မတ်ႈ 18

လွင်ႈၽူႈလႂ်ယႂ်ႇမျၢတ်ႈသေပိူၼ်ႈ

(တူၺ်း၊ မႃႇ 9:33-37။ လု 9:46-48)

1မိူဝ်ႈယၢမ်းၼၼ်ႉတပႄးၸဝ်ႈတင်းလၢႆ၊မႃးၸူးၸဝ်ႈယေႇသု၊သေလႄႈလဝ်ႈထၢမ်လွင်ႈဢၼ်ၽူႈလႂ်တၵ်းယဵင်ႈၶႅၼ်းယႂ်ႇမျၢတ်ႈသေပိူၼ်ႈ၊ၵႃႈၼႂ်းမိူင်းၵၢင်ႁၢဝ်ၸဝ်ႈပုၼ်ႉၼၼ်ႉဢေႃႈ။

2ၵမ်းၼၼ်ႉ၊မၼ်းၸဝ်ႈႁွင်ႉဢဝ်လုၵ်ႈဢွၼ်ႇၵေႃႉၼိုင်ႈမႃးၸုၵ်းၵႃႈၼႂ်းဝူင်ႈၵၢင်ၶဝ်ယဝ်ႉၸင်ႇ၊- 3လၢတ်ႈလႄႈဝႃႈ၊ “ၵဝ်ဝႃႈတီႈၸိုဝ်ႈတီႈၸႂ်ႈမၼ်းၸမ်ႉ၊ပေႃးသူယင်းဢမ်ႇပိၼ်ႇၸႂ်သူမႃးပဵၼ်ၸိူဝ်ႉၼင်ႇလုၵ်ႈဢွၼ်ႇၸိုင်၊သူဢမ်ႇလႆႈၶဝ်ႈၵႃႈၼႂ်းမိူင်းၵၢင်ႁၢဝ်ၸဝ်ႈၼၼ်ႉဢေႃႈ။- 4ၽူႈလႂ်သေဢမ်ႇဝႃႈ၊ၵေႃႉဢၼ်ၶျႃးတႅမ်ႇႁူဝ်ၸႂ်တူဝ်ၸဝ်ႈၵဝ်ႇမိူၼ်ၸိူဝ်ႉၼင်ႇလုၵ်ႈဢွၼ်ႇၼႆႉၼၼ်ႉ၊ၵေႃႉၼၼ်ႉပဵၼ်ၵေႃႉဢၼ်ယႂ်ႇမျၢတ်ႈသေပိူၼ်ႈၵႃႈၼႂ်းမိူင်းၵၢင်ႁၢဝ်ၸဝ်ႈပုၼ်ႉဢေႃႈ။- 5ပိူင်လဵဝ်ၵၼ်၊ၽူႈလႂ်သေဢမ်ႇဝႃႈ၊ၵေႃႉဢၼ်ႁပ်ႉတုင်းဢဝ်လုၵ်ႈဢွၼ်ႇၸိူဝ်ႉၼင်ႇၼႆၵႃႈၼႂ်းၼႃႇမႃႉၸိုဝ်ႈသဵင်ၵဝ်ၼၼ်ႉ၊ ၵေႃႉၼၼ်ႉႁပ်ႉတုင်းဢဝ်ၵဝ်ဢေႃႈ။

ဢပျတ်ႈတၢမ်ႇၵေႃႉဢၼ်ယႃယုၵ်ႉပိူၼ်ႈ

(တူၺ်း၊ မႃႇ 9:42-48။ လု 17:1-2)

