1 သမူၺ်ႇ 9
9
လိူၵ်ႈဢဝ်သေႃးလုႁႂ်ႈပဵၼ်ၶုၼ်ႁေႃၶမ်း
1မိူဝ်ႈယၢမ်းၼၼ်ႉမီးၵူၼ်းဢၼ်လႆႈၸိုဝ်ႈၵိသႃႉ၊ၼၼ်ႉၵေႃႉၼိုင်ႈဢေႃႈ။ မၼ်းၼၼ်ႉပဵၼ်ၵူၼ်းမၢၵ်ႈၵူၼ်းမီး၊ၵူၼ်းဢၼ်မီးဢေႃးၸႃႇၸၢၵ်ႈသူပ်းၸၢၵ်ႈၵႂၢမ်းလႄႈပဵၼ်ၵူၼ်းၸိူဝ်ႉၶိူဝ်းပိၼ်ႇယႃႇမိၼ်ႇ၊လုၵ်ႈၸၢႆးဢပျေႇလႃႉ၊လၢၼ်ၸၢႆးၸေႇရေႃႇ၊ၵႃႈၼႂ်းၶိူဝ်းႁိူၼ်းပေႇၶေႃႇရတ်ႉ၊ၼႂ်းၵူၼ်းႁိူၼ်းဢႃႇၽိ၊ၼၼ်ႉဢေႃႈ။- 2မၼ်းၼၼ်ႉမီးလုၵ်ႈၸၢႆးၵေႃႉၼိုင်ႈဢၼ်လႆႈၸိုဝ်ႈသေႃးလု၊ဢၼ်ပဵၼ်ၵူၼ်းႁၢင်ႈလီၼၼ်ႉဢေႃႈ။ ၵႃႈၼႂ်းမဵဝ်းဢိသရေး၊ၼႆႉမၼ်းသုင်လိူဝ်ပိူၼ်ႈႁူဝ်မၼ်းပူၼ်ႉပႅၼ်ပိူၼ်ႈယူႇလႄႈႁၢင်ႈလီၼႃႇလိူဝ်ပိူၼ်ႈဢေႃႈ။
3ၽဝ်ႇၼိုင်ႈၽုင်မႃႉလီႈၵိသႃႉ၊ပေႃႈသေႃးလု၊ၼၼ်ႉႁၢႆၵႂႃႇလႄႈမၼ်းလၢတ်ႈတီႈလုၵ်ႈၸၢႆးမၼ်းလႄႈဝႃႈ၊ “မႂ်းႁွင်ႉဢဝ်ၵႃႈၼႂ်းၵူၼ်းဢွၼ်ႇတင်းလၢႆၼႆႉၵေႃႉၼိုင်ႈသေယဝ်ႉ၊လုၵ်ႉလႄႈၵႂႃႇၸွမ်းႁႃမႃႉလီႈၸိူဝ်းၼၼ်ႉတႃႉ၊” ဝႃႈၼင်ႇၼႆဢေႃႈ။- 4ၶဝ်သွင်ၵေႃႉၼၼ်ႉၵႂႃႇလႄႈႁႃၵႃႈၼိူဝ်ႁၢၼ်ႉလွႆဢေႇၽရိမ်ႇ၊ဢိၵ်ႇတင်းၵႃႈတီႈမိူင်းသႃႇလိသႃႉ၊ၵူႈတီႈၵူႈလႅၼ်သေၵေႃႈဢမ်ႇထူပ်းဢမ်ႇႁၼ်။ ၶဝ်သမ်ႉလႄႇႁႃၵႃႈတီႈဢိူင်ႇသႃႇလိမ်း၊ၵေႃႈဢမ်ႇထူပ်းဢမ်ႇႁၼ်။ ၶဝ်ၵႂႃႇလႄႇႁႃၵႃႈတီႈသိုင်ႇတိူင်းမိူင်းပိၼ်ႇယႃႇမိၼ်ႇ၊ၵူႈတီႈၵူႈလႅၼ်ၼႆႉၵေႃႈဢမ်ႇထူပ်းဢမ်ႇႁၼ်။- 