai ɗa u gaꞋin yaba dem u yaꞋan yolo ka̱ta̱ u vaku n vuka vi ni koci. U laꞋa ta̱ n kugaꞋan kpamu, vuka dem u yaꞋan yolo ka̱ta̱ u vaku n vali vi ni koci.

3Vali u iwan kuvaku n vuka vi ni ba. U gaꞋan ta̱ u vaku n vuka va, adama a na a̱yi vali vi ni ɗa wi. Ka̱ta̱ kpamu vuka vi iwan kuvaku n vali vi ni ba. U gaꞋan ta̱ u vaku n vali va, adama a na vuka vi ni ɗa wi. 4Vuka vi neke utsura wi ikyamba i ni u vali vi ni, vali feu u neke utsura wi ikyamba i ni u vuka vi ni. 5Ka̱ta̱ i sa̱nka̱na̱i ikyamba i ɗa̱ ba, saidei i sheshe baci kuka̱sa̱kpa̱ biꞋi adama a na i yaꞋan avasa a̱ ka̱tsuma̱ ka ayin kenu a nan lo a. Ka̱ta̱ i bono kpamu i gasa ikyamba, ta lo MalyaꞋi† mo kondo ɗa̱ adama a na i fuɗa i ka̱na̱ ka̱ci ka̱ ɗa̱ ba. 6N dana ta̱ ili i nam pa adama a na n ka̱sa̱kpa̱ ɗa̱ i kpa̱ɗa̱ kuvaku n vuka ali a kubana megeshe kenu i ciga baci. Wila̱ u ɗa e nekei i yaꞋan nannai ba. 7Mi ishi ta̱ a kulaꞋa n kuciga aza o Kutoni a̱ kpa̱ɗa̱ kuyaꞋan yolo, tsu na mpa mi babu yolo. Amma Ka̱shile ke ci neke ta̱ yaba dem kuneꞋe ku ni. A̱yi na n kuneꞋe ku ni, a̱yi na ɗe feu n kuneꞋe ku ni kau.

8Gogo na mi ta̱ a kuyaꞋan kadanshi n a̱ɗa̱ aza o Kutoni ali n a̱ma̱ci a na i agapa. U gaꞋan ta̱ i kpa̱ɗa̱ kudoku kuyaꞋan yolo kpamu. Yongoi nannai endeꞋen tsu na mi. 9Amma yi baci a kufuɗa kuka̱na̱ ka̱ci ka̱ ɗa̱ ba, i yaꞋan yolo. U laꞋa ta̱ n kugaꞋan i yaꞋan yolo a na yo yongo a mazama ma̱ a̱ma̱ci n ali.

10Mi ta̱ n wila̱ u na n kuneke, a̱ɗa̱ na yi n yolo. Amma mayun ɗa Vuzagbayin Yesu n ka̱ci ka̱ ni u nekei tsu wila̱ u nam pa, mpa ɗa ba. Vuka ɗa baci vi, ka̱ta̱ vu ɗenga̱ u vali vu nu ba. 11Ko vu ɗenga̱ baci, ka̱ta̱ vu doku vi yaꞋan yolo i yoku ba, saidei vu bono u vali vu nu. Vali ɗa baci ta na vi, ka̱ta̱ vu loko vuka vu nu ba.

12Gogo na mi ta̱ a kadanshi n a̱ɗa̱ na yo oloi aza a na i aza o Kutoni ba. Vuzagbayin Yesu u neke tsu kuyotsongusu adama a ukuna u nam pa ba, amma mpa mi ta̱ e kuneke ɗa̱ kuyotsongusu ku va̱. A̱ɗa̱ vi yoku ali a na i aza o Kutoni yi ta̱ n a̱ma̱ci a na a̱ kpa̱ɗa̱i kuneke a̱ɗu e le. Vuka va vi ciga baci kuɗenga̱ ba, ka̱ta̱ vu loko yi ba. 13Vuka ɗa baci vi vu na vi vuza vu Kutoni, ɗa kpamu vali vu nu vi vuza na u kpa̱ɗa̱i kuneke ka̱ɗu, ɗa wu ushuki kuyongo n avu, ka̱ta̱ vu ɗenga̱ vu ka̱sa̱kpa̱ yi ba. 14Avu vuka ɗa baci vi nannai, yolo i ɗa̱ yi ta̱ ciɗa adama a̱ nu. Avu kpamu vali vuza Yesu ɗa baci vi, vu na wi n vuka vu na vi vuza Yesu ba, yolo i ɗa̱ yi ta̱ ciɗa adama a̱ nu. Ta baci nannai ba, muku n ɗa̱ n kuyaꞋan ciɗa ba, amma gogo na i ta̱ ciɗa adama tsu na i tuka̱i n ida̱shi i ciɗa a̱ ubuta̱ u yolo u ɗa̱.

