မႃႇ 15

ဢဝ်ၸဝ်ႈယေႇသုဢၢပ်ႈတီႈၶုၼ်ပိလတ်ႉ

(တူၺ်း၊ မတ်ႈ 27:1-2၊11-14။ လု 23:1-5။ ယူဝ်း 18:28-38)

1မိူဝ်ႈဢၼ်ထိုင်ၶိင်ႇႁူဝ်ၼႂ်ၸဝ်ႉၸဝ်ႉၸိုင်၊ယဵၸ်ႈပရေႃးႁဵၵ်ႈ#15:1 “ယဵၸ်ႈပရေႃးႁဵၵ်ႈ” - ၽူႈတၢင်တူဝ်ႁဵတ်းဝၢတ်ႈသၢၵ်ႈၵၢပ်ႈတၢင်းလူႇတီႈၽြႃးပဵၼ်ၸဝ်ႈလူင်ၶဝ်ႁိပ်ႈၼႅတ်ႈတိူင်ႇပၢင်ႇဢုပ်ႇၵုမ်လူၺ်ႈၵၼ်တင်းၵူၼ်းဢၼ်ပဵၼ်ၵႄႇပဵၼ်ႁူဝ်လႂ်၊သြႃႇမေႃၵျၢမ်းထမ်ႇမႃႉလႂ်၊ဢိၵ်ႇတင်းၶုၼ်လုမ်းတင်းလၢႆသေယဝ်ႉ၊ၶဝ်မတ်ႉမိုဝ်းၸဝ်ႈယေႇသု၊သေလႄႈဢဝ်ၵႂႃႇဢၢပ်ႈပၼ်တီႈၶုၼ်ပိလတ်ႉ၊ဢေႃႈ။- 2ၶုၼ်ပိလတ်ႉ၊ၵေႃႈထၢမ်မၼ်းၸဝ်ႈလႄႈဝႃႈ၊ “မႂ်းၸႂ်ႈၶုၼ်ႁေႃၶမ်းၵျူး၊ႁိုဝ်း၊” ဝႃႈၼင်ႇၼႆလႄႈ၊မၼ်းၸဝ်ႈၶိုၼ်းလၢတ်ႈလႄႈဝႃႈ၊ “မႅၼ်ႈၸွမ်းၵႃႈၼင်ႇဢၼ်ၸဝ်ႈထၢမ်ၼႆႉယဝ်ႉ၊” ဝႃႈၼင်ႇၼႆဢေႃႈ။

3မိူဝ်ႈၼၼ်ႉ၊ယဵၸ်ႈပရေႃးႁဵၵ်ႈလူင်ၶဝ်တၢင်ႇဢပျတ်ႈၼမ်ၼႃႇတီႈမၼ်းၸဝ်ႈဢေႃႈ။- 4ၶုၼ်ပိလတ်ႉ၊သမ်ႉထၢမ်မၼ်းၸဝ်ႈထႅင်ႈလႄႈဝႃႈ၊ “မႂ်းဢမ်ႇၶိုၼ်းတွပ်ႇၵႃႈသင်ယဝ်ႉႁိုဝ်း။ တူၺ်းလူး။ ၶဝ်ႁႃဢပျတ်ႈတၢင်ႇသႂ်ႇမႂ်းၼမ်ၼႃႇယဝ်ႉ၊” ဝႃႈၼင်ႇၼႆဢေႃႈ။

5ၵူၺ်းၵႃႈ၊မၼ်းၸဝ်ႈဢမ်ႇၶိုၼ်းတွပ်ႇသေၶေႃႈသေၵမ်းလႄႈၶုၼ်ပိလတ်ႉ၊သမ်ႉပေႃးဢၢမ်းၼႃႇဢေႃႈ။

တၢင်းဢၼ်ဢဝ်တၢႆၸဝ်ႈယေႇသု

(တူၺ်း၊ မတ်ႈ 27:15-26။ လု 23:13-25။ ယူဝ်း 18:39-19:16)