5မိူဝ်ႈဢၼ်ၶဝ်ႁွတ်ႈထိုင်ၵႃႈတီႈဢိူင်ႇၸုၽႃႉ၊ၼၼ်ႉၸိုင်၊သေႃးလု၊လၢတ်ႈတီႈၵူၼ်းဢွၼ်ႇမၼ်းလႄႈဝႃႈ၊ “ၶိုၼ်းပွၵ်ႈမိူဝ်းႁိူၼ်းတႃႉႁဝ်း။ ပေႃႈၵဝ်တၵ်းဢမ်ႇမႆႈၸႂ်လူၺ်ႈမႃႉလီႈၸိူဝ်းၼၼ်ႉလႄႈတၵ်းမႆႈၸႂ်ၵွပ်ႈႁဝ်းယဝ်ႉ၊” ဝႃႈၼင်ႇၼႆဢေႃႈ။
6ၵူၼ်းဢွၼ်ႇၼၼ်ႉလၢတ်ႈလႄႈဝႃႈ၊ “ၵမ်းၼိုင်ႈလူးၵွၼ်ႇၶႃႈ။ ၵႃႈၼႂ်းဝဵင်းၼႆႉမီးၵူၼ်းၽြႃးပဵၼ်ၸဝ်ႈၵေႃႉၼိုင်ႈဢၼ်မီးသရေႇၼႃႈတႃႁူင်ႁၢင်းၼၼ်ႉ၊ၵွပ်ႈပိူဝ်ႈၵႂၢမ်းၵႃႈဢၼ်မၼ်းလၢတ်ႈၼၼ်ႉၸၢင်ႈပဵၼ်ၸွမ်းၵူႈၶေႃႈၵူႈၵမ်းၼၼ်ႉ ဢေႃႈ။ ၵႂႃႇၸူးတီႈမၼ်းလူးၵွၼ်ႇတႃႉႁဝ်း။ ၸၢင်ႈၶႄးမၼ်းတၵ်းလၢတ်ႈၼႄတီႈဢၼ်ႁဝ်းတၵ်းထူပ်းႁၼ်မႃႉလီႈၸိူဝ်းၼၼ်ႉလႆႈဢေႃႈ၊” ဝႃႈၼင်ႇၼႆဢေႃႈ။
7 သေႃးလု၊ၵေႃႈလၢတ်ႈလႄႈဝႃႈ၊ “ပေႃးႁဝ်းၵႂႃႇၸိုင်၊ႁဝ်းတၵ်းဢဝ်ၵႃႈသင်ၵႂႃႇလူႇတၢၼ်း။ တၢင်းၵိၼ်ႁဝ်းဢၼ်ပႃးမႃးၵႃႈၼႂ်းႁေႃႇၼၼ်ႉမူတ်းသဵင်ႈယဝ်ႉ။ ႁဝ်းယင်းဢမ်ႇမီးၶွင်ၽၢၵ်ႇသေၸိူဝ်ႉသေမဵဝ်း။ ႁဝ်းမီးၵႃႈသင်ဝႆႉ၊” ဝႃႈၼင်ႇၼႆဢေႃႈ။
8ၵူၼ်းဢွၼ်ႇၼၼ်ႉၵေႃႈလၢတ်ႈလႄႈဝႃႈ၊ “ၵမ်းၼိုင်ႈလူးၵွၼ်ႇၶႃႈ။ တီႈၵဝ်ၶႃႈၼႆႉမီးငိုၼ်းမၢတ်ႈၼိုင်ႈၶႃႈဢေႃႈ။ ၵဝ်ၶႃႈတၵ်းဢဝ်ငိုၼ်းၼၼ်ႉပၼ်တီႈမၼ်း၊ႁႂ်ႈမၼ်းၶႆႈၼႄတီႈဢၼ်ႁဝ်းတၵ်းထူပ်းႁၼ်မႃႉလီႈလႆႈၼၼ်ႉဢေႃႈ၊” ဝႃႈၼင်ႇၼႆဢေႃႈ။
