Wungo ti azo 10

Atatalita so a sara na wen ti nginza

1 *KOTA GBIA atene na Moïse: 2“Mo leke atatalita use na wen ti nginza so a pika tere ni na martoo. Fade a yeke huru tatalita ni ti iri bongbi ti azo ti Israel wala ti mu lege na ala ti londo ti hon. 3Tongana a huru atatalita use kue, bongbi ti azo ti Israel kue ayeke bongbi na tere ti mo, nduru na yanga ti da ti bongo so KOTA GBIA na azo ti lo ayeke wara tere daa. 4Tongana a huru gi tatalita oko, akota zo na amakonzi ti akete mara ti Israel laa ayeke bongbi na tere ti mo. 5Tongana a huru tatalita si ngangu dekongo ayeke na gbe ni, azo so asara bâbâ na mbage ti To laa ayeke londo ti hon. 6Tongana a huru tatalita ti fani use ni si ngangu dekongo ayeke na gbe ni, azo so asara bâbâ na mbage ti Mbongo laa ayeke londo ti hon. Tongana tatalita ni atoto si ngangu dekongo ayeke na gbe ni, andaa hongo ti ala laa. 7Tongana a huru tatalita si dekongo ayeke na gbe ni pepe, so ayeke ti iri azo ti Israel ti bongbi tere na ndo oko.

8“Awayango-sandaga, *ahale ti Aaron laa ayeke huru atatalita ni. So ayeke mbeni ndia so ayeke ngba kpu na kpu ndali ti ahale ti ala.

9“Na kodro ti ala, tongana ala gue ti tiri bira na awato ti ala so ayeke sara ngangu na ala, ayeke nzoni ala huru tatalita ni si ngangu dekongo ayeke na gbe ni. Tongaso, mbi KOTA GBIA Nzapa ti ala, mbi yeke dabe ti mbi na ala si mbi yeke zi ala na maboko ti awato ti ala ni. 10Na lango ti sarango amatanga ti ala nga na amatanga ti ala ti fini nze, ala yeke huru atatalita ni na ndembe so ala yeke mu *asandaga ti ala so ayeke gbi ni kue na wâ nga na asandaga ti beoko. Na lege ti ye so, fade mbi yeke dabe ti mbi na ala. Mbi laa mbi yeke KOTA GBIA Nzapa ti ala.”

TI LONDO NA SINAI NGBII ASI NA KATIKATI TI MOAB

10–21

Azo ti Israel amu lege ti hon

11 Na nze use ti use ngu ni, na lango baleuse ni, ngbongboro mbinda alondo na ndö ti da ni ti hon, da so a zia atêne na ya ni, atêne so a su atënë ti *mbuki na le ni. 12Azo ti Israel alondo na benyama ti Sinai ti hon, kapa na kapa. Mbinda ni ague, aluti na ya ti benyama ti Paran. 13So ayeke kozo londongo ti azo ti Israel ti hon laa, alingbi na yanga so KOTA GBIA amu na Moïse.

14Azo ti mara ti Juda na aturugu ti ala laa alondo kozoni ti hon; ala yeke tambula na peko ti bendere ti mara ti ala. Makonzi ti aturugu ti ala ayeke Nashon, molenge ti Aminadab. 15Netaneel, molenge ti Suar laa ayeke makonzi ti aturugu ti mara ti Isakar. 16Eliab, molenge ti Helon laa ayeke makonzi ti aturugu ti mara ti Zabulon.

17A zi aye ti da so a zia nde ndali ti KOTA GBIA, a zia na sese si *ahale ti Gershon na amolenge ti Merari ayo ti hon na ni.

18Azo ti mara ti Ruben na aturugu ti ala laa alondo ti hon; ala yeke tambula na peko ti bendere ti mara ti ala. Makonzi ti aturugu ti ala ayeke Elisur, molenge ti Shedeur. 19Shelumiel, molenge ti Surishadai laa ayeke makonzi ti aturugu ti mara ti Siméon. 20Eliasaf, molenge ti Deuel laa ayeke makonzi ti aturugu ti mara ti Gad.

21Na pekoni, azo ti mara ti Lévi so ayeke ahale ti Kehat laa alondo ti hon. Ala yo akungba ti da so a zia nde ndali ti Nzapa. Atanga ti azo ti mara ti Lévi ayeke leke da ni kozoni si ala si.

22Na pekoni, azo ti mara ti Efraim na aturugu ti ala laa alondo ti hon; ala yeke tambula na peko ti bendere ti mara ti ala. Makonzi ti aturugu ti ala ayeke Elishama, molenge ti Amihud. 23Makonzi ti aturugu ti azo ti mara ti Manase ayeke Gamliel, molenge ti Pedasur. 24Makonzi ti aturugu ti azo ti mara ti Benjamin ayeke Abidan, molenge ti Gidoni.

25Na peko ti ala kue ayeke azo ti mara ti Dan, ala na aturugu ti ala laa alondo ti hon. Ala yeke tambula na peko ti bendere ti mara ti ala. Ala laa ako nda ti tambula ni. Makonzi ti aturugu ti ala ayeke Ahiezer, molenge ti Amishadai. 26Makonzi ti aturugu ti azo ti mara ti Aser ayeke Pagiel, molenge ti Okran. 27Makonzi ti aturugu ti azo ti mara ti Neftali ayeke Ahira, molenge ti Enan.

28So ayeke lege so azo ti Israel alondo ti hon laa, ala na aturugu ti ala kue.

Moïse agi mbeni zo ti fa lege ti tambula ni

29 Moïse atene na Hobab, molenge ti kogara ti lo Reuel, zo ti mara ti Madian, atene: “E yeke gue fadeso na kodro so *KOTA GBIA amu zendo ti mu na e so. Ga, e na mo, e gue; fade mo nga, mo yeke wara mbeni mbage ti anzoni ye so KOTA GBIA atene tënë ti mungo ni na azo ti Israel.” 30Hobab akiri tënë na lo: “Mbi yeke gue pepe; mbi yeke kiri na kodro ti mbi, na ya ti sewa ti mbi.” 31Moïse akiri tënë na lo: “Mbi gbu gere ti mo, mo zia e pepe! Mo laa mo hinga ando nde nde ti ya ti benyama so e lingbi ti sara abâbâ ti e daa. Mo laa mo yeke fa lege na e. 32Tongana e na mo, e gue, fade e yeke sara titene mo nga, mo yeke wara anzoni ye so KOTA GBIA ayeke mu na e.”

33 Azo ti Israel alondo na hoto ti KOTA GBIA ti hon si ala tambula na ya ti lango ota. Na ya ti lango ota so kue, sanduku ti *mbuki ti KOTA GBIA ayeke hon na dawa ti ala ti gi ndo so ala lingbi ti wu tere ti ala daa. 34Na kota lâ, tongana ala londo na ya ti bâbâ ti hon, ngbongboro mbinda ti KOTA GBIA ayeke hon na ndö ti li ti ala, na nduzu. 35 Na ndembe so sanduku ti mbuki ni ayeke hon, Moïse ayeke tene: “KOTA GBIA, londo! Tongaso si awato ti mo ayeke kangbi kirikiri si azo so ake mo ayeke kpe na dawa ti mo!” 36Na ndembe so ala yeke zia sanduku ni na sese, Moïse ayeke tene: “KOTA GBIA, mo kiri fadeso, mo ga, mo duti na tere ti gba ti amara ti azo ti Israel!”

Currently Selected:

Wungo ti azo 10: MNF2010

Highlight

Copy

Compare