6ၼႂ်းပွႆးပသၶႃႇ၊ၵူႈပွၵ်ႈၼၼ်ႉ၊ၶုၼ်ပိလတ်ႉ၊ယၢမ်ႈပွႆႇၵူၼ်းထွင်ႇဢွၵ်ႇပၼ်ယေႈၵေႃႉ၊ဢၼ်ၵူၼ်းတင်းလၢႆယွၼ်းဢဝ်ၼၼ်ႉဢေႃႈ။- 7မိူဝ်ႈယၢမ်းၼၼ်ႉမီးၵူၼ်းထွင်ႇၵေႃႉၼိုင်ႈ၊ဢၼ်လႆႈၸိုဝ်ႈပႃႇရပ်ႉပႃႉ၊ၼၼ်ႉလုၵ်ႉၽိုၼ်ႉမိူင်းလႄႈလႆႈဢဝ်ဢသၢၵ်ႈပိူၼ်ႈတၢႆၼႂ်းမိူဝ်ႈဢၼ်မၼ်းႁဵတ်းၵၢၼ်လုၵ်ႉၽိုၼ်ႉမိူင်းၼၼ်ႉဢေႃႈ။- 8ၵူၼ်းတင်းလၢႆၸုတုမ်ၵၼ်မႃးၼမ်ၼႃႇလႄႈၽွမ်ႉၵၼ်ယွၼ်းတီႈၶုၼ်ပိလတ်ႉ၊ႁႂ်ႈႁဵတ်းၸွမ်းၵႃႈၼင်ႇဢၼ်ယၢမ်ႈႁဵတ်းမႃးၼၼ်ႉဢေႃႈ။- 9ၶုၼ်ပိလတ်ႉ၊ၵေႃႈထၢမ်ၶဝ်လႄႈဝႃႈ၊ “သူၶႂ်ႈႁႂ်ႈၵဝ်ပွႆႇလွတ်ႈၶုၼ်ႁေႃၶမ်းၵျူး၊ၼၼ်ႉႁိုဝ်း၊” ဝႃႈၼင်ႇၼႆၼၼ်ႉ၊- 10ပိူဝ်ႈဢၼ်ၶုၼ်ၼၼ်ႉ၊ႁုလွင်ႈဢၼ်ယဵၸ်ႈပရေႃးႁဵၵ်ႈလူင်ၸိူဝ်းၼၼ်ႉ၊ငိၼ်းၸင်းမၼ်းၸဝ်ႈၼႃႇလူင်လၢင်လႄႈၸင်ႇဢဝ်မၼ်းၸဝ်ႈဢၢပ်ႈၸိူဝ်ႉၼင်ႇၼၼ်ၼၼ်ႉဢေႃႈ။

11မိူဝ်ႈၼၼ်ႉ၊ယဵၸ်ႈပရေႃးႁဵၵ်ႈလူင်ၸိူဝ်းၼၼ်ႉတိုၵ်းသူၼ်းမူႇၵူၼ်းတင်းလၢႆ၊ႁႂ်ႈယွၼ်းၶုၼ်ပိလတ်ႉ၊ပွႆႇပႃႇရပ်ႉပႃႉ၊ၵူၺ်းပၼ်တီႈၶဝ်ဢေႃႈ။- 12ၶုၼ်ပိလတ်ႉ၊ၸင်ႇထၢမ်တီႈမူႇၵူၼ်းလႄႈဝႃႈ၊ “ပေႃးပဵၼ်ၼႆၸိုင်၊တီႈၵေႃႉဢၼ်သူႁွင်ႉႁဵၵ်ႈဝႃႈ၊ၶုၼ်ႁေႃၶမ်းၵျူး၊ၼႆႉ၊ၵဝ်တၵ်းလႆႈႁဵတ်းၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။

13ၶဝ်ၶိုၼ်းပၢဝ်ႇသႅၼ်ႇလႄႈလၢတ်ႈဝႃႈ၊ “ဢဝ်မၼ်းတွၵ်ႇၸပ်းဝႆႉၵႃႈၼိူဝ်သဝ်မႆႉဝႃးမိုဝ်းသေၵမ်းၶႃႈ၊” ဝႃႈၼင်ႇၼႆဢေႃႈ။