15Amma vuza na wi vuza vu Kutoni ba, wu ushuku baci kuka̱sa̱kpa̱ yolo i vuza vu Kutoni, ka̱ta̱ vuza vu Kutoni u gutsaka yi kushamgba ba. Nannai u yaꞋan baci, vuza na u nekei ka̱ɗu u buwa n kakuna n yolo ya ba. Amma wi baci a kuyaꞋan, yolo i lyaꞋa kelime n vali ko vuka vu na u kpa̱ɗa̱i kuneke ka̱ɗu ka, adama a na Ka̱shile ka ciga tsu ta̱ a̱tsu aza o Kutoni ci yongo m ma̱ta̱na̱ n yaba dem. 16N dana ɗa̱ a̱ɗa̱ a̱ma̱ci a na yi aza e Yesu: U gaꞋan ba vali vu nu wi ta̱ o kubono wo tono Yesu Kishi adama a̱ nu. Mayun ɗa a kubana wa̱ nu feu, a̱ɗa̱ ali a na yi aza e Yesu: U gaꞋan ba vuka vu nu wi ta̱ o kubono wo tono Kishi adama a̱ nu.

Tono Vuzavaguɗu ayin dem

17Aza o Kutoni dem n tsu dana ta̱ uma o yongo tsu na i, ana Vuzagbayin Yesu u zagbai le ɗa kpamu Ka̱shile ke ɗekei le o okpo uma a̱ ni. Gogo na mi ta̱ a kudana ɗa̱ nannai feu. 18Agisana, vuza na u ciya̱i ukiɗi u kavaja kafu wo okpo vuza vu Kutoni, ka̱ta̱ u sokongu urotu u ni ba. Ayin a na kpamu vuza va wi isai Yesu, ka̱ta̱ baci a saꞋwa kukiɗa yi ba, ka̱ta̱ o bono a kiɗa yi kavaja ka gogo na ba. 19N ukiɗi u kavaja ko babu ukiɗi u kavaja, na lo wi n ukuna ba. Ili i na i laꞋi n kugaꞋan i ɗaɗa kuyaꞋan ili i na Ka̱shile ka danai a yaꞋan. 20I lyaꞋa kelime nannai tsu na yi ishi n ayin a na Ka̱shile ke ɗekei ɗa̱. 21Kagbashi ka vi? Ka̱ta̱ vu ka̱sa̱kpa̱ ka nan lo ka takacika wu ba. Amma vi ciya̱ baci ayin a na va̱ kuciya̱ uba̱ruwi,† yaꞋan nannai ka̱ta̱ vu ba̱ruwa̱. 22Aza a na ishi agbashi a ayin a na Vuzagbayin u ɗekei le, ele o okpo ta̱ uma a na a̱ ciya̱i uba̱ruwi a̱ ubuta̱ u Vuzagbayin. Ta kpamu nannai, aza a na ishi uba̱ruwi a ayin a na Vuzagbayin u ɗekei le, gogo na ele agbashi a̱ Kishi a ɗa. 23Ka̱shile ka tsula ɗa̱ ta̱. U tsupa ta̱ ɗe adama a̱ ɗa̱ n a̱bunda̱i. Ka̱ta̱ yo okpo tsa agbashi a na a tsu gutsaka a panaka uma a na a panaka Ka̱shile ba. 24Uma a̱ va̱, n dana ta̱ kpamu, yongoi tsu na yi ishi a ayin a na Ka̱shile ke ɗekei ɗa̱, n utsura u Ka̱shile wi ta̱ a̱ kuɓa̱nka̱ ɗa̱ i yaꞋan nannai.

Kuyotsongusu ku uma a na ka̱ta̱ a yaꞋin yolo ba

25Gogo na mi ta̱ a kuɗanaka uma a na ka̱ta̱ a yaꞋin yolo ba. Vuzagbayin u neke wila̱ wa adama a ili i na uma a nam pa a kuyaꞋan ba, yaꞋan n dana ili i na mpa n sheshei. Yi ta̱ a kufuɗa ya̱ kushuku n ili i na n danai adama a kasingai ka Vuzagbayin wa̱ va̱. 26Atakaci i ta̱ lo, adama a nannai n sheshe ta̱ aza a na ka̱ta̱ a yaꞋin yolo ba o yongo tsu nan lo. 27Amma vi yaꞋan baci yolo, ka̱ta̱ i pece yolo i ɗa̱ ba. Ka̱ta̱ vi yaꞋan yolo ba? Ka̱ta̱ ta na vi yaꞋan ba. 28Avu kolobo vi yaꞋan baci yolo, vi yaꞋan unushi ba. Mekere kpamu ma yaꞋan baci yolo, u yaꞋan unushi ba. Amma n ciga ta̱ m ɓa̱nka̱ ɗa̱ i ciya̱ i sula atakaci a na i punu a̱ ubuta̱ u yolo.

