ႁေႃးတြႃး 31
31
ယေႃးသုပုတ်ႈဢဝ်ဢရႃႇမူဝ်းသေႇ
1 မူဝ်းသေႇ၊သိုပ်ႇႁေႃးလၢတ်ႈတီႈၵူၼ်းမဵဝ်းဢိသရေး၊တင်းလၢႆထႅင်ႈလႄႈလၢတ်ႈဝႃႈ၊- 2“ၵဝ်ၼႆႉဢသၢၵ်ႈတဵမ်ပၢၵ်ႇသၢဝ်းပီဝၼ်းမိူဝ်ႈၼႆႉယဝ်ႉ။ ၵမ်းလိုၼ်းၵဝ်ဢမ်ႇတၢတ်ႈၼိူင်ႇလႆႈပုၼ်ႈတေဢွၼ်ႁူဝ်သူၵႂႃႇထႅင်ႈယဝ်ႉ။ လိူဝ်သေၼၼ်ႉထႃႇဝရႃႉၽြႃး၊မီးဢမိင်ႉတီႈၵဝ်လႄႈဝႃႈ၊ ‘မႂ်းဢမ်ႇလႆႈၶၢမ်ႈၼမ်ႉယေႃးတၢၼ်ႇ၊ၼႆႉ၊’ ဝႃႈၼႆဝႆႉယဝ်ႉ။- 3ထႃႇဝရႃႉၽြႃး၊ၽြႃးပဵၼ်ၸဝ်ႈသူတၵ်းဢွၼ်ႁူဝ်သူၵႂႃႇႁႂ်ႈလႆႈယႃႉၵူၼ်းမဵဝ်းၸိူဝ်းဢၼ်မီးၵႃႈတီႈၼၼ်ႈပုၼ်ႈလွင်ႈၼင်ႇႁိုဝ်သူတၵ်းလႆႈဢုပ်ႉပိူင်ႇၸၢမ်ႇၸႃးဢေႃႈ။ ယေႃးသု၊တၵ်းဢွၼ်ႁူဝ်သူၵႂႃႇၸွမ်းၵႃႈၼင်ႇဢၼ်ထႃႇဝရႃႉၽြႃး၊မီးဢမိင်ႉဝႆႉၼၼ်ႉဢေႃႈ။- 4ထႃႇဝရႃႉၽြႃး၊တၵ်းယႃႉပႅတ်ႈၵူၼ်းၸိူဝ်းၼၼ်ႉမိူၼ်ၸိူဝ်ႉၼင်ႇဢၼ်မၼ်းၸဝ်ႈႁဵတ်းတီႈသိႁုၼ်ႇ၊တင်းဢေႃႇၶႃႉ၊ၶုၼ်ႁေႃၶမ်းဢႃႇမေႃးရိ၊ၸိူဝ်းၼၼ်ႉဢိၵ်ႇတင်းတီႈမိူင်းၶဝ်ၼၼ်ႉဢေႃႈ။- 5ထႃႇဝရႃႉၽြႃး၊တၵ်းႁႂ်ႈသူဢွင်ႇသိုၵ်းၵႃႈၼိူဝ်ၶဝ်လႄႈသူတၵ်းတေလႆႈႁဵတ်းတီႈၶဝ်ၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉၼၼ်ႉထူၼ်ႈထူၼ်ႈတဵမ်တဵမ်ဢေႃႈ။- 6ဢဝ်ႁႅင်းလႄႈမီးတၢင်းဢၼ်ႁတ်းႁၢၼ်တႃႉ။ ယႃႇပေၵူဝ်ႁႄၶဝ်။ ထႃႇဝရႃႉၽြႃး၊ၽြႃးပဵၼ်ၸဝ်ႈသူတၵ်းၵႂႃႇလူၺ်ႈၵၼ်တင်းသူဢေႃႈ။ မၼ်းၸဝ်ႈတၵ်းဢမ်ႇၸုၼ်ႉပႅတ်ႈသူ၊တၵ်းဢမ်ႇပႄႇပႅတ်ႈသူဝႆႉ၊” ဝႃႈၼင်ႇၼႆဢေႃႈ။