14ၶုၼ်ပိလတ်ႉ၊သမ်ႉထၢမ်ထႅင်ႈလႄႈဝႃႈ၊ “ၵွပ်ႈသင်။ မၼ်းႁဵတ်းမႅၼ်ႈဢပျတ်ႈၵႃႈသင်၊” ဝႃႈၼင်ႇၼႆသေၵေႃႈ၊ၶဝ်ယဵင်ႈၶႅၼ်းပၢဝ်ႇသႅၼ်ႇႁႅင်းၼႃႇလႄႈလၢတ်ႈဝႃႈ၊ “ဢဝ်မၼ်းတွၵ်ႇၸပ်းဝႆႉၵႃႈၼိူဝ်သဝ်မႆႉဝႃးမိုဝ်းသေၵမ်းၶႃႈ၊” ဝႃႈၼင်ႇၼႆဢေႃႈ။

15ၶုၼ်ပိလတ်ႉ၊ၵေႃႈ၊ၼင်ႇႁိုဝ်မူႇၵူၼ်းတင်းလၢႆတၵ်းပျေႇၸႂ်ၸိုင်၊ပွႆႇလွတ်ႈပႃႇရပ်ႉပႃႉ၊ပၼ်ပုၼ်ႈၶဝ်ယဝ်ႉၸင်ႇ၊ပေႃႉယႅၼ်ႉၸဝ်ႈယေႇသု၊သေလႄႈဢဝ်ဢၢပ်ႈပၼ်ႁႂ်ႈၶဝ်လႆႈတွၵ်ႇၸပ်းၵႃႈၼိူဝ်သဝ်မႆႉဝႃးမိုဝ်းၼၼ်ႉသေဢေႃႈ။

ၵူၼ်းသိုၵ်းႁဵတ်းပျၢၵ်ႈတီႈၸဝ်ႈယေႇသု

(တူၺ်း၊ မတ်ႈ 27:27-31။ ယူဝ်း 19:2-3)

16မိူဝ်ႈၼၼ်ႉ၊ၵူၼ်းသိုၵ်းၶဝ်ဢဝ်ၸဝ်ႈယေႇသု၊ၵႂႃႇၵႃႈၼႂ်းတပ်ႉဢၼ်မီးၼႂ်းပၢင်ႇဝၢင်းႁေႃၼၼ်ႉသေယဝ်ႉ၊ႁွင်ႉဢဝ်ၵူၼ်းသိုၵ်းတင်းမူတ်းမႃးၸုတုမ်ၵၼ်ဢေႃႈ။- 17ၶဝ်ဢဝ်သိူဝ်ႈယၢဝ်းလႅင်ၵမ်ႇၽိုၼ်ၼိုင်ႈၼုင်ႈမႆပၼ်မၼ်းၸဝ်ႈလႄႈဢဝ်ၶိူဝ်းၼၢမ်သၢၼ်ႁဵတ်းပဵၼ်ၶူၺ်ႇသရၽူႇသေသုပ်းသႂ်ႇတီႈႁူဝ်မၼ်းၸဝ်ႈဢေႃႈ။- 18ဝၢႆးၼၼ်ႉ၊ၶဝ်ဢွၼ်ၵၼ်ႁဵတ်းႁၢင်ႈရူဝ်ႇသေႇၵူဝ်ယမ်တီႈမၼ်းၸဝ်ႈလႄႈလၢတ်ႈဝႃႈ၊ “ၶုၼ်ႁေႃၶမ်းၵျူး၊တီႈၶႃႈ႟။ ႁႂ်ႈၸဝ်ႈႁဝ်းဢသၢၵ်ႈယိုၼ်းယၢဝ်းသေၵမ်းလူၺ်ႈတီႈၶႃႈ၊” ဝႃႈၼင်ႇၼႆဢေႃႈ။- 19ၶဝ်ဢဝ်ၶွၼ်ႉမႆႉဢေႃႈပေႃႉယႅၼ်ႉႁူဝ်မၼ်းၸဝ်ႈ၊ထူမ်ႇၼမ်ႉလၢႆးသႂ်ႇမၼ်းၸဝ်ႈသေယဝ်ႉ၊ၶုပ်ႉၶဝ်ႇလႄႈဢွၼ်ၵၼ်ၵူမ်ႈႁူဝ်ၵွမ်းႁူဝ်ပၼ်တီႈမၼ်းၸဝ်ႈဢေႃႈ။- 20လိုၼ်းသေၶဝ်ႁဵတ်းပျၢၵ်ႈၶူဝ်ယဝ်ႉယဝ်ႉၼၼ်ႉ၊ၶဝ်ထွတ်ႇဢဝ်သိူဝ်ႈယၢဝ်းလႅင်ၵမ်ႇၼၼ်ႉသေလႄႈၶိုၼ်းၼုင်ႈပၼ်ၶူဝ်းၼုင်ႈမၼ်းၸဝ်ႈသေယဝ်ႉၸင်ႇ၊ၶဝ်ဢဝ်မၼ်းၸဝ်ႈဢွၵ်ႇၵႂႃႇႁႂ်ႈလႆႈတွၵ်ႇတၢႆၵႃႈၼိူဝ်သဝ်မႆႉဝႃးမိုဝ်းသေဢေႃႈ။