6“ၽူႈလႂ်သေဢမ်ႇဝႃႈ၊ၵေႃႉဢၼ်ႁဵတ်းႁႂ်ႈလုၵ်းဢွၼ်ႇဢၼ်ယုမ်ႇမၢတ်ႈၵဝ်ၸိူဝ်းၼၼ်ႉလႆႈၽိတ်းပိူင်ႈတြႃးလႄႈပဵၼ်ဢပျတ်ႈၸိုင်၊တီႈၵေႃႉၼၼ်ႉထုၵ်ႇလီဢဝ်မၢၵ်ႇႁိၼ်လူၺ်ႁွႆႈၶေႃးမၼ်းသေလႄႈပွႆႇၸူမ်လူင်းၼႂ်းၼမ်ႉပၢင်ႇလၢႆႇဢၼ်လိုၵ်ႉၼၼ်ႉယဵင်ႈၶႅၼ်းတေလီဢေႃႈ။- 7ၵွပ်ႈပိူဝ်ႈမီးလွင်ႈတၢင်းဢၼ်ၶီႈလိုတ်းလႄႈလူမ်ႉၼၼ်ႉမီးၼမ်ၼႃႇလႄႈလေႃးၵႃႉၼႆႉမီးဢႃႉမၢင်ႇၵလႃႇဢေႃႈ။ လွင်ႈတၢင်းဢၼ်ၶီႈလိုတ်းလႄႈလူမ်ႉၼမ်ၼႃႇၼၼ်ႉတၵ်းလႆႈမီးဢေႃႈ။ ၼႂ်းဝႃႈၼၼ်သေၵေႃႈ၊ၵေႃႉဢၼ်ႁႂ်ႈမီးလွင်ႈတၢင်းဢၼ်ၶီႈလိုတ်းလႄႈလူမ်ႉၼၼ်ႉမီးဢႃႉမၢင်ႇၵလႃႇဢေႃႈ။

8“ပေႃးတိၼ်မႂ်း၊ဢမ်ႇၼၼ်မိုဝ်းမႂ်းၼၼ်ႉႁဵတ်းႁႂ်ႈမႂ်းၶီႈလိုတ်းလႄႈလူမ်ႉၽိတ်းပိူင်ႈၸိုင်၊တႅပ်းပႅတ်ႈတႃႉ။ ၵွပ်ႈပိူဝ်ႈၼင်ႇႁိုဝ်လႄႈဝႃႈၸမ်ႉ၊တၢင်းဢၼ်မီးတိၼ်ၶွၼ်လဵဝ်၊မိုဝ်းၶွၼ်လဵဝ်လႄႈၶဝ်ႈၵႃႈၼႂ်းမိူင်းၵၢင်ႁၢဝ်ၼၼ်ႉယဵင်ႈၶႅၼ်းမျၢတ်ႈလီၼႃႇသေမႂ်းမီးတိၼ်သွင်ၶွၼ်မိုဝ်းသွင်ၶွၼ်သေယဝ်ႉ၊တူၵ်းႁွတ်ႈၵႃႈၼႂ်းမိူင်းငရၢႆးၼၼ်ႉဢေႃႈ။- 9ပေႃးမၢၵ်ႇတႃမႂ်းၼၼ်ႉႁဵတ်းႁႂ်ႈမႂ်းၶီႈလိုတ်းလႄႈၽိတ်းပိူင်ႈၸိုင်၊ၶွၵ်းပႅတ်ႈတႃႉ။ တၢင်းဢၼ်မီးတႃႁူၺ်ႇလဵဝ်လႄႈၶဝ်ႈၵႃႈၼႂ်းမိူင်းဢသၢၵ်ႈၼၼ်ႉ၊ယဵင်ႈၶႅၼ်းမျၢတ်ႈလီၼႃႇသေတၢင်းဢၼ်မီးမၢၵ်ႇတႃသွင်ႁူၺ်ႇလႄႈတူၵ်းႁွတ်ႈၵႃႈၼႂ်းမိူင်းငရၢႆးၼၼ်ႉဢေႃႈ။

ၵႂၢမ်းဢုပမႃႇသူဝ်းဢၼ်ႁၢႆၵႂႃႇ

(တူၺ်း၊ လု 15:3-7)

