ရူဝ်းမႃႉ 13

တၢင်းဢၼ်ၶၢမ်ႇဢဝ်ဢႃႇၼႃႇၶုၼ်

1ႁႂ်ႈၵူၼ်းၵူႈၵေႃႉၶၢမ်ႇဢဝ်ဢႃႇၼႃႇၶုၼ်ဢုပ်ႉမိူင်းၶဝ်တႃႉ။ လွင်ႈမၼ်းၸမ်ႉ၊ဢႃႇၼႃႇဢၼ်လႂ်သေဢမ်ႇဝႃႈပေႃးၽြႃးပဵၼ်ၸဝ်ႈယင်းဢမ်ႇပၼ်ဢၶႂၢင်ႉၸိုင်၊ဢမ်ႇတႄႇဢမ်ႇမၼ်ႈလႆႈလႄႈဢႃႇၼႃႇဢၼ်တႄႇယူႇမီးယူႇတင်းသဵင်ႈတင်းလူင်ၼၼ်ႉပဵၼ်ဢၼ်ၽြႃးပဵၼ်ၸဝ်ႈပၼ်ဝႆႉတီႈၶဝ်ဢေႃႈ။- 2ပိူဝ်ႈၼႆလႄႈ ၵေႃႉဢၼ်ႁဵတ်းၶတ်းဢႃႇၼႃႇဢၼ်ၽြႃးပဵၼ်ၸဝ်ႈၶၢၼ်းဝႆႉၼၼ်ႉၸိုင်၊မၼ်းႁဵတ်းၶတ်းဢမိင်ႉၽြႃးပဵၼ်ၸဝ်ႈဢေႃႈ။ လိူဝ်သေၼၼ်ႉၵေႃႉဢၼ်ႁဵတ်းၶတ်းၼၼ်ႉတၵ်းလႆႈၶၢမ်ႇတၢမ်ႇဢပျတ်ႈဢေႃႈ။- 3ၶုၼ်ဢုပ်ႉမိူင်းဢၼ်ဝႃႈၼၼ်ႉပဵၼ်ပုၼ်ႈတႃႇၵူၼ်းလီၵူၼ်းငၢမ်းတၵ်းလႆႈၵူဝ်ႁႄဢမ်ႇၸႂ်ႈ။ ပဵၼ်ပုၼ်ႈတႃႇၵူၼ်းႁၢႆႉၵူၼ်းမိူၵ်ႈတင်းလၢႆတၵ်းလႆႈၵူဝ်ႁႄဢေႃႈ။ ၸွင်ႇမႂ်းၶႂ်ႈပဵၼ်ၵေႃႉဢၼ်ဢမ်ႇလူဝ်ႇၵူဝ်ႁႄၶုၼ်ဢၼ်မီးဢႃႇၼႃႇၼၼ်ႉႁိုဝ်း။ ႁဵတ်းၵူၼ်းလီတႃႉ။ မၼ်းယင်းတၵ်းယုၵ်ႉယွင်ႈမႂ်းဢေႃႈ။- 4လွင်ႈမၼ်းၸမ်ႉ၊ၶုၼ်ဢုပ်ႉမိူင်းပဵၼ်ၵူၼ်းၸႂ်ႉၵူၼ်းသွႆၽြႃးပဵၼ်ၸဝ်ႈပုၼ်ႈဢၵျူဝ်းတၢင်းလီမႂ်းဢေႃႈ။ ၵူၺ်းၵႃႈ၊ပေႃးမႂ်းႁဵတ်းႁၢႆႉႁဵတ်းမိူၵ်ႈၸိုင်၊ၵူဝ်ႁႄမၼ်းတႃႉ။ ၵွပ်ႈလွင်ႈၼင်ႇႁိုဝ်ဝႃႈၼႆၸမ်ႉ၊မၼ်းယိပ်းလၢပ်ႇသၢၼ်ႇလႅၵ်ႈယူႇလၢႆလၢႆဢမ်ႇၸႂ်ႈ။ မၼ်းပဵၼ်ၵူၼ်းၸႂ်ႉၵူၼ်းသွႆၽြႃးပဵၼ်ၸဝ်ႈလႄႈဢဝ်တၢင်းဢၼ်ၽြႃးပဵၼ်ၸဝ်ႈၶိုၼ်းတွပ်ႇတႅၼ်းဢပျတ်ႈၼၼ်ႉၸီႇယၢင်ႇတီႈၶဝ်ၸိူဝ်းဢၼ်ႁဵတ်းႁၢႆႉႁဵတ်းမိူၵ်ႈၼၼ်ႉဢေႃႈ။- 5ၵွပ်ႈၼႆလႄႈသူထုၵ်ႇလီၶၢမ်ႇဢဝ်ဢႃႇၼႃႇၶုၼ်ဢုပ်ႉမိူင်းဢေႃႈ။ ဢမ်ႇၸႂ်ႈၵွပ်ႈပိူဝ်ႈၵူဝ်တၢမ်ႇဢၼ်ၽြႃးပဵၼ်ၸဝ်ႈၶိုၼ်းတွပ်ႇတႅၼ်းဢပျတ်ႈၵူၺ်းလႄႈ ၶၢမ်ႇဢဝ်ၵွပ်ႈပိူဝ်ႈၸႂ်ဢၼ်ႁုတူဝ်ၸဝ်ႈၵဝ်ႇၼၼ်ႉတႃႉ။