7မိူဝ်ႈၼၼ်ႉ မူဝ်းသေႇ၊ႁွင်ႉဢဝ်ယေႃးသု၊သေယဝ်ႉ၊လၢတ်ႈတေႃႇမၼ်းၵႃႈတီႈၽၢႆႇၼႃႈၵူၼ်းမဵဝ်းဢိသရေး၊တင်းသဵင်ႈတင်းလူင်လႄႈဝႃႈ၊ “ဢဝ်ႁႅင်းလႄႈမီးတၢင်းဢၼ်ႁတ်းႁၢၼ်တႃႉ။ မႂ်းၼႆႉပဵၼ်ၵေႃႉဢၼ်တၵ်းဢွၼ်ႁူဝ်ၵူၼ်းၸိူဝ်းၼႆႉၵႂႃႇၶဝ်ႈဢုပ်ႉပိူင်ႇၸၢမ်ႇၸႃးမိူင်းဢၼ်ထႃႇဝရႃႉၽြႃး၊တိူင်ႇၵၢဝ်ႇၵတိဝႆႉတီႈပူႇမွၼ်ႇၶဝ်လႄႈဝႃႈ၊ ‘တၵ်းပၼ်တီႈၶဝ်ဢေႃႈ၊’ ဝႃႈၼႆၼၼ်ႉဢေႃႈ။- 8ထႃႇဝရႃႉၽြႃး၊တၵ်းဢွၼ်ႁူဝ်မႂ်းၵႂႃႇလႄႈတၵ်းမီးလူၺ်ႈၵၼ်တင်းမႂ်းဢေႃႈ။ မၼ်းၸဝ်ႈတၵ်းဢမ်ႇႁႂ်ႈမႂ်းလူမ်ႉပင်းၵႂႃႇ၊တၵ်းဢမ်ႇၸုၼ်ႉပႅတ်ႈမႂ်းဝႆႉ။ ယႃႇပေမႆႈၸႂ်။ ယႃႇပေၸႂ်လု၊” ဝႃႈၼင်ႇၼႆဢေႃႈ။
တြႃးၸဝ်ႈဢၼ်တၵ်းလႆႈၽတ်းဢၢၼ်ႇၸဵတ်းပီယေႈပွၵ်ႈ
9ပိူဝ်ႈၼႆလႄႈမူဝ်းသေႇ၊တႅမ်ႈတြႃးၸဝ်ႈဝႆႉသေလႄႈဢဝ်ဢၢပ်ႈပၼ်တီႈယဵၸ်ႈပရေႃးႁဵၵ်ႈ#31:9 “ယဵၸ်ႈပရေႃးႁဵၵ်ႈ” - ပဵၼ်ၽူႈတၢင်တူဝ်ႁဵတ်းဝၢတ်ႈသၢၵ်ႈၵၢပ်ႈတၢင်းလူႇတီႈၽြႃးပဵၼ်ၸဝ်ႈၵူၼ်းမဵဝ်းလေႇဝိ၊ၸိူဝ်းဢၼ်မီးပုၼ်ႈၽွၼ်းႁၢမ်တိူၵ်ႈပတိၺိၺ်ႇထႃႇဝရႃႉၽြႃး၊ဢိၵ်ႇတင်းတီႈၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်းဢိသရေး၊တင်းလၢႆၼၼ်ႉဢေႃႈ။- 10မၼ်းၸင်ႇသင်ႇလၢတ်ႈတီႈၶဝ်လႄႈဝႃႈ၊ “ၼႂ်းတီႈသုတ်းပီဢၼ်ထူၼ်ႈၸဵတ်းပီ၊မိူဝ်ႈပီဢၼ်ၶႂၢင်းလွတ်ႈပွႆႇပၼ်ႁွတ်ႈထိုင်မႃးၵူႈပွၵ်ႈၵူႈပွၵ်ႈၼၼ်ႉ၊ၽတ်းဢၢၼ်ႇတြႃးၸဝ်ႈၼႆႉလူၺ်ႈသဵင်ဢၼ်လင်ၵႃႈၼႂ်းပၢင်ပွႆးသုမ်ႉထဵင်ၼၼ်ႉတႃႉ။- 