Sofonii 3
3
Azo ti Jérusalem ama iringo ndo ti Nzapa pepe
1Mawa na gbata ti ngangu li so,
gbata so *sioni ayeke na tere ti lo so,
gbata ti sarango ngangu na azo so!
2 Gbata ni ama iringo ndo pepe,
lo ma wango pepe,
lo zia be ti lo na ndö ti *KOTA GBIA pepe,
lo ga nduru na Nzapa ti lo pepe.
3 Amakonzi ti lo ayeke tongana abamara
so ayeke toto;
awafango-ngbanga ti lo ayeke
tongana ambo ti ngonda so ate kobe ti ala ti lakui kue
si na ndaperere, ala yeke na ye oko ti tengo ni pepe.
4Awayanga-Nzapa ti lo ayeke azo ti kirikiri,
azo ti handango zo;
awayango-sandaga ti lo asara si ye
so a zia nde ndali Nzapa aga *sioni;
ala do ndia na sese.
5Andaa KOTA GBIA ayeke na ya ti gbata ni,
lo yeke mbirimbiri, lo yeke sara ye ti sioni pepe.
Lakue na ndaperere, lo yeke fâ ngbanga polele;
lo zia lege ni pepe.
Ataa so kue, kamene ayeke sara zo ti sioni pepe.
6KOTA GBIA atene:
“Mbi hunzi ambeni mara kue awe,
mbi kungbi agbagba ti bira ti ala;
mbi sara si ndö ti alege ti ala angba senge,
zo oko akiri ahon daa pepe;
mbi buba agbata ti ala kue awe,
zo oko angba pepe,
zo ti lango na ya ni ayeke daa pepe.
7Mbi tene na be ti mbi, mbi tene:
‘Mo gbata so, tongana mo kpe fade mbeto ti mbi,
tongana mo ma fade wango ti mbi,
ka a yeke buba mo pepe.’
Me lakue so mbi yeke ga ti pika mo,
azo ti mo ayeke kpe hio ti sara sioni ahon ndoni.
8So tënë ti yanga ti KOTA GBIA laa:
Ala ku mbi!
Ala ku lango so mbi yeke ga
ti sigigi na nda ti ala.
Mbi leke na be ti mbi ti bongbi amara kue,
ti bongbi akodro ti agbia kue,
ti fâ ngbanga na li ti azo ni,
ti tuku ngonzo ti mbi ti wâ na ndö ti ala.
Biani, mbanda ti mbi so ayeke londo tongana wâ
ayeke gbi sese kue.”
Fade Nzapa ayeke sanze sarango ye ti azo
9“Tongaso, fade mbi yeke ndu poro ti yanga
ti amara titene aga *nzoni
si ala kue alingbi ti di iri ti mbi *KOTA GBIA,
ala kue ayeke sara kua ti mbi na be oko.
10Ataa azo so ayeke voro mbi,
ala so akangbi yongoro kâ na peko ti *bale ti Etiopii,
fade ala yeke ga na mbi *sandaga ti ala.”
Tanga ti azo ti Israel so angba na fini
11 “Na lango ni so, ala azo ti mbi,
asioni ye so kue ala sara,
aye so ala sara ti ke mbi,
fade kamene ni ayeke kiri ti sara ala pepe.
Biani, na lango ni so, azo ti kirikiri
so baba ahon ndö ti ala,
mbi yeke zi ala na popo ti ala, azo ti mbi.
Tongaso si ala zia lege ti sarango kuru baba
na ndö ti hoto ti mbi
so ayeke nde si ayeke nzoni kue.
12Fade mbi yeke zia
asenge zo na azo ti mawa
angba na popo ti ala.
Ala yeke kpe na mbi *KOTA GBIA
titene mbi bata ala.
13 Tanga ti azo ti Israel so angba na fini
ayeke kiri ti sara sioni pepe,
ala yeke kiri ti tene mvene pepe,
a yeke kiri ti wara tënë ti handango ndo
na yanga ti ala pepe.
Me fade ala lingbi ti te kobe nzoni,
ala lingbi ti wu tere ti ala nzoni,
zo oko ti zia mbeto na be ti ala ayeke daa pepe.”
A yeke kiri ti leke gbata ti Jérusalem
14Mo gbata ti *Sion,
mo dekongo na ngia!
Ala azo ti Israel, ala pika maboko ti ala na ngia.
Mo gbata ti Jérusalem,
mo duti na ngia na be ti mo kue!
15Ngbanga so *KOTA GBIA
aye ti fâ na li ti ala so, lo zia ni awe;
lo tumba awato ti ala yongoro awe.
KOTA GBIA, gbia ti Israel, ayeke na popo ti ala,
mbeni ye ti sioni ayeke kiri
ti zia mbeto na be ti ala pepe.
16Na lango ni so,
fade a yeke tene na gbata ti Jérusalem:
“Sion, sara mbeto pepe,
be ti mo awoko pepe!
17KOTA GBIA, Nzapa ti mo ayeke na popo ti mo,
lo yeke kpengba zo ti bira,
lo yeke zo ti songo mo na kuâ.
Tere ti lo anzere mingi ndali ti mo;
na lege ti ndoye ti lo,
lo yeke kiri ti bi tënë na li ti mo pepe.
Lo yeke dodo, lo yeke dekongo na ngia ndali ti mo.
18Azo so ayeke na ya ti vundu,
azo so ayeke yongoro na mo
si ala lingbi ti sara matanga pepe so,
fade mbi yeke bongbi ala.
Tongaso, mbi yeke zi kamene
so fade ane na ndö ti Jérusalem.
19Na ngoi ni so, fade mbi yeke sara sioni
na azo so kue asara ngangu na ala.
Azo so awara ka,
fade mbi yeke kanga le ti ka ti ala;
azo so a gbu ala, a gue na ala na kodro wande,
mbi yeke kiri ti bongbi ala na ndo oko.
Fade mbi yeke sara titene azo ane ala
si iri ti ala awu, amu ya ti akodro
so kue a zia lani kamene na le ti ala daa.
20Na ngoi ni so, mbi yeke kiri na ala;
gi na ngoi ni so, mbi yeke bongbi ala na ndo oko.
Gi na le ti ala wani, mbi yeke sara titene
gigi ti ala akiri aga nzoni.
Mbi yeke sara titene azo ane ala
si iri ti ala awu, amu ndo na popo
ti azo ti sese kue.”
Tënë so KOTA GBIA atene laa.
Currently Selected:
Sofonii 3: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010