ၸဝ်ႈယေႇသုလႆႈၶၢမ်ႇတွၵ်ႇၵႃႈၼိူဝ်သဝ်

(တူၺ်း၊ မတ်ႈ 27:32-44။ လု 23:26-43။ ယူဝ်း 19:17-27)

21ၼႂ်းၶၢဝ်းတၢင်းၼၼ်ႉ၊ၶဝ်ႁူပ်ႉထူပ်းၵူၼ်းၵေႃႉၼိုင်ႈ၊ၸိုဝ်ႈသိမုၼ်ႇ၊ဢၼ်လုၵ်ႉသေၵႃႈတီႈဝၢၼ်ႈၼွၵ်ႈၶဝ်ႈဝဵင်းမႃးယူႇၼၼ်ႉလႄႈ၊ၵူၼ်းသိုၵ်းၶဝ်တဵၵ်းငႅၼ်းႁႂ်ႈမၼ်းမႅၵ်ႇသဝ်မႆႉဝႃးမိုဝ်းၸဝ်ႈယေႇသု၊ဢေႃႈ။ (သိမုၼ်ႇ၊ၼၼ်ႉပဵၼ်ၵူၼ်းမိူင်းၵုရေႇၼေႇ၊လႄႈ၊ပဵၼ်ပေႃႈဢလႅၵ်ႉၸၼ်းတႃး၊ဢိၵ်ႇတင်းရုၽု၊ဢေႃႈ။-) 22ၶဝ်ဢဝ်မၼ်းၸဝ်ႈၵႂႃႇၵႃႈတီႈလွႆၵေႃးလႃႉၵေႃးထႃႉ၊ဢၼ်ပွင်ႇဝႃႈၵွင်းၵွၵ်းႁူဝ်ၼၼ်ႉယဝ်ႉၸင်ႇ၊- 23ၵႃႈတီႈၼၼ်ႈ၊ၶဝ်ဢဝ်ၼမ်ႉမၢၵ်ႇၸပိတ်ႉသူမ်ႈလေႃးၵၼ်တင်းမုရၼ်ႇတိုၵ်းပၼ်မၼ်းၸဝ်ႈၵိၼ်ဢေႃႈ။ ၵူၺ်းၵႃႈ၊မၼ်းၸဝ်ႈဢမ်ႇၵိၼ်။- 24ၶဝ်ဢဝ်မၼ်းၸဝ်ႈတွၵ်ႇသႂ်ႇၵႃႈၼိူဝ်သဝ်မႆႉဝႃးမိုဝ်းယဝ်ႉၸင်ႇ၊ဢဝ်ၶူဝ်းၼုင်ႈမၼ်းၸဝ်ႈၼၼ်ႉတူၵ်းၸႃႇၵွၵ်ႈမႅင်ႇၵၼ်၊ၽူႈလႂ်တၵ်းလႆႈၽိုၼ်လႂ်ၼၼ်ႉဢေႃႈ။- 25ၶိင်ႇဢၼ်ၶဝ်တွၵ်ႇမၼ်းၸဝ်ႈဝႆႉၵႃႈၼိူဝ်သဝ်မႆႉၼၼ်ႉ၊ပဵၼ်ၶိင်ႇၵၢင်ၼႂ်ၵဝ်ႈမွင်းဢေႃႈ။- 26လိၵ်ႈဢၼ်ၽုၺ်ႇၼႄဢပျတ်ႈမၼ်းၸဝ်ႈၼၼ်ႉဝႃႈဝႆႉၸမ်ႉ၊ “ၶုၼ်ႁေႃၶမ်းၵျူး၊” ဝႃႈၼင်ႇၼႆဢေႃႈ။- 27ၵူၼ်းၸူၼ်သွင်ၵေႃႉၵေႃႈ၊ၶဝ်ဢဝ်တွၵ်ႇဝႆႉၽၢႆႇၶႂႃၸဝ်ႈၵေႃႉၼိုင်ႈ၊ၽၢႆႇသၢႆႉၸဝ်ႈၵေႃႉၼိုင်ႈလူၺ်ႈၵၼ်တင်းမၼ်းၸဝ်ႈဢေႃႈ။- 28ဢၼ်မီးၼႂ်းၵျၢမ်းလိၵ်ႈလႄႈဝႃႈ၊ “မၼ်းလႆႈၶၢမ်ႇတၢင်းဢၼ်ၼပ်ႉဢၢၼ်ႇၶဝ်ႈပႃးၵႃႈၼႂ်းၶဝ်ၸိူဝ်းဢၼ်ဢမ်ႇတြႃးတင်းလၢႆဢေႃႈ၊” ဝႃႈၼင်ႇၼႆၼၼ်ႉပျေႉၸုမ်ႇမိူဝ်ႈၼၼ်ႉယဝ်ႉဢေႃႈ။

