Wungo ti azo 23
23
1Balaam atene na Balak: “Mo leke na mbi agbalaka mbarambara na ndo so; mo mu na mbi akoli-bagara mbarambara nga na akoli-taba mbarambara.” 2Balak asara ye so Balaam ahunda na lo. Balak na Balaam aya koli-bagara oko na koli-taba oko na *sandaga so a yeke gbi ni kue na wâ na ndö ti gbalaka oko oko. 3Balaam atene na Balak: “Luti nduru na tere ti sandaga ti mo so; ti mbi, mbi yeke hon yongoro kete. E hinga pepe, fade *KOTA GBIA ayeke ga ti wara mbi. Tënë so lo yeke tene na mbi, ataa tënë ni ayeke tongana nyen, fade mbi yeke tene peko ni na mo.” Na pekoni lo gue na ndö ti mbeni hoto so pere ayeke daa pepe. 4Nzapa aga awara Balaam si Balaam atene na lo: “Mbi leke gbalaka mbarambara, mbi ya koli-bagara oko na koli-taba oko na ndö ti gbalaka ni oko oko.” 5KOTA GBIA azia mbeni tënë na yanga ti Balaam si lo tene na lo: “Kiri na tere ti Balak; tënë so mo yeke tene na lo laa.”
6Balaam akiri na tere ti Balak so angba ti luti na tere ti sandaga ti lo, lo na amakonzi ti sese ti Moab kue. 7Tongaso Balaam adiko bia so, lo tene:
“Balak asara si mbi londo na Aram mbi ga;
gbia ti Moab asara si mbi londo na ahoto ti To mbi ga.
‘Ga mo deba Jacob na mbi!
Ga mo tene sioni tënë na ndö ti azo ti Israel!’
8Me zo so Nzapa adeba lo pepe,
fade mbi deba lo tongana nyen?
Zo so KOTA GBIA atene sioni tënë
na ndö ti lo pepe,
fade mbi tene sioni tënë
na ndö ti lo tongana nyen?
9Na li ti akota têne so mbi yeke daa,
mbi yeke baa ala;
na li ti akete hoto so mbi yeke daa,
le ti mbi angba ti baa ala;
ala yeke azo so aduti nde.
Ala bongbi tere na ambeni mara nde pepe.
10Zo wa laa alingbi ti diko azo ti Israel, zo wa?
*Ahale ti Jacob so ayeke gbani gbani so?
Mbi ye ti kui tongana ti azo ti mbirimbiri,
mbi ye si kuâ ti mbi aduti tongana ti ala.”
11Balak atene na Balaam: “Nyen laa mo sara na mbi so? Mbi ga na mo ge titene mo deba awato ti mbi, me mo sara ti mo gi tufa na ndö ti ala gbani gbani!” 12Balaam akiri tënë: “Alingbi mbi tene pepe gi tënë so KOTA GBIA azia na yanga ti mbi ti tene?”
Balaam asara tufa na ndö ti azo ti Israel ti fani use ni
13Balak akiri atene: “Ga, e gue na mbeni ndo nde so fade mo yeke baa azo ti Israel kue. Ge so, mo yeke baa gi mbeni mbage ti azo ni. Kâ, fade mo yeke deba ala na mbi.” 14Balak ague na Balaam na mbeni ndo so zo ayeke duti daa ti baa awato, na li ti hoto ti Pisga. Na ndo so lo kiri lo sara gbalaka mbarambara si lo gbi koli-bagara oko na koli-taba oko na ndö ti gbalaka oko oko. 15Balaam atene na Balak: “Luti na tere ti sandaga ti mo so a yeke gbi ni kue na wâ; ti mbi, mbi yeke gue kâ ti ku…”
16 *KOTA GBIA aga awara Balaam si azia mbeni tënë na yanga ti lo ti tene. Na pekoni, lo tene na Balaam: “Kiri na tere ti Balak, tënë so mo yeke tene na lo laa.” 17Balaam akiri na tere ti Balak so angba ti luti na tere ti sandaga ti lo, lo na amakonzi ti sese ti Moab kue. Balak ahunda Balaam, atene: “KOTA GBIA atene nyen?” 18Tongaso Balaam adiko bia so, lo tene:
“Balak, londo, mo ma mbi si!
Molenge ti Sipor, dingi mê ti mo, mo ma mbi!
19Nzapa ayeke zo pepe titene lo tene mvene,
lo yeke senge zo ti sese pepe ti duti na yanga use use.
Tënë so lo tene, fade lo yeke sara ni pepe?
Tënë so lo tene, fade lo yeke sara ye ti peko ni pepe?
20KOTA GBIA atene na mbi ti sara tufa na ndö ti azo so,
lo wani, lo sara tufa na ndö ti ala awe; awe!
Tënë so mbi tene, mbi lingbi ti kiri na ndö ni pepe.
21KOTA GBIA abaa sioni ye na Jacob pepe,
lo baa ye ti kirikiri na popo ti azo ti Israel pepe.
KOTA GBIA, Nzapa ti ala ayeke na ala.
Ala yeke dekongo na ngia ti fa so lo yeke gbia.
22Nzapa asara si ala sigigi na kodro ti Ezipte;
lo yeke na kota ngangu tongana ti ngbä.
23Tënë ti sarango yoro ayeke na popo ti azo ti Jacob pepe,
tënë ti bango nda ti aye ayeke na popo ti azo ti Israel pepe.
Na ngoi so alingbi, fade a yeke tene na azo ti Jacob
nga na azo ti Israel ye so kue Nzapa ayeke sara.
24Baa, azo so alondo tongana mama ti bamara,
ala luti na ndö ti gere ti ala tongana bamara.
Bamara ni ate nyama ti lo awe si lo yeke lango;
lo nyon mene ti nyama so lo gbu awe si lo yeke lango.”
25Balak atene na Balaam: “Tongana mo ye ti deba ala pepe, sara nga tufa na ndö ti ala pepe.” 26Balaam akiri tënë na Balak, atene: “Kozoni, mbi tene fade biani na mo, mbi tene: mbi yeke sara gi ye so kue KOTA GBIA atene!”
Balaam asara tufa na ndö ti azo ti Israel ti fani ota ni
27Balak atene na Balaam: “Ga, mbi kiri mbi gue na mo na mbeni ndo nde. E hinga pepe, fade Nzapa ayeke yeda titene na ndo so kâ, mo deba azo so na mbi.” 28Balak ague na Balaam na ndö ti hoto ti Peor. Tongana zo aluti na ndö ti hoto ni, lo yeke baa benyama kue. 29Balaam atene na Balak: “Mo leke na mbi agbalaka mbarambara na ndo so; mo mu na mbi akoli-bagara mbarambara nga na akoli-taba mbarambara.” 30Balak asara ye ni tongana ti so Balaam atene. Na pekoni, lo ya koli-bagara oko na koli-taba oko na sandaga so a yeke gbi ni kue na wâ na ndö ti gbalaka oko oko kue.
Currently Selected:
Wungo ti azo 23: MNF2010
Highlight
Copy
Compare
Share
Want to have your highlights saved across all your devices? Sign up or sign in
© La Société Biblique de Centrafrique 2010