29Uma a̱ va̱, n dana ɗa̱ magaba, ayin a na a buwai ɗa̱ na a iɗika, i gbayin ba. Adama a ayin a na a buwai tsu, ka̱ta̱ vu la̱nga̱sa̱ ayin a̱ nu adama a̱ kula̱nsa̱ vuka ba. 30Ko vi baci a̱ ma̱shi adama a̱ una̱mgbuka̱tsuma̱, vi lyaꞋa kelime n kuyaꞋanka Vuzagbayin tsugbashi. Ko yi baci a izoshi n kupana ku ma̱za̱nga̱, ka̱ta̱ i ka̱sa̱kpa̱ ma̱za̱nga̱ ma̱ ɗa̱ ma zuwa ɗa̱ kucinukpa n kuyaꞋanka Vuzagbayin tsugbashi ba. I ciya̱ka̱ baci ka̱ci ka̱ ɗa̱ ili n a̱bunda̱i, ka̱ta̱ i zuwa ɗa̱ kuka̱sa̱kpa̱ kuyaꞋanka Vuzagbayin Yesu Kishi tsugbashi ba. 31Vi yaꞋan baci ili i na uma a ci yaꞋan na a iɗika dem, ka̱ta̱ i la̱nga̱sa̱ ayin a̱ ɗa̱ ra̱ka̱ a kuciɓasa ukuna u le ba, adama a na aduniyan n ili i ni dem yi ta̱ o kukotso babu megeshe.

32N ciga ɗa̱ i muɗa̱ ka̱ɗu adama a ili ya aduniyan i nam pa ba. Vali vu na u kpa̱ɗa̱i kuyaꞋan yolo wi ta̱ a kufuɗa wa̱ liva̱ a kuyaꞋan ulinga u Vuzagbayin n u sheshei uteku u na u kusaꞋa Ka̱shile ka̱ɗu kpamu. 33Amma vali vu na vi n yolo u laꞋa ta̱ n ili i kumuɗa̱ ka̱ɗu. Mayun ɗa u muɗa̱ ka̱ɗu n ili ya aduniyan i nam pa, koɓolo n ili i na u kuyaꞋan adama a na u saꞋa vuka vi ni ka̱ɗu. 34Wi ta̱ n a̱ɗu e re. Nannai feu mekere ko vuka, vuza na wi n vali ba, wi ta̱ a kufuɗa kuna ayin a̱ ni adama a na u yaꞋan ulinga u Ka̱shile. U ci ciga ta̱ u neke ka̱ci ka̱ ni u Vuzagbayin, ikyamba n ka̱ɗu ka̱ ni dem. Amma vuka vi baci n vali, wi ta̱ a kuna ayin a̱ ni a kuyaꞋan ili ya aduniyan, koɓolo kpamu n tsu na u kusaꞋa vali vi ni ka̱ɗu. 35Gogo na ana n yaꞋankai ɗa̱ kadanshi nahannai, ɗaɗa adama a na n ciga ta̱ m ɓa̱nka̱ ɗa̱, amma n shiya ɗa̱ ba. N ciga ta̱ m ɓa̱nka̱ ɗa̱ i yongo tsu na uma a̱ Ka̱shile a gaꞋin o yongo, adama a na i fuɗa i yaꞋanka Vuzagbayin tsugbashi babu ili i na i kuꞋuwa ka̱ta̱ i banka ɗa̱ a̱ ubuta̱ u yoku.

36Amma vuza wi baci n kamana, ɗa wi m mali ka̱u ma kuyaꞋan yolo, u gaꞋan ta̱ a yaꞋan yolo, na lo a yaꞋan unushi ba.#7:36 U gaꞋan ba kabaꞋin ka nam pa ka ki ta̱ a kudana: Kesheku ke yeve baci ili i na u kuyaꞋan m mekere ma̱ ni ma na ma̱ gita̱i kulaza yolo ba, amma ɗa u sheshei mekere ma yaꞋan yolo, u gaꞋan ta̱ u yaꞋan. Amma kesheku ke sheshe baci kusa̱nka̱ yi, u lyaꞋa kelime n kuyaꞋan nannai u nusa ba. Amma u shesheke mekere ma̱ ni uteku u na ka̱ɗu ka̱ ni ka cigai, u ka̱sa̱kpa̱ aza o yoku o yotsongu yi ili i na u kuyaꞋan ba. 37Amma u sheshe baci n ka̱ɗu ka̱ ni u kuyaꞋan yolo n kamana ka̱ ni ka ba, babu na vuza u gutsakai ni, ɗa wi kpamu a kufuɗa kuka̱na̱ ka̱ci ka̱ ni u tono i na u sheshei va, u yaꞋan ta̱ feu ili i singai. 38A yaꞋan baci yolo, u gaꞋan ta̱. A yaꞋan baci yolo ba, u laꞋa ta̱ n kugaꞋan.

39Vuka vi shamgba o yolo i ni a̱ ubuta̱ u vali vi ni ali sai ayin a na ukpa̱ u pecei le. Na lo wo okpo ta̱ ba̱ri, wi ta̱ a kufuɗa wa yaꞋan yolo kpamu, amma wo olo vali vu na vi vuza vu Kutoni ku Vuzagbayin. 40Me ene ta̱ wo okpo baci babu vali, u kulaꞋa ta̱ m ma̱za̱nga̱, i ɗa kpamu ili i na Ayinviki a̱ Ka̱shile i a kudana.

Currently Selected:

1 Korintiya 7: asgNT

Highlight

Copy