10“လွင်ႈၼင်ႇႁိုဝ်တူဝ်သူတၵ်းဢမ်ႇသႄႉသွမ်းတီႈလုၵ်ႈဢွၼ်ႇၸိူဝ်ႉၼင်ႇၼႆၸိုင်၊ဝႆႉသတိတႃႉ။ ၵဝ်ဝႃႈတီႈသူၸမ်ႉ၊ၶဝ်မီးတမၢၼ်ႇၵၢင်ႁၢဝ်ၶဝ်ဢၼ်ၶႃးၸႃးၽၢႆႇၼႃႈပေႃႈၸဝ်ႈၵဝ်၊ဢၼ်မီးၵႃႈၼိူဝ်ၽုင်ႇၵၢင်ႁၢဝ်ပုၼ်ႉၼၼ်ႉယူႇတႃႇသေႇဢေႃႈ။- 11[လွင်ႈမၼ်းၸမ်ႉ၊လုၵ်ႈၵူၼ်း၊မႃးႁႂ်ႈလႆႈၵႄႇၶျွတ်ႈဢဝ်ၶဝ်ၸိူဝ်းဢၼ်ႁၢႆၵႂႃႇၼၼ်ႉဢေႃႈ။]#18:11 […] ၼႂ်းမူႇၵျၢမ်းလိၵ်ႈၵဝ်ႇၵဝ်ႇၵမ်ႈၼမ်ဢမ်ႇမီး

12“တီႈၵူၼ်းၵေႃႉၼိုင်ႈမီးသူဝ်းပၢၵ်ႇတူဝ်လႄႈပေႃးသူဝ်းတူဝ်ၼိုင်ႈႁၢႆၵႂႃႇၸိုင်၊သူထၢင်ႇမၼ်းတေႁဵတ်းၸိူဝ်ႉၼင်ႇႁိုဝ်။ မၼ်းၸၢင်ႈပွႆႇသူဝ်းၵဝ်ႈသိပ်းပၢႆၵဝ်ႈတူဝ်ဝႆႉၵႃႈတီႈတၢပ်ႈလွႆသေယဝ်ႉ၊ၵႂႃႇသွၵ်ႈႁႃသူဝ်းတူဝ်ဢၼ်ႁၢႆၵႂႃႇၼၼ်ႉဢေႃႈ။- 13ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊မိူဝ်ႈဢၼ်ၶိုၼ်းႁၼ်ၸိုင်၊မၼ်းယဵင်ႈၶႅၼ်းၸူမ်းသိူဝ်းလူၺ်ႈလွင်ႈတူဝ်ၼၼ်ႉ၊ၼႃႇသေသူဝ်းဢၼ်ၵိုတ်းယူႇၵဝ်ႈသိပ်းပၢႆၵဝ်ႈတူဝ်ဢၼ်ဢမ်ႇၽိတ်းတၢင်းလႄႈဢမ်ႇႁၢႆၵႂႃႇၼၼ်ႉဢမ်ႇၸႂ်ႈႁိုဝ်း။- 14ပိူင်လဵဝ်ၵၼ်၊ပေႃႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ၸဝ်ႈပုၼ်ႉၼၼ်ႉ၊ဢမ်ႇၶႂ်ႈႁႂ်ႈလုၵ်ႈဢွၼ်ႇၸိူဝ်ႉၼင်ႇၼႆလႆႈလုလႅဝ်သေၵေႃႉသေၵူၼ်း။