6ၵွပ်ႈလွင်ႈၸိူဝ်ႉၼင်ႇၼႆလႄႈသူလႆႈထၢမ်းၶွၼ်ႇဢေႃႈ။ ၶုၼ်ဢုပ်ႉမိူင်းတင်းလၢႆပဵၼ်ၵူၼ်းၸႂ်ႉၵူၼ်းသွႆၽြႃးပဵၼ်ၸဝ်ႈလႄႈၶဝ်ပွင်ႁဵတ်းပွင်ထၢမ်းၼႃႈၵၢၼ်ၸဝ်ႈၼႂ်းလွင်ႈတၢင်းၵူႈၸိူဝ်ႉၵူႈပိူင်ၼႆႉဢေႃႈ။- 7ပိူဝ်ႈၼႆလႄႈၸွမ်းၵႃႈၼင်ႇဢၼ်သူထုၵ်ႇလီပၼ်ၼၼ်ႉဢဝ်ပၼ်တႃႉ။ ၶွၼ်ႇဢၼ်သူထုၵ်ႇလီထၢမ်းၼၼ်ႉၵေႃႈထၢမ်းတႃႉ။ ငိုၼ်းၵႅပ်းငိုၼ်းၵၢင်ဢၼ်သူထုၵ်ႇလီပၼ်ၼၼ်ႉၵေႃႈပၼ်တႃႉ။ ၵေႃႉဢၼ်ထုၵ်ႇလီလႆႈၵဵပ်းတီႈမၼ်းၵေႃႈႁႂ်ႈၵဵပ်းဢဝ်တႃႉ။ ရူဝ်ႇသေႇၵေႃႉဢၼ်သူထုၵ်ႇလီရူဝ်ႇသေႇၼၼ်ႉတႃႉ။ ပၼ်ၵုင်ႇသရေႇၵေႃႉဢၼ်သူထုၵ်ႇလီပၼ်ၵုင်ႇသရေႇၼၼ်ႉတႃႉ။

လွင်ႈတၢင်းဢၼ်သိူၵ်ႈသမ်ႇၵၼ်

8ယႃႇပေႁႂ်ႈမီးၼီႈသေမဵဝ်းတီႈၽူႈလႂ်။ ႁႂ်ႈမီးၼီႈတၢင်းႁၵ်ႉမႅတ်ႈတႃႇတၢင်းဢၼ်သူၵေႃႉၼိုင်ႈလႄႈၵေႃႉၼိုင်ႈထုၵ်ႇလီမီးၼိူဝ်ၵၼ်ၼၼ်ႉၵူၺ်းတႃႉ။ ၵေႃႉဢၼ်ႁၵ်ႉပိူၼ်ႈၼၼ်ႉထွမ်ႇဢဝ်လႄႈၵမ်ၵျၢင်ႉၸွမ်းပိင်းၺၢပ်ႈတြႃးၸဝ်ႈယဝ်ႉ။- 9ပိင်းၺၢပ်ႈတြႃးၸဝ်ႈဢၼ်ဝႃႈ၊ “ယႃႇပေၽိတ်းပိူင်ႈၵူတ်ႉၽူဝ်ၵူတ်ႉမေးပိူၼ်ႈ။ ယႃႇပေဢဝ်ဢသၢၵ်ႈၵူၼ်းတၢႆ၊ယႃႇပေလၵ်ႉပိူၼ်ႈ၊ယႃႇပေၸပ်းၸွႆးၶႂ်ႈလႆႈၶွင်ပိူၼ်ႈ၊” ဢၼ်ဝႃႈၸိူဝ်ႉၼင်ႇၼႆတင်းသဵင်ႈဢိၵ်ႇတင်းပိင်းၺၢပ်ႈတြႃးတၢင်ႇၸိူဝ်ႉတၢင်ႇဢၼ်တင်းလၢႆႁူမ်ႈပွင်းၵၼ်ဝႆႉ ၼႂ်းပိင်းၺၢပ်ႈတြႃးမဵဝ်းလဵဝ်ဢၼ်ဝႃႈ၊ “ႁၵ်ႉၵူၼ်းဢၼ်ၸၢပ်ႈသႅင်ႇၵၼ်တင်းမႂ်းမိူၼ်ၸိူဝ်ႉၼင်ႇဢၼ်မႂ်းႁၵ်ႉတူဝ်ၸဝ်ႈၵဝ်ႇၼၼ်ႉတႃႉ၊” ဝႃႈၼင်ႇၼႆၼၼ်ႉဢေႃႈ။-#တူၺ်း၊ ဢွၵ်ႇ 20:13-17။ ႁဵတ်း 19:18 10ၵေႃႉဢၼ်ႁၵ်ႉၵူၼ်းတင်းလၢႆၼၼ်ႉတၵ်းဢမ်ႇတွၼ်ႉႁဵတ်းမိူၵ်ႈတီႈပိူၼ်ႈဢေႃႈ။ ပိူဝ်ႈၼႆလႄႈၵေႃႉဢၼ်ၸၢင်ႈႁၵ်ႉပိူၼ်ႈၼၼ်ႉပဵၼ်ၵေႃႉဢၼ်ထွမ်ႇဢဝ်လႄႈၵမ်ၵျၢင်ႉၸွမ်းပိင်းၺၢပ်ႈတြႃးတင်းမူတ်းယဝ်ႉဢေႃႈ။

