မတ်ႈ 5
5
တြႃးၸဝ်ႈဢၼ်ႁေႃးတီႈၼိူဝ်လွႆ
1မိူဝ်ႈဢၼ်ၸဝ်ႈယေႇသု၊ႁၼ်ၵူၼ်းၼမ်ၼႃႇလူင်လၢင်ၼၼ်ႉ၊မၼ်းၸဝ်ႈၶိုၼ်ႈၵႃႈၼိူဝ်လွႆၵႂႃႇဢေႃႈ။ တီႈၼၼ်ႈမိူဝ်ႈဢၼ်တပႄးၸဝ်ႈတင်းလၢႆလွမ်ႉႁွပ်ႈမၼ်းၸဝ်ႈမႃးၼၼ်ႉမၼ်းၸဝ်ႈၼင်ႈလႄႈ၊- 2တႄႇၸႃႉပိုတ်ႇပၢၵ်ႇႁေႃးလၢတ်ႈတြႃးတီႈၶဝ်ဢေႃႈ။
တြႃးမၢင်ႇၵလႃႇဢၼ်မၼ်းၸဝ်ႈႁေႃးလၢတ်ႈ
(တူၺ်း၊ လု 6:20-23)
3“ၶဝ်ၸိူဝ်းဢၼ်ႁူဝ်ၸႂ်ၶျႃးတႅမ်ႇၼၼ်ႉမီးမၢင်ႇၵလႃႇဢေႃႈ။
မိူင်းၵၢင်ႁၢဝ်ၸဝ်ႈပဵၼ်မိူင်းၶဝ်ၼၼ်ႉယဝ်ႉ။
4ၶဝ်ၸိူဝ်းဢၼ်ၶူမ်ၸႂ်ၶူမ်ၶေႃးၼၼ်ႉမီးမၢင်ႇၵလႃႇဢေႃႈ။
တီႈၶဝ်ၼၼ်ႉၽြႃးပဵၼ်ၸဝ်ႈတၵ်းႁႂ်ႈသႃႇၸႂ်ဢေႃႈ။
5ၶဝ်ၸိူဝ်းဢၼ်ႁူဝ်ၸႂ်ၼိမ်သိမ်ႇဢူၼ်ႈဢွၼ်ႇၼၼ်ႉမီးမၢင်ႇၵလႃႇဢေႃႈ။
ၶဝ်ၼၼ်ႉတၵ်းလႆႈၶၢမ်ႇဢမူၺ်ႇၸွမ်းၼင်ႇၵတိၽြႃးပဵၼ်ၸဝ်ႈဢေႃႈ။
6ၶဝ်ၸိူဝ်းဢၼ်မီးႁူဝ်ၸႂ်ဢၼ်ဢိုပ်းယၢၵ်ႈ
တွင်ႉမႆႈပႃႇရမီႇတၢင်းသိုဝ်ႈတေႃႇၼၼ်ႉမီးမၢင်ႇၵလႃႇဢေႃႈ။
တီႈၶဝ်ၼၼ်ႉၽြႃးပဵၼ်ၸဝ်ႈတၵ်းႁႂ်ႈႁွတ်ႈတၢင်းဢၼ်လိူင်ႇၸႂ်ဢေႃႈ။
7ၶဝ်ၸိူဝ်းဢၼ်ႁူဝ်ၸႂ်ၸၢင်ႈႁၵ်ႉဢဵတ်းလူၼၼ်ႉမီးမၢင်ႇၵလႃႇဢေႃႈ။
တီႈၶဝ်ၼၼ်ႉၽြႃးပဵၼ်ၸဝ်ႈတၵ်းႁၵ်ႉဢဵတ်းလူဢေႃႈ။
8ၶဝ်ၸိူဝ်းဢၼ်ႁူဝ်ၸႂ်ၶၢဝ်ၸၢင်ႇၼၼ်ႉမီးမၢင်ႇၵလႃႇဢေႃႈ။
ၶဝ်ၼၼ်ႉတၵ်းလႆႈႁၼ်ၽြႃးပဵၼ်ၸဝ်ႈဢေႃႈ။
9ၶဝ်ၸိူဝ်းဢၼ်ႁႂ်ႈတၢင်းဢၼ်ပိူၼ်ႈၽိတ်းၵၼ်ထၢတ်ႇယဵၼ်ၼၼ်ႉမီးမၢင်ႇၵလႃႇဢေႃႈ။
ၶဝ်ၼၼ်ႉတၵ်းလႆႈၶၢမ်ႇႁွင်ႉဝႃႈ၊ ပဵၼ်လုၵ်ႈၽြႃးပဵၼ်ၸဝ်ႈဢေႃႈ။
10ၶဝ်ၸိူဝ်းဢၼ်လႆႈၶၢမ်ႇၼိၵ်ႈၸၢၵ်ႈငႅၼ်းသႄးၵွပ်ႈပိူဝ်ႈဢၼ်ၸွမ်းတြႃးတၢင်းဢၼ်၊