11ၽတ်းဢၢၼ်ႇတြႃးၸဝ်ႈၼႆႉတီႈၵူၼ်းမဵဝ်းဢိသရေး၊တင်းလၢႆ မိူဝ်ႈဢၼ်ၶဝ်ဢွၼ်ၵၼ်မႃးႁဵတ်းဝၢတ်ႈၵူဝ်းၵႂၢႆႇတီႈထႃႇဝရႃႉၽြႃး၊ၽြႃးပဵၼ်ၸဝ်ႈသူၵႃႈတီႈဢၼ်မၵ်းၶၢၼ်းဝႆႉတႃႇတေဝႆႈသႃၵူဝ်းၵႂၢႆႇၽြႃးပဵၼ်ၸဝ်ႈၼၼ်ႉတႃႉ။- 12ႁွင်ႉဢဝ်ၵႃႈဢၼ်ပဵၼ်ၵူၼ်းၸၢႆး၊ၽူႈယိင်းတင်းလုၵ်ႈဢွၼ်ႇဢိၵ်ႇတင်းၵူၼ်းမဵဝ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈယူႇၵႃႈၼႂ်းဝဵင်းသူတင်းလၢႆမႃးၸုတုမ်ၵၼ်ႁႂ်ႈၶဝ်လႆႈဢၶႂၢင်ႉဢၼ်ထွမ်ႇငိၼ်းတြႃးၸဝ်ႈၼႆႉၵူႈၵေႃႉၵူႈၵူၼ်းသေလႄႈသွၼ်ဢဝ်ႁႂ်ႈရူဝ်ႇသေႇၵူဝ်ယမ်ထႃႇဝရႃႉၽြႃး၊ၽြႃးပဵၼ်ၸဝ်ႈသူသေယဝ်ႉ၊ႁႂ်ႈပႃးတင်းသဵတ်ႈၸႃႇပႂ်ႉၵမ်ပႂ်ႉၸွမ်းပိင်းၺၢပ်ႈၸဝ်ႈတင်းသဵင်ႈတင်းမူတ်းၼႆႉတႃႉ။- 13ပေႃးႁဵတ်းၸိူဝ်ႉၼင်ႇၼၼ်ၸိုင်၊လုၵ်ႈလၢၼ်ၸိူဝ်ႉၶိူဝ်းသူဢၼ်ဢမ်ႇပႆႇတွၼ်ႉငိၼ်းတြႃးၸဝ်ႈထႃႇဝရႃႉၽြႃး၊ၽြႃးပဵၼ်ၸဝ်ႈသူၸိူဝ်းၼၼ်ႉတၵ်းတေဢွၼ်ၵၼ်လႆႈငိၼ်းဢေႃႈ။ ၼင်ႇၼၼ်လႄႈၶဝ်တၵ်းမီးဢၶႂၢင်ႉဢၼ်သွၼ်ဢဝ်သေလႄႈထွမ်ႇဢဝ်မၼ်းၸဝ်ႈယူႇၸူဝ်ႈဢၼ်ၶဝ်ယင်းယူႇၵႃႈၼႂ်းမိူင်းဢၼ်သူၸမ်တၵ်းၶၢမ်ႈၼမ်ႉယေႃးတၢၼ်ႇ၊ၵႂႃႇလႄႈဢုပ်ႉပိူင်ႇၸၢမ်ႇၸႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။
ထႃႇဝရႃႉၽြႃးသင်ႇလၢတ်ႈမူဝ်းသေႇၵမ်းလိုၼ်းသုတ်း
