Awayango-sandaga 22
22
c. Ndia ndali ti tengo kobe ti sandaga so azo aga na ni na Nzapa
1KOTA GBIA atene na Moïse:
2“Tene na Aaron nga na amolenge ti lo ti koli titene ala buba iri ti mbi so ayeke nde si ayeke nzoni kue pepe, alingbi ala duti yamba na tere ti asandaga so azo ti Israel azia nde ndali ti mbi. Mbi laa mbi yeke KOTA GBIA. 3Mo tene na ala, mo tene:
“Na ya ti angoi so ayeke ga, zo so kue ayeke na ya ti *hale ti ala so aga *sioni, tongana lo gue nduru na asandaga so azo ti Israel azia nde ndali ti mbi KOTA GBIA, fade lo yeke kiri ti sara kua ti mbi pepe. Mbi laa mbi yeke KOTA GBIA. 4Mbeni hale ti Aaron so ayeke na kobela ti poro ti tere, wala mbeni sioni kobela so ayeke yuru na lege ti tere ti lo ti koli, alingbi lo te *sandaga so a zia nde ndali ti Nzapa so pepe. Kozo titene lo te ni, alingbi *a sukula asioni ti lo si. Tënë so ayeke legeoko ndali ti zo so aga *sioni na lege so lo ndu mbeni kuâ, wala zo so ngu ti tere ti lo ti koli ayuru. 5Tënë so ayeke nga legeoko ndali ti zo so andu mbeni kete nyama so ayeke sara titene zo aga *sioni, wala ndali ti zo so ayeke sara titene mbeni zo aga *sioni, ataa *sioni ti zo ni ayeke tongana nyen. 6Zo so andu aye tongaso, lo ga *sioni awe; lo yeke ngba *sioni ngbii asi na lakui. Asandaga so a zia nde ndali ti Nzapa, kozo titene lo te ni, alingbi lo sukula tere ti lo kue. 7Gi so lâ alinda, zo ni aga *nzoni awe. Tongaso, lo lingbi ti te asandaga so a zia nde ndali ti Nzapa so senge, ngbanga ti so kobe ti lo laa. 8Alingbi wayango-sandaga ate kuâ ti mbeni nyama ti ngonda pepe, wala mbeni nyama so mbeni sioni nyama asuru ya ti lo. Tongana lo te ni, fade lo yeke ga *sioni. Mbi laa mbi yeke KOTA GBIA.
9“Alingbi awayango-sandaga asara ye alingbi na atënë ti yanga ti mbi. Tongaso si ngbanga ati na li ti ala pepe ndali ti tënë ti kobe. Tongana ala sara si kobe ni aga sioni, fade ala yeke kui. Mbi laa mbi yeke KOTA GBIA so mbi sara titene ala duti nde si ala duti nzoni kue.
10“Ye so a zia nde ndali ti Nzapa, mbeni senge zo alingbi ti te ni pepe. Ataa zo so ayeke lango na da ti wayango-sandaga, ataa zo so ayeke sara kua na wayango-sandaga si a yeke futa lo futango, ala lingbi ti te ye so a zia nde ndali ti Nzapa pepe. 11Me tongana wayango-sandaga avo mbeni zo na nginza, zo ni alingbi ti te ye so a zia nde ndali ti Nzapa so senge. Ngbaa so a du lo na da ti wayango-sandaga, lo lingbi nga ti te ye so a zia nde ndali ti Nzapa so senge. 12Tongana molenge ti wayango-sandaga ti wali amu mbeni senge koli, ye so a zi na ndö ti asandaga so a zia nde ndali ti Nzapa, molenge-wali ni alingbi ti te ni pepe. 13Me molenge ti wayango-sandaga ni alingbi ti duti mbeni wali-mua, wala koli ti lo ake lo awe. Tongana lo du amolenge pepe si lo kiri na da ti babâ ti lo tongana ti so lo de ando maseka, lo lingbi ti te kobe ti babâ ti lo senge, ataa so kobe ni, mbeni senge zo alingbi ti te ni pepe.
14“Kobe so a zia nde ndali ti Nzapa, tongana mbeni zo ate ni na mbana ti be ti lo pepe, alingbi lo kiri na wayango-sandaga gi oko wungo ti kobe ni. Lo yeke kangbi ya ti kobe ni oku, lo zi mbeni mbage ni oko, lo zia na ndö ni si lo mu na wayango-sandaga.