11သူထုၵ်ႇလီႁဵတ်းၸိူဝ်ႉၼင်ႇၼႆၵွပ်ႈပိူဝ်ႈသူႁုဢၶိင်ႇမၼ်းယူႇယဝ်ႉလႄႈတေႃႈလဵဝ်ၼႆႉသူလူဝ်ႇတိုၼ်ႇမႃးသေၵႃႈတီႈတၢင်းဢၼ်ၼွၼ်းလပ်းယူႇၼၼ်ႉယဝ်ႉဢေႃႈ။ ဢၶိင်ႇဢၼ်ႁဝ်းတၵ်းလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၼၼ်ႉမိူဝ်ႈလဵဝ်ၼႆႉၸမ်မႃးသေယၢမ်းမိူဝ်ႈဢၼ်ႁဝ်းတႄႇၸႃႉယုမ်ႇမၢတ်ႈၼၼ်ႉယဝ်ႉဢေႃႈ။- 12ၶိင်ႇၵၢင်ၶိုၼ်းၸမ်တၵ်းသဵင်ႈယဝ်ႉလႄႈၸမ်ၶိင်ႇၽႃႉပၢင်ႇမိူင်းလႅင်းမႃးယဝ်ႉ၊ဢွၼ်ၵၼ်ပႄႇပႅတ်ႈတၢင်းၵမ်တၢင်းၵျၢင်ႉဢၼ်လပ်းသိင်ႇၼၼ်ႉလႄႈယိပ်းတိုဝ်းၶိူင်ႈလၢၵ်ႈၼၢၵ်ႈပုၼ်ႈတႃႇၼႂ်းဢၼ်လႅင်းၵၼ်တႃႉႁဝ်း။- 13-14ဝႄႈပႅတ်ႈတၢင်းဢၼ်ႁဵတ်းပွႆးလႄႈၵိၼ်လဝ်ႈမဝ်းၵမ်၊တၢင်းဢၼ်ၽိတ်းပိူင်ႈၽူဝ်မေးပိူၼ်ႈလႄႈၵိလေႇသႃႇၵူဝ်ႈၵိူၵ်ႇဢိၵ်ႇတင်းတၢင်းဢၼ်ၶွႆၵၼ်လႄႈၽိတ်းၵၼ်ထဵင်ၵၼ်ၸိူဝ်းၼၼ်ႉသေယဝ်ႉ၊ဢွၼ်ၵၼ်ပႂ်ႉထိင်းတူဝ်ၸဝ်ႈၵဝ်ႇႁႂ်ႈလႆႈၵမ်ၵျၢင်ႉၸိူဝ်ႉၼင်ႇၵူၼ်းဢၼ်မီးၼႂ်းၵၢင်ဝၼ်းဢၼ်လႅင်းၼၼ်ႉတႃႉႁဝ်း။ ယိပ်းတိုဝ်းၶိူင်ႈလၢၵ်ႈၼၢၵ်ႈၸဝ်ႈၽြႃးယေႇသုၶရိၸ်ႈ၊သေလႄႈယႃႇပေၶိုင်ပွင်ႁႂ်ႈတူဝ်ၵႃႇယႃႉၵႂႃႇၸွမ်းၵိလေႇသႃႇမၼ်းၼၼ်ႉ။

Currently Selected:

ရူဝ်းမႃႉ 13: SHNCL

Highlight

Compare

Copy