14မိူဝ်ႈၼၼ်ႉ၊ထႃႇဝရႃႉၽြႃး၊မီးဢမိင်ႉတီႈမူဝ်းသေႇ၊လႄႈဝႃႈ၊ “မႂ်းတေဢမ်ႇလႆႈယူႇထႅင်ႈႁိုင်ႁိုင်ယဝ်ႉ။ ႁွင်ႉဢဝ်ယေႃးသု၊လႄႈဢွၼ်ၵၼ်မႃးၵႃႈတီႈသုမ်ႉထဵင်ၸဝ်ႈၼၼ်ႉတင်းသွင်ၵေႃႉႁႂ်ႈၵဝ်လႆႈသင်ႇလၢတ်ႈၼႄပၼ်တီႈမၼ်းတႃႉ၊” ဝႃႈၼင်ႇၼႆဢေႃႈ။ မူဝ်းသေႇ၊တင်းယေႃးသု၊ၵေႃႈၵႂႃႇၵႃႈတီႈသုမ်ႉထဵင်ၸဝ်ႈၼၼ်ႉဢေႃႈ။- 15ထႃႇဝရႃႉၽြႃး၊ထၢင်ႇသႃးပေႃႇမႃးၵႃႈတီႈၶဝ်သွင်ၵေႃႉ ၵႃႈၼႂ်းသဝ်မွၵ်ႇၵုမ်ႈဢၼ်တႄႇယူႇၵႃႈၼိူဝ်ၽၵ်းတူသုမ်ႉထဵင်ၸဝ်ႈၼၼ်ႉဢေႃႈ။
16 ထႃႇဝရႃႉၽြႃး၊ၵေႃႈမီးဢမိင်ႉတီႈမူဝ်းသေႇ၊လႄႈဝႃႈ၊ “မႂ်းၸမ်တၵ်းၼွၼ်းလပ်းလူၺ်ႈၵၼ်တင်းပူႇပေႃႈမႂ်းၸိူဝ်းၼၼ်ႉယဝ်ႉ။ လိုၼ်းသေဢၼ်မႂ်းတၢႆၵႂႃႇယဝ်ႉၼၼ်ႉၸိုင်၊ၵူၼ်းၸိူဝ်းၼႆႉတၵ်းဢမ်ႇပႂ်ႉသဵတ်ႈၸႃႇတေႃႇၵဝ်သေလႄႈပႄႇပႅတ်ႈပတိၺိၺ်ႇဢၼ်ၵဝ်ႁဵတ်းဝႆႉလူၺ်ႈၵၼ်တင်းၶဝ်ၼၼ်ႉဢေႃႈ။ ၶဝ်တၵ်းၸုၼ်ႉပႅတ်ႈၵဝ်သေလႄႈၵူဝ်းၵႂၢႆႇၽြႃးတင်းလၢႆၵႃႈၼႂ်းမိူင်းဢၼ်ၶဝ်တၵ်းၶဝ်ႈၵႂႃႇဢုပ်ႉပိူင်ႇၸၢမ်ႇၸႃးၼၼ်ႉဢေႃႈ။- 17မိူဝ်ႈဢၼ်လွင်ႈတၢင်းၸိူဝ်းၼၼ်ႉပဵၼ်မႃးၸိုင်၊ၵဝ်တၵ်းၸႂ်မႆႈၶႂ်ႈၸႃႉတေႃႇၶဝ်လႄႈၸုၼ်ႉပႅတ်ႈၶဝ်ဢေႃႈ။ ၶဝ်တၵ်းႁွတ်ႈတၢင်းလုတၢင်းလႅဝ်လႄႈၽေးဢႃႉမၢင်ႇၵလႃႇဢၼ်လီၵူဝ်လီႁႄၼမ်ၼႃႇတၵ်းတူၵ်းႁွတ်ႈၵႃႈၼိူဝ်ၶဝ်ဢေႃႈ။ မိူဝ်ႈၼၼ်ႉၶဝ်တၵ်းၶႆႈၸႂ်ထူပ်းလွင်ႈဢၼ်ဝႃႈ၊လွင်ႈတၢင်းၸိူဝ်းၼႆႉပဵၼ်မႃးတီႈၶဝ်ၵွပ်ႈပိူဝ်ႈၵဝ်ဢၼ်ပဵၼ်ၽြႃးပဵၼ်ၸဝ်ႈၶဝ်ၼႆႉဢမ်ႇမီးလူၺ်ႈၵၼ်တင်းၶဝ်ၼၼ်ႉဢေႃႈ။- 18မိူဝ်ႈယၢမ်းၼၼ်ႉၵဝ်တၵ်းထဵင်ပႅတ်ႈတၢင်းဢၼ်တၵ်းၸွႆႈထႅမ်ၶဝ်ၼၼ်ႉၵွပ်ႈပိူဝ်ႈဢၼ်ၶဝ်ႁဵတ်းတုၸရိူၵ်ႈလႄႈၵႂႃႇဝႆႈၽြႃးတၢင်ႇသူႇတၢင်ႇပႃးတင်းလၢႆၼၼ်ႉဢေႃႈ။
19“တေႃႈလဵဝ်ၼႆႉတႅမ်ႈလိၵ်ႈႁဵတ်းၵႂၢမ်းၼႆႉဝႆႉသေလႄႈဢဝ်သွၼ်ပၼ်တီႈၵူၼ်းမဵဝ်းဢိသရေး၊တင်းလၢႆတႃႉ။ ၵႂၢမ်းဢၼ်ႁဵတ်းၼႆႉၸိုင်၊သွၼ်ႁႂ်ႈၶဝ်ဢူမ်သူပ်းဝႆႉႁႂ်ႈလႆႈပဵၼ်သၢၵ်ႈသေႇပုၼ်ႈၵဝ်လွင်ႈဢပျတ်ႈၵူၼ်းမဵဝ်းဢိသရေး၊တင်းလၢႆတႃႉ။- 20ၵဝ်တၵ်းဢဝ်ၶဝ်ၶဝ်ႈထိုင်ၵႃႈၼႂ်းမိူင်းဢၼ်မၢၵ်ႈမီးလီပဵၼ်လႄႈၽုၼ်ႇလီလိၼ်လီ#31:20 “မိူင်းဢၼ်မၢၵ်ႈမီးလီပဵၼ်လႄႈၽုၼ်ႇလီလိၼ်လီ” ၵႃႈၼႂ်းၵျၢမ်းမူႇၶူႇသျိင်ႇႁွင်ႉဝႃႈ၊ “မိူင်းဢၼ်ၼမ်ႉၼူမ်းတင်းၼမ်ႉၽိုင်ႈလႆ” ၼၼ်ႉၸွမ်းၵႃႈၼင်ႇဢၼ်ၵဝ်တိူင်ႇဝႃႈၵတိဝႆႉတီႈပူႇမွၼ်ႇၶဝ်ၼၼ်ႉဢေႃႈ။ ၵႃႈတီႈၼၼ်ႈၶဝ်တေလႆႈၵိၼ်ဢိမ်ႇၵိၼ်တဵမ်သေယဝ်ႉ၊ယူႇလီပီးမၼ်းယူႇဢေႃႈ။ ၵူၺ်းၵႃႈ၊ၶဝ်တၵ်းဝၢႆႇၼႃႈပႅတ်ႈသေၵႃႈတီႈၵဝ်လႄႈဝႆႈၽြႃးတၢင်ႇသူႇတၢင်ႇပႃးတင်းလၢႆဢေႃႈ။ ၶဝ်တၵ်းၸုၼ်ႉပႅတ်ႈၵဝ်လႄႈယႃႉပတိၺိၺ်ႇတြႃးၵဝ်ပႅတ်ႈဢေႃႈ။- 21ၵမ်းၼၼ်ႉ၊ၽေးဢႃႉမၢင်ႇၵလႃႇဢၼ်လီၵူဝ်လီႁႄၼမ်ၼႃႇတၵ်းတူၵ်းႁွတ်ႈၵႃႈၼိူဝ်ၶဝ်ဢေႃႈ။ ၵူၺ်းၵႃႈ၊တၵ်းတေလႆႈႁဵတ်းလိၵ်ႈႁဵတ်းၵႂၢမ်းၼႆႉယူႇႁႂ်ႈလႆႈပဵၼ်သၢၵ်ႈသေႇပုၼ်ႈၵဝ်လွင်ႈဢပျတ်ႈၶဝ်ဢေႃႈ။ ပိၵ်ႉသမ်ႉယၢမ်းမိူဝ်ႈလဵဝ်ၼႆႉၸဵမ်မိူဝ်ႈၸူဝ်ႈဢၼ်ၵဝ်ဢမ်ႇပႆႇဢွၼ်ၶဝ်ၶဝ်ႈၵႂႃႇၵႃႈၼႂ်းမိူင်းဢၼ်ၵဝ်တိူင်ႇဝႃႈၵတိဝႆႉၼၼ်ႉၸိုင်၊ၵဝ်ႁုတၢင်းဢၼ်ၶဝ်ၵျၢမ်ႇပွင်ၸိူဝ်ႉၼင်ႇႁိုဝ်ၼၼ်ႉဝႆႉယဝ်ႉ၊” ဝႃႈၼင်ႇၼႆဢေႃႈ။
