Mishe 7
7
Toto ti wayanga-Nzapa
1Mawa na mbi! Mbi yeke tongana zo
so ague ti gi ale ti keke na peko ti so
azo ako ale ti keke ni kue awe;
mbi yeke tongana zo so ague ti gi ale ti *vinye
na peko ti so azo afâ ale ti vinye ni awe.
Me mbi wara mbeni ye oko ti tengo ni pepe,
ataa le ti vinye wala le ti fige
so anzere na mbi mingi so.
2Azo so abata be ti ala na Nzapa
ayeke na ya ti kodro ni mbeni pepe.
Mbeni zo ti mbirimbiri oko ayeke
na popo ti azo ti kodro ni pepe.
Azo kue ayeke gi gi lege ti fâ amba ti ala;
zo oko oko ayeke gi lege titene mba ti lo
ati na ya ti gbanda.
3Maboko ti ala ayapu na sarango sioni ye.
Titene amakonzi asara nzoni ye,
ala yeke hunda titene a mu na ala ye si;
awafango-ngbanga ayeke hunda goro.
Akota zo ayeke tene gi tënë
ti nzara ti warango aye so ahon ndö ti ala
si ala kue ayeke ma tere ti sara gi aye ni so.
4Zo ti nzoni na popo ti ala ayeke
tongana aki;
zo ti mbirimbiri na popo ti ala
ayeke sioni ahon gba ti akeke ti ki.
Lango ti fango ngbanga na ndö ti ala alingbi awe,
lango so asanziri ti ala, awayanga-Nzapa,
atene tënë ni kozoni awe so.
Fadeso be ti ala afun kue awe.
5Ala azo, azo so ayeke nduru na ala,
ala yeda na tënë ti ala pepe;
azo so ala ye ala mingi so,
ala zia be ti ala na ndö ti ala pepe.
Ataa na awali ti ala wani, ala bata yanga ti ala.
6 Biani, molenge-koli ayeke iri babâ ti lo
zo ti gbogbolinda,
molenge-wali ayeke ga wato ti mama ti lo,
wali ayeke ga wato ti mama ti koli ti lo;
wato ti zo oko oko ayeke azo ti da ti lo wani.
7Me ti mbi, mbi yeke baa ndo
na mbage ti *KOTA GBIA,
mbi yeke ku Nzapa, wasongo mbi;
fade Nzapa ti mbi ayeke ma mbi.
Azo ti Israel azia be ti ala ti ku KOTA GBIA
8Mo, wato ti mbi, mo he mbi pepe.
Tongana mbi ti, fade mbi yeke londo;
tongana mbi duti na ya ti vukongo ndo,
*KOTA GBIA ayeke lumiere ti mbi.
9Ayeke nzoni mbi kanga be ti mbi
na ngonzo ti KOTA GBIA,
ngbanga ti so mbi sara siokpari ti ke ti lo.
Me mbeni lango ayeke ga
so fade lo yeke mu tënë ti mbi na maboko ti lo,
lo yeke sara si fango ngbanga ti mbi aduti na legeni.
Lo yeke zi mbi na ya ti vukongo ndo
ti zia mbi na ya ti lumiere
si fade mbi yeke baa aye ti lo so lo sara ni
na lege ti mbirimbiri.
10Fade wato ti mbi ayeke baa ye ni na le ti lo
si kamene ayeke gbu le ti lo;
wato ti mbi so ayeke hunda lani mbi, atene:
“KOTA GBIA, Nzapa ti mo ni ayeke na ndo wa?”
Fade mbi yeke baa lo na le
na ndembe so a yeke do lo na gere,
tongana ti so a yeke do potopoto na lege.
11Lango titene a kiri ti leke
gbagba ti tere ti gbata ti mo ayeke ga.
Na lango ni so, fade azo ayeke kiri
ti kono ya ti kodro ti mo.
12Na lango ni so, azo ti mo ayeke londo
mbage na mbage ti kiri na ndo ti mo;
ambeni ayeke londo na Asirii,
ambeni ayeke londo na Ezipte
nga na ya ti akodro nde nde
so ayeke na popo ti ngu ti Ezipte na ti Efrate;
ambeni ayeke londo na yanga ti kota ngu-ingo kâ,
ambeni ayeke londo na yanga ti kota ngu-ingo ge;
ambeni ayeke londo na sese ti ahoto kâ,
ambeni ayeke londo na sese ti ahoto ge.
13Fade tanga ti sese ayeke ga tongana benyama
ndali ti sioni sarango ye ti azo so alango kâ.
14KOTA GBIA, na keke ti mo,
mo fa lege na azo ti mo
tongana ti so wabatango-taba
ayeke fa lege na ataba ti lo.
Azo ni aga ye ti mo awe.
Fadeso ala yeke duti gi ala oko na ya ti ngonda,
me anzoni sese so akeke ayeke sigigi daa pendere
angoro tere ni kue.
Gue na azo ti mo na nzoni sese ti Bashan na ti Galaad,
tongana ti so mo sara ando.
15Sara titene e baa aye ti kpene ti mo
tongana ti so mo sara ando na ndembe
ti sigingo ti e na kodro ti Ezipte.
16Fade amara nde ayeke baa aye ni na le ti ala,
kamene ayeke gbu le ti ala,
ataa so ala yeke na ngangu mingi.
Ala yeke hinga tënë so ala yeke tene pepe,
ala yeke yeda ti ma tënë oko pepe.
17Fade ala yeke su fuku ti sese tongana ngbo,
tongana anyama so ayeke hara na sese.
Na mbeto na be ti ala, ala yeke sigigi
na ya ti angangu gbagba ti ala ti bira
ti ga na mo KOTA GBIA, Nzapa ti e.
Fade mbeto ayeke hon ndö ti ala
mbeto ti mo ayeke sara ala.
18 Mbeni nzapa wa laa alingbi na mo?
Mo laa mo yeke zi siokpari ti tanga ti azo ti mo
so angba na fini,
mo yeke zia be ti mo na kpengbango li
ti azo ni pepe.
Ndali ti yengo so mo ye na tanga ti azo ti mo
so angba na fini,
mo yeke sara ngonzo na tere ti ala ngbii aninga pepe,
me ye so anzere na be ti mo ayeke titene
mo sara nzoni be na azo.
19 Fade mo yeke kiri ti baa mawa ti e,
mo yeke do asiokpari ti e na gbe ti gere ti mo,
mo yeke tuku asioni ti e kue
na gbe ti kota ngu-ingo.
20Mo yeke bata tënë ti yanga ti mo
na *ahale ti Jacob na ti Abraham.
Ye so mo deba yanga ti mo ti sara na akotara ti e
ngbene ye ando laa.
Currently Selected:
Mishe 7: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010