29ၵူၼ်းၸိူဝ်းဢၼ်ၵႂႃႇမႃးႁိမ်းမၼ်းၸဝ်ႈၸိူဝ်းၼၼ်ႉ၊ဢွၼ်ၵၼ်သႄႉသွမ်းတၢင်ႇဢပျတ်ႈတီႈမၼ်းၸဝ်ႈယူႇ၊သၼ်ႇႁူဝ်ငွၵ်းႁူဝ်ယူႇသေလႄႈလၢတ်ႈဝႃႈ၊ “ႁႄႉ၊ၵေႃႉဢၼ်ၵိူၼ်ႇယႃႉၵျွင်းပိၵ်ႈမၢၼ်ႇၸဝ်ႈသေလႄႈၼႂ်းသၢမ်ဝၼ်းၵူၺ်းတၵ်းၶိုၼ်းတႄႇႁဵတ်းၼႆႉ႟။- 30တေႃႈလဵဝ်ၵႄႇသႄႇဢဝ်တူဝ်ၸဝ်ႈၵဝ်ႇသေလႄႈလူင်းသဝ်မႆႉဝႃးမိုဝ်းမႃးတႃႉ၊” ဝႃႈၼင်ႇၼႆဢေႃႈ။

31မိူၼ်ၼင်ႇၼၼ်၊ယဵၸ်ႈပရေႃးႁဵၵ်ႈၶဝ်ယွၵ်ႇယဝ်ႈလၢတ်ႈပျၢၵ်ႈၶူဝ်လွင်ႈမၼ်းၸဝ်ႈလူၺ်ႈၵၼ်တင်းသြႃႇမေႃၵျၢမ်းထမ်ႇမႃႉၸိူဝ်းၼၼ်ႉလႄႈဝႃႈ၊ “မၼ်းၶျွတ်ႈဢဝ်ပိူၼ်ႈလႆႈဝႃႈၼႆယဝ်ႉ။ တူဝ်ၸဝ်ႈၵဝ်ႇဢမ်ႇၶျွတ်ႈဢဝ်တူဝ်ၸဝ်ႈၵဝ်ႇလႆႈ။- 32ႁႂ်ႈၸဝ်ႈၶရိၸ်ႈ၊ၶုၼ်ႁေႃၶမ်းၵျူး၊လူင်းသဝ်မႆႉဝႃးမိုဝ်းမႃးတေႃႈလဵဝ်ၼႆႉတႃႉ။ ႁဝ်းတၵ်းဢွၼ်ၵၼ်ယုမ်ႇမၢတ်ႈမၼ်းဢေႃႈ၊” ဝႃႈၼင်ႇၼႆဢေႃႈ။