ပီႈၼွင်ႉၵၼ်ၵႄႈလိတ်ႈတၢင်းၽိတ်းၵၼ်

15“ပေႃးပီႈၼွင်ႉမႂ်းၽိတ်းပိူင်ႈမႂ်းၸိုင်၊ၵႂႃႇၵႃႈတီႈမၼ်းၽုၺ်ႇဢွၵ်ႇၼႄပျႃးဢပျတ်ႈမၼ်းလႄႈၵႄႈလိတ်ႈတၢင်းၽိတ်းတီႈၵၼ်မႂ်းတင်းမၼ်းတဵတ်ႇတဵတ်ႇတႃႉ။ ပေႃးမၼ်းထွမ်ႇဢဝ်ၵႂၢမ်းမႂ်းၸိုင်၊မႂ်းလႆႈပီႈၼွင်ႉမႂ်းၶိုၼ်းမႃးယဝ်ႉ။- 16ၵူၺ်းၵႃႈ၊ပေႃးမၼ်းဢမ်ႇထွမ်ႇမႂ်းၸိုင်၊ႁွင်ႉဢဝ်ၵူၼ်းသွင်သၢမ်ၵေႃႉၵႂႃႇၸွမ်းမႂ်းလႄႈႁဵတ်းၸွမ်းၼႂ်းၵႂၢမ်းၵျၢမ်းလိၵ်ႈဢၼ်ဝႃႈ၊ ‘ႁႂ်ႈၵႂၢမ်းဢၼ်မႂ်းလၢတ်ႈၵူႈၶေႃႈၵူႈၵမ်းၼၼ်ႉ၊ ႁႂ်ႈၵူၼ်းသွင်သၢမ်ၵေႃႉပဵၼ်သၢၵ်ႈသေႇမၼ်းတႃႉ၊’ ဝႃႈၼႆၼၼ်ႉႁဵတ်းၸိူဝ်ႉၼင်ႇၼႆတႃႉ။- 17ပေႃးမၼ်းယင်းဢမ်ႇပႆႇထွမ်ႇၶဝ်ၸိုင်၊ဢဝ်တၢင်းၽိတ်းမၼ်းၼၼ်ႉလၢတ်ႈထိုင်တီႈၸိူဝ်းၸဝ်ႈတႃႉ။ တီႈသုတ်းမၼ်း၊ ပေႃးမၼ်းယင်းဢမ်ႇထွမ်ႇၸိူဝ်းၸဝ်ႈၸိုင်၊မၢတ်ႈမၼ်းပဵၼ်မိူၼ်ၵူၼ်းၸိူဝ်းဢၼ်ဢမ်ႇယုမ်ႇမၢတ်ႈထႃႇဝရႃႉၽြႃး၊ ဢမ်ႇၼၼ်ၵူၼ်းၵဵပ်းၶွၼ်ႇၼၼ်ႉတႃႉ။

တၢင်းဢၼ်မတ်ႉၽုၵ်ႇလႄႈပွႆႇပၼ်

18“ၵဝ်ဝႃႈတီႈၸိုဝ်ႈၸႂ်ႈမၼ်းၸမ်ႉ၊ၵႃႈဢၼ်သူမတ်ႉၽုၵ်ႇဝႆႉၵႃႈၼိူဝ်လိၼ်မိူင်းၼႆႉၼၼ်ႉ၊ၵႃႈၼိူဝ်မိူင်းၵၢင်ႁၢဝ်ၸဝ်ႈပုၼ်ႉၵေႃႈ၊ တၵ်းမတ်ႉၽုၵ်ႇဝႆႉဢေႃႈ။ ၵႃႈဢၼ်သူပွႆႇပၼ်ၵႃႈၼိူဝ်လိၼ်မိူင်းၼႆႉၼၼ်ႉ၊ၵႃႈၼိူဝ်မိူင်းၵၢင်ႁၢဝ်ၸဝ်ႈပုၼ်ႉၵေႃႈတၵ်းပွႆႇပၼ်ဢေႃႈ။