သိုဝ်ႈတေႃႇၼၼ်ႉမီးမၢင်ႇၵလႃႇဢေႃႈ။ မိူင်းၵၢင်ႁၢဝ်ၸဝ်ႈပဵၼ်မိူင်းၶဝ်ဢေႃႈ။
11“မိူဝ်ႈဢၼ်ပိူၼ်ႈသႄႉသွမ်းတၢင်ႇဢပျတ်ႈဢၼ်ဢမ်ႇ ၸိုဝ်ႈဢမ်ႇၸႂ်ႈၵူႈၸိူဝ်ႉၵူႈပိူင်တီႈသူလႄႈၼိၵ်ႈၸၢၵ်ႈငႅၼ်းသႄးသူၵွပ်ႈပိူဝ်ႈသူပဵၼ်တပႄးၵဝ်ၼၼ်ႉသူမီးမၢင်ႇၵလႃႇဢေႃႈ။- 12ၸူမ်းသိူဝ်းမူၼ်ႈပျေႃႇတႃႉ။ သူးလၢပ်ႈဢၵျူဝ်းဢၼ်ယႂ်ႇၼႃႇၼၼ်ႉမႄးႁႅၼ်းဝႆႉပုၼ်ႈသူၵႃႈၼႂ်းမိူင်းၵၢင်ႁၢဝ်ၸဝ်ႈၼၼ်ႉယဝ်ႉ။ ပရေႃးၽႅတ်ႈဢၼ်ပေႃႇမႃးဢွၼ်တၢင်းသူတင်းလၢႆၸိူဝ်းၼၼ်ႉၵေႃႈလႆႈၶၢမ်ႇၸိူဝ်ႉၼင်ႇၼႆပူၼ်ႉမႃးယဝ်ႉ။
လွင်ႈၵိူဝ်ဢိၵ်ႇတင်းဢၼ်လႅင်း
(တူၺ်း၊ မႃႇ 9:50။ လု 14:34-35)
13“သူပဵၼ်မိူၼ်ၸိူဝ်ႉၼင်ႇၵိူဝ်ပုၼ်ႈၵူၼ်းၼႂ်းလေႃးၵႃႉၼႆႉဢေႃႈ။ ၵိူဝ်ၼႆႉပေႃးဢၼ်ၸဵမ်းမၼ်းႁၢႆၵႂႃႇၸိုင်၊ဢမ်ႇၸၢင်ႈၶိုၼ်းလႆႈဢၼ်ၸဵမ်းမၼ်းၼၼ်ႉထႅင်ႈယဝ်ႉ။ ဢမ်ႇပွင်ႇလွင်ႈၵႃႈသင်ယဝ်ႉလႄႈ၊ဢဝ်ထိမ်ႈပႅတ်ႈပႃႈၼွၵ်ႈႁႂ်ႈၵူၼ်းယဵပ်ႇၵူၼ်းၶၢမ်ႈၵူၺ်းယဝ်ႉဢေႃႈ။
14“သူပဵၼ်မိူၼ်ၸိူဝ်ႉၼင်ႇဢၼ်လႅင်းပုၼ်ႈလေႃးၵႃႉၼႆႉဢေႃႈ။ ဝဵင်းဢၼ်တႄႇဝႆႉၵႃႈၼိူဝ်ပၢႆၸိၵ်းလွႆၸိုင်၊ဢမ်ႇသိူင်ႇဢမ်ႇလပ်ႉဝႆႉလႆႈ။- 15ဢမ်ႇမီးၽူႈလႂ်တႆႈၵွၵ်းၽႆးသေလႄႈဢဝ်ပဵတ်ႈႁူမ်ႇသုမ်ႇဝႆႉ၊ ၸၢင်ႈဢဝ်တၢင်ႇဝႆႉၵႃႈၼိူဝ်ၶဵင်ႇတီႈတႆႈၽႆးဢၼ်သုင်၊ပုၼ်ႈလွင်ႈၼင်ႇႁိုဝ်တၵ်းပၼ်ဢၼ်လႅင်းၵႃႈတီႈၵူၼ်းႁိူၼ်းၵူႈၵေႃႉၵူႈၵူၼ်းၼၼ်ႉဢေႃႈ။
လွင်ႈတၢင်းဢၼ်ႁိူဝ်ႈလႅင်း
