Amato 2
2
Ndara akanga lege na zo ti sara sioni
1Molenge ti mbi,
yeda na atënë ti mbi;
bata andia ti mbi nzoni tongana ti so
zo ayeke bata ye ti ngangu ngere.
2Dingi mê ti mo, mo ma atënë ti ndara,
gi lege ngangu ti ma ya ni.
3Biani, gi hingango ye;
sara ngangu ti wara hingango ndo!
4 Gi ndara tongana ti so zo ayeke gi nginza;
gi ni ngangu tongana ti so
zo ayeke gi mbeni mosoro so ahonde.
5Tongana mo sara tongaso,
fade mo yeke hinga nda ti kpengo mbeto
ti KOTA GBIA,
mo yeke wara lege ti hinga Nzapa.
6 KOTA GBIA laa ayeke mu ndara na zo;
hingango ye na hingango ndo alondo na lo.
7KOTA GBIA ayeke bata anzoni ye
ndali ti azo ti mbirimbiri;
lo yeke tongana *vala ndali ti azo
so sarango ye ti ala ayeke na legeni.
8Lo yeke bata azo
so ayeke sara ye na lege ti ndia;
lo yeke bata lege ti azo
so abata be ti ala kue na lo.
9Molenge ti mbi, tongana mo ma mbi,
fade mo yeke hinga, mo tene,
sarango ye ti mbirimbiri,
sarango ye na lege ti ndia
na sarango ye na legeni
ayeke sara si zo abaa nzoni daa.
10Fade ndara ayeke li na ya ti be ti mo,
hingango ye ayeke zia ngia na be ti mo.
11Nzoni gbungo-li
ayeke sara si sioni ye awara mo pepe,
hingango ndo ayeke bata mo.
12Aye use so ayeke sara si mo kpe lege
ti sioni sarango ye;
ala yeke zi mo na maboko ti azo ti tenengo mvene;
13ala yeke zi nga mo na maboko ti azo
so azia lege ti mbirimbiri
titene ala mu lege so avuko.
14Be ti azo ni ayeke na ngia na sarango sioni;
tere ti ala anzere na asioni sarango ye ti kirikiri.
15Lege ti sarango ye ti ala ayeke kirikiri
si lege so ala mu aba bango.
16Tongaso, mo yeke kpe lege ti wali
so ayeke ti mo pepe,
wali wande so ayeke tene anzerengo tënë.
17 Lo do koli ti lo ti maseka, lo zia;
tongaso lo buba lege ti *mbuki na Nzapa ti lo.
18Sioni dutingo ti lo ayeke gue na lo na kuâ;
alege ti sarango ye ti lo ayeke gue na lo
na ndo ti akuâ.
19Azo so kue ague na ndo ti lo ayeke kiri pepe;
lege so ayeke gue na zo na fini,
ala yeke wara ni mbeni pepe.
20Tongaso, ayeke nzoni mo mu lege
ti dutingo ti azo ti nzoni;
mo sara ye tongana ti azo ti mbirimbiri.
21Biani, fade azo ti mbirimbiri
ayeke lango na ya ti kodro so;
azo so dutingo ti ala ayeke na legeni
ayeke ngba daa.
22Me ti azo ti sioni,
a yeke zi ala na ya ti kodro ni;
azo ti handango amba ti ala,
a yeke tumba ala daa.
© La Société Biblique de Centrafrique 2010