ၵူၼ်းသွင်ၵေႃႉဢၼ်လႆႈၶၢမ်ႇတွၵ်ႇဝႆႉၵႃႈၼိူဝ်သဝ်မႆႉဝႃးမိုဝ်းလူၺ်ႈၵၼ်တင်းမၼ်းၸဝ်ႈၼၼ်ႉၵေႃႈသႄႉသွမ်းတၢင်ႇဢပျတ်ႈမၼ်းၸဝ်ႈဢေႃႈ။

ၸဝ်ႈယေႇသုၸႂ်ၶၢတ်ႇတၢႆၵႂႃႇ

(တူၺ်း၊ မတ်ႈ 27:45-56။ လု 23:44-49။ ယူဝ်း 19:28-30)

33မိူဝ်ႈထိုင်ၶိင်ႇၵၢင်ဝၼ်းတဵင်ႈၸိုင်၊ၵၢင်ဝၼ်းလပ်းသိင်ႇၽိတ်းၽိတ်းၵႂႃႇတင်းမိူင်းႁိုင်သၢမ်မွင်းဢေႃႈ။- 34မိူဝ်ႈထိုင်ၶိင်ႇသၢမ်မွင်းဝၢႆးဝၼ်းၸိုင်၊ၸဝ်ႈယေႇသု၊ႁဵတ်းသဵင်ဢၼ်ယႂ်ႇၼႃႇႁွင်ႉသႅၼ်ႇလႄႈဝႃႈ၊ “ဢေးလိ၊ဢေးလိ၊လႃးမႃး၊သႃႇပၵ်ႉသၼိ၊” ဝႃႈၼင်ႇၼႆဢေႃႈ။ ၵႂၢမ်းဢၼ်မၼ်းၸဝ်ႈဝႃႈၼၼ်ႉပွင်ႇဝႃႈ၊ “ၽြႃးၵဝ်ၶႃႈ၊ၽြႃးၵဝ်ၶႃႈ၊ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸုၼ်ႉပႅတ်ႈၵဝ်ၶႃႈၸိူဝ်ႉၼင်ႇႁိုဝ်တီႈၶႃႈ၊” ဝႃႈၼင်ႇၼႆဢေႃႈ။

35ၵူၼ်းဢၼ်ၸုၵ်းယူႇတီႈႁိမ်းၼၼ်ႉၵမ်ႈၽွင်ႈငိၼ်းလႄႈလၢတ်ႈဝႃႈ၊ “ထွမ်ႇလူး။ မၼ်းႁွင်ႉႁႃဢေးလိယႃႉ၊ဢေႃႈ၊” ဝႃႈၼင်ႇၼႆဢေႃႈ။- 36မိူဝ်ႈၼၼ်ႉ၊ၵူၼ်းၵေႃႉၼိုင်ႈလႅၼ်ႈၵႂႃႇဢဝ်ၼူၼ်းၵုၺ်သေလႄႈၸုမ်ႇသႂ်ႇၼႂ်းၼမ်ႉမၢၵ်ႇၸပိတ်ႉသူမ်ႈယဝ်ႉၸင်ႇသဵပ်ႇသႂ်ႇပၢႆမႆႉဢေႃႈသေလႄႈယိုၼ်ႈပၼ်ႁႂ်ႈၸဝ်ႈယေႇသု၊ၸုပ်ႇၵိၼ်သေယဝ်ႉလၢတ်ႈလႄႈဝႃႈ၊ “ၸွင်ႇဢေးလိယႃႉ၊တၵ်းမႃးၶျႃးဢဝ်မၼ်းလူင်းႁိုဝ်း၊ဢမ်ႇမႃးဢဝ်ၶျႃးလူင်းႁိုဝ်းပႂ်ႉတူၺ်းတႃႉႁဝ်း၊” ဝႃႈၼင်ႇၼႆဢေႃႈ။