16“ပိူင်လဵဝ်ၵၼ်ၼႂ်းသူၼႆႉမိူၼ်ၸိူဝ်ႉၼင်ႇၵွၵ်းၽႆးၼၼ်ႉ၊ႁႂ်ႈဢၼ်လႅင်းသူထွင်ႇႁိူဝ်ႈပႃႈၼႃႈပိူၼ်ႈတႃႉ။ လွင်ႈမၼ်းၸမ်ႉ၊ပိူၼ်ႈတၵ်းႁၼ်တၢင်းၵမ်တၢင်းၵျၢင်ႉဢၼ်လီသူၼၼ်ႉလႄႈယွင်ႈယေႃးပေႃႈၸဝ်ႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ပုၼ်ႉၼၼ်ႉဢေႃႈ။
သွၼ်ပၼ်လွင်ႈပိင်းၺၢပ်ႈတြႃး
17“ၵဝ်မႃးႁႂ်ႈလႆႈယႃႉၵျၢမ်းပိင်းၺၢပ်ႈတြႃးတင်းၵျၢမ်းဢၼႃႇၵတ်ႉတိၸိူဝ်းၼၼ်ႉဝႃႈၼႆ၊ယႃႇပေထၢင်ႇၽိတ်း။ ၵဝ်မႃးပုၼ်ႈတၵ်းႁႂ်ႈလႆႈမႃးယႃႉဢမ်ႇၸႂ်ႈ။ မႃးပုၼ်ႈတၵ်းႁႂ်ႈလႆႈပျေႉၸုမ်ႇဢေႃႈ။- 18ၵဝ်ဝႃႈတီႈၸိုဝ်ႈတီႈၸႂ်ႈမၼ်းၸမ်ႉ၊တေႃႇထိုင်ႁွတ်ႈၽႃႉၵၢင်ႁၢဝ်တင်းလိၼ်မိူင်းဢမ်ႇပႆႇသုတ်းသဵင်ႈႁၢႆဝၢႆးၵႂႃႇၼၼ်ႉ၊တူဝ်မႄႈလိၵ်ႈၸမ်ႈၼိုင်ႈမဵတ်ႉၼိုင်ႈလႄႈသင်၊ၸူဝ်ႈဢၼ်ဢမ်ႇပႆႇပဵၼ်ၸွမ်းပျေႉၸုမ်ႇၼၼ်ႉတေဢမ်ႇလႆႈလုလႆႈႁၢႆသေၵႃႈၼႂ်းၵျၢမ်းပိင်းၺၢပ်ႈတြႃးၼႆႉ။- 19ပိူဝ်ႈၼႆလႄႈ၊ၵေႃႉဢၼ်ၽိတ်းပိူင်ႈသဵၼ်ႈတြႃးဢၼ်လဵၵ်ႉသေပိူၼ်ႈၼၼ်ႉလႄႈသင်၊သမ်ႉသွၼ်ပၼ်ပိူၼ်ႈႁႂ်ႈႁဵတ်းၽိတ်းၸွမ်းၸိူဝ်ႉၼင်ႇၼၼ်ႉလႄႈသင်၊ၵေႃႉၼၼ်ႉတၵ်းလႆႈၶၢမ်ႇတၢင်းႁွင်ႉၵေႃႉဢၼ်လဵၵ်ႉသေပိူၼ်ႈၵႃႈၼႂ်းမိူင်းၵၢင်ႁၢဝ်ၸဝ်ႈပုၼ်ႉဢေႃႈ။ ပိူင်လဵဝ်ၵၼ်ၵေႃႉဢၼ်ၵမ်ၵျၢင်ႉၸွမ်းတြႃးပိင်းၺၢပ်ႈဢၼ်လဵၵ်ႉသေပိူၼ်ႈၼၼ်ႉလႄႈသင်၊သမ်ႉသွၼ်ပၼ်ပိူၼ်ႈႁႂ်ႈႁဵတ်းၸွမ်းၸိူဝ်ႉၼင်ႇၼၼ်လႄႈသင်၊ၵေႃႉၼၼ်ႉတၵ်းလႆႈၶၢမ်ႇတၢင်းႁွင်ႉၵေႃႉဢၼ်ယႂ်ႇသေပိူၼ်ႈၵႃႈၼႂ်းမိူင်းၵၢင်ႁၢဝ်ၸဝ်ႈပုၼ်ႉဢေႃႈ။- 