19“ၵဝ်သမ်ႉဝႃႈထႅင်ႈၸမ်ႉ၊ပေႃးသူသွင်ၵေႃႉယူႇၵႃႈၼိူဝ်လိၼ်မိူင်းၼႆႉၽွမ်ႉၸႂ်ၵၼ်သူးတွင်းလဝ်ႈယွၼ်းသေၸိူဝ်ႉသေပိူင်ၸိုင်၊ပေႃႈၸဝ်ႈၵဝ်ဢၼ်မီးယူႇၵႃႈၼိူဝ်မိူင်းၵၢင်ႁၢဝ်ၸဝ်ႈပုၼ်ႉၼၼ်ႉတၵ်းပၼ်တီႈသူဢေႃႈ။- 20ၵွပ်ႈလွင်ႈၼင်ႇႁိုဝ်လႄႈဝႃႈၸမ်ႉ၊တီႈလႂ်တၼ်းလႂ်သေဢမ်ႇဝႃႈ၊ ပေႃးၵူၼ်းသွင်သၢမ်ၵေႃႉၸုတုမ်ၵၼ်ၼႂ်းၼႃႇမႃႉၸိုဝ်ႈသဵင်ၵဝ်ၸိုင်၊ၵဝ်တၵ်းမီးယူႇၵႃႈၼႂ်းဝူင်ႈၵၢင်ၶဝ်ဢေႃႈ၊” ဝႃႈၼင်ႇၼႆဢေႃႈ။

ၵႂၢမ်းဢုပမႃႇလွင်ႈၵူၼ်းဢွၼ်ႇဢမ်ႇပွႆႇဢပျတ်ႈ

21မိူဝ်ႈၼၼ်ႉ၊ပေႇတရု၊မႃးၸူးတီႈၸဝ်ႈယေႇသု၊သေလႄႈလဝ်ႈထၢမ်ဝႃႈ၊ “ၸဝ်ႈႁဝ်း။ ပေႃးပီႈၼွင်ႉၵဝ်ၶႃႈၽိတ်းပိူင်ႈၵဝ်ၶႃႈယူႇၶိူဝ်းၶိူဝ်းၸိုင်၊ၵဝ်ၶႃႈထုၵ်ႇလီပွႆႇလွတ်ႈဢပျတ်ႈမၼ်းထူၼ်ႈထိုင်လၢႆပွၵ်ႈၶႃႈ။ ထူၼ်ႈထိုင်ၸဵတ်းပွၵ်ႈၶႃႈႁိုဝ်း၊” ဝႃႈၼင်ႇၼႆလႄႈ။

22မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ၵဝ်ဢမ်ႇဝႃႈႁႂ်ႈထူၼ်ႈထိုင်ၸဵတ်းပွၵ်ႈၵူၺ်း။ တၵ်းလႆႈပွႆႇလွတ်ႈထူၼ်ႈထိုင်၊ၼပ်ႉဢၢၼ်ႇထိုင်ၸဵတ်းသိပ်းႁႂ်ႈထူၼ်ႈၸဵတ်းပွၵ်ႈဢေႃႈ။- 23ပိူဝ်ႈၼႆလႄႈ၊မိူင်းၵၢင်ႁၢဝ်ၸဝ်ႈပဵၼ်မိူၼ်ၸိူဝ်ႉၼင်ႇၶုၼ်လူင် ပႃးၼိုင်ႈ၊ၶႂ်ႈတႂၢၵ်ႈၸရၢင်းငိုၼ်းတီႈၵူၼ်းဢွၼ်ႇၸဝ်ႈတင်းလၢႆၼၼ်ႉဢေႃႈ။- 24မိူဝ်ႈဢၼ်တႄႇၸႃႉၵဵပ်းၸရၢင်းယူႇၼၼ်ႉ၊ထူပ်းႁၼ်ၵူၼ်းဢွၼ်ႇၸဝ်ႈၵေႃႉၼိုင်ႈ၊ထုၵ်ႇၼီႈတီႈၸဝ်ႈမၼ်းဝႆႉငိုၼ်းတလၢၼ်ႇတၢၼ်ႇသႅၼ်ၼိုင်ႈ#18:24 “ငိုၼ်းတလၢၼ်ႇတၢၼ်ႇ” - ပဵၼ်ၶႅပ်းၶမ်းၼိုင်ႈၶႅပ်းဢၼ်မီးၵႃႈၶၼ်ၼမ်သေ ငိုၼ်းတေႃႇလႃႇဢမေႇရီႇၵၼ်ႇႁဵင်ၼိုင်ႈဢေႃႈ လႄႈ၊- 25ပိူဝ်ႈဢၼ်ၵူၼ်းဢွၼ်ႇၼၼ်ႉဢမ်ႇတႅၼ်းၼီႈၸိူဝ်းၼၼ်ႉလႆႈလႄႈ၊ ၶုၼ်လူင်ၸင်ႇပူင်ဢမိင်ႉႁႂ်ႈၶၢႆတူဝ်မၼ်းႁႂ်ႈလႆႈပဵၼ်ၶႃႈပႃးၸဵမ်လုၵ်ႈလၢင်းမၼ်း၊မေးမၼ်းဢိၵ်ႇတင်းဢုၵ်ႉၸႃႇၶူဝ်းလဵင်းမၼ်းၵႃႈမီးတင်းသဵင်ႈတင်းလူင်ပုၼ်ႈတႃႇတေတႅၼ်းၼီႈၼၼ်ႉဢေႃႈ။- 26ၵူၼ်းဢွၼ်ႇၵေႃႉၼၼ်ႉၶုပ်ႉမူပ်ႇၵူမ်ႈၵွမ်းယူႇသေလႄႈတွင်းပၢၼ်ႇလႄႈဝႃႈ၊ ‘ဢဵတ်းလူယိူၼ်ႉၶၢမ်ႇၵဝ်ၶႃႈသေၵမ်းတီႈၶႃႈ။ ၼီႈၵႃႈဢၼ်မီးၸိုင်၊ၵဝ်ၶႃႈတၵ်းတႅၼ်းယူႇၶႃႈဢေႃႈ၊’ မိူဝ်ႈဢၼ်ဝႃႈၼင်ႇၼႆၸိုင်၊- 27ၶုၼ်လူင်ၼၼ်ႉမီးၸႂ်ဢဵတ်းလူၵူၼ်းဢွၼ်ႇၸဝ်ႈၼၼ်ႉသေယဝ်ႉ၊ ပွႆႇၶႂၢင်းပၼ်ၼီႈၵႃႈဢၼ်မၼ်းမီးၼၼ်ႉသေဢေႃႈ။