37 ၸဝ်ႈယေႇသု၊သမ်ႉႁဵတ်းသဵင်ဢၼ်ယႂ်ႇၼႃႇႁွင်ႉသႅၼ်ႇလႄႈထွတ်ႇၸႂ်မၼ်းၸဝ်ႈၵႂႃႇသေဢေႃႈ။

38မိူဝ်ႈၼၼ်ႉ၊ၽႃႈၵင်ႈတီႈမူတ်းၸၢင်ႇၵျွင်းပိၵ်ႈမၢၼ်ႇၸဝ်ႈသိၵ်ႇၶၢတ်ႇၵႂႃႇတႄႇဢဝ်တီႈႁူဝ်ၵႂႃႇတေႃႇႁွတ်ႈထိုင်တိၼ်ဢေႃႈ။- 39ၶုၼ်သိုၵ်းလူင်ဢၼ်ၸုၵ်းယူႇတေႃႇၼႃႈၵၼ်တင်းမၼ်းၸဝ်ႈၼၼ်ႉ၊လႆႈႁၼ်လွင်ႈတၢင်းဢၼ်မၼ်းၸဝ်ႈႁွင်ႉသႅၼ်ႇထွတ်ႇၸႂ်ၸိူဝ်ႉၼင်ႇၼၼ်ၼၼ်ႉၸိုင်၊လၢတ်ႈလႄႈဝႃႈ၊ “ၸႂ်ႈတႄႉယဝ်ႉ။ ၵေႃႉၼႆႉပဵၼ်လုၵ်ႈၽြႃးပဵၼ်ၸဝ်ႈတႄႉဢေႃႈ၊” ဝႃႈၼင်ႇၼႆဢေႃႈ။

40ၵႃႈတီႈၼၼ်ႈ၊မီးမႄႈယိင်းၵမ်ႈၽွင်ႈယူႇတီႈဢၼ်ႁၢင်ႇႁၢင်ႇလႄႈလွမ်ပႂ်ႉတူၺ်းယူႇဢေႃႈ။ ၼႂ်းမႄႈယိင်းၸိူဝ်းၼၼ်ႉပႃးၸႃႉၸဵမ်မႃႇရိမႃႇၵတလႃႉ၊မႃႇရိ၊ၵေႃႉပဵၼ်မႄႈယႃႇၵုပ်ႈ၊တင်းယူဝ်းသေႇ၊ဢိၵ်ႇတင်းသႃႇလုမ်း၊လႄႈ။- 41ပဵၼ်ၶဝ်ၸိူဝ်းဢၼ်ၸွမ်းပႃႈလင်မၼ်းၸဝ်ႈလႄႈႁဵတ်းလဵင်ႉႁဵတ်းလူၼႂ်းမိူဝ်ႈဢၼ်မၼ်းၸဝ်ႈမီးယူႇၼႂ်းဢိူင်ႇၵႃႇလိလႄး၊ၼၼ်ႉဢေႃႈ။ မႄႈယိင်းတၢင်ႇၵေႃႉၼမ်ၼႃႇဢၼ်ၸွမ်းမၼ်းၸဝ်ႈသေလႄႈမႃးႁွတ်ႈမႃးထိုင်တီႈဝဵင်းယေႇရုသလႅမ်ႇ၊ၸိူဝ်းၼၼ်ႉၵေႃႈပႃးၵႃႈတီႈၼၼ်ႈဢေႃႈ။

သၢင်းၵျူဝ်ႇတူဝ်တၢႆၸဝ်ႈယေႇသု

(တူၺ်း၊ မတ်ႈ 27:57-61။ လု 23:50-56။ ယူဝ်း 19:38-42)