20ၵဝ်ႁေႃးလၢတ်ႈပၼ်သတိတီႈသူလႄႈဝႃႈၸမ်ႉ၊ပေႃးတၢင်းၵမ်တၢင်းၵျၢင်ႉသူယင်းဢမ်ႇလီလိူဝ်တွၼ်းၼႃႇသေတၢင်းၵမ်တၢင်းၵျၢင်ႉၵူၼ်းၵိူင်းၽႃႇရိသႄး၊ၶဝ်၊ဢိၵ်ႇတင်းသြႃႇမေႃၵျၢမ်းထမ်ႇမႃႉၶဝ်ၸိူဝ်းၼၼ်ႉၸိုင်၊သူဢမ်ႇလႆႈၶဝ်ႈၵႃႈၼႂ်းမိူင်းၵၢင်ႁၢဝ်ၸဝ်ႈပုၼ်ႉ။
တၢင်းဢၼ်သင်ႇသွၼ်လွင်ႈၸႂ်လမ်သႆႈၵမ်ႇ
21“သူလႆႈငိၼ်းပိင်းၺၢပ်ႈတြႃးဝႆႉပုၼ်ႈၵူၼ်းမိူဝ်ႈၵွၼ်ႇလႄႈဝႃႈ၊ ‘ယႃႇပေဢဝ်ဢသၢၵ်ႈၵူၼ်းတၢႆ။ ၵေႃႉဢၼ်ဢဝ်ဢသၢၵ်ႈၵူၼ်းတၢႆၼၼ်ႉတၵ်းလႆႈၶၢမ်ႇတၢင်းဢၼ်ၸီႇယၢင်ႇဢေႃႈ၊’ ဝႃႈၼင်ႇၼႆယဝ်ႉ။-#တူၺ်း၊ ဢွၵ်ႇ 20:13 22တြႃးဢၼ်ၵဝ်ႁေႃးၸမ်ႉ၊ၽူႈလႂ်သေဢမ်ႇဝႃႈ၊ၵေႃႉဢၼ်ၸႂ်လမ်သႆႈၵမ်ႇတေႃႇပီႈၼွင်ႉမၼ်းၼၼ်ႉတၵ်းလႆႈၶၢမ်ႇတၢင်းဢၼ်ၸီႇယၢင်ႇဢပျတ်ႈဢေႃႈ။ ၵေႃႉဢၼ်လၢတ်ႈတီႈပီႈၼွင်ႉမၼ်းလႄႈဝႃႈ၊ ‘ၵူၼ်းငိူဝ်ႈငႃႉ’ ဝႃႈၼႆၼၼ်ႉ၊လႆႈထိူၵ်ႈၶၢမ်ႇတၢင်းဢၼ်ၸီႇယၢင်ႇၽၢႆႇၼႃႈၶုၼ်လုမ်းဢေႃႈ။ ၵေႃႉဢၼ်လၢတ်ႈတီႈပီႈၼွင်ႉမၼ်းလႄႈဝႃႈ၊ ‘မႂ်းမိူၵ်ႈ’ ဝႃႈၼႆၼၼ်ႉတၵ်းလႆႈထိူၵ်ႈၶၢမ်ႇၽႆးငရၢႆးဢေႃႈ။- 23ပိူဝ်ႈၼႆလႄႈမိူဝ်ႈဢၼ်မႂ်းဢၢင်ႈတေလူႇၵႃႈတီႈၽြႃးပဵၼ်ၸဝ်ႈ၊ၽၢႆႇၼႃႈၶဵင်ႇတၢင်းလူႇယူႇလႄႈၶုၵ်းၸႂ်လႆႈလွင်ႈဢၼ်ပီႈၼွင်ႉမႂ်းမီးတီႈတၵ်းတၢင်ႇဢပျတ်ႈမႂ်းဝႆႉၼၼ်ႉ၊- 24ဢဝ်ၶိူင်ႈတၢင်းလူႇမႂ်းၼၼ်ႉတမ်းဝႆႉႁိမ်းၶဵင်ႇတၢင်းလူႇသေလႄႈပွၵ်ႈၵႂႃႇတွင်းပၢၼ်ႇၵႄႈလိတ်ႈတၢင်းၽိတ်းမႂ်းၼၼ်ႉႁႂ်ႈယဝ်ႉၵွၼ်ႇ၊ၸင်ႇၶိုၼ်းမႃးလူႇတၢင်းလူႇမႂ်းၵႃႈတီႈၽြႃးပဵၼ်ၸဝ်ႈတႃႉ။ မီးၼင်ႇၼႆဢေႃႈ။