15“Ye so azo ti Israel amu na sandaga ti zia nde ndali ti KOTA GBIA, alingbi awayango-sandaga asara si aga sioni pepe. 16Tongana ala ngba ti duti *sioni si ala te asandaga so a zia nde ndali ti Nzapa, ala sara si ngbanga ati na li ti azo ti Israel ndali ti mbeni sioni so alingbi ti leke tënë ni. Biani, mbi laa mbi yeke KOTA GBIA so mbi yeke sara titene azo ni aduti nde si aduti nzoni kue.”
Ndia ndali ti sorongo anyama ti sandaga
17KOTA GBIA atene na Moïse: 18Tene na Aaron, na amolenge ti lo ti koli nga na azo ti Israel kue, mo tene:
“Tongana mbeni zo ti Israel, wala mbeni wande so aduti na Israel aye ti mu na mbi KOTA GBIA *sandaga so a yeke gbi ni kue na wâ ndali ti zendo so lo mu, wala na be ti lo wani, 19alingbi lo mu na popo ti anyama ti lo koli-bagara, koli-taba wala koli-ngasa so mbeni mbage ti tere ti lo abuba pepe, lo ga na ni si mbi yeda na lo. 20 Nyama so mbeni mbage ti tere ti lo abuba, alingbi lo mu na sandaga pepe, tongaso pepe mbi yeke yeda na lo pepe. 21Tongana mbeni zo aye ti mu sandaga ti beoko ndali ti zendo so lo mu wala lo na be ti lo wani, alingbi lo mu na popo ti anyama ti lo bagara, taba wala ngasa so mbeni mbage ti tere ti lo abuba pepe, lo ga na ni si mbi yeda na lo. 22Nyama so le ti lo abuba, wala gere ti lo akungbi wala a fâ ni, wala mbeni ye asuku na tere ti lo, wala koto-mo-lango ayeke na tere ti lo, wala dartere, ala mu mara ti nyama tongaso na sandaga na mbi KOTA GBIA pepe, ala zia ni na ndö ti gbalaka pepe ti gbi ni kue na wâ na mbi KOTA GBIA. 23Koli-bagara, wala koli-taba so mbeni gere ti lo ayo mingi, wala ayeke nduru mingi, ala lingbi ti mu na sandaga na be ti ala wani. Me ala lingbi ti mu ni pepe na sandaga so ala mu zendo ndali ni. Fade mbi KOTA GBIA, mbi yeke yeda na ni pepe. 24Nyama so a mboko ale ti korobo ti lo, wala a pete ni, wala a zi ni, wala a fâ ni, ala mu na sandaga na mbi KOTA GBIA pepe; ala sara ye tongaso na kodro ti ala pepe. 25Mara ti anyama tongaso, ala vo ni na maboko ti awande pepe ti mu na sandaga na mbi, Nzapa ti ala. Mara ti anyama tongaso akpa anyama so mbeni mbage ti tere ti ala abuba awe; fade mbi yeke yeda na ni pepe.”
26KOTA GBIA atene na Moïse:
27“Tongana mbeni bagara adu, wala mbeni taba adu, wala mbeni ngasa adu, alingbi amolenge ni angba na tere ti mama ti ala na ya ti lango mbarambara. Na lango miombe ni, tongana a mu ala na sandaga so a yeke gbi ni kue na wâ, fade mbi yeke yeda na ni. 28Me mama ti bagara, mama ti taba, wala mama ti ngasa, ala fâ go ti lo na ti molenge ti lo gi na ya ti lango oko pepe.
29“Tongana ala ga na sandaga ti mungo singila na mbi KOTA GBIA, ayeke nzoni ala mu ni alingbi na lege so mbi yeke yeda na ala. 30Ala yeke te ni gi na oko lango ni so; ala bata tanga ni asi kekereke pepe. Mbi laa mbi yeke KOTA GBIA.
31“Fade ala yeke bata atënë ti ndia ti mbi si ala yeke sara ye alingbi na ni. Mbi laa mbi yeke KOTA GBIA. 32Iri ti mbi so ayeke nde si ayeke nzoni so kue so, ala buba ni pepe. Ala azo ti Israel, ala sara si azo ane iri ti mbi so ayeke nde si ayeke nzoni kue. Mbi KOTA GBIA laa, mbi yeke sara titene ala duti nde si ala duti nzoni kue. 33Mbi laa mbi mu ala na kodro ti Ezipte, mbi sigigi na ala titene mbi duti Nzapa ti ala. Mbi laa mbi yeke KOTA GBIA.”
Currently Selected:
Awayango-sandaga 22: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010