42မိူဝ်ႈဢၼ်ႁွတ်ႈထိုင်ၶိင်ႇႁူဝ်ၶမ်ႈၼႂ်းဝၼ်းဢၼ်မႄးႁႅၼ်းထႃႈၼၼ်ႉ၊ပဵၼ်ဝၼ်းၽိတ်ႈသိၼ်လူင်ၵူၼ်းၵျူး၊ၶဝ်ၼၼ်ႉၸိုင်၊- 43ယူဝ်းသႅပ်ႈ၊ၵူၼ်းဝဵင်းဢရိမသႄး၊ၵေႃႉပဵၼ်ၶုၼ်လုမ်းလႄႈမီးသရေႇ၊ပဵၼ်ၵူၼ်းဢၼ်မုင်ႈထႃႈမွင်းထႃႈမိူင်းၽြႃးပဵၼ်ၸဝ်ႈၼၼ်ႉ၊ဝႆႉၸႂ်ႁတ်းႁတ်းႁၢၼ်ႁၢၼ်သေလႄႈၶဝ်ႈၸူးတီႈၶုၼ်ပိလတ်ႉ၊လႄႈယွၼ်းတူဝ်တၢႆၸဝ်ႈယေႇသု၊ဢေႃႈ။- 44ၶုၼ်ပိလတ်ႉ၊လႆႈငိၼ်းလွင်ႈဢၼ်တေႃႈလဵဝ်ၼႆႉၸဝ်ႈယေႇသု၊တၢႆယဝ်ႉဝႃႈၼႆၼၼ်ႉဢၢမ်းၼႃႈလူင်လၢင်သေယဝ်ႉ၊ႁွင်ႉၶုၼ်သိုၵ်းလူင်ၼၼ်ႉမႃးလႄႈထၢမ်ဝႃႈ၊ “မၼ်းတၢႆႁိုင်ယဝ်ႉႁိုဝ်း၊” ဝႃႈၼင်ႇၼႆဢေႃႈ။- 45မိူဝ်ႈဢၼ်မၼ်းလႆႈငိၼ်းၵႂၢမ်းၶုၼ်သိုၵ်းလူင်ဝႃႈ၊မၼ်းၸဝ်ႈတၢႆတႄႉယဝ်ႉၼၼ်ႉၸိုင်၊ဢဝ်တူဝ်တၢႆမၼ်းၸဝ်ႈဢၢပ်ႈပၼ်တီႈယူဝ်းသႅပ်ႈ၊ဢေႃႈ။- 46ယူဝ်းသႅပ်ႈ၊ၵေႃႈသိုဝ်ႉၽႃႈပၢၼ်ႇဢၼ်ၶျေႃးမႃးလႄႈၶျႃးတူဝ်တၢႆမၼ်းၸဝ်ႈလူင်းယဝ်ႉၸင်ႇ၊ဢဝ်ၽႃႈပၢၼ်ႇၼၼ်ႉၶဵၼ်းႁေႃႇသေယဝ်ႉ၊သႂၢင်းသႂ်ႇဝႆႉၵႃႈၼႂ်းပိုင်ႈပႃႇႁဵဝ်ႈဢၼ်ၶုတ်းမူင်ႇဝႆႉၵႃႈၼႂ်းၼႃႈၽႃႁိၼ်ၼၼ်ႉဢေႃႈ။ မၼ်းဢဝ်မၢၵ်ႇႁိၼ်လူင်ၵိင်ႈသႂ်ႇဝႆႉၵႃႈတီႈပၢၵ်ႇႁူးပိုင်ႈပႃႇႁဵဝ်ႈၼၼ်ႉဢေႃႈ။- 47မႃႇရိမႃႇၵတလႃႉ၊တင်းမႃႇရိ၊မႄႈယူဝ်းသေႇ၊ၶဝ်လႆႈႁၼ်တီႈဢၼ်ဢဝ်တူဝ်တၢႆမၼ်းၸဝ်ႈဝႆႉၼၼ်ႉဢေႃႈ။

Currently Selected:

မႃႇ 15: SHNCL

Highlight

Copy

Compare