28“ၵူၼ်းဢွၼ်ႇၸဝ်ႈၼၼ်ႉဢွၵ်ႇၵႂႃႇလႄႈထူပ်းႁၼ်ၵေႃႉသႄႈမၼ်းပဵၼ်ၵူၼ်းဢွၼ်ႇၸဝ်ႈၼင်ႇၵၼ်ဢၼ်ထုၵ်ႇၼီႈတီႈမၼ်း၊ ငိုၼ်းတေႇၼႃႇရီႇပၢၵ်ႇၼိုင်ႈ#18:28 “တေႇၼႃႇရီႇပၢၵ်ႇၼိုင်ႈ” - ပဵၼ်ငိုၼ်းၵႃႈႁႅင်းဝၼ်းပုၼ်ႈတႃႇသၢမ်လိူၼ် ၼၼ်ႉသေလႄႈ၊ တဵၵ်းငႅၼ်းၶေႃးမၼ်းလႄႈလၢတ်ႈဝႃႈ၊ ‘ၼီႈဢၼ်မႂ်းထုၵ်ႇတီႈၵဝ်ၼၼ်ႉတႅၼ်းၶိုၼ်းမိူဝ်ႈလဵဝ်တႃႉ၊’ ဝႃႈၼင်ႇၼႆဢေႃႈ။- 29ၵေႃႉသႄႈမၼ်းၵူၼ်းဢွၼ်ႇၸဝ်ႈၼင်ႇၵၼ်ၼၼ်ႉၵေႃႈႁွမ်းမိုဝ်းဝႆႈမၼ်းသေယဝ်ႉ၊တွင်းပၢၼ်ႇလႄႈဝႃႈ၊ ‘ဢဵတ်းလူယိူၼ်ႉၶၢမ်ႇၵဝ်ၶႃႈသေၵမ်းတီႈၶႃႈ။ ၼီႈၵႃႈမီးၸိုင်၊ၵဝ်ၶႃႈတၵ်းတႅၼ်းယူႇၶႃႈဢေႃႈ၊’ ဝႃႈၼင်ႇၼႆသေၵေႃႈ၊- 30မၼ်းယင်းဢမ်ႇထွမ်ႇလႄႈတိမတ်ႉဢဝ်ၵေႃႉၼၼ်ႉၶင်ထွင်ႇဝႆႉ၊ တေႃႇႁွတ်ႈၼီႈၸိူဝ်းၼၼ်ႉပျေႇဢေႃႈ။- 31မိူဝ်ႈဢၼ်ၵူၼ်းဢွၼ်ႇၸဝ်ႈၼင်ႇၵၼ်တၢင်ႇၵေႃႉတၢင်ႇၵူၼ်းႁၼ်ၸိုင်၊ၶဝ်ၸဵပ်းၸႂ်ၼႃႇလႄႈၵႂႃႇလဝ်ႈလၢတ်ႈလွင်ႈတၢင်းၼၼ်ႉထိုင်တီႈၶုၼ်လူင်ဢေႃႈ။- 32ၶုၼ်လူင်ၸင်ႇႁွင်ႉဢဝ်ၵူၼ်းဢွၼ်ႇၸဝ်ႈၵေႃႉၼၼ်ႉမႃးလႄႈလၢတ်ႈဝႃႈ၊ ‘ၶႃႈဢၼ်ႁၢႆႉမိူၵ်ႈၼႆႉ႟။ မႂ်းတွင်းပၢၼ်ႇၵဝ်လႄႈၵဝ်ပွႆႇၶႂၢင်းပၼ်ၼီႈမႂ်းတင်းသဵင်ႈတင်းလူင်ယဝ်ႉ။- 33ၸိူဝ်ႉၼင်ႇဢၼ်ၵဝ်ဢဵတ်းလူမႂ်းၼၼ်ႉ၊မႂ်းထုၵ်ႇလီဢဵတ်းလူၵေႃႉသႄႈမႂ်းၵူၼ်းဢွၼ်ႇၸဝ်ႈၼင်ႇၵၼ်ၼၼ်ႉဢမ်ႇၸႂ်ႈႁိုဝ်း၊’ ဝႃႈၼင်ႇၼႆသေယဝ်ႉ၊- 34ၸႂ်မႆႈၶႂ်ႈၸႃႉၼႃႇလႄႈပူင်ဢမိင်ႉႁႂ်ႈဢဝ်ၵူၼ်းဢွၼ်ႇၸဝ်ႈၼၼ်ႉသႂ်ႇထွင်ႇဝႆႉ၊တေႃႇထိုင်ႁွတ်ႈမၼ်းတႅၼ်းၶိုၼ်းၼီႈတင်းသဵင်ႈတင်းမူတ်းယဝ်ႉၼၼ်ႉဢေႃႈ၊” ဝႃႈၼင်ႇၼႆဢေႃႈ။

35 ၸဝ်ႈယေႇသု၊သိုပ်ႇလၢတ်ႈလႄႈဝႃႈ၊ “မိူၼ်ၼင်ႇၼၼ်၊ပေႃးသူပီႈၼွင်ႉၼင်ႇၵၼ်ၵၼ်ယင်းဢမ်ႇမီးတင်းၸႂ်ၵႂၢင်ႈလႄႈပွႆႇလွတ်ႈဢပျတ်ႈတီႈၵၼ်ၸိုင်၊ပေႃႈၸဝ်ႈၵဝ်ဢၼ်ယူႇၵႃႈၼိူဝ်ၽုင်ႇၵၢင်ႁၢဝ်ပုၼ်ႉၼၼ်ႉ၊တၵ်းၸီႇယၢင်ႇသူၸိူဝ်ႉၼင်ႇၼၼ်ႉဢေႃႈ။”

Currently Selected:

မတ်ႈ 18: SHNCL

Highlight

Copy

Compare