22 မူဝ်းသေႇ၊တႅမ်ႈလိၵ်ႈႁဵတ်းၵႂၢမ်းၼၼ်ႉၼႂ်းဝၼ်းၼၼ်ႉၵမ်းလဵဝ်လႄႈသွၼ်ပၼ်တီႈၵူၼ်းမဵဝ်းဢိသရေး၊တင်းလၢႆဢေႃႈ။
23မိူဝ်ႈၼၼ်ႉ၊ထႃႇဝရႃႉၽြႃး၊သမ်ႉသင်ႇလၢတ်ႈတီႈယေႃးသု၊လုၵ်ႈၸၢႆးၼုၼ်ႇ၊ၼၼ်ႉလႄႈဝႃႈ၊ “ဢဝ်ႁႅင်းလႄႈမီးတၢင်းဢၼ်ႁတ်းႁၢၼ်တႃႉ။ မႂ်းတၵ်းတေလႆႈဢွၼ်ဢဝ်ၵူၼ်းမဵဝ်းဢိသရေး၊တင်းလၢႆၶဝ်ႈၸၢမ်ႇၸႃးၵႃႈၼႂ်းမိူင်းဢၼ်ၵဝ်တိူင်ႇဝႃႈၵတိဝႆႉၼၼ်ႉဢေႃႈ။ ၵဝ်တၵ်းမီးယူႇလူၺ်ႈၵၼ်တင်းမႂ်းဢေႃႈ၊” ဝႃႈၼင်ႇၼႆဢေႃႈ။
24 မူဝ်းသေႇ၊ၵေႃႈတႅမ်ႈၵႂၢမ်းပိင်းၺၢပ်ႈတြႃး၊ၽြႃးပဵၼ်ၸဝ်ႈဝႆႉၵႃႈၼႂ်းၽိုၼ်လိၵ်ႈလႄႈဝႆႉသတိၼင်ႇႁိုဝ်တၵ်းဢမ်ႇတူၵ်းဢမ်ႇႁူင်ႈသေၶေႃႈသေၵမ်းၼၼ်ႉ ဢေႃႈ။- 25မိူဝ်ႈဢၼ်တႅမ်ႈယဝ်ႉတူဝ်ႈလီငၢမ်းယဝ်ႉၸိုင်၊မၼ်းသင်ႇလၢတ်ႈတီႈယဵၸ်ႈပရေႃးႁဵၵ်ႈ#31:25 “ယဵၸ်ႈပရေႃးႁဵၵ်ႈ” - ပဵၼ်ၽူႈတၢင်တူဝ်ႁဵတ်းဝၢတ်ႈသၢၵ်ႈၵၢပ်ႈတၢင်းလူႇတီႈၽြႃးပဵၼ်ၸဝ်ႈၵူၼ်းမဵဝ်းလေႇဝိ၊ၸိူဝ်းဢၼ်ပႂ်ႉထိင်းတိူၵ်ႈပတိၺိၺ်ႇထႃႇဝရႃႉၽြႃး၊ၼၼ်ႉလႄႈဝႃႈ၊- 26“ဢဝ်ၽိုၼ်လိၵ်ႈပိင်းၺၢပ်ႈတြႃးထႃႇဝရႃႉၽြႃး၊ၼႆႉတၢင်ႇဝႆႉၵႃႈႁိမ်းတိူၵ်ႈပတိၺိၺ်ႇထႃႇဝရႃႉၽြႃး၊ၽြႃးပဵၼ်ၸဝ်ႈသူႁႂ်ႈပဵၼ်သၢၵ်ႈသေႇလွင်ႈဢပျတ်ႈၵူၼ်းမၼ်းၸဝ်ႈၼၼ်ႉတႃႉ။- 27ၵဝ်ႁုလွင်ႈတၢင်းဢၼ်ၶဝ်မီးၸႂ်တိုဝ်ၸႂ်တၼ်ၵႃႈႁိုဝ်ဢိၵ်ႇတင်းလွင်ႈဢၼ်ၶဝ်မီးၸႂ်ဢၼ်လုၵ်ႉၽိုၼ်ႉၵႃႈႁိုဝ်ၼၼ်ႉယူႇဢေႃႈ။ ၶဝ်လုၵ်ႉၽိုၼ်ႉထႃႇဝရႃႉၽြႃး၊ယူႇၼႂ်းၸူဝ်ႈပၢၼ်ၵဝ်ၼႆႉၵူၺ်းဢမ်ႇၵႃး၊ဝၢႆးသေၵဝ်တၢႆၵႂႃႇယဝ်ႉၼၼ်ႉၶဝ်ယင်းတၵ်းယဵင်ႈၶႅၼ်းလုၵ်ႉၽိုၼ်ႉယူႇလိူဝ်တွၼ်းၼႃႇသေၼၼ်ႉလူးၵွၼ်ႇဢေႃႈ။- 28ႁႂ်ႈၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၼႂ်းၸိူဝ်ႉၶိူဝ်းသူၵူႈမဵဝ်းဢိၵ်ႇတင်းမူးမၢတ်ႈၽွင်းမိူင်းသူတင်းသဵင်ႈတင်းလူင်ၸုတုမ်ၵၼ်ၵႃႈတီႈၵဝ်ၼႆႉႁႂ်ႈၵဝ်လႆႈဢဝ်ၵႂၢမ်းၸိူဝ်းၼႆႉႁေႃးလၢတ်ႈထိုင်ႁူၶဝ်တႃႉ။ ၵဝ်တၵ်းၵၢဝ်ႇတိူင်ႇၵၢင်ႁၢဝ်တင်းလိၼ်မိူင်းႁႂ်ႈလႆႈပဵၼ်သၢၵ်ႈသေႇပုၼ်ႈၵဝ်လွင်ႈဢပျတ်ႈၶဝ်ၼၼ်ႉဢေႃႈ။- 29ၵဝ်ႁုလွင်ႈဝၢႆးသေၵဝ်တၢႆယဝ်ႉၼၼ်ႉၵူၼ်းတင်းလၢႆတၵ်းႁၢႆႉယုတ်ႈၼႃႇလႄႈပႄႇပႅတ်ႈတြႃးဢၼ်ၵဝ်သင်ႇလၢတ်ႈဝႆႉတီႈၶဝ်ၼၼ်ႉဢေႃႈ။ ၼင်ႇၼၼ်လႄႈၼႂ်းၶိင်ႇၵႃႇလႃႉမိုဝ်ႉဝၼ်းၵမ်းလိုၼ်းၼၼ်ႉၶဝ်တၵ်းထူပ်းႁၼ်ၽေးဢႃႉမၢင်ႇၵလႃႇ ၵွပ်ႈပိူဝ်ႈဢၼ်ၶဝ်ႁဵတ်းတုၸရိူၵ်ႈဢပျတ်ႈလႄႈဢဝ်လွင်ႈတၢင်းဢၼ်ၶဝ်ႁဵတ်းၼၼ်ႉတိုၵ်းယူင်းတၢင်းၸႂ်မႆႈၶႂ်ႈၸႃႉထႃႇဝရႃႉၽြႃး၊ၼၼ်ႉဢေႃႈ၊” ဝႃႈၼင်ႇၼႆဢေႃႈ။
လိၵ်ႈႁဵတ်းၵႂၢမ်းမူဝ်းသေႇ
30မိူဝ်ႈၼၼ်ႉ၊မူဝ်းသေႇ၊ဢဝ်လိၵ်ႈႁဵတ်းၵႂၢမ်းၼၼ်ႉၵူႈၶေႃႈႁဵတ်းၼႄၵူၼ်းမဵဝ်းဢိသရေး၊တင်းသဵင်ႈတင်းလူင်ယၢမ်းမိူဝ်ႈဢၼ်ၶဝ်ဢွၼ်ၵၼ်ထွမ်ႇငိၼ်းယူႇၼၼ်ႉလႄႈဝႃႈၸမ်ႉ။
Currently Selected:
ႁေႃးတြႃး 31: SHNCL
Highlight
Copy
Compare
Share
Want to have your highlights saved across all your devices? Sign up or sign in