9-11 သေႃးလု၊ၵေႃႈလၢတ်ႈလႄႈဝႃႈ၊ “လီယဝ်ႉ။ ဢွၼ်ၵၼ်ၵႂႃႇၸူးတီႈမၼ်းတႃႉႁဝ်း၊” ဝႃႈၼင်ႇၼႆသေလႄႈ၊ၶဝ်ဢွၼ်ၵၼ်ၵႂႃႇၸူးတီႈဝဵင်းဢၼ်ၵူၼ်းၽြႃးပဵၼ်ၸဝ်ႈယူႇၼၼ်ႉဢေႃႈ။ ယၢမ်းမိူဝ်ႈဢၼ်ၶဝ်ယင်းတိုၵ်ႉၶိုၼ်ႈၸွမ်းတၢင်းၵႂႃႇၸူးတီႈဝဵင်းယူႇၼၼ်ႉ ၶဝ်ထူပ်းႁၼ်ၼၢင်းယိင်းသၢဝ်ၸိူဝ်းဢၼ်ဢွၵ်ႇမႃးတဵၵ်းၼမ်ႉၼၼ်ႉလႄႈထၢမ်ဝႃႈ၊ “ၸွင်ႇမီးၵူၼ်းဢၼ်ၸၢင်ႈႁုႁၼ်ၵႃႈၼႂ်းဝဵင်းၼႆႉႁိုဝ်း၊” ဝႃႈၼင်ႇၼႆဢေႃႈ။ မိူဝ်ႈၵွၼ်ႇဢွၼ်ၼႆႉၼၼ်ႉၵႃႈၼႂ်းမဵဝ်းဢိသရေး၊ၼၼ်ႉပေႃးသေၵေႃႉသေၵူၼ်းမီးလွင်ႈတၢင်းဢၼ်လူဝ်ႇတွင်ႈထၢမ်ထႃႇဝရႃႉၽြႃး၊ၸိုင်၊မၼ်းၸၢင်ႈဝႃႈ၊ “ၵႂႃႇၵႃႈတီႈၽူႈၸၢင်ႈႁုႁၼ်ၼၼ်ႉတႃႉႁဝ်း၊” ဝႃႈၼင်ႇၼႆဢေႃႈ။
12ၼၢင်းယိင်းသၢဝ်ၸိူဝ်းၼၼ်ႉၶိုၼ်းလၢတ်ႈလႄႈဝႃႈ၊ “မီးၶႃႈဢေႃႈ။ မၼ်းၸင်ႇပူၼ်ႉၵႂႃႇဢွၼ်တၢင်းသူၸဝ်ႈၼႆႉၵူၺ်းၶႃႈဢေႃႈ။ ၵႂႃႇၶၼ်ၶၼ်ၽႂ်းၽႂ်းတႃႉ။ မၼ်းႁွတ်ႈမႃးၵႃႈတီႈဝဵင်းၼႆႉၵွပ်ႈပိူဝ်ႈဢၼ်မီးပွႆးဢၼ်ႁဵတ်းတၢင်းလူႇၵႃႈၼိူဝ်ၶဵင်ႇတၢင်းလူႇၵႃႈတီႈၼိူဝ်လွႆပုၼ်ႉဢေႃႈ။- 13ပေႃးသူၸဝ်ႈၶဝ်ႈၵႃႈၼႂ်းဝဵင်းတေႃႈလဵဝ်ၼႆႉၸိုင်၊တၵ်းထူပ်းႁၼ်မၼ်းၵမ်းလဵဝ်၊ၸူဝ်ႈဢၼ်မၼ်းဢမ်ႇပႆႇၶိုၼ်ႈၵႃႈတီႈၼိူဝ်လွႆႁႂ်ႈလႆႈၵိၼ်ၼၼ်ႉဢေႃႈ။ ၵူၼ်းတင်းလၢႆဢမ်ႇၸၢင်ႈႁဵတ်းၵႃႈသင်တေႃႇထိုင်မၼ်းႁွတ်ႈမႃး၊ၵွပ်ႈပိူဝ်ႈမၼ်းလူဝ်ႇပၼ်တၢင်းလီတီႈၶိူင်ႈတၢင်းလူႇၼၼ်ႉဢွၼ်တၢင်းဢေႃႈ။ လိုၼ်းၼၼ်ႉၸင်ႇ၊ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ႁွင်ႉပၢင်းၼၼ်ႉလႆႈၵိၼ်ဢေႃႈ။ ပိူဝ်ႈၼႆလႄႈသူၸဝ်ႈၶိုၼ်ႈၵႂႃႇၸူးတေႃႈလဵဝ်ၼႆႉတႃႉ။ သူၸဝ်ႈတၵ်းထူပ်းႁၼ်မၼ်းၵမ်းလဵဝ်ဢေႃႈ၊” ဝႃႈၼင်ႇၼႆဢေႃႈ။- 14ၶဝ်သွင်ၵေႃႉၼၼ်ႉၵေႃႈ ၶိုၼ်ႈၸူးတီႈဝဵင်းလႄႈ၊မိူဝ်ႈဢၼ်ယင်းတိုၵ်ႉၶဝ်ႈဝဵင်းၵႂႃႇယူႇၼၼ်ႉ ၶဝ်ႁၼ်သမူၺ်ႇလႃႉ၊ဢွၵ်ႇမႃးတေႃႇၼႃႈၵၼ်တင်းၶဝ်သွင်ၵေႃႉ ယူႇၸွမ်းသဵၼ်ႈတၢင်းဢၼ်မၼ်းၶိုၼ်ႈၵႂႃႇၸူးတီႈလွႆဢၼ်ႁဵတ်းဝၢတ်ႈၵူဝ်းၵႂၢႆႇၼၼ်ႉဢေႃႈ။
15ဝၼ်းမိူဝ်ႈဝႃးၼၼ်ႉၸူဝ်ႈဢၼ်သမူၺ်ႇလႃႉ၊ဢမ်ႇပႆႇႁွတ်ႈမႃးၼၼ်ႉၸိုင်၊ထႃႇဝရႃႉၽြႃး၊မီးဢမိင်ႉတီႈမၼ်းဝႆႉလႄႈဝႃႈ၊- 16“ဝၼ်းမိူဝ်ႈၽုၵ်ႈၶိင်ႇၼႆႉၵဝ်တၵ်းပွႆႇၸႂ်ႉၵူၼ်းၵေႃႉၼိုင်ႈဢၼ်ပဵၼ်ၵူၼ်းၸိူဝ်ႉၶိူဝ်းပိၼ်ႇယႃႇမိၼ်ႇ၊မႃးၸူးတီႈမႂ်းဢေႃႈ။ မႂ်းတၵ်းလႆႈပၼ်ၽိၵ်ႈသိၵ်ႈတၢင်းဢၼ်သွၼ်းလေႃႇၵႃႈၼိူဝ်မၼ်းလူၺ်ႈၼမ်ႉမၼ်း၊ႁႂ်ႈမၼ်းပဵၼ်ၶုၼ်ဢၼ်ဢုပ်ႉပိူင်ႇၵူၼ်းၵဝ်ၵူၼ်းမဵဝ်းဢိသရေး၊တႃႉ။ မၼ်းတၵ်းၵႄႇၼုၵ်ႈဢဝ်ၶဝ်လွတ်ႈသေၵႃႈၼႂ်းမိုဝ်းမဵဝ်းၽိလိတ်ႉတိ၊ဢေႃႈ။ လွင်ႈမၼ်းၸမ်ႉ၊ၵဝ်တူၺ်းႁၼ်တုၵ်ႉၶႃႉတၢင်းၽၢၼ်ၵူၼ်းၵဝ်လႄႈလႆႈငိၼ်းသဵင်ဢၼ်ၶဝ်ႁႆႈႁွင်ႉပုၼ်ႈတၢင်းၸွႆႈတၢင်းထႅမ်ၶဝ်ၼၼ်ႉယဝ်ႉ၊” ဝႃႈၼင်ႇၼႆဢေႃႈ။