25“ပေႃးသေၵေႃႉသေၵူၼ်းႁဵတ်းဢမုၸွႆးတြႃးသႂ်ႇမႂ်းလႄႈဢွၼ်ၵႂႃႇတီႈလုမ်းၼၼ်ႉၸိုင်၊ၶျေႃးဝွၼ်းတွင်းပၢၼ်ႇႁႂ်ႈမၼ်းပျေႇၸႂ်မိူဝ်ႈဢၼ်ယင်းမီးဢၶိင်ႇယင်းပႆတၢင်းၵႂႃႇယူႇၼၼ်ႉတႃႉ။ ပေႃးဢမ်ႇၼၼ်မၼ်းတၵ်းဢဝ်မႂ်းဢၢပ်ႈတီႈၶုၼ်လုမ်းလႄႈၶုၼ်လုမ်းၼၼ်ႉတၵ်းဢၢပ်ႈပၼ်ၵႃႈၼႂ်းမိုဝ်းၵႄႇႁၢၼ်သေယဝ်ႉ၊ၶင်မႂ်းဝႆႉၼႂ်းထွင်ႇဢေႃႈ။- 26ၵဝ်ဝႃႈတီႈၸိုဝ်ႈၸႂ်ႈမၼ်းၸမ်ႉ၊ပေႃးလႆႈပဵၼ်ၵႂႃႇၸိူဝ်ႉၼင်ႇၼၼ်ယဝ်ႉၸိုင်၊ၸူဝ်ႈဢၼ်မႂ်းဢမ်ႇပႆႇတႅၼ်းငိုၼ်းၵုမ်ႇၵုမ်ႇၼၼ်ႉဢမ်ႇလႆႈဢွၵ်ႇထွင်ႇ။
လွင်ႈတၢင်းဢၼ်ၵူတ်ႉမေးပိူၼ်ႈ
27“သူလႆႈငိၼ်းတြႃးပိင်းၺၢပ်ႈဝႆႉလႄႈဝႃႈ၊ ‘ယႃႇပေၵူတ်ႉမေးပိူၼ်ႈ’ ဝႃႈၼႆမီးဝႆႉၼၼ်ႉယဝ်ႉ၊-#တူၺ်း၊ ဢွၵ်ႇ 20:14 28တြႃးဢၼ်ၵဝ်ႁေႃးၸမ်ႉ၊ ‘ပေႃးၵူၼ်းၸၢႆးဢဝ်တင်းတႃၵိလေႇသႃႇလႄႈတူၺ်းမေးပိူၼ်ႈၸိုင်၊တၢင်းၼႂ်းၸႂ်မၼ်းၽိတ်းပိူင်ႈမေႇထုင်ႇဢၼ်ဢမ်ႇတြႃးတီႈမႄႈယိင်းၼၼ်ႉယဝ်ႉ၊’ မီးၼင်ႇၼႆဢေႃႈ။- 29ပေႃးမၢၵ်ႇတႃၶွၼ်ၶႂႃမႂ်းႁဵတ်းႁႂ်ႈမႂ်းၽိတ်းပိူင်ႈဢပျတ်ႈၸိုင်၊ၶွၵ်းဢွၵ်ႇပႅတ်ႈတႃႉ။ တၢင်းဢၼ်ဢၢင်ႇၵႃႇမႂ်းဢၼ်ၼိုင်ႈလုၼၼ်ႉယိင်းၶႅၼ်းတေလီသေတၢင်းဢၼ်တူၵ်းငရၢႆးတင်းတူဝ်ဢေႃႈ။- 30မိူၼ်ၼင်ၼၼ်ႉ၊ပေႃးမိုဝ်းၶွၼ်ၶႂႃမႂ်းၼၼ်ႉႁဵတ်းႁႂ်ႈမႂ်းၽိတ်းပိူင်ႈဢပျတ်ႈၸိုင်၊တႅပ်းပႅတ်ႈတႃႉ။ တၢင်းဢၼ်ဢၢင်ႇၵႃႇဢၼ်ၼိုင်ႈလုၼၼ်ႉယဵင်ႈၶႅၼ်းတေလီသေတူၵ်းငရၢႆးတင်းတူဝ်ဢေႃႈ။
လွင်ႈတၢင်းဢၼ်ၽူဝ်မေးပႅတ်ႈၵၼ်
(တူၺ်း၊ မတ်ႈ 19:9။ မႃႇ 10:11-12။ လု 16:18)
