Awayango-sandaga 9
9
Aaron na amolenge ti lo ato nda ti kua ti wayango-sandaga
1Na lango miombe ni, Moïse airi Aaron na amolenge ti lo nga na akangba ti Israel. 2Lo tene na Aaron: “Mu mbeni kete bagara so mo yeke ya na *sandaga ndali ti zingo siokpari na li ti azo; mo mu nga mbeni koli-taba ti ya na sandaga so a yeke gbi ni kue na wâ. Alingbi anyama ni use kue, mbeni mbage ti tere ti ala abuba pepe. Fade mo yeke ya ala na KOTA GBIA. 3Na pekoni, mo tene na azo ti Israel, mo tene: Ala mu koli-ngasa na sandaga ndali ti zingo siokpari na li ti ala; ala yeke mu nga kete bagara na kete taba ti ngu oko, ala so kue, mbeni mbage ti tere ti ala abuba pepe. Ala yeke mu ala na sandaga so a yeke gbi ni kue na wâ. 4Ala yeke mu nga mbeni koli-bagara na mbeni koli-taba ndali ti sandaga ti beoko; ala yeke bongbi ni na farini so ala gbu ya ni na mafuta. Biani, laso laa KOTA GBIA ayeke si na ala.”
5Aye so Moïse amu yanga daa so, ala mu ni, ague na ni na yanga ti da ti bongo so KOTA GBIA na azo ti lo ayeke wara tere daa. Bongbi ti azo ti Israel kue aga si ala luti na dawa ti KOTA GBIA. 6Moïse atene: “Baa, yanga so KOTA GBIA amu na ala laa; tongana ala sara ye alingbi na ni, fade lo yeke si na ala si ala baa gonda ti lo.” 7 Moïse atene na Aaron: “Ga nduru na tere ti gbalaka, mo mu sandaga ti mo ndali ti zingo siokpari na li ti mo; mo mu nga sandaga ti mo so a yeke gbi ni kue na wâ. Mo mu asandaga ni so titene Nzapa azi siokpari na li ti mo nga na li ti azo ni kue. Na pekoni, mo mu sandaga ti azo ni titene Nzapa azi siokpari na li ti ala, alingbi na yanga so KOTA GBIA amu.”
8Aaron aga nduru na tere ti gbalaka si lo fâ go ti kete bagara so lo mu na sandaga ndali ti zingo siokpari na li ti lo wani. 9Amolenge ti lo aga na lo mene ti nyama ni; lo yoro li ti maboko ti lo ya ni si lo sara na tere ti adidi so ayeke na andangoro ti gbalaka ni. Tanga ti mene ni, lo tuku na gere ti gbalaka ni. 10Mafuta ti nyama ni, na aronyon ni nga na mafuta so ayeke na tere ti be ni, lo zia na ndö ti gbalaka si lo zö ni kue na wâ, alingbi na yanga so KOTA GBIA amu na Moïse. 11Ti nyama ni nga na poro ni, lo gbi ni yongoro na tere ti bâbâ.
12Aaron afâ go ti koli-taba so a mu na sandaga so a yeke gbi ni kue na wâ. Amolenge ti lo amu na lo mene ni, lo fi na tere ti gbalaka ni, angoro ni kue. 13Amolenge ti lo amu nga na lo nyama so a doroko lo so, nga na li ni si lo zö ni kue na ndö ti gbalaka. 14Lo sukula ya ti nyama ni nga na agere ni, lo bongbi ni na sandaga so a yeke gbi ni kue na wâ si lo zö ni na ndö ti gbalaka.
15Na pekoni, Aaron aya na KOTA GBIA sandaga ti azo ni. Lo mu koli-ngasa so azo ni aga na ni ndali ti zingo siokpari na li ti ala, lo fâ go ni si lo mu na sandaga ndali ti zingo siokpari na li ti ala, tongana ti so lo sara na kozo nyama ni. 16Anyama use ti sandaga so a yeke gbi ni kue na wâ so, lo ya ni alingbi na lege ti ndia ni. 17Lo ya sandaga ti ale ti kobe: lo mu mbeni farini asi ya ti maboko ti lo, lo zö ni kue na wâ na ndö ti gbalaka legeoko na sandaga ti ndaperere so a yeke gbi ni kue na wâ. 18 Lo fâ go ti koli-bagara na koli-taba so azo aga na ni ti mu na sandaga ti beoko. Amolenge ti lo amu na lo mene ni si lo fi na tere ti gbalaka, angoro ni kue. 19Ala mu nga na lo akasa ti koli-ngasa na ti koli-taba so mafuta ayeke daa mingi, so ti tene damba ni, mafuta so ayeke na tere ti akamba ti ya ti anyama ni, aronyon ni nga na mafuta so ayeke na tere ti be ni. 20Ala zia akasa ni na ndö ti kate ti anyama use so si Aaron azö ni kue na wâ na ndö ti gbalaka. 21Aaron amu akate ti anyama ni na agere ni ti mbage ti koli, lo ya ni na nduzu ti fa atene, lo mu na KOTA GBIA, alingbi na yanga so Moïse amu.
22 So Aaron ahunzi ti mu sandaga ndali ti zingo siokpari na li ti azo, na sandaga so a yeke gbi ni kue na wâ nga na sandaga ti beoko, lo yoro maboko ti lo na nduzu si lo sara tufa na ndö ti azo ni. Na pekoni, lo londo na tere ti gbalaka ni, lo zu. 23Moïse na Aaron ali na ya ti da ti bongo so KOTA GBIA na azo ti lo ayeke wara tere daa. So ala sigigi awe, ala sara tufa na ndö ti azo ni. Tongaso KOTA GBIA asi na azo ni si ala baa gonda ti lo. 24Mbeni wâ asigigi na dawa ti KOTA GBIA si agbi sandaga so a yeke gbi ni kue na wâ nga na akasa ti mafuta so ayeke na ndö ti gbalaka ni. Azo kue abaa ni, ala dekongo na ngia si ala ti akpo li ti ala na sese.
Currently Selected:
Awayango-sandaga 9: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010