17မိူဝ်ႈဢၼ်သမူၺ်ႇလႃႉ၊ႁၼ်သေႃးလု၊ၼၼ်ႉၸိုင်၊ထႃႇဝရႃႉၽြႃး၊မီးဢမိင်ႉတီႈမၼ်းလႄႈဝႃႈ၊ “ၵေႃႉၼႆႉပဵၼ်ၵူၼ်းဢၼ်ၵဝ်လၢတ်ႈလွင်ႈမၼ်းဝႆႉတီႈမႂ်းၼၼ်ႉယဝ်ႉ။ မၼ်းတၵ်းဢုပ်ႉပိူင်ႇၵႃႈၼိူဝ်ၵူၼ်းၵဝ်တင်းလၢႆဢေႃႈ၊” ဝႃႈၼင်ႇၼႆဢေႃႈ။- 18မိူဝ်ႈၼၼ်ႉသေႃးလု၊ၵႂႃႇၸူးတီႈသမူၺ်ႇလႃႉ၊ၵေႃႉဢၼ်မီးတီႈႁိမ်းၽၵ်းတူၼၼ်ႉလႄႈတွင်ႈထၢမ်ဝႃႈ၊ “ၶႅၼ်းတေႃႈၼႄပၼ်ႁိူၼ်းၽူႈၸၢင်ႈႁုႁၼ်ၼၼ်ႉသေၵမ်း၊” ဝႃႈၼင်ႇၼႆဢေႃႈ။
19 သမူၺ်ႇလႃႉ၊ၶိုၼ်းလၢတ်ႈလႄႈဝႃႈ၊ “ၵဝ်ပဵၼ်ၽူႈၸၢင်ႈႁုႁၼ်ဢေႃႈ။ ၶိုၼ်ႈၵႂႃႇထႃႈၵဝ်ၵႃႈတီႈထႃႇၼႃႉဢၼ်ႁဵတ်းဝၢတ်ႈၵူဝ်းၵႂၢႆႇၼၼ်ႉတႃႉ။ သူတင်းသွင်ၵေႃႉတၵ်းလႆႈၵိၼ်လူၺ်ႈၵၼ်တင်းၵဝ်ၼႂ်းဝၼ်းမိူဝ်ႈၼႆႉဢေႃႈ။ မိူဝ်ႈၽုၵ်ႈၵၢင်ၼႂ်တၵ်းလၢတ်ႈၼႄၵႃႈဢၼ်မႂ်းမီးဢလူဝ်ႇၼၼ်ႉယဝ်ႉၸင်ႇတၵ်းပွႆႇမႂ်းၵႂႃႇဢေႃႈ။- 20လူၺ်ႈလွင်ႈမႃႉလီႈၸိူဝ်းဢၼ်ႁၢႆၵႂႃႇမိူဝ်ႈသိုၼ်းၼၼ်ႉၵေႃႈယႃႇပေမႆႈၸႂ်။ ထူပ်းႁၼ်ဝႆႉယဝ်ႉ။ ၵေႃႉဢၼ်ၵူၼ်းမဵဝ်းဢိသရေး၊လူဝ်ႇသေပိူၼ်ႈၼၼ်ႉပဵၼ်ၽူႈလႂ်ဝႃႈၼႆၸမ်ႉ၊ပဵၼ်မႂ်းဢိၵ်ႇတင်းၵူၼ်းႁိူၼ်းပေႃႈမႂ်းၵႃႈမီးၼၼ်ႉယဝ်ႉ၊” ဝႃႈၼင်ႇၼႆဢေႃႈ။
21 သေႃးလု၊ၵေႃႈလဝ်ႈလၢတ်ႈလႄႈဝႃႈ၊ “ၵဝ်ၶႃႈၼႆႉပဵၼ်ၵူၼ်းၸိူဝ်ႉၶိူဝ်းပိၼ်ႇယႃႇမိၼ်ႇ၊မဵဝ်းဢၼ်လဵၵ်ႉဢၼ်ၼွႆႉသေပိူၼ်ႈၵႃႈၼႂ်းၵူၼ်းမဵဝ်းဢိသရေး၊လႄႈၶိူဝ်းႁိူၼ်းၵဝ်ၶႃႈသမ်ႉပဵၼ်ဢၼ်ၼႃႈလဵၵ်ႉတႃတႅမ်ႇသေပိူၼ်ႈၵႃႈၼႂ်းၸိူဝ်ႉၶိူဝ်းပိၼ်ႇယႃႇမိၼ်ႇ၊ဢေႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈလၢတ်ႈၸိူဝ်ႉၼင်ႇၼႆတီႈၵဝ်ၶႃႈ၊” ဝႃႈၼင်ႇၼႆဢေႃႈ။
22မိူဝ်ႈၼၼ်ႉ သမူၺ်ႇလႃႉ၊ဢွၼ်ဢဝ်သေႃးလု၊တင်းၵူၼ်းဢွၼ်ႇမၼ်းၶဝ်ႈၸူးၵႃႈၼႂ်းလုၵ်းလူင်သေယဝ်ႉ၊ႁႂ်ႈမၼ်းၼင်ႈၵႃႈတီႈႁူဝ်ၽိူၼ်တီႈဢၼ်မီးၶႅၵ်ႇယူႇသၢမ်သိပ်းၵေႃႉၼင်ႈယူႇၼၼ်ႉဢေႃႈ။- 23သမူၺ်ႇလႃႉ၊လၢတ်ႈတီႈၵူၼ်းဢၼ်ပဵၼ်ႁူဝ်ၼႃႈၽၢႆႇတူမ်ႈႁုင်မၼ်းလႄႈဝႃႈ၊ “ဢဝ်ၵွၼ်ႈၼိူဝ်ႉဢၼ်ၵဝ်ဢၢပ်ႈပၼ်တီႈမႂ်းလႄႈသင်ႇလၢတ်ႈႁႂ်ႈမႂ်းၸတ်းဝႆႉၶေႃၶေႃၼၼ်ႉမႃးတႃႉ၊” ဝႃႈၼင်ႇၼႆဢေႃႈ။- 24ၵေႃႉၼၼ်ႉၵေႃႈဢဝ်ၵွၼ်ႈၼိူဝ်ႉႁူဝ်ၶႃဢၼ်မွၼ်းမွၼ်းၼၼ်ႉမႃးတမ်းပၼ်ၵႃႈတီႈၽၢႆႇၼႃႈသေႃးလု၊ဢေႃႈ။ သမူၺ်ႇလႃႉ၊ၵေႃႈလၢတ်ႈလႄႈဝႃႈ၊ “တူၺ်းလူး။ ဢၼ်ၼႆႉပဵၼ်ၵွၼ်ႈၼိူဝ်ႉဢၼ်ၵဝ်ဢဝ်ဝႆႉပုၼ်ႈမႂ်းယဝ်ႉ။ ၵိၼ်တႃႉ။ ၵဝ်သိမ်းဝႆႉပုၼ်ႈမႂ်းႁႂ်ႈလႆႈၵိၼ်ပွၵ်ႈၼႆႉႁူမ်ႈလူၺ်ႈၵၼ်တင်းၶႅၵ်ႇဢၼ်ႁွင်ႉပၢင်းဝႆႉၼၼ်ႉယဝ်ႉ၊” ဝႃႈၼင်ႇၼႆဢေႃႈ။
ပိူဝ်ႈၼႆလႄႈသေႃးလု၊ၵိၼ်ၶူပ်းလူၺ်ႈၵၼ်တင်းသမူၺ်ႇလႃႉ၊ၼႂ်းဝၼ်းၼၼ်ႉဢေႃႈ။- 25မိူဝ်ႈဢၼ်ၶဝ်လူင်းသေၵႃႈတီႈထႃႇၼႃႉဢၼ်ႁဵတ်းဝၢတ်ႈၵူဝ်းၵႂၢႆႇလႄႈၶဝ်ႈၵႃႈၼႂ်းဝဵင်းၸိုင်၊ၶဝ်မႄးႁႅၼ်းပၼ်ၵူႇတီႈၼွၼ်းပုၼ်ႈသေႃးလု၊#9:25 “မႄးႁႅၼ်းပၼ်ၵူႇ … ပုၼ်ႈသေႃးလု၊” ၵျၢမ်းမူႇႁေႇပြႄးဝႃႈ၊ “မၼ်းဢုပ်ႇၵုမ်သေႃးလု” ဢေႃႈ ၵႃႈၼိူဝ်လင်ၶႃးႁိူၼ်း#9:25 “လင်ၶႃးႁိူၼ်း” လင်ၶႃးႁိူၼ်းၵူၼ်းမိူင်းတၢင်းပုၼ်ႉႁဵတ်းပဵင်းပဵင်းဝႆႉဢေႃႈသေယဝ်ႉ၊- 26မၼ်းၼွၼ်းၵႃႈတီႈၼၼ်ႈ#9:26 “မၼ်းၼွၼ်းၵႃႈတီႈၼၼ်ႈ” ၵျၢမ်းမူႇႁေႇပြႄးဢမ်ႇမီးၵႂၢမ်းၶေႃႈၼႆႉ။ ဢေႃႈ။
သမူၺ်ႇလႃႉဢဝ်ၼမ်ႉမၼ်းသွၼ်းလေႃႇသေႃးလု
မိူဝ်ႈထိုင်ၵၢင်ၼႂ်မိူင်းလႅင်းမႃးၼၼ်ႉ၊သမူၺ်ႇလႃႉ၊ၵႂႃႇပူၵ်းလုၵ်ႉသေႃးလု၊ၵႃႈၼိူဝ်လင်ၶႃးႁိူၼ်းသေလႄႈလၢတ်ႈဝႃႈ၊ “လုၵ်ႉတႃႉ။ ၵဝ်တၵ်းပွႆႇမႂ်းၵႂႃႇဢေႃႈ၊” ဝႃႈၼင်ႇၼႆဢေႃႈ။ သေႃးလု၊လုၵ်ႉသေယဝ်ႉ၊မၼ်းတင်းသမူၺ်ႇလႃႉ၊ၵႂႃႇၸွမ်းၵၼ်ဢေႃႈ။- 27မိူဝ်ႈဢၼ်ၶဝ်ႁွတ်ႈၵႂႃႇၵႃႈတီႈႁိမ်းတီႈသုတ်းဝဵင်းၼၼ်ႉၸိုင်၊သမူၺ်ႇလႃႉ၊လၢတ်ႈတီႈသေႃးလု၊လႄႈဝႃႈ၊ “လၢတ်ႈႁႂ်ႈၵူၼ်းဢွၼ်ႇမႂ်းၵႂႃႇဢွၼ်တၢင်းတႃႉ၊” ဝႃႈၼင်ႇၼႆလႄႈၵူၼ်းဢွၼ်ႇၼၼ်ႉၵႂႃႇဢွၼ်တၢင်းသေယဝ်ႉ၊သမူၺ်ႇလႃႉ၊သမ်ႉလၢတ်ႈလႄႈဝႃႈ၊ “ၵိုတ်းသဝ်းယူႇၵမ်းဢွၼ်ႇၼိုင်ႈတႃႉ။ ၵဝ်တၵ်းမွၵ်ႇလၢတ်ႈဢမိင်ႉၽြႃးပဵၼ်ၸဝ်ႈတီႈမႂ်းဢေႃႈ၊” ဝႃႈၼင်ႇၼႆဢေႃႈ။
Currently Selected:
1 သမူၺ်ႇ 9: SHNCL
Highlight
Copy
Compare
Share
Want to have your highlights saved across all your devices? Sign up or sign in