31“သမ်ႉမီးတြႃးပိင်းၺၢပ်ႈဝႆႉလႄႈဝႃႈ၊ ‘ပေႃးၵူၼ်းၸၢႆးၶႂ်ႈပႅတ်ႈမေးမၼ်းၸိုင်၊ႁႂ်ႈမၼ်းတႅမ်ႈလိၵ်ႈဢၼ်ပႅတ်ႈၵၼ်ၶၢတ်ႇၵၼ်ၼၼ်ႉပၼ်မေးမၼ်းတႃႉ၊’ ဝႃႈၼႆဝႆႉယဝ်ႉ။-#တူၺ်း၊ ႁေႃး 24:1-4 32တြႃးဢၼ်ၵဝ်ႁေႃးၸမ်ႉ၊ ‘လိူဝ်သေတၢင်းဢၼ်မေးမၼ်းလဵၼ်ႈၽူဝ်ၼွႆႉလႄႈပေႃးၵူၼ်းၸၢႆးပႅတ်ႈမေးမၼ်းၵွပ်ႈပိူဝ်ႈလွင်ႈတၢင်းသေၸိူဝ်ႉသေပိူင်ၸိုင်၊မၼ်းႁဵတ်းႁႂ်ႈမေးမၼ်းၽိတ်းပိူင်ႈဢမ်ႇၵႃး၊ၵေႃႉဢၼ်ဢဝ်မႄႈယိင်းၼၼ်ႉၵေႃႈၽိတ်းပိူင်ႈမေးပိူၼ်ႈဢေႃႈ၊’ မီးၼင်ႇၼႆဢေႃႈ။
လွင်ႈဢၼ်တိူင်ႇၵၢဝ်ႇၵႂၢမ်းသဵတ်ႈၸႃႇ
33“ထႅင်ႈလွင်ႈၼိုင်ႈသူလႆႈငိၼ်းတြႃးပိင်းၺၢပ်ႈဝႆႉပုၼ်ႈၵူၼ်းမိူဝ်ႈၵွၼ်ႇလႄႈဝႃႈ၊ ‘ယႃႇပေတိူင်ႇၵၢဝ်ႇၵႂၢမ်းသဵတ်ႈၸႃႇလၢႆလၢႆလွၵ်ႇလွၵ်ႇ။ တၢင်းဢၼ်တိူင်ႇၵၢဝ်ႇၵႂၢမ်းသဵတ်ႈၸႃႇတီႈၽြႃးပဵၼ်ၸဝ်ႈၼၼ်ႉတေလႆႈပႂ်ႉထိင်းႁႂ်ႈမၼ်ႈၵိုမ်းဢေႃႈ၊’ ဝႃႈၼင်ႇၼႆၼၼ်ႉယဝ်ႉ။-#တူၺ်း၊ ႁဵတ်း 19:12။ ထိူၼ်ႇ 30:2 34တြႃးဢၼ်ၵဝ်ႁေႃးၸမ်ႉ၊ယႃႇပေတိူင်ႇၵၢဝ်ႇၵႂၢမ်းသဵတ်ႈၸႃႇလႃးလႃး။ ယႃႇပေတိူင်ႇၵၢဝ်ႇၵႂၢမ်းသဵတ်ႈၸႃႇတေႃႇၽႃႉၵၢင်ႁၢဝ်။ လွင်ႈမၼ်းၸမ်ႉ၊ၽႃႉၵၢင်ႁၢဝ်ပဵၼ်ပလၢင်ႇၽြႃးပဵၼ်ၸဝ်ႈဢေႃႈ။- 35ၵႃႈတီႈလိၼ်မိူင်းၵေႃႈယႃႇပေတိူင်ႇၵၢဝ်ႇၵႂၢမ်းသဵတ်ႈၸႃႇ။ လိၼ်မိူင်းပဵၼ်တီႈတမ်းတိၼ်ၽြႃးပဵၼ်ၸဝ်ႈဢေႃႈ။ ၵႃႈတီႈဝဵင်းယေႇရုသလႅမ်ႇ၊ၵေႃႈယႃႇတိူင်ႇၵၢဝ်ႇၵႂၢမ်းသဵတ်ႈၸႃႇ။ ပဵၼ်ဝဵင်းမႁႃႇၶုၼ်လူင်ဢေႃႈ။- 36ယႃႇပေဢဝ်ႁူဝ်သူတိူင်ႇၵၢဝ်ႇၵႂၢမ်းသဵတ်ႈၸႃႇ။ ၶူၼ်ႁူဝ်သူသဵၼ်ႈၼိုင်ႈၵူၺ်းၵေႃႈသူဢမ်ႇၸၢင်ႈႁဵတ်းႁႂ်ႈၽိူၵ်ႇမႃးလမ်မႃးလႆႈ။- 37ၵႂၢမ်းဢၼ်သူတၵ်းလၢတ်ႈၼၼ်ႉ၊လၢတ်ႈသိုဝ်ႈသိုဝ်ႈဝႃႈ၊ ‘ၸႂ်ႈၶႃႈယဝ်ႉ။’ ဢမ်ႇၼၼ်ၵေႃႈလၢတ်ႈဝႃႈ၊ ‘ဢမ်ႇၸႂ်ႈၶႃႈ။’ ဝႃႈၼႆၵူၺ်းတႃႉ။ ၵႂၢမ်းဢၼ်ပူၼ်ႉပႅၼ်သေၶေႃႈၵႂၢမ်းၸိူဝ်းၼႆႉၸမ်ႉ၊ပဵၼ်မႃးၵႃႈတီႈၶုၼ်ဢႃႉမၢင်ႇၵလႃႇၵူၺ်းဢေႃႈ။ မီးၼင်ႇၼႆဢေႃႈ။
လွင်ႈတၢင်းဢၼ်တွပ်ႇတႅၼ်းၶိုၼ်း
(တူၺ်း၊ လု 6:29-30)
38“သူလႆႈငိၼ်းပိင်းၺၢပ်ႈတြႃးဝႆႉလႄႈဝႃႈ၊ ‘မၢၵ်ႇတႃၶွၼ်ၼိုင်ႈတၵ်းလႆႈသေပုၼ်ႈမၢၵ်ႇတႃၶွၼ်ၼိုင်ႈ၊ၶဵဝ်ႈသိၵ်ႈၼိုင်ႈတၵ်းလႆႈသေပုၼ်ႈၶဵဝ်ႈသိၵ်ႈၼိုင်ႈဢေႃႈ၊’ ဝႃႈၼႆၼၼ်ႉယဝ်ႉ။-#တူၺ်း၊ ဢွၵ်ႇ 21:24 39တြႃးဢၼ်ၵဝ်ႁေႃးၸမ်ႉ၊ ‘ယႃႇပေၶိုၼ်းတွပ်ႇတီႈၵေႃႉဢၼ်ၽိတ်းမႂ်းၼၼ်ႉ။ ပေႃးပိူၼ်ႈတူပ်းၵႅမ်ႈမႂ်းၽၢႆႇၶႂႃၸိုင်၊ဝၢႆႇပၼ်ၵႅမ်ႈမႂ်းၽၢႆႇသၢႆႉထႅင်ႈလူးၵွၼ်ႇတႃႉ။- 40ပေႃးပိူၼ်ႈၸုင်မႂ်းၶိုၼ်ႈလုမ်းလႄႈမႂ်ဢဝ်သိူဝ်ႈမႂ်းၸိုင်၊ပၼ်ၽႃႈဝႆမႂ်းၸွမ်းတႃႉ။- 41ပေႃးၵေႃႉဢၼ်မီးဢႃႇၼႃႇလႄႈၸႂ်ႉမႂ်းႁၢပ်ႇၶူဝ်းမၼ်းၵႂႃႇၶၢဝ်းတၢင်းလၵ်းၼိုင်ႈၸိုင်၊သူင်ႇပၼ်မၼ်းၵႂႃႇထိုင်သွင် လၵ်းလူးၵွၼ်ႇတႃႉ။- 42တီႈၵေႃႉဢၼ်ယွၼ်းမႂ်းၼၼ်ႉပၼ်တႃႉ။ တီႈၵေႃႉဢၼ်ယွၼ်းယိမ်တီႈမႂ်းၼၼ်ႉၵေႃႈၵူႈယိမ်ပၼ်တႃႉ၊’ မီးၼင်ႇၼႆဢေႃႈ။
တၢင်းဢၼ်သင်ႇသွၼ်ႁႂ်ႈႁၵ်ႉရၢၼ်ႇသူႇ
(တူၺ်း၊ လု 6:27-28၊32-36)
43“သူလႆႈငိၼ်းတြႃးပိင်းၺၢပ်ႈဝႆႉလႄႈဝႃႈ၊ ‘ႁၵ်ႉၵေႃႉဢၼ်ၸၢပ်ႈသႅင်ႇၵၼ်တင်းမႂ်းတႃႉ။ ၸင်းရၢၼ်ႇသူႇမႂ်းတႃႉ၊’ ဝႃႈၼႆၼၼ်ႉယဝ်ႉ။- 44တြႃးဢၼ်ၵဝ်ႁေႃးၸမ်ႉ၊ ‘ႁၵ်ႉရၢၼ်ႇသူႇသူတႃႉ။ သူးတွင်းပုၼ်ႈၶဝ်ၸိူဝ်းဢၼ်ၼိၵ်ႈၸၢၵ်ႈငႅၼ်းသႄးသူၼၼ်ႉတႃႉ၊’ မီးၼင်ႇၼႆဢေႃႈ။- 45ပေႃးသူႁဵတ်းၸိူဝ်ႉၼင်ႇၼၼ်ၸိုင်၊သူတၵ်းလႆႈဢၶႂၢင်ႉဢၼ်ပဵၼ်လုၵ်ႈပေႃႈၸဝ်ႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ပုၼ်ႉဢေႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈဝႃႈၸမ်ႉ၊ပေႃႈၸဝ်ႈသူၼၼ်ႉႁႂ်ႈၵၢင်ဝၼ်းႁိူဝ်ႈလႅင်းၵႃႈၼိူဝ်ၵူၼ်းလီၵူၼ်းၸႃႉမိူၼ်မိူၼ်ၵၼ်ဢေႃႈ။ မိူၼ်ၸိူဝ်ႉၼင်ႇၼၼ်မၼ်းၸဝ်ႈႁႂ်ႈၽူၼ်တူၵ်းၵႃႈၼိူဝ်ၵူၼ်းသိုဝ်ႈတေႃႇ၊ၵူၼ်းဢၼ်ဢမ်ႇသိုဝ်ႈတေႃႇတင်းလၢႆၽဵင်ႇၽဵင်ႇၵၼ်ဢေႃႈ။- 46ပေႃးမႂ်းႁၵ်ႉၶဝ်ၸိူဝ်းဢၼ်ႁၵ်ႉမႂ်းၼၼ်ႉၵူၺ်းၸိုင်၊တၵ်းလႆႈဢၵျူဝ်းတီႈၽြႃးပဵၼ်ၸဝ်ႈၵႃႈသင်။ ၵူၼ်းဢၼ်ၵဵပ်းၶွၼ်ႇၶဝ်တေႃႈယင်းႁဵတ်းထၢၼ်ႇၼႆႉယူႇ။- 47ပေႃးမႂ်းတူင်ႉတၵ်ႉပီႈၼွင်ႉမႂ်းၵူၺ်းၸိုင်၊တၵ်းမျၢတ်ႈတွၼ်းလိူဝ်ၵႃႈသင်။ ၶဝ်ၸိူဝ်းဢၼ်ဢမ်ႇယုမ်ႇမၢတ်ႈၸဝ်ႈၽြႃးတင်းလၢႆၵေႃႈယင်းႁဵတ်းထၢၼ်ႇၼႆႉယူႇ။- 48ၵွပ်ႈလွင်ႈၸိူဝ်ႉၼႆလႄႈၸိူဝ်ႉၼင်ႇဢၼ်ပေႃႈၸဝ်ႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်လႄႈပျေႉၸုမ်ႇလီငၢမ်းၼၼ်ႉ၊ သူၵေႃႈဢွၼ်ၵၼ်ပျေႉၸုမ်ႇလီငၢမ်းတႃႉ။ မီးၼင်ႇၼႆဢေႃႈ။
Currently Selected:
မတ်ႈ 5: SHNCL
Highlight
Share
Copy
Want to have your highlights saved across all your devices